« ថ្ងៃទី ៥–១១ ខែ កញ្ញា ។ អេសាយ ១–១២ ៖ ‹ ព្រះទ្រង់ជាសេចក្តីសង្គ្រោះរបស់ខ្ញុំ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ៥–១១ ខែ កញ្ញា ។ អេសាយ ១–១២ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២
ព្យាការីអេសាយប្រាប់ទុកជាមុនពីការប្រសូតរបស់ព្រះគ្រីស្ទ ដោយ ហារី អាន់ឌើរសុន
ថ្ងៃទី ៥–១១ ខែ កញ្ញា
អេសាយ ១–១២
« ព្រះទ្រង់ជាសេចក្តីសង្គ្រោះរបស់ខ្ញុំ »
ពាក្យសម្ដីរបស់អេសាយអាចពិបាកនឹងយល់ ។ កាលដែលបងប្អូនពិចារណាពីរបៀបដើម្បីបង្រៀនកុមារអំពីគម្ពីរអេសាយ សូមផ្ដោតលើសេចក្ដីពិតសាមញ្ញទាំងឡាយ ដែលអាចពង្រឹងសេចក្ដីជំនឿរបស់ពួកគេលើព្រះយេស៊ូវគ្រីស្ទ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមអញ្ជើញកុមារឲ្យចែកចាយអ្វីមួយ ដែលពួកគេបានធ្វើនាពេលថ្មីៗនេះដើម្បីរស់នៅតាមដំណឹងល្អ ដូចជា ការអធិស្ឋាន ការបង្ហាញចិត្តល្អដល់នរណាម្នាក់ ឬការគោរពប្រតិបត្តិតាមបទបញ្ញត្តិផ្សេងៗទៀត ។
បង្រៀនគោលលទ្ធិ ៖ កុមារតូចៗ
នៅក្នុងព្រះវិហារបរិសុទ្ធ យើងរៀនអំពីព្រះយេស៊ូវគ្រីស្ទ ។
អេសាយបានឃើញជាមុននូវគ្រាមួយ ពេលដែលព្រះវិហារបរិសុទ្ធ « ភ្នំជាទីស្អាងព្រះវិហារនៃព្រះយេហូវ៉ា » នឹងទាក់ទាញមនុស្សមកពី « ប្រជាជាតិជាច្រើន » ។ បងប្អូនអាចប្រើការព្យាករនេះដើម្បីជួយកុមារឲ្យទន្ទឹងរង់ចាំដល់ពេលដែលពួកគេអាចទៅព្រះវិហារបរិសុទ្ធបាន ។
សកម្មភាពដែលអាចធ្វើបាន
-
សូមកុមារឲ្យគូររូបផ្ទះរបស់ពួកគេ ។ បន្ទាប់មក សូមអាន អេសាយ ២:២ ជាមួយគ្នា ហើយអញ្ជើញឲ្យពួកគេគូររូបភាពមួយនៃ « ទីស្អាងព្រះវិហារនៃព្រះយេហូវ៉ា » ដែលជាព្រះវិហារបរិសុទ្ធ ។ សូមអាន ខទី ៣ ជាមួយគ្នា ហើយអញ្ជើញពួកគេឲ្យគូរបន្ថែមទៅលើរូបភាពរបស់ពួកគេ នូវមនុស្សជាច្រើនដែលមកកាន់ព្រះវិហារបរិសុទ្ធ រួមទាំងគ្រួសាររបស់ពួកគេផងដែរ ។ តើហេតុអ្វីយើងចង់ទៅដំណាក់របស់ព្រះអម្ចាស់ ? សូមចែកចាយទីបន្ទាល់របស់បងប្អូនអំពីពរជ័យទាំងឡាយដែលបានមក នៅពេលយើងរៀនអំពីព្រះអម្ចាស់នៅក្នុងដំណាក់របស់ទ្រង់ ។
-
សូមឲ្យកុមារម្នាក់កាន់រូបភាពព្រះវិហារបរិសុទ្ធមួយ ហើយសូមឲ្យកុមារនិយាយពីអ្វីដែលពួកគេឃើញនៅក្នុងរូបភាពនោះ ។ សូមសួរពួកគេពីអ្វីដែលពួកគេចូលចិត្តអំពីព្រះវិហារបរិសុទ្ធ ។ សូមអាន អេសាយ ២:២–៣ ជាមួយគ្នា ហើយឲ្យពួកគេស្ដាប់រកមូលហេតុបន្ថែមទៀតដែលយើងស្រឡាញ់ព្រះវិហារបរិសុទ្ធ ។ សូមប្រាប់កុមារពីមូលហេតុដែលបងប្អូនស្រឡាញ់ព្រះវិហារបរិសុទ្ធ ។
-
សូមច្រៀងជាមួយកុមារនូវបទចម្រៀងមួយបទអំពីព្រះវិហារបរិសុទ្ធ ដូចជាបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) ។ សូមជួយពួកគេឲ្យស្វែងរកពាក្យ និងឃ្លានៅក្នុងបទចម្រៀងនេះ ដែលបង្រៀនអំពីព្រះវិហារបរិសុទ្ធ និងអ្វីដែលយើងធ្វើនៅទីនោះ ។
-
សូមគូររូបផ្លូវមួយនៅលើក្ដារខៀន ហើយដាក់រូបភាពព្រះវិហារបរិសុទ្ធមួយ ឬរូបព្រះអង្គសង្គ្រោះនៅចុងបញ្ចប់ផ្លូវនោះ ( សូមមើល ការអភិវឌ្ឍផ្ទាល់ខ្លួន ៖ សៀវភៅណែនាំកុមារ ទំព័រ ២–៣ ) ។ សូមឲ្យកុមារប្តូរវេនគ្នាគូររូបពួកគេដើរនៅលើផ្លូវនោះ ។ ពេលពួកគេគូររូប សូមអញ្ជើញពួកគេឲ្យអានតាមឃ្លានេះចេញពី អេសាយ ២:៣ ៖ « យើងនឹងដើរតាមផ្លូវទាំងនោះ » ។ តើយើងអាចធ្វើអ្វីខ្លះ ដើម្បីដើរតាមផ្លូវរបស់ព្រះអម្ចាស់ ?
« ដ្បិតមានបុត្រ ១ កើតដល់យើង ព្រះទ្រង់ប្រទានបុត្រា ១ មកយើងហើយ » ( អេសាយ ៩:៦ ) ។
អេសាយបានព្យាករអំពីព្រះយេស៊ូវគ្រីស្ទ ។
ព្យាការីទាំងអស់ថ្លែងទីបន្ទាល់អំពីព្រះយេស៊ូវគ្រីស្ទ សូម្បីតែព្យាការីដែលបានរស់នៅជាយូរមុនទ្រង់បានប្រសូតមកក្ដី ដូចជាអេសាយជាដើម ។ សូមពិចារណាពីអ្វីដែលកុមារអាចរៀនបានអំពីព្រះយេស៊ូវគ្រីស្ទ តាមរយៈការព្យាកររបស់អេសាយ នៅក្នុង អេសាយ ៩:៦ ។
សកម្មភាពដែលអាចធ្វើបាន
-
សូមចែកចាយជាមួយកុមាររឿង « អេសាយជាព្យាការី » ( នៅក្នុង ដំណើររឿងព្រះគម្ពីរសញ្ញាចាស់ ) ។ សូមអានឈប់ៗ ដើម្បីឲ្យកុមារអាចជជែកពីអ្វីដែលអេសាយបានដឹងអំពីព្រះយេស៊ូវគ្រីស្ទ ជាច្រើនឆ្នាំមុនពេលដែលទ្រង់បានប្រសូតមក ។ សូមអានឲ្យកុមារស្តាប់ អេសាយ ៩:៦ ហើយសូមអញ្ជើញពួកគេឲ្យអានតាមបងប្អូន រាល់ « ព្រះនាម » ដែលអេសាយបានប្រាប់ថា « គេនឹងហៅ » ព្រះយេស៊ូវគ្រីស្ទ ។
-
សូមសរសេរនៅលើសន្លឹកក្រដាសនូវព្រះបរមងារមួយចំនួនរបស់ព្រះយេស៊ូវគ្រីស្ទ ដែលមាននៅក្នុង អេសាយ ៩:៦ ( សូមមើលទំព័រសកម្មភាពសប្ដាហ៍នេះ ) ។ សូមឲ្យកុមារម្នាក់ៗជ្រើសរើសគោរមងារមួយ ហើយជួយកុមារឲ្យអានព្រះបរមងារនោះទៅកាន់មិត្តភក្តិក្នុងថ្នាក់ ។ សូមនិយាយជាមួយកុមារថាតើ ព្រះបរមងារនីមួយៗមានន័យយ៉ាងណាចំពោះបងប្អូន ។ សូមឲ្យរូបភាពរបស់ព្រះគ្រីស្ទទៅកុមារម្នាក់ ហើយសូមឲ្យគាត់ចែកចាយអ្វីមួយអំពីព្រះយេស៊ូវ បន្ទាប់មកហុចរូបភាពនោះទៅឲ្យកុមារម្នាក់ទៀត ។ សូមធ្វើសកម្មភាពនេះឡើងវិញ រហូតដល់កុមារទាំងអស់មានឱកាសចែកចាយ ។
បង្រៀនគោលលទ្ធិ ៖ កុមារធំៗ
ដោយសារព្រះយេស៊ូវគ្រីស្ទ ខ្ញុំអាចប្រែចិត្ត ហើយបានស្អាត ។
អេសាយបានរស់នៅក្នុងគ្រាមួយ ដែលប្រជាជនរបស់លោកជាច្រើនបានបែរចេញពីព្រះអម្ចាស់ ។ ប៉ុន្តែព្រះអម្ចាស់បានសន្យាដល់ពួកគេថា អំពើបាបរបស់ពួកគេអាចត្រូវបានអត់ទោសឲ្យ ប្រសិនបើពួកគេប្រែចិត្ត ។ ទ្រង់បានធ្វើការសន្យានេះដល់ពួកយើងផងដែរ ។
សកម្មភាពដែលអាចធ្វើបាន
-
សូមឲ្យកុមារអាន អេសាយ ១:២–៤ ហើយនិយាយអំពីមូលហេតុមួយចំនួន ដែលព្រះអម្ចាស់មិនសប្បាយព្រះទ័យជាមួយនឹងប្រជាជនយូដា ។ សូមអាន អេសាយ ១:១៦–១៩ ជាមួយគ្នា ដើម្បីរៀនពីអ្វីដែលព្រះអម្ចាស់បានអញ្ជើញប្រជាជនឲ្យធ្វើ ។ សូមជួយកុមារឲ្យយល់ពាក្យ និងឃ្លាពិបាកៗ ប្រសិនបើចាំបាច់ ។ ដើម្បីជួយពួកគេឲ្យស្រមៃឃើញ ខទី ១៨ សូមដាក់បង្ហាញអ្វីមួយដែលមានពណ៌ក្រហមស្រស់ និងអ្វីមួយដែលមានពណ៌សសុទ្ធ ។ តើយើងរៀនអ្វីខ្លះអំពីសេចក្ដីមេត្តាករុណារបស់ព្រះយេស៊ូវគ្រីស្ទតាមរយៈខគម្ពីរទាំងនេះ ? សូមឲ្យកុមារចែកចាយអារម្មណ៏របស់ពួកគេអំពីអំណោយទាននៃការអភ័យទោសឲ្យរបស់ព្រះយេស៊ូវគ្រីស្ទ ហើយចែកចាយអារម្មណ៍របស់បងប្អូនផងដែរ ។
-
សូមជួយកុមារឲ្យទន្ទេញ អេសាយ ១:១៨ ។ សូមសរសេរខគម្ពីរនោះនៅលើក្ដារខៀន ហើយអញ្ជើញកុមារឲ្យសូត្រខគម្ពីរនោះជាច្រើនដង ដោយលុបពាក្យមួយម្ដងៗ រហូតទាល់តែពួកគេអាចទន្ទេញខគម្ពីរនេះចាំ ។ បងប្អូនក៏អាចប្រើប្រាស់ចម្រៀកក្រដាសសរសេរពាក្យចេញមកពីខគម្ពីរនោះផងដែរ ។ ហេតុអ្វីវាសំខាន់ដើម្បីចងចាំជានិច្ចនូវអ្វីដែលខគម្ពីរនេះបង្រៀន ? សូមពិភាក្សាពីរបៀបដែលការទទួលបុណ្យជ្រមុជទឹក និងការទទួលទានសាក្រាម៉ង់ ធ្វើឲ្យយើងទទួលបានការសន្យានេះ ។
នៅក្នុងព្រះវិហារបរិសុទ្ធ យើងរៀនអំពីព្រះយេស៊ូវគ្រីស្ទ ។
ការព្យាកររបស់អេសាយអំពី « ភ្នំជាទីស្អាងព្រះវិហារនៃព្រះយេហូវ៉ា » បង្ហាញពីពរជ័យមួយចំនួនដែលបានមកពីការថ្វាយបង្គំនៅក្នុងព្រះវិហារបរិសុទ្ធ ជាមួយនឹងពរជ័យផ្សេងៗទៀតដែលនឹងបានមកនៅថ្ងៃចុងក្រោយ ។ សូមពិចារណាអំពីរបៀបដែលបងប្អូននឹងបំផុសគំនិតកុមារឲ្យស្វែងរកពរជ័យទាំងនេះ ។
សកម្មភាពដែលអាចធ្វើបាន
-
សូមឲ្យកុមារអានអំពីអ្វីដែលអេសាយបានឃើញនៅក្នុង អេសាយ ២:២–៣ ហើយគូររូបភាពមួយពីអ្វីដែលពួកគេគិតឃើញ ។ សូមពន្យល់ថា អេសាយបានហៅព្រះវិហារបរិសុទ្ធថាជា « ភ្នំជាទីស្អាងព្រះវិហារនៃព្រះអម្ចាស់ » ។ ហេតុអ្វីភ្នំគឺជាទីសម្គាល់ដ៏ល្អមួយសម្រាប់ព្រះវិហារបរិសុទ្ធ ?
-
សូមអញ្ជើញកុមារឲ្យអាន អេសាយ ២:២–៣, ៥ ហើយកំណត់ពីអ្វីមួយនៅក្នុងខគម្ពីរនីមួយៗទាំងនេះ ដែលបំផុសគំនិតពួកគេឲ្យទៅព្រះវិហារបរិសុទ្ធនៅថ្ងៃណាមួយ ។ បន្ទាប់មក សូមអាន ខទី ៤ ជាមួយគ្នា ហើយពិភាក្សាពីរបៀបដែលព្រះវិហារបរិសុទ្ធជួយនាំមកនូវសេចក្ដីសុខសាន្តដែលបានពិពណ៌នានៅក្នុងខគម្ពីរនេះ ។ សូមជួយពួកគេឲ្យគិតអំពីរបៀបនានាដែលពួកគេអាចរៀបចំខ្លួន ដើម្បីទៅព្រះវិហារបរិសុទ្ធនៅថ្ងៃណាមួយ ។
អេសាយបានព្យាករអំពីព្រះយេស៊ូវគ្រីស្ទ ។
អេសាយបានព្យាករអំពីការប្រសូតរបស់ព្រះឱរសមួយអង្គ ដែលនឹងគង់នៅលើបល្ល័ង្ករបស់ដាវីឌ និងស្ថាបនានគរមួយឡើងដែលគ្មានទីបញ្ចប់ ។ តើបងប្អូនអាចជួយកុមារដែលបងប្អូនបង្រៀនយល់ពីការព្យាករអំពីព្រះយេស៊ូវគ្រីស្ទទាំងនេះដោយរបៀបណា ?
សកម្មភាពដែលអាចធ្វើបាន
-
សូមឲ្យកុមារផ្ដល់ឧទាហរណ៍អំពីងារដែលមនុស្សម្នាក់អាចមាន ដូចជាងារដែលទាក់ទងនឹងការងារ ការហៅ ក្រុម ឬគ្រួសារមួយ ។ តើងារទាំងនេះប្រាប់អ្វីខ្លះអំពីមនុស្សម្នាក់ដែលមានងារទាំងនេះ ? សូមជួយកុមារស្វែងរកព្រះបរមងារទាំងឡាយរបស់ព្រះយេស៊ូវគ្រីស្ទនៅក្នុង អេសាយ ៧:១៤ និង ៩:៦–៧ ។ តើព្រះបរមងារនីមួយៗទាំងនេះបង្រៀនអ្វីខ្លះដល់យើងអំពីទ្រង់ ? តើយើងរៀនអ្វីខ្លះទៀត អំពីព្រះយេស៊ូវគ្រីស្ទតាមរយៈខគម្ពីរទាំងនេះ ?
-
សូមអាន ម៉ាថាយ ១:២១–២៣ និង លូកា ១:៣១–៣៣ ជាមួយគ្នា ហើយពិភាក្សាពីរបៀបដែលការព្យាកររបស់អេសាយនៅក្នុង អេសាយ ៧:១៤; ៩:៦–៧ ត្រូវបានបំពេញនៅពេលព្រះយេស៊ូវគ្រីស្ទបានប្រសូតមក ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមឲ្យកុមារគិតអំពីអ្វីមួយ ដែលពួកគេបានរៀនអំពីព្រះអង្គសង្គ្រោះ ដែលពួកគេអាចចែករំលែកជាមួយគ្រួសាររបស់ពួកគេបាន ដូចជាព្រះនាមមួយរបស់ទ្រង់ ។
ការកែលម្អការបង្រៀនរបស់យើង
ជួយកុមារឲ្យសាងទំនុកចិត្ត ។ កុមារមួយចំនួនពុំមានអារម្មណ៍ថា មានសមត្ថភាពរៀនដំណឹងល្អដោយខ្លួនឯងនោះទេ ។ របៀបមួយដើម្បីស្ថាបនាទំនុកចិត្តរបស់ពួកគេគឺ សរសើរពួកគេ ពេលពួកគេចូលរៀនក្នុងថ្នាក់ ។ សូមសន្យាជាមួយកុមារថា ព្រះវិញ្ញាណបរិសុទ្ធនឹងជួយពួកគេឲ្យរៀន ។