« ថ្ងៃទី ១២–១៨ ខែ កញ្ញា ។ អេសាយ ១៣–១៤; ២៤–៣០; ៣៥ ៖ ‹ ការណ៍អស្ចារ្យ ហើយចម្លែក › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១២–១៨ ខែ កញ្ញា ។ អេសាយ ១៣–១៤; ២៤–៣០; ៣៥ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២២
ព្រៃពិសិដ្ឋ ដោយ ប្រេនថ៍ បូរ៉ាប់
ថ្ងៃទី ១២–១៨ ខែ កញ្ញា
អេសាយ ១៣–១៤; ២៤–៣០; ៣៥
« ការណ៍អស្ចារ្យ ហើយចម្លែក »
បន្ទាប់ពីការសិក្សា អេសាយ ១៣–១៤; ២៤–៣០; ៣៥ ប្រកបដោយការអធិស្ឋានហើយ សូមដាក់ផែនការសកម្មភាពនានាដើម្បីជួយដល់កុមារឲ្យរៀនសូត្រ ។ គំនិតសកម្មភាពខាងក្រោមនេះអាចកែសម្រួលសម្រាប់ក្រុមអាយុណាក៏បាន ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមអញ្ជើញកុមារឲ្យក្រោកឈរ ប្រសិនបើពួកគេចង់ចែកចាយអ្វីដែលពួកគេបានរៀននាពេលថ្មីៗនេះអំពីដំណឹងល្អនៅគេហដ្ឋាន ឬនៅព្រះវិហារ ។ សូមផ្ដល់ឱកាសដល់កុមារម្នាក់ៗឲ្យចែកចាយ ។
បង្រៀនគោលលទ្ធិ ៖ កុមារតូចៗ
មានសង្គ្រាមមួយនៅស្ថានសួគ៌ ។
ពីមុនផែនដីត្រូវបានបង្កើតឡើង ព្រះវរបិតាសួគ៌បានជ្រើសរើសព្រះយេស៊ូវគ្រីស្ទឲ្យធ្វើជាព្រះអង្គសង្គ្រោះរបស់យើង ។ អេសាយ ១៤:១២–១៤ ពិពណ៌នាអំពីភាពឆ្មើងឆ្មៃដែលសាតាំងបានបង្ហាញនៅក្នុងការប្រជុំប្រឹក្សានៅលើស្ថានសួគ៌មុនជីវិតនេះ ។
សកម្មភាពដែលអាចធ្វើបាន
-
សូមប្រើប្រាស់ « សេចក្តីផ្តើម ៖ ផែនការរបស់ព្រះវរបិតាសួគ៌យើង » ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ១–៣ ) ឬ ចម្រៀង « ខ្ញុំរស់នៅស្ថានសួគ៌ » ( សៀវភៅចម្រៀងកុមារ ទំព័រ ១៤០ ) ដើម្បីប្រាប់កុមារអំពីសង្គ្រាមនៅស្ថានសួគ៌ មុនពេលយើងបានកើតមក ។ ( កាលដែលបងប្អូនធ្វើដូច្នោះ សូមបញ្ចូលឃ្លាទាំងឡាយមកពី អេសាយ ១៤:១២–១៤ ដែលពិពណ៌នាអំពីសាតាំង ) ។ បន្ទាប់មក សូមអញ្ជើញកុមារឲ្យតំណាលរឿងនេះឡើងវិញប្រាប់ដល់បងប្អូន ។ សូមសង្កត់ធ្ងន់ថា ព្រះយេស៊ូវគ្រីស្ទបានធ្វើតាមផែនការរបស់ព្រះវរបិតាសួគ៌ និងបានក្លាយជាព្រះអង្គសង្គ្រោះរបស់យើង ។
-
នៅលើក្ដារខៀន សូមគូររូបបេះដូងមួយដែលមានពាក្យ សាតាំង និងមុខក្រៀមក្រំនៅខាងក្នុងនោះ ។ ពន្យល់ថា សាតាំងបានគិតនៅក្នុងចិត្តវាថា « អញនឹងតម្កើងបល្ល័ង្កអញ ឲ្យខ្ពស់ជាងអស់ទាំងផ្កាយរបស់ព្រះ » ( អេសាយ ១៤:១៣ ) ដែលមានន័យថា វាចង់បានល្អជាងព្រះវរបិតាសួគ៌ ។ អញ្ជើញកុមារម្នាក់ឲ្យគូររូបបេះដូងមួយទៀតនៅលើក្ដារខៀន រូបបេះដូងនេះមានពាក្យថា ព្រះយេស៊ូវ និងមុខរីករាយនៅខាងក្នុងនោះ ។ សូមជួយឲ្យកុមារយល់ថា ព្រះយេស៊ូវបានមានព្រះទ័យចង់ធ្វើអ្វីដែលព្រះវរបិតាសួគ៌បង្គាប់ឲ្យទ្រង់ធ្វើ ( សូមមើល ម៉ូសេ ៤:១–២ ) ។ តើយើងអាចធ្វើតាមគំរូរបស់ព្រះយេស៊ូវយ៉ាងដូចម្ដេច ?
« ទ្រង់នឹងបំផ្លាញសេចក្តីស្លាប់ឲ្យសូន្យបាត់ទៅជាដរាប » ( អេសាយ ២៥:៨ ) ។
ព្រះយេស៊ូវគ្រីស្ទបានមានព្រះជន្មរស់ឡើងវិញ ។
ព្រះយេស៊ូវគ្រីស្ទអាចលួងលោមទុក្ខព្រួយ ដែលយើងមានអំពីសេចក្ដីស្លាប់ ។ ដោយសារទ្រង់បានមានជ័យជម្នះលើសេចក្ដីស្លាប់ នោះយើងនឹងរស់ឡើងវិញផងដែរ ។
សកម្មភាពដែលអាចធ្វើបាន
-
សូមបង្ហាញរូបភាពមួយអំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ហើយឲ្យកុមារចែកចាយពីអ្វីដែលពួកគេដឹងអំពីរូបភាពនោះ ។ បើចាំបាច់ សូមចែកចាយជាមួយពួកគេនូវដំណើររឿងរបស់ព្រះយេស៊ូវមានព្រះជន្មរស់ឡើងវិញ ( សូមមើល « ព្រះយេស៊ូវមានព្រះជន្មរស់ឡើងវិញ » នៅក្នុង ដំណើររឿងព្រះគម្ពីរសញ្ញាថ្មី ទំព័រ ១៣៩–៤៤ ) ។ សូមចាក់ ឬច្រៀងចម្រៀងអំពីការមានព្រះជន្មរស់ឡើងវិញ ដូចជាបទ « ព្រះយេស៊ូវបានរស់ឡើងវិញ » ( សៀវភៅចម្រៀងកុមារ ទំព័រ ៤៤ ) ហើយឲ្យកុមារចែកចាយថា វាធ្វើឲ្យពួកគេមានអារម្មណ៏យ៉ាងណា ដែលដឹងថា ព្រះយេស៊ូវបានមានព្រះជន្មរស់ពីសេចក្តីស្លាប់មកវិញនោះ ។
-
សូមប្រាប់កុមារអំពីនរណាម្នាក់ដែលបងប្អូនស្គាល់ ដែលបានស្លាប់ទៅហើយ ។ តើយើងមានអារម្មណ៍យ៉ាងណា នៅពេលនរណាម្នាក់ដែលយើងស្រឡាញ់បានស្លាប់ ? អញ្ជើញកុមារឲ្យគូរមុខនរណាម្នាក់កំពុងយំ ។ បន្ទាប់មក សូមអាន អេសាយ ២៥:៨ ទៅពួកគេ ។ តើព្រះយេស៊ូវនឹងធ្វើអ្វីចំពោះទឹកភ្នែករបស់យើង ពេលយើងនឹកនរណាម្នាក់ដែលបានស្លាប់ទៅ ? អញ្ជើញកុមារឲ្យគូររូបមុខរីករាយ ។ សូមថ្លែងទីបន្ទាល់របស់បងប្អូនថា ដោយសារព្រះយេស៊ូវគ្រីស្ទបានមានព្រះជន្មរស់ឡើងវិញ នោះយើងអាចត្រូវបានលួងលោម ពេលនរណាម្នាក់ស្លាប់ ហើយដឹងថា យើងទាំងអស់គ្នានឹងបានរស់ឡើងវិញនៅថ្ងៃមួយ ។
ព្រះអម្ចាស់បានស្តារសាសនាចក្ររបស់ទ្រង់ឡើងវិញតាមរយៈ យ៉ូសែប ស្ម៉ីធ ។
ការស្តារឡើងវិញនៃដំណឹងល្អគឺជា « ការណ៍អស្ចារ្យ ហើយចម្លែក » ( អេសាយ ២៩:១៤ ) ។ សូមចែកចាយជាមួយនឹងកុមារនូវការណ៍អស្ចារ្យមួយចំនួន ដែលព្រះអម្ចាស់បានធ្វើ—និងបន្តធ្វើ—ដើម្បីស្តារដំណឹងល្អរបស់ទ្រង់ឡើងវិញនៅជំនាន់របស់យើង ។
សកម្មភាពដែលអាចធ្វើបាន
-
អញ្ជើញកុមារឲ្យប្រាប់បងប្អូនពីអ្វីដែលពួកគេដឹងអំពី យ៉ូសែប ស៊្មីធ ។ បើចាំបាច់ សូមចែកចាយជាមួយពួកគេនូវ « ការនិមិត្តដំបូងរបស់យ៉ូសែប ស្ម៊ីធ » ( នៅក្នុង ដំណើររឿងព្រះគម្ពីរគោលលទ្ធិ និងសេចក្ដីសញ្ញា ទំព័រ ៩–១២ ) ។ សូមអាន អេសាយ ២៩:១២ ហើយពន្យល់ថា ទោះបីជាមនុស្សជាច្រើនបានគិតថា យ៉ូសែប ស៊្មីធ មិនមែនជាអ្នកមាន « ចំណេះ » ក្ដី ក៏ព្រះយេស៊ូវគ្រីស្ទបានស្ដារដំណឹងល្អរបស់ទ្រង់តាមរយៈរូបលោកដែរ ។
-
សូមអាន អេសាយ ២៩:១៤ ឲ្យកុមារស្តាប់ ហើយចែកចាយជាមួយពួកគេនូវពាក្យផ្សេងៗទៀត ដែលមានន័យដូចគ្នានឹងពាក្យ « អស្ចារ្យ » និង « ចម្លែក » ។ សូមបង្ហាញរបស់ដែលតំណាងឲ្យកិច្ចការដ៏អស្ចារ្យមួយចំនួនរបស់ព្រះអម្ចាស់អំឡុងថ្ងៃចុងក្រោយនេះ ដូចជារូបភាពនៃការនិមិត្តដំបូង ឬរូបភាព យ៉ូសែប ស៊្មីធ កំពុងទទួលបព្វជិតភាព ( សូមមើល សៀវភៅរូបភាពដំណឹងល្អ ល.រ. ៩០, ៩៣, ៩៤ ) ឬព្រះគម្ពីរមរមនមួយក្បាល ។ អញ្ជើញកុមារឲ្យជ្រើសរើសរបស់មួយ ហើយចែកចាយពីមូលហេតុដែលរបស់នោះអស្ចារ្យចំពោះពួកគេ ។
បង្រៀនគោលលទ្ធិ ៖ កុមារធំៗ
អេសាយ ២៤:៣–៥; ២៩:៧–១០; ៣០:៨–១៤
ការក្បត់សាសនា មានន័យថា ការបែរចេញពីព្រះអម្ចាស់ និងពួកព្យាការីរបស់ទ្រង់ ។
ការអានការព្រមានរបស់អេសាយអំពីគ្រោះថ្នាក់នៃការក្បត់សាសនា អាចជួយកុមារឲ្យប្តេជ្ញាចិត្តនៅស្មោះត្រង់ចំពោះព្រះអម្ចាស់ និងធ្វើតាមពួកព្យាការីរបស់ទ្រង់ ។
សកម្មភាពដែលអាចធ្វើបាន
-
សូមសរសេរពាក្យ ការក្បត់សាសនា នៅលើក្ដារខៀន ។ អញ្ជើញកុមារឲ្យស្វែងរកនិយមន័យមួយនៅក្នុង « ការក្បត់សាសនា » នៅក្នុងសេចក្ដីណែនាំដល់បទគម្ពីរទាំងឡាយ ( នៅលើគេហទំព័រ scriptures.ChurchofJesusChrist.org ) ។ អញ្ជើញពួកគេឲ្យអាន អេសាយ ២៤:៥; ៣០:៩–១១ ហើយធ្វើបញ្ជីមួយពីអ្វីៗ ដែលមនុស្សបានធ្វើនៅក្នុងជំនាន់របស់អេសាយ ដែលបានដឹកនាំពួកគេទៅកាន់ការក្បត់សាសនា ។ បន្ទាប់មក អញ្ជើញកុមារឲ្យផ្លាស់ប្ដូរចំណុចនានានៅក្នុងបញ្ជីនោះ ទៅជាអ្វីៗដែលយើងអាចធ្វើបាន ដើម្បីនៅបន្តស្មោះត្រង់នឹងព្រះអម្ចាស់ ។
-
សូមបែងចែកកុមារជាដៃគូ ហើយចាត់ឲ្យគូនីមួយៗអានវគ្គបទគម្ពីរមួយតទៅនេះ ៖ អេសាយ ២៤:៣–៥; អេសាយ ២៩:៧–១០; ឬ អេសាយ ៣០:៨–១៤ ។ អញ្ជើញពួកគេឲ្យគូររូបភាពដែលតំណាងឲ្យអ្វីដែលពួកគេបានអាន ។ កាលដែលពួកគេចែកចាយគំនូររបស់ពួកគេ សូមជួយពួកគេឲ្យពិភាក្សាពីអ្វីដែលពាក្យសម្ដីរបស់អេសាយបង្រៀន អំពីមូលហេតុដែលយើងគួរតែនៅបន្តស្មោះត្រង់ចំពោះព្រះអម្ចាស់ ។
ការស្តារឡើងវិញនៃដំណឹងល្អគឺជា « ការណ៍អស្ចារ្យ » មួយ ។
តើបងប្អូនអាចជួយកុមារឲ្យយល់ថា ពួកគេជាផ្នែកមួយនៃ « ការណ៍អស្ចារ្យ » របស់ព្រះអម្ចាស់ ( អេសាយ ២៩:១៤ ) នៅថ្ងៃចុងក្រោយនេះដោយរបៀបណា ?
សកម្មភាពដែលអាចធ្វើបាន
-
សូមបង្ហាញរូបភាពនៃព្រឹត្តិការណ៍អស្ចារ្យមួយចំនួន ដែលបានកើតឡើងពេលដែលដំណឹងល្អត្រូវបានស្ដារឡើងវិញ ( សូមមើល សៀវភៅរូបភាពដំណឹងល្អ ល.រ. ៩០–៩៥ ឬទំព័រសកម្មភាពសប្ដាហ៍នេះ ) ។ សូមអាន អេសាយ ២៩:១៤, ១៨, ២៤ ជាមួយគ្នា ហើយអញ្ជើញកុមារឲ្យរកមើលពាក្យ និងឃ្លាដែលទាក់ទងនឹងព្រឹត្តិការណ៍នៅក្នុងរូបភាពទាំងនេះ ។ សូមសួរកុមារថា តើពួកគេអាចជួយដល់ « ការណ៍អស្ចារ្យ » ( ខទី ១៤ ) របស់ព្រះអម្ចាស់ដោយរបៀបណា ។
-
ចែកចាយបទពិសោធន៍ខ្លីមួយ ដើម្បីជួយកុមារឲ្យយល់ពីអត្ថន័យនៃ ការស្ដារឡើងវិញ ។ ឧទាហរណ៍ សូមនិយាយអំពីអ្វីមួយដែលបានបាត់ និងរបៀបដែលបងប្អូនបានរកឃើញវាវិញ ។ សូមជួយកុមារឲ្យប្រៀបធៀបរឿងនេះទៅនឹងការស្ដារឡើងវិញនៃដំណឹងល្អ ។ យោងទៅតាម អេសាយ ២៩:១៣–១៥ ហេតុអ្វីយើងត្រូវការការស្ដារឡើងវិញ ? តើការណ៍អស្ចារ្យអ្វីខ្លះ ដែលព្រះអម្ចាស់បានធ្វើដើម្បីស្ដារដំណឹងល្អរបស់ទ្រង់ឡើងវិញ ?
ការបង្រៀនរបស់អេសាយធ្វើឲ្យខ្ញុំយល់ពីព្រះយេស៊ូវគ្រីស្ទ ។
ការបង្រៀនរបស់អេសាយអាចធ្វើឲ្យកុមារដែលបងប្អូនបង្រៀនយល់ពីព្រះអង្គសង្គ្រោះ និងជួយពួកគេចងចាំពីអ្វីៗដែលទ្រង់បានធ្វើសម្រាប់ពួកគេ ។
សកម្មភាពដែលអាចធ្វើបាន
-
សូមសរសេរបទគម្ពីរយោងដូចតទៅនេះនៅលើសន្លឹកក្រដាសដាច់ពីគ្នា ៖ អេសាយ ១៤:៣; អេសាយ ២៥:៨; អេសាយ ២៨:១៦; ម៉ាថាយ ១១:២៨–៣០; កូរិនថូស ទី១ ១៥:៥៣–៥៧; ហេលេមិន ៥:១២ ។ សូមឲ្យក្រដាសទាំងនោះទៅកុមារ ហើយអញ្ជើញពួកគេឲ្យសរសេរនៅលើក្រដាសនោះនូវសេចក្ដីពិត ដែលពួកគេរៀនចេញពីខគម្ពីរទាំងនោះ ហើយធ្វើការរួមគ្នាដើម្បីផ្គូផ្គងខគម្ពីរទាំងឡាយដែលបង្រៀនសេចក្ដីពិតស្រដៀងគ្នានេះ ។ យោងទៅតាមខគម្ពីរទាំងនេះ តើកិច្ចការដ៏អស្ចារ្យអ្វីខ្លះដែលព្រះអម្ចាស់បានធ្វើសម្រាប់យើង ?
-
សូមឲ្យកុមារជ្រើសរើសឃ្លាមួយចេញពី អេសាយ ១៤:៣; ២៥:៨ ឬ ២៨:១៦ ដែលរំឭកពួកគេអំពីព្រះយេស៊ូវគ្រីស្ទ ។ អញ្ជើញពួកគេឲ្យសរសេរឃ្លានោះនៅលើក្រដាសមួយសន្លឹក ហើយគូររូបព្រះអង្គសង្គ្រោះ ដែលពួកគេអាចដាក់តាំងនៅក្នុងផ្ទះរបស់ពួកគេបាន ។
លើកទឹកចិត្តឲ្យមានការរៀនសូត្រនៅឯគេហដ្ឋាន
អញ្ជើញកុមារឲ្យសរសេរ ឬគូររូបភាពមួយនៃអ្វីមួយដែលពួកគេបានរៀននៅក្នុងថ្នាក់ថ្ងៃនេះ ។ សូមលើកទឹកចិត្តពួកគេឲ្យចែកចាយអ្វីដែលពួកគេបានរៀនជាមួយក្រុមគ្រួសាររបស់ពួកគេ ឬសមាជិកម្នាក់ក្នុងថ្នាក់ដែលមិនបានមកអង្គការបឋមសិក្សានៅថ្ងៃនេះ ។
ការកែលម្អការបង្រៀនរបស់យើង
សូមបត់បែនសកម្មភាពតម្រូវទៅតាមកុមារដែលមានពិការភាព ។ ការបត់បែនសកម្មភាពបន្ដិចបន្ដួច អាចធានាបានថា កុមារអាចរៀនសកម្មភាពទាំងនោះបាន ។ ឧទាហរណ៍ ប្រសិនបើសកម្មភាពមួយដែលឲ្យបង្ហាញរូបភាព នោះបងប្អូនអាចច្រៀងចម្រៀងជំនួសវិញ ដើម្បីឲ្យកុមារដែលមានបញ្ហាភ្នែកមើលមិនសូវច្បាស់អាចចូលរួមបានដែរ ។