Ko sa Nodra Qasenivuli na Gone

Sa kacivi iko na Kalou mo vakavulici ira na Luvena ena ivakarau ni iVakabula. Ko a vakatikori ki na veikacivi oqo ena dodonu ni lewa ni Nona matabete tabu. Kevaka o sega mada ga ni qasenivuli matua, ena nomu bula kilikili voli, masu e veisiga, ka vulica na ivolanikalou, ena dolea vei iko na Tamada Vakalomalagi na veivakauqeti kei na kaukauwa ni Yalo Tabu me vukea na nomu rawaka (raica na 2Nifai 33:1

Sa luvena na Tamada vakalomalagi o ira ka sa nuitaki mo qarava, ka sa kila tu o Koya na nodra gagadre kei na sala vinaka duadua me yacovi ira kina. Ena vuku ni Yalo Tabu, ena tuberi iko na Kalou ni ko vakarau tu kei na gauna o veivakavulici tiko kina. Ena vakatakila vei iko o Koya na ka mo kaya kei na ka mo cakava (raica na 2Nifai 32:5).

Na inaki bibi ni kena vulici ka vakatavulici na kosipeli o ya me vakatitobutaka na saumaki ki vua na Tamada Vakalomalagi kei Jisu Karisito. Na nomu takete vaka qasenivuli o ya me vukei o ira o vakavulica mera kitaka na ka kece era rawata mera saumaki vakalevu cake kina—na sasaga e yawaka tu na gauna ni kalasi. Sureti ira o vakavulica mera cuqena tu na vulici i Jisu Karisito kei na Nona kosipeli ka cakacakataka na ka era sa vulica. Vakayaloqaqataka mera cakava na nodra vuli vakai ira ka vakamatavuvale e taudaku ni kalasi me sa ivurevure taumada ni nodra vulica na kosipeli. Ni ra cakacaka ena vakabauta ni vuli tu vakai ira ka vakamatavuvale, era na sureta na Yalotabu ki na nodra bula, ka sa ikoya na Yalotabu e kauta mai na saumaki dina. Na veika kece o vakayacora vaka qasenivuli sa dodonu me vakanamata tu ki na inaki tabu oqo.

Vakatavulica duadua ga na vunau ni kosipeli vakalesui mai i Jisu Karisito ka kune ena ivolanikalou kei na nodra vosa na parofita edaidai. Na vunau savasava—tawamudu, na dina tawaveisautaki sa vakatavulica na Kalou kei ira na Nona italai—sa sureta na Yalotabu ka sa tiko kina na kaukauwa me veisautaka na bula.

Na veikacivi ni veivakatavulici e sa dua na veidinadinati tabu, ka sa dau matau meda vakadrukai tu ena gauna eso. Ia nanuma ni sa kacivi iko na Tamamu Vakalomalagi, ka na sega ni laivi iko o Koya. Oqo na cakacaka ni Turaga, ka ni ko veiqaravi tu “ena [yalomu] taucoko, igu, vakasama kei na kaukauwa” (Vunau kei na Veiyalayalati 4:2), ena vakalevutaka o Koya na nomu gugumatua, isolisoli, kei na taledi, ka na vakalougatataka na nodra bula o vakavulica na nomu veiqaravi.