era laveliga tiko na gone ena rumu ni vuli ni valenilotu

Sotavi ni Nodra Gagadre na Gone Sobu

E sa dau tuvakarau ka nanamaki na gone me ra vulica na kosipeli kevaka e sa vakavulici tu ena iwalewale era rawa ni kila vakamatata kina. Vakauasivi kevaka o vakavulici ira na gone sobu, navuca na vakayagataki ni veimataqali itaviqaravi oqo me vukea na nodra vuli.

• Laga. Na serenilotu kei na sere eso mai na iVolanisere ni Gonelalai sa vakavulica vakaukauwa na ivunau. Vakayagataka na ituvatuva ni ulutaga ena daku ni iVolanisere ni Gonelalai mo raica na sere eso e semati ki na ivakavuvuli ni kosipeli o vakavulica tiko. Vukei ira na gone ni semata na itukutuku ni sere ki na nodra bula. Me ivakaraitaki, sa rawa ni o vakataroga na vosa se malanivosa eso ena qaqa ni sere. Me ikuri ni laga sere, sa rawa ni ra matanataka na sere na gone se vakarorogo tu ga ki na sere vaka voqa ni vakatagi ni ra vakayacora tiko na itaviqaravi tale eso. Me baleta na vakasama tale eso, raica na wase “Using Music to Teach Doctrine” kei na “Helping Children Learn and Remember Primary Songs and Hymns” ena “iDusidusi ni Gauna ni Lagasere kei na Nodra Vakaitavi ena Sereivakatagi na Gone ena Sakaramede” ena ivurevure oqo.

• Rogoca tu se matanataka e dua na italanoa. Era taleitaka na gone sobu na italanoa—mai na ivolanikalou, mai na nomu bula, mai na itukutuku makawa ni Lotu, se mai na Mekasini ni Lotu. Vakaraica na sala eso me ra vakaitavitaki kina ena tukuni ni talanoa. Sa rawa ni ra taura na yaloyalo se yaya eso, droinitaka na yaloyalo ni ka era rogoca tiko, matanataka na italanoa, se veivuke ni tukuna na italanoa. Vukei ira na gone ni kila na dina ni kosipeli ena italanoa eso o wasea.

• Wilika a dua na ivolanikalou. Era na rairai sega ni rawa ni wilivola vakalevu sara na gone sobu, ia o se na rawa tikoga ni vakaitavitaki ira ena vulici ni ivolanikalou. O na rairai gadreva mo vakanamata ki na dua na tikina, malanivosa bibi, se vosa. Ni o wilika cake tu e dua na ivolanikalou, sa rawa ni o sureta na gone me ra tucake se laveta na ligadra ni ra rogoca e dua na vosa vakatabakidua se malanivosa o via vakanamata kina. Era rawa sara mada ga ni cavuqaqataka na malanivosa leleka eso mai na ivolanikalou kevaka era veitaravitaka tu vakavica. Ni ra rogoca tu na vosa ni Kalou, era na vakila na Yalotabu.

• Mo bulabula. Baleta ni ra sa dau waribariba na gone sobu, tuva na sala eso me ra veitosoyaki kina—tayabe, ladelade, kisodali, cuva, taubale, kei na veika tale eso e semati ki na ivakavuvuli ni talanoa o vakavulica tiko. Sa rawa talega ni mana na veika oqo ni ko ni lagasere vata.

• Raica tu e dua na yaloyalo se sarava e dua na vidio. Ni ko vakaraitaka vei ira na gone e dua na yaloyalo se vidio, tarogi ira ena taro eso e vukei ira ni raica na kena semati ki na dua na ivakavuvuli ni kosipeli se italanoa ni ivolanikalou. Me ivakaraitaki, sa rawa mo taroga, “Na cava e yaco tiko ena yaloyalo se vidio oqo?” se “Na cava e vakavuna vei iko?” Na icurucuru ni Gospel Library, MediaLibrary.ChurchofJesusChrist.org, kei na children.ChurchofJesusChrist.org e sa vanua vinaka me ra raici kina na vidio.

• Wasea na veika e sotavi. Ena rairai sega tu ni levu na ka e tiko me ra wasea na gone sobu me vakataki ira na gone qase cake, ia kevaka o soli veituberi vakatabakidua vei ira, sa rawa ni ra wasea na nodra nanuma kei na veika era sotava ena ka era sa vulica tiko.

  rokarokataki tiko na gone ena rumunivuli ni valenilotu

• Bulia. Sa rawa vei ira na gone ni bulia, droinitaka, se rokataka e dua na ka e semati ki na italanoa se ivakavuvuli era vulica tiko. Vakauqeti ira ni kauta i vale na nodra ibulibuli ka wasea ki na lewe ni matavuvale me vukei ira ni nanuma na ka era sa vulica.

• Vakaitavi ena lesoni vakainaki eso. E rawa ni vukei ira na gone e dua na lesoni vakainaki rawarawa me ra kila vakamatata e dua na ivakavuvuli ni kosipeli e dredre tu me kilai. Ni vakayagataki tu na lesoni vakainaki, vakaraica na sala eso me ra vakaitavi kina na gone. Era na vuli sara vakalevu ena nodra veimaliwai vakaicaba mai na kena saravi tu ga e dua na iwalewale.

• Matanataka Ni ra matanataka na gone e dua na ituvaki era na rawa ni sotava tu ena nodra bula taumada, era sa kila rawa vakamatata cake na sala e tutaki kina na ivakavuvuli ni kosipeli ki na nodra bula.

• Tokaruataka na itaviqaravi. Era na rairai gadreva na gone sobu ni rogoca vakavuqa na ivakavuvuli me ra kilai vinaka kina. Kakua ni rere ni veitaravitaka wasoma na italanoa se itaviqaravi eso, donuya na lesoni vata sara mada ga. Me ivakaraitaki, o na via wasea beka vakavica e dua na italanoa ni ivolanikalou ena sala duidui eso ena dua na gauna ni lesoni—ena wiliwili mai na ivolanikalou, vakalekalekataki tu ena nomu vosa, vakaraitaki ni dua na vidio, vakalaivi tu me ra vukei iko na gone mo talanoa, nodra sureti ni matanataka na italanoa, kei na so tale. Kevaka e tokaruataki talega e vale e dua na itaviqaravi a vakayagataki ena kalasi, na kena caka veitaravi ena vukei ira na gone ni vulica ka nanuma.

• Veiwasei kei ira tale eso. Era sa taracake tiko na gone na kila vakaveimaliwai ka dau marautaka tu na vuli kei na qito vakaitabavata. Vakarautaka na madigi eso me ra veiwasei, vakaitavi yadudua, ka veitokoni ni ra vuli tu.

• Vakaitavi ena veimataqali itaviqaravi. E dau lekaleka tu ga na nodra gauna ni vakarorogo na gone sobu, ka duidui tu na iwalewale ni nodra vuli. Vakayagataka na veimataqali itaviqaravi, ka wanonova matua na ivakatakilakila eso ni ra sa gadreva na gone e dua na veisau ni moimoi. Me ivakaraitaki, o na rairai gadreva mo caka veisau wasoma ena maliwa ni itaviqaravi malua ka bulabula eso.

Sa tiki ni nomu itavi ni nodra qasenivuli na gone sobu—me ikuri ni kena vakavulici na ivakavuvuli ni kosipeli—o ya na nodra vukei na gone ni vulica na ivakarau me ra vakaitavi kina vakamaqosa ena dua na kalasi ni Lotu. Me ivakaraitaki, era na rairai gadreva ni vulica na vakaitavi, veiwasei, nodra rokovi na tani, kei na so tale. Era vakarautaka eso na qasenivuli na ivolakabi ni nodra ilesilesi vakayadua na gone me ra vakaitavi ena dua na sala vakatabakidua ena kalasi (me vaka na masu, tauri ni dua na yaloyalo, se veisoliyaki pepa). Na ilesilesi sa rawa ni veisau e veimacawa. Oqo e vukea na nodra vakaitavitaki na gone ka vakanamata ki na itovo maqosa ni rumu ni vuli.

Dau yaga tu vei ira na gone—vakabibii o ira na gone sobu—na ivakarau tudei era sa vakamatautaki kina. Baleta ni dau lekaleka tu na nodra gauna ni vakarorogo na gone sobu ka sotavi dredre ena so na gauna me ra makutu tu ena gauna taucoko ni kalasi, e sa dau vinaka sara ke na okati ena ivakarau oqo na veisau wasoma eso mai na dua na itaviqaravi ki na dua tale. Me ivakaraitaki, na ivakarau ni nomu kalasi sa rawa ni okata na cegu vagauna me rokataki e dua na yaloyalo, lagasere, kei na so tale.