Vakayagataki ni Lako Mai, Mo Muri Au—Baleta na Lalai

Vakavakarau tu ni Veivakavulici ena Lalai

Na vuli vakai iko e vale kei na matavuvale sa dodonu me usutu ni kena vulici ni kosipeli. Sa dina oqo kivei iko kei ira na gone o vakavulica. Ni ko vakarau na veivakavulici, tekivu ena nomu sotava tu vakai iko na veika ena ivolanikalou. Na nomu vakavakarau bibi duadua ena yaco ni o vakasaqara na ivolanikalou ka qara na veivakauqeti ni Yalo Tabu.

NaLako Mai, Mo Muri Au—Baleta na Tamata Yadua kei na Matavuvale e sa dua talega na tiki bibi ni nomu vuli vakai iko kei na nomu vakavakarau mo veivakavulici. Ena vukei iko ni kila vakatitobu sara na ivakavuvuli vakaivunau era kune ena ivolanikalou.

Donuya na nomu vakavakarau, ena basika vei iko na vakasama kei na veivakauqeti eso me baleti ira na gone o vakavulica. O na ciqoma na raitaudonu eso ni sala ena vakalougatataka kina na nodra bula na ivakavuvuli ni ivolanikalou eso. O na tuberi tu mo vakauqeti ira ni raica na veivakavuvuli o ya ni ra vulica vakai ira kei na nodra matavuvale na ivolanikalou.

Vakasama eso ni Veivakavulici

Ni ko vakarau na veivakavulici, sa rawa ni o rawata na ikuri ni veivakauqeti ena dikevi ni tuvatuva ni veivakavulici ena ivurevure oqo. Kakua ni nanuma na veivakasama oqo me ra idusidusi veitaravi ia me ra sa vakatutu ga ni vakayadrata tu na nomu veivakauqeti. O sa kilai ira na gone oqo—ka na yaco mo kilai ira vakavinaka sara ni ko veitaratara vata kei ira ena kalasi. Sa kilai ira talega na Turaga, ka na vakauqeti iko o Koya ena sala uasivi eso mo vakavulici ka vakalougatataki ira kina.

E tiko e vuqa tale na ivurevure mo na vakayagataka ni ko vakavakarau tu, oka kina na vakasama eso ena Lako Mai, Mo Muri Au—Baleta na Tamata Yadua kei na Matavuvale kei na Mekasini ni Lotu. Ena levu tale na itukutuku baleta na veika oqo kei na ivurevure tale eso, raica na “Additional Resources for Teaching Children” ena ivurevure oqo.

Eso na Ka me Vakasamataki Matua

• Ena veigauna kece o sotavi ira na gone, navuca na sala eso o rawa ni vukei ira kina ni vakila na loloma ni Tamada Vakalomalagi kei Jisu Karisito ka kila tu na veivakauqeti ni Yalo Tabu.

• Sa itavi taumada ni itubutubu me ra vakavulica na luvedra. Vaka qasenivuli, sa dua na nomu itavi bibi mo tokona, vakauqeta, ka tara cake na vuli kosipeli ena itikotiko. Dau kidavi ira na gone e sega ni vakavulica tu na nodra itubutubu na kosipeli ena nodra itikotiko. Okati ira taucoko na gone ena veivosakitaki ni kosipeli, veitalia na kedra ituvaki vakaitikotiko.

• Ena rairai rawarawa sara vei ira na gone na kilai vakamatata ni vakatavuvuli eso ena Veiyalayalati Makawa ni ra kila tu eso na itukutuku makawa ni veivakatavuvuli oya. Sa rawa ni o raica na itukutuku makawa ena Lako Mai, Mo Muri Au—Me Baleta na Tamata Yadua kei na Matavuvale kei na iTalanoa ni Veiyalayalati Makawa eso

• Sa vinaka na veitaravi. E dau mana cake nodra vulica na dina vakosipeli na gone ni ra vakatavulici tu vakaveitaravi na dina oqo ena mataqali itaviqaravi eso. Kevaka o raica ni sa mana vei ira na gone e dua na itaviqaravi vakavuli, navuca mo veitaravitaka, vakauasivi ke o vakavulici ira tiko na gone sobu. Sa rawa talega ni o railesuva e dua na itaviqaravi mai na lesoni sa oti.

• Sa vinakati iko na Tamada Vakalomalagi mo rawaka vaka qasenivuli. Sa vakarautaka tu o Koya e vuqa na ivurevure me vukei iko kina, oka kina na soqoni ni matabose ni qasenivuli. Sa rawa ena veisoqoni oqo mo veivosaki kei ira na qasenivuli tale eso ena veibolebole o ni sotava. Sa rawa talega mo ni veivosakitaka ka vakatovotovotaka na ivakavuvuli eso ni veivakavulici va-Karisito.

• Kevaka o vakavulici ira tiko na gone sobu ka gadreva na ikuri ni veivuke, raica na “Sotavi na Nodra Gagadre na Gone Sobu” ena ivurevure oqo.

• Na ivurevure oqo e oka kina na ituvatuva ni veimacawa ena loma ni yabaki. Ena Sigatabu ni sega ni dau vakayacori na Lalai ena vuku ni koniferedi raraba, koniferedi ni iteki, se dua tale na vuna, era tomana na matavuvale na wiliki ni Veiyalayalati Makawa e vale me vaka na idusidusi vakarautaki. Kakua ni leqataka na lesoni eso o calata; vakavulica na ituvatuva vakamacawa sa lesi.