Abinadi i mua i te ariʼi Noa, nā Andrew Bosley

4–10 nō Mē.

Mosia 11–17

« E māramarama… e ʼore roa e mohimohi »

E feruri i te hiʼoraʼa o Abinadi nō te haʼapiʼiraʼa ʼevanelia. E aha tā tātou i ʼite i roto i te Mosia 11–17 o te tauturu ia ʼoutou ia riro ’ei hōʼē ʼorometua haʼapiʼi maitaʼi aʼe ?

Pāpa’i i te mau mana’o e tae mai

Fa’a’ite mai i te mana’o

Nō te faʼatiʼa i te mau pīahi ʼia faʼaʼite mai i te tahi mea tā rātou i haʼapiʼi mai i roto i tā rātou iho tuatāpaparaʼa ʼaore rā tuatāpaparaʼa ʼutuāfare i te pāpaʼiraʼa moʼa, e ani ia rātou ʼia faʼahope i teie nei pereota : ʼĀhani e tiʼa iāʼu ʼia māʼiti i te hōʼē ʼīrava i roto i te Mosia 11–17 nō te faʼaʼite atu i te hōʼē taʼata tei herehia e ʼoutou, ’o teie ïa .

Ha’api’i i te ha’api’ira’a tumu

Mosia 11–13; 17

E ti’a atu tātou nō te parau mau, noa atu e tiʼa atu tātou anaʼe.

• Noa atu eʼita tā ʼoutou mau pīahi e faʼariʼariʼahia i te pohe nō tō rātou ʼiteraʼa pāpū, e faʼaruru rātou i te pātoʼiraʼa nō tō rātou mau tiʼaturiraʼa. Penei a’e e ʼite mai rātou i te mau ʼohipa i tupu ʼaore rā te mau tuhaʼa i roto i te Mosia 11–13 ʼe 17 o te hōroʼa ia rātou i te tahi atu ā itoito nō te tiʼa atu nō te parau mau. E aha te mea i hōroʼa ia Abinadi ʼe ia Alama i te itoito ’ia ’ore e mata’u ? Nāhea tātou ʼia riro ’ei mea hau atu ā i te ʼetaʼeta ’e te pāpū i te pārururaʼa i te parau mau ? E hōro’a mai te mau faʼahitiraʼa parau i roto i « Te tahi atu ā mau mātēria » i te tahi mau manaʼo.

• Nō te tauturu i tā ʼoutou mau pīahi ʼia haʼapiʼi mai nā roto mai i te tahi atu mau hiʼoraʼa nō te pātoʼi itoito i te parau mau, e pāpa’i i ni’a i te tāpura ’ere’ere Te mau taʼata tei tiʼa nō te parau mau. E ha’amata ʼoutou ma te tāu’aparau nō Abinadi, te aniraʼa i te mau pīahi ’ia faʼaʼite mai i te tahi mau ’ohipa ’o tei haʼamāere ia rātou nō niʼa ia Abinadi, ’a taiʼo ai rātou i tōna parau i teie hepetoma. I muri iho e faʼaʼite mai rātou i te tahi atu mau tāne ʼe mau vahine—nō roto mai i te mau pāpaʼiraʼa moʼa, tō rātou ʼutuāfare, ʼaore rā tō rātou iho mau ’itera’a—tei riro i tō rātou manaʼoraʼa ’ei mau hiʼoraʼa nō te tiʼa atu nō te parau mau. E aha tā te reira e faʼauru ia tātou ’ia rave maoti teie mau hiʼoraʼa ?

Mosia 12:19–37

ʼIa tuatāpapa anaʼe tātou i te parau a te Atua, e tiʼa ia tātou ʼia faʼaʼohipa i tō tātou pa’ari ’ia māramarama.

• ʼA tuatāpapa ai rātou i te Mosia 12:19–37 i teie hepetoma, ʼua noaʼa paha i te mau pīahi te mau ʼite nō te niʼa i te auraʼa ʼia fa’a’ohipa i tō tātou pa’ari nō te hāroʼaroʼa i te parau a te Atua. ʼA feruri i te ani i te tahi o te mau pīahi ʼia faʼaʼite mai i tō rātou mau manaʼo. ʼAore rā e faʼaʼohipa i te tahi taime i roto i te piha haʼapiʼiraʼa nō te māʼimi ʼāmui i teie mau ʼīrava ʼe ʼia tāu’aparau e aha tō rātou mau manaʼo e nāhea ʼia haʼafaufaʼa atu ā i te tuatāpaparaʼa ʼevanelia. ʼEi hiʼoraʼa, nō te aha e mea faufaʼa rahi ʼia ʼite i te ture a te Atua ’e ʼia « haʼapaʼo i te reira » ? (Mosia 12:29).

• E aha tā tā ʼoutou mau pīahi i ’apo mai nā roto i te faʼaauraʼa i te mau huru ʼe te mau ravera’a a te mau tahuʼa a Noa ʼe te huru e tiʼa ia tātou ʼia rave nō tā tātou tuatāpaparaʼa ʼevanelia. Ani ia rātou ʼia taiʼo i te Mosia 12:19–37, ma te hi’o i te mau faʼahaparaʼa tā Abinadi i faʼahiti nō te mau tahuʼa a Noa. E aha tā Abinadi i parau nō niʼa i tā tātou tuatāpapara’a ʼevanelia i teie mahana ? Ani i te mau pīahi ʼia faʼaʼite mai e aha tā rātou i rave ’o tei tauturu ia rātou ʼia fa’a’ohipa i tō rātou pa’ari nō te hāroʼaroʼara’a ʼe ʼia faʼarahi atu ā i tō rātou māramarama i te ʼevanelia.

  

  E tītau te tuatāpapara’a ʼevanelia maitaʼi, ʼia faʼaʼohipa tātou i tō tātou pa’ari ’ia māramarama.

Mosia 13:28–15:11

E tae mai te faʼaoraraʼa nā roto ia Iesu Mesia ʼe tāna tāraʼehara.

• Nō te ha’apāpū i te mana’o o te mau taʼata tiʼaturi ʼore nō te taeraʼa mai o te Mesia, ʼua faʼahiti Abinadi i te hōʼē tohuraʼa a Isaia ’o te haʼaputapū i te ʼāʼau (hiʼo Mosia 14). E rave rahi mau rāveʼa nō te mau pīahi ’ia hi’ohi’o haere faʼahou i teie pene. E nehenehe rātou e taiʼo i te tahi mau ʼīrava i te hōʼē taime ʼe ʼia tāu’aparau i te reira, ʼaore rā e vāhi ma mau pupu na’ina’i i te mau pīahi nō te paraparau nō niʼa i te mau ʼīrava faufaʼa rahi, ’oia ato’a te mau faʼahororaʼa, nō te ʼite mai i te tahi atu ā mau mana’o. Faʼaitoito ia rātou ʼia faʼaʼite mai e aha tā rātou i ʼapo mai nō niʼa i te Faʼaora i roto i teie pene.

• ʼUa taʼa ānei i tā ʼoutou mau pīahi e aha te auraʼa ē ʼua « haʼamāha Iesu Mesia i te tītauraʼa a te parau-tiʼa » ? (Mosia 15:9). Nō te tauturu ia rātou ʼia noaʼa te hōʼē hāro’aro’ara’a maitaʼi aʼe, e haʼamata ma te taiʼo ʼāmui i te « Parau-tiʼa » ʼe te « Aroha » i roto i Te arataʼi o te mau pāpaʼiraʼa moʼa (scriptures.ChurchofJesusChrist.org) ʼaore rā « Parau-Tiʼa » ʼe « Aroha » i niʼa i te topics.ChurchofJesusChrist.org. Penei a’e e hina’aro te hōʼē pīahi e rave e pāpaʼi i te hōʼē auraʼa poto nō te mau tāʼo tāta’irahi i niʼa i te tāpura ’ere’ere. E taiʼo ʼāmui i muri iho i te Mosia 15:1–9. Nāhea tō Iesu Mesia haʼamāharaʼa i te mau tītauraʼa o te parau-tiʼa ? Nāhea ʼoia i te pūpūra’a i tōna aroha nō tātou ? E faʼaʼohipa te mau video tei faʼaʼitehia i roto i « Te tahi atu ā mau mātēria » i te mau ʼāʼamu ʼe te mau faʼaauraʼa nō te faʼata’a mai i te aroha o te Faʼaora ; e tauturu te mātaʼitaʼiraʼa i te hōʼē o teie mau video i te mau pīahi ʼia feruri i te tahi atu mau faʼaauraʼa ’o tē faʼahōhoʼa ra, nāhea Iesu Mesia i te haʼamāharaʼa i te mau tītauraʼa o te parau-tiʼa

Mosia 11 ; 12:33–37 ; 13:11–26

E tiʼa i te mau faʼaueraʼa ʼia pāpaʼihia i roto i tō tātou ʼāʼau.

• E nehenehe ʼoutou e tauturu i te mau pīahi ʼia hāroʼaroʼa i te faufaʼa rahi ʼia « pāpaʼihia te mau faʼaueraʼa i roto i tō [tātou] ʼāʼau » ma te ani ia rātou e aha tō rātou mana’o i te auraʼa o teie pereota. Ani ia rātou i muri iho ’ia faʼahuru ’ē i te mau faʼaueraʼa tā Abinadi i haʼapiʼi i roto i te Mosia 12:33–37 ʼe 13:11–26 i te mau hara tā te ariʼi Noa ʼe tōna nūnaʼa e rave ra (hiʼo Mosia 11:1–7, 14–15). Nāhea te mau faʼaueraʼa « ’ia pāpaʼihia i roto i tō [tātou] ʼāʼau » i taʼa ʼē ai i te mātau-noa-raʼa i te reira ? (Mosia 13:11). Nāhea tātou e ʼite ai ē ʼua pāpaʼihia te mau faʼaueraʼa i roto i tō tātou ʼāʼau ? E aha te mau hiʼoraʼa tā tātou e nehenehe e faʼaʼite atu ?

Faʼaitoito i te haʼapiʼiraʼa mai i te fare.

ʼUa mana’o aʼena ānei te mau pīahi i te mea tā Abinadi i ʼite—ē ʼua faufaʼa ʼore tā rātou mau tautoʼoraʼa nō te faʼaʼite i te ʼevanelia ? ʼA parau ia rātou ē i roto i te Mosia 18–26 e taiʼo rātou nō niʼa i te hotu ʼauhune a te mau tautoʼoraʼa a Abinadi.

Te tahi atu ā mau mātēria

Mau haʼapiʼiraʼa a te mau peropheta nō niʼa i te tiʼaraʼa nō te parau mau.

ʼUa haʼapiʼi te peresideni Russell M. Nelson : « ʼUa ineine te mau pipi mau a Iesu Mesia ’ia ti’a atu, ’ia parau ma te taiā ’ore, ’e ’ia riro ’ei feiā ta’a ’ē atu i te mau ta’ata o te ao nei… ʼAore roa e mea ʼōhie ʼaore rā e tupu noa nō te riroraʼa mai teie mau huru pipi pūai. E ti’a i tō tātou tūtonura’a ’ia ha’amau-pāpū-hia i ni’a i te Fa’aora ’e tāna ’evanelia. E tītauhia te tūtavara’a rahi o te ferurira’a nō te hi’o atu iāna i roto i te mau manaʼo ato’a. ’Ia nā reira tātou, e ʼore tō tātou mau fēʼaʼa ʼe tō tātou mau mataʼu » (« Faʼahaere mai te mana o Iesu Mesia i roto i tō tātou oraraʼa », Ensign ʼaore rā Liahona, Mē 2017, 40–41).

ʼUa parau te peresiden Thomas S. Monson : « E mata na tātou i te faʼaitoito ʼe i te faʼaineine nō te ti’a nō te mau mea tā tātou e ti’aturi nei, ’e mai te peu ē, e tītauhia ia tātou ’ia ti’a ’o tātou ana’e, ʼia rave tātou i te reira ma te itoito, ma te haʼapūaihia nā roto i te ʼiteraʼa ē, te ti’ara’a mau, eʼita tātou e ti’a o tātou ana’e mai e mea ē, e ti’a tātou ’e tō tātou Metua i te Ao ra » (« ʼIa itoito ʼia ti’a o ʼoe ana’e », Ensign ’aore rā Liahona, Novema 2011, 67).

ʼUa haʼapiʼi te peresideni Gordon B. Hinckley : ʼUa pāpaʼi Paulo ia Timoteo « e ’ere ho’i i te ’ā’au taiā tā te Atua i hōro’a mai nō tātou, i te ’ā’au itoito rā, ’e te aroha, ’e te ha’apa’o maita’i ». ’Eiaha ’oe e ha’amā i te parau o tō tātou Fatuʼ (2 Timoteo 1:7–8). Tē hina’aro nei au i te mau melo ato’a o teie ’ēkālesia ’ia pia i teie mau parau i te vāhi e ti’a ia rātou ’ia ’ite atu i te mau po’ipo’i ato’a ’a ha’amata ai rātou i tō rātou mahana. E hōro’a mai rātou i te itoito ia tātou nō te parau, e hōro’a mai rātou i te fa’aro’o ia tātou nō te tāmata, e ha’apūai rātou i tō tātou ’itera’a i te Fatu ia Iesu Mesia » (Te mau Haʼapiʼiraʼa a te mau peresideni o te ’Ēkālesia : Gordon B. Hinckley [2016], 338).

Mau Video nō niʼa i te parau-tiʼa ʼe te aroha i niʼa i te ChurchofJesusChrist.org.

• « Te Mesia a Handel : Te fare ’āuri a te taʼata hōroʼa tārahu »

• « Te Arai »

• « I reira te parau tiʻa, te here ʼe te aroha e fārerei ai »