“Meei 11–17. Motiaea 18–24: ‘Ti a Tia n Rin Inanon te Berita ae Tabu ma Ngaia,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Meei 11–17. Motiaea 18–24,” Nakomai, Iriirai—Ibukin te Reirei n Tabati: 2020
Minerva K. Teichert (1888-1976), Birinakon te Uea ae Rimwaai ma Ana Aomata, 1949-1951, te oera iaon te mitionaite, 35 7/8 x 48 te inti. Brigham Young University Miutiem ibukin Korobanna, 1969
Meei 11–17
Motiaea 18–24
Ti a Tia n Rin Inanon te Berita ae Tabu ma Ngaia
Ngkana ko wareka Motiaea 18–24, iangoia aomata aika ko reireiniia. Tera ae ko ataia ibukiia? Te Tamnei ae Raoiroi e kona ni kaunga am iango ao ni buokiko n atai koaua n te euangkerio ae a na rangi ni bongana ibukim.
Korei Am Namakin
Kaungaa te Tibwatibwa
Kaoiia kaain te kiraati bwa a na uotirakei tabeua reirei, ke rongorongon koaua, aika a kunei n aia tai ni kamatebwaia Motiaea 18–24. (Tabeua reirei a karinanaki n te kabwarabwara n te reirei n te wiiki aei n Nakomai, Iriirai—Ibukiia Aomata n Tatabemaniia ao Utu.) Kaungaia bwa a na tibwauai kiibu man Motiaea 18–24 aika anga reirei iaon reirei aikai. Tera atatai aika a tia ni karekei ma koaua aikai?
Reirei te Reirei
E raonaki te bwabetito ma te berita ae tabu ni beku ibukin te Atua ao n tei bwa Ana tia kakoaua.
-
Ngkana ko wareka Motiaea 18 ao ni katauraoi n anga reirei, ko na namakinna bwa ko na buokiia kaain am kiraati n rinanon ao n iangoa aia berita ae tabu n te bwabetito. Aio te kawai teuana ae ko kona ni karaoa aei: Kaoiia kaain te kiraati bwa a na mwakuri ni bootaki ni koroi ni karinani iaon te burakibooti mwakoro n taeka n aron mwaitina aika a kona n uring aika a kaineti ma ana kabwarabwara Aramwa n te berita ae tabu n te bwabetito. Ngke a bane n tia, a kona kaain te kiraati ni wareka Motiaea 18:8–10 ao ni karin tabeua nakon baika a karinanaki ake akea ibuakoia. (A kona naba ni karin mwakoro n taeka man R&B 20:37, 77, ao 79.) E na kona n ibuobuoki n titirakiniia tera nanon mwakoro n taeka n tatabeua ao tera ae a kona ni karaoia ni kawakina mwakoron te berita ae tabu n te bwabetito. E kanga te Uea ni kakabwaiaira ngkana ti kekeiaki ni kawakina tibwangara n te berita ae tabu?
-
Ngke a katauraoia aomata ake taan iriira Aramwa bwa a na bwabetitoaki, e reireiniia Aramwa bwa “kainakin ana nanai te Atua” e kainnanoa karaoan te berita n iriira te Atua ao n tabe Ibukiia Natina (taraa Motiaea 18:8–9). Tao a kona kaain te kiraati n tibwaua aia atatai ngke boni ngaiia ke temanna ae a kinaa e kakorakoraaki mai iroun temanna are e kakoroa nanon te berita n te bwabetito ae kabwarawaraaki n Motiaea 18:8–10. Te katooto, n ningai ae e a tia temanna ni kamwengaraoia ke ni buokiia ni uoti uotaia aika a rawawata? A kanga atatai aikai ni kaungaira bwa ti na kawakin ara berita? Ko kona naba ni kauriingiia kaain te kiraati bwa e kanga n tei Abinataai “bwa te [tia kakoaua ibukin] te Atua n taainako ao ni bwaai nako, n taabo nako” (te kibu 9). Tera ae ti kona n reiakinna man ana kataooto ngkana ti kekeiaki ni kakoroa nanon mwakoron ara berita n te bwabetito?
Ngkana ti bwabetitoaki, ti berita bwa ti na beku ibukin te Atua ao tabeman.
Ana aomata te Atua a katiteuanaaki.
-
Motiaea 18:17–31 e kabwarabwarai tuua ake e anga Aramwa nakoia ana aomata ni buokiia bwa a na riki ni katiteuanaki bwa kaain ana Ekaretia Kristo. Ni buokiia kaain te kiraati n iangoia bwa a kanga tuua aikai ni kaineti nakoia, ko kona n tuangiia bwa a na kamatebwai kiibu aikai n te kurubu ae uarereke ao ni korei mwin tuua aika a kunei. E na kanga irakin tuua aikai ni buokiia kaain te uoote n namakina riki te katiteuanaaki? Iai kouru aika a kona ni karaoia kaain am kiraati n tatabemaniia ke n te kurubu n ira aia katooto ana aomata Aramwa?
-
Tabeman aomata a mimi, bwa bukin tera ti kainnanoa te ekaretia? Ni buokiia kaain te kiraati ni kaeka te titiraki aei, ko kona ni korea tamnein ana kateitei te Ekaretia iaon te burakibooti ao korea te titiraki aei iaana. A kona ngkanne kaain te kiraati ni kakaea ni Motiaea 18:17–31 ao ni koroia iaon te burakibooti kaekaan titiraki aika a kona ni kunei inanon kiibu aikai. A kona naba ni kunei kaeka inanon mwakoron ana taetae Unimwaane Christofferson inanon “Bwaai n Ibuobuoki Riki Tabeua.” Tao ko kona ni kariaia tabeman kaain te kiraati ni karaoa aia kaotioti bwa a na kanga ni kaeka temanna raoraoia ae aki kakoaua ae e riai te ekaretia ni barongaaki. Bukin tera ti kakaitau n riki bwa kaain te Ekaretia?
-
Ngkai ti tangiria n iangoia bwa a na bane aomata n namakina bwa a butiimwaeaki n te taromauri, ma ni bon arona, tiaki ni kabane aika a namakina te butimwaeaki. Tera ae ti reiakinna mairouia ana aomata Aramwa n Motiaea 18:17–31 ae e na kona ni buokiira ni karekea te tabo ae a na bane n namakinna bwa boni kaina ngaia ni kabane?
E kona te Uea ni kabebetei rawawatara.
-
Kaangaanga ake a uouotia kaain am kiraati, a kaokoro ma ake a rootaki iai ana aomata Rimwaai ke ana aomata Aramwa ngke a tautoronaki. Ma rongorongon taian karaki aikai a kaineti nakon temanna ae namakinna bwa e karawawataaki n te kaangaanga ke taai ni kaangaanga. Kaoiia kaain te kiraati bwa a na tibwaua te bwai ae a tia n reiakinna man Motiaea 21–24 bwa e na kanga te Atua ni kona ni buokiira n tain karawawatakira. (Ibukin kakimototoan taekan rongorongo aikai, taraa L. Tom Perry, “The Power of Deliverance,” Ensign ke Riaona, Meei 2012, 94–97.) A kona naba kaain te kiraati n tibwauai taai ngke ngaiia, n aroia ana aomata Aramwa, a rinanon are ngke a kakoroaki bukin ana berita te Atua are E na kabebetei rawawataia ao ni kawariia inanon karawawatakiia (taraa Motiaea 24:14).
-
E na uaana ibukiia kaain te kiraati bwa a na kabanei tabeua miniti ni koroi aia kaangaanga aika a tia ni kaitara ma ngaai ao n iangoi kawai ake e buokiia te Uea ni uotii rawawataia. Iai mwakoro n taeka man Motiaea 21–24 ake a kaungaia bwa a na rairaki nakon te Uea n tain te kakaitara? E kanga ana berita te Uea nakoia ana aomata Aramwa n Motiaea 24:14 n irekereke ma te berita ae tabu ae ti karaoia ma te Uea n te bwabetito? (taraa Motiaea 18:8–10).
Kaungaa te Kamatebwai n te Mweenga
Ni kaungaia kaain te kiraati bwa a na wareka Motiaea 25–28, tuangiia bwa a na iangoa temanna ae ataia are e a tia n tannako man te euangkerio. Tuangiia bwa ngkana a wareki mwakoro aikai, a na bae ni kunei atatai aika a nano bwa a na kanga ni buoka te aomata anne bwa e na oki.
Bwaai n Ibuobuoki Riki Tabeua
Bukin Tera Ti Riai n Ira te Burabeti?
E taku Unimwaane D. Todd Christofferson: I kunea bwa iai tabeman aomata aika a taku n aia iango bwa a taua te aro ke n iai irouia te tamnei ma a rawa n roko n te taromauri ke ni kainnanoan te bootaki anne. Waaki ni kakamwakuri n te tamnei bon ibukiia n ae onoti. Ma te Ekaretia e bon karikaki mai Iroun Teuare e boboto iaona maiura n tamnei—Iesu Kristo. E materaoi bwa ko na tei n iangoia bwa bukin tera E rineia bwa e na kabongana te ekaretia, Ana Ekaretia, Ana Ekaretia Iesu Kristo ibukiia Aika Itiaki ni Boong aika Kaitira, ni karaoa nanon Ana mwakuri ao Ana mwakuri Tamana.”
Unimwaane Christofferson e tibwaua oin bukina ngkai e katea te Ekaretia te Uea (taraa “Why the Church,” Ensign ke Riaona, Nob. 2015, 108–11):
-
“N tataekina rongorongon ana euangkerio Iesu Kristo ae raoiroi ao ni karaoi otenanti ni kamaiu—n taekana teuana, ni uotiia aomata nakon Kristo.”
-
“Ni katea te kaomiuniti ibukiia Aika Itiaki are e na kamatoa temanna n te ‘kawai ae eti man irariki are e na kairi ngkami nakon te maiu ae akea tokina’ [2 Nibwaai 31:18]. … Reitaki n te onimaki, ti reireina ao ni kakorakora temanna ma temanna ao ni kekeiaki ni maiuakina te kabanea n rietaata ni kainibaire n riki bwa ana reirei Iesu.”
-
Ni “karekea te ikotaki ni katoa wiiki ni motirawa ao ni kabouaki, te tai ao te tabo ni katikui bwain te aonaaba ao waaki ni kakukurei—te Tabati.”
-
“Ni kakoroi nanon bwaai aika a kainnanoaki aika aki kona ni koro bukiia irouia aomata ke kurubu aika a uarereke riki [n raonaki] ma tabeakinaia aika a kainnano, … [uotakin] te euangkerio nakon te aonaaba … [katean ao wakinakin] tembora, ana auti te Uea, ike a na kona iai ni karaoaki otenanti aika a kakawaki ao ni karaoaki inanona berita aika tabu.”
-
Ni katauraoan kiing n te nakoanibonga, ake “a kawakinaki itiakin ana reirei te Tia Kamaiu ao koauan Ana otenanti ni kamaiu irouia ana aobitia ana nakoanibonga te Ekaretia, … buokia ni katauraoia naake a tangiria ni karekei, kakoaua te konabwai ao kororaoia naake a bubuti, ao a karaoi … [ao] kinaa te koaua ao te kantaninga ae bure.”