« ថ្ងៃទី ២១–២៧ ខែ ធ្នូ ។ បុណ្យគ្រីស្ទម៉ាស់ ៖ ‹ ព្រះអង្គនឹងយាងមកឯលោកិយ ដើម្បីមកប្រោសលោះរាស្ត្ររបស់ព្រះអង្គ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ២១–២៧ ខែ ធ្នូ ។ បុណ្យគ្រីស្ទម៉ាស់ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២០
នុ៎ះន៍ កូនចៀមនៃព្រះដោយ វ៉លធើរ រ៉េន
ថ្ងៃទី ២១–២៧ ខែ ធ្នូ
បុណ្យគ្រីស្ទម៉ាស់
« ព្រះអង្គនឹងយាងមកឯលោកិយ ដើម្បីមកប្រោសលោះរាស្ត្ររបស់ព្រះអង្គ »
នៅពេលអ្នកសិក្សាពីការប្រសូតរបស់ព្រះយេស៊ូវគ្រីស្ទនៅសប្ដាហ៍នេះ សូមពិចារណាពីរបៀបដែលអ្នកអាចជួយសិស្សរបស់អ្នកពង្រឹងទីបន្ទាល់របស់ពួកគេអំពីព្រះយេស៊ូវគ្រីស្ទ និងដង្វាយធួនរបស់ទ្រង់ ។ គំនិតយោបល់មួយចំនួននៅក្នុងគម្រោងមេរៀននេះអាចជួយបាន ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមអញ្ជើញសិស្សឲ្យចាប់ដៃគូ ឬបង្កើតជាក្រុមតូចៗ ហើយចែកចាយពីរបៀបដែលការរៀនសូត្រអំពីព្រះយេស៊ូវគ្រីស្ទមកពីព្រះគម្ពីរមរមននៅឆ្នាំនេះបានពង្រឹងដល់សេចក្ដីជំនឿរបស់ពួកគេលើទ្រង់ និងការបង្រៀនរបស់ទ្រង់ ។
បង្រៀនគោលលទ្ធិ
នីហ្វៃទី ១ ១១:១៣–២៣, ហេលេមិន ១៤:១–១៣, នីហ្វៃទី ៣ ១:៤–២២
ព្រះយេស៊ូវគ្រីស្ទបានប្រសូតធ្វើជាព្រះអង្គសង្គ្រោះរបស់យើង ។
-
តើអ្នក អាចប្រើព្រះគម្ពីរមរមនដើម្បីបង្រៀនសិស្សអំពីព្រឹត្តិការណ៍ដ៏ពិសិដ្ឋនៃការប្រសូតរបស់ព្រះអង្គសង្គ្រោះតាមរបៀបណា ? វិធីមួយគឺបំបែកសិស្សជាបីក្រុម ហើយឲ្យក្រុមនីមួយៗនូវវគ្គបទគម្ពីរមួយដូចតទៅនេះដើម្បីអានរួមគ្នា ៖ នីហ្វៃទី ១ ១១:១៣–២៣, ហេលេមិន ១៤:១–១៣ និង នីហ្វៃទី ៣ ១:៤–២២ ។ សូមក្រុមទាំងនោះពិភាក្សាគ្នានូវអ្វីដែលបទគម្ពីរទាំងនេះបង្រៀនពួកគេអំពីការប្រសូតរបស់ព្រះអង្គសង្គ្រោះ ។ បន្ទាប់មក ក្រុមនីមួយៗអាចចែកចាយជាមួយសិស្សដទៃទៀតអំពីអ្វីដែលពួកគេបានពិភាក្សា ។ ហេតុអ្វីវាមានតម្លៃដើម្បីមានសាក្សីរបស់ព្រះគម្ពីរមរមនអំពីការប្រសូតរបស់ព្រះអង្គសង្គ្រោះ ?
-
ការដឹងអំពីការប្រសូតរបស់ព្រះគ្រីស្ទគឺជារឿងសំខាន់ ប៉ុន្តែការដឹងពី ហេតុផល ដែលទ្រង់ប្រសូតមកគឺជារឿងកាន់តែសំខាន់ ។ តើយើងអាចជួយសិស្សឲ្យពិចារណាពីព្រះចេស្ដាប្រោសលោះរបស់ព្រះយេស៊ូវគ្រីស្ទតាមរបៀបណា ? ប្រហែលជាសិស្សអាចអាចែកចាយដំណើររឿង និងវគ្គមួយចំនួនដែលពួកគេបានសិក្សានៅសប្ដាហ៍នេះ( សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ សូមលើកទឹកចិត្តពួកគេឲ្យចែកចាយថាតើរឿងដែលពួកគេបានសិក្សាធ្វើឲ្យការដឹងគុណរបស់ពួកគេចំពោះការប្រសូតរបស់ព្រះអង្គសង្គ្រោះ និងចំពោះព្រះចេស្ដាប្រោសលោះរបស់ទ្រង់កាន់តែស៊ីជម្រៅតាមរបៀបណា ?
-
ដើម្បីចាប់ផ្ដើមការពិភាក្សាមួយអំពីអំណោយដែលព្រះបានប្រទានដល់យើងតាមរយៈព្រះរាជបុត្រារបស់ទ្រង់ នោះអ្នកអាចអញ្ជើញសិស្សពីរបីនាក់ឲ្យពិភាក្សាអំពីអំណោយពិសេសៗដែលពួកគេបានទទួលនៅថ្ងៃបុណ្យគ្រីស្ទម៉ាស់ ។ តើយើងបង្ហាញការដឹងគុណចំពោះអំណោយដែលយើងទទួលបានតាមរបៀបណា ? បន្ទាប់មក សិស្សអាចអានពាក្យដកស្រង់របស់ប្រធាន ថូម៉ាស អេស ម៉នសុន ដែលមាននៅក្នុង« ធនធានបន្ថែមទាំងឡាយ » ហើយពិភាក្សាពីអំណោយទាំងបួនដែលប្រធានម៉នសុនបានលើកឡើង ។ តើព្រះអង្គសង្គ្រោះបានដើរតួនាទីអ្វីខ្លះនៅក្នុងអំណោយទាំងនេះ ? តើយើងអាចបង្ហាញការដឹងគុណរបស់យើងចំពោះព្រះវរបិតាសួគ៌សម្រាប់អំណោយទាំងនេះតាមរបៀបណា ?
-
ជាផ្នែកនៃការពិភាក្សារបស់អ្នកអំពីថ្ងៃបុណ្យគ្រីស្ទម៉ាស់ សូមពិចារណាអញ្ជើញសិស្សឲ្យលេង ឬច្រៀងទំនុកតម្កើងបុណ្យគ្រីស្ទម៉ាស់ ។ អ្នកក៏អាចរុករកធនធានផ្សេងទៀតដែលមាននៅក្នុង « ធនធានបន្ថែមទាំងឡាយ » ផងដែរ ។
ទំព័រចំណងជើងនៃព្រះគម្ពីរមរមន, បុព្វកថាអំពីព្រះគម្ពីរមរមន, នីហ្វៃទី ២ ២៥:២៣, ២៦, ៣៣:៤, ១០
ព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ ។
-
ខណៈដែលការសិក្សារបស់អ្នកអំពីព្រះគម្ពីរមរមនបានឈានមកដល់ទីបញ្ចប់ អ្នកគួរផ្ដល់ឱកាសដល់សិស្សដើម្បីសញ្ជឹងគិតនូវអ្វីដែលពួកគេបានរៀនអំពីព្រះយេស៊ូវគ្រីស្ទនៅក្នុងព្រះគម្ពីរមរមននៅឆ្នាំនេះ ។ ដើម្បីជួយចាប់ផ្ដើមការពិភាក្សាមួយ អ្នកអាចអានរួមគ្នានូវ នីហ្វៃទី ២ ២៥:២៣, ២៦ និង ៣៣:៤, ១០ រួមទាំងសេចក្ដីដកស្រង់មកពី បុព្វកថា និង ទំព័រចំណងជើងរបស់ព្រះគម្ពីរមរមនផងដែរ ។ អ្នកក៏អាចចែកចាយដំណើររឿង ឬវគ្គមួយដែលបាននាំអ្នកឲ្យខិតជិតព្រះយេស៊ូវគ្រីស្ទ រួចហើយទុកពេលឲ្យសិស្សពីរបីនាទីដើម្បីចែកចាយនូវដំណើររឿង ឬវគ្គរបស់ពួកគេផ្ទាល់ ។ សូមធ្វើទីបន្ទាល់របស់អ្នកអំពីព្រះគម្ពីរមរមន ហើយអញ្ជើញសិស្សឲ្យធ្វើដូចគ្នាដែរ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
ដើម្បីបំផុសគំនិតសិស្សឲ្យចាប់ផ្ដើមអានគោលលទ្ធិ និងសេចក្ដីសញ្ញា អ្នកអាចចែកចាយខគម្ពីរពេញចិត្តមួយ ឬបទពិសោធន៍ដ៏បំផុសគំនិតមួយដែលអ្នកធ្លាប់មានជាមួយនឹងការសិក្សាគោលលទ្ធិ និង សេចក្តីសញ្ញា ។
ធនធានបន្ថែមទាំងឡាយ
ធនធានអំពីបុណ្យគ្រីស្ទម៉ាស់ ។
-
រូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។
-
« A Savior Is Born—Christmas Video » ( វីដេអូ ChurchofJesusChrist.org )
-
« Good Tidings of Great Joy: The Birth of Jesus Christ » ( វីដេអូ ChurchofJesusChrist.org )
-
ការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយ ( ChurchofJesusChrist.org/broadcasts/first–presidency–christmas–devotionals ) ។
អំណោយរបស់ព្រះអង្គសង្គ្រោះ ។
ប្រធាន ថូម៉ាស អេស ម៉នសុន បានបង្រៀន ៖
« ខ្ញុំសញ្ជឹងគិតពីភាពខុសគ្នានៃបុណ្យគ្រីស្ទម៉ាស់ ។ មានការផ្សាយពាណិជ្ជកម្មដ៏មានប្រជាប្រិយភាពមួយអំពីអំណោយដែលមានតម្លៃហួសប្រមាណបានវេចខ្ចប់យ៉ាងជំនាញ ហើយវាមានចំណងជើងថា ‹ សម្រាប់មនុស្សដែលមានអ្វីៗគ្រប់យ៉ាង › ។ នៅក្នុងការអានព័ត៌មានមួយបែបនេះ ខ្ញុំបានឃើញអំណោយមួយដែលមានទំហំ ៣៧០ មីលីម៉ែត្រការេ ដែលបានវេចខ្ចប់ដោយមានបូរ និងបណ្ណជូនពរដ៏ស្រស់ស្អាតដែលសរសេរថា ‹ រីករាយបុណ្យគ្រីស្ទម៉ាស់ › ។ វត្ថុផ្សេងទៀតរួមមាន ប្រដាប់វាយកូនហ្គោលដែលមានដាំគ្រាប់ពេជ្រសម្រាប់អ្នកលេងកូនហ្គោល ការធ្វើដំណើរតាមកប៉ាលនៃសមុទ្រការ៉ាបៀន និងដំណើរដ៏អស្ចារ្យមួយទៅកាន់ជួរភ្នំនៅប្រទេសស្វីសសម្រាប់ដំណើរផ្សងព្រេង ។ វត្ថុទាំងនោះទំនងជាស័ក្ដិសមនឹងប្រធានបទរបស់គំនូរជីវចលអំពីបុណ្យគ្រីស្ទម៉ាស់មួយដែលបានបង្ហាញពីពួកហោរាបីនាក់កំពុងធ្វើដំណើរទៅភូមិបេថ្លេហិមជាមួយនឹងប្រអប់អំណោយដាក់នៅលើសត្វអូដ្ឋរបស់ពួកគេ ។ មានគេនិយាយថា ‹ ចាំមើលចុះ បាលថាហ្សា យើងនឹងចាប់ផ្ដើមធ្វើអ្វីមួយជាមួយនឹងអំណោយទាំងនេះដែលវានឹងធ្វើឲ្យមានភាពចលាចល ! › …
« សូមឲ្យយើងទុកបញ្ជីនៃបុណ្យគ្រីស្ទម៉ាស់ ដោយមានអំណោយដែលមាននូវការពិពណ៌នាប្លែកៗមួយអន្លើរសិន ។ ចូរយើងងាកចេញពីការគិតថានឹងជូនផ្កាសម្រាប់ម្ដាយ ក្រវ៉ាត់–កពិសេសសម្រាប់ឪពុក តុក្កតាស្អាត រទេះភ្លើងដែលមានសំឡេងរោទិ៍ កង់ដែលទន្ទឹងរង់ចាំជាយូរ … ហើយដឹកនាំគំនិតរបស់យើងទៅរកអំណោយទាំងនោះដែលព្រះបានប្រទានឲ្យ ដែលវាមានភាពស្ថិតស្ថេតរហូត ។ ខ្ញុំបានជ្រើសយកអំណោយចំនួនបួនចេញពីបញ្ជីមួយដ៏វែង ៖ …
« ទីមួយ អំណោយនៃកំណើត ។ វាត្រូវបានប្រទានឲ្យយើងម្នាក់ៗ ។ កំណើតរបស់យើងគឺជាឯកសិទ្ធិដ៏ទេវភាពដើម្បីចាកចេញពីផ្ទះសួគ៌ារបស់យើងមកកាន់រូបកាយជាសាច់ ហើយដើម្បីបង្ហាញតាមរយៈជីវិតរបស់យើងនូវភាពស័ក្ដិសម និងគុណសម្បត្តិរបស់យើងដើម្បីត្រឡប់ទៅរកទ្រង់វិញ ទៅកាន់មនុស្សដែលយើងស្រឡាញ់បំផុត និងទៅកាន់នគរមួយដែលមានឈ្មោះថាសេឡេស្ទាល ។ … វាគឺជាការទទួលខុសត្រូវរបស់យើងដើម្បីបង្ហាញការដឹងគុណរបស់យើងតាមរយៈទង្វើរនៅក្នុងជីវិតរបស់យើង ។ …
« ទីពីរ អំណោយនៃសេចក្ដីសុខសាន្ត ។ នៅក្នុងពិភពលោកដ៏ច្របូកច្របល់ដែលយើងរស់នៅ សំឡេងរំខាន់នៃចរាចរ ការផ្សាយពាណិជ្ជកម្មឮៗនៃប្រព័ន្ធផ្សព្វផ្សាយ និងតម្រូវការជាច្រើនសម្រាប់ពេលវេលារបស់យើង—រឿងទាំងអស់នេះគួបផ្សំនឹងបញ្ហានៃពិភពលោក—ធ្វើឲ្យមានការឈឺក្បាល ការឈឺចាប់ និងប្រើកម្លាំងរបស់យើងទាំងស្រុងដើម្បីតតាំង ។ …
« ទ្រង់ជាមនុស្សទូទុក្ខ ហើយក៏ធ្លាប់ស្គាល់សេចក្តីឈឺចាប់ ដល់អស់អ្នកដែលមានដួងចិត្តខ្វាយខ្វល់ ហើយប្រទានអំណោយទាននៃសេចក្តីសុខសាន្ត ។ ‹ ខ្ញុំទុកសេចក្ដីសុខនៅនឹងអ្នករាល់គ្នា គឺខ្ញុំឲ្យសេចក្ដីសុខសាន្តរបស់ខ្ញុំដល់អ្នករាល់គ្នា ហើយដែលខ្ញុំឲ្យ នោះមិនមែនដូចជាលោកិយឲ្យទេ ។ កុំឲ្យចិត្តអ្នករាល់គ្នាថប់បារម្ភ ឬភ័យឡើយ › ( យ៉ូហាន ១៤:២៧ ) ។ …
« ទីបី អំណោយនៃសេចក្ដីស្រឡាញ់ ។ មានអ្នកប្រាជ្ញាម្នាក់ដែលទូលនឹងព្រះយេស៊ូវ បានចោទសួរទ្រង់ថា ‹ លោកគ្រូ ក្នុងបណ្តាក្រឹត្យវិន័យ តើបញ្ញត្តិណាដែលយ៉ាងសំខាន់បំផុត ? ទ្រង់បានតបភ្លាមៗថា ‹ ត្រូវឲ្យស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង ។
« ‹ នេះជាបញ្ញត្តិយ៉ាងសំខាន់ទី១ ។
« ‹ ហើយបញ្ញត្តិទីពីរក៏បែបដូចគ្នាគឺថា ត្រូវឲ្យស្រឡាញ់អ្នកជិតខាងដូចខ្លួនឯង » ( ម៉ាថាយ ២២:៣៦–៣៩ ) ។ …
« ទីបួន អំណោយនៃជីវិត—ជាជីវិតអមតៈ ។ ផែនការរបស់ព្រះវរបិតាសួគ៌នៃយើងមាននូវការបង្ហាញនៃសេចក្ដីស្រឡាញ់ដ៏ពិតគ្មានទីបញ្ចប់ ។ អ្វីគ្រប់យ៉ាងដែលយើងស្រឡាញ់បំផុត សូម្បីតែក្រុមគ្រួសាររបស់យើង មិត្តភក្ដិរបស់យើង អំណររបស់យើង ចំណេះដឹងរបស់យើង ទីបន្ទាល់របស់យើង នឹងឈប់មាន ប្រសិនបើពុំដោយសារព្រះវរបិតារបស់យើង និងព្រះរាជបុត្រារបស់ទ្រង់ ព្រះអម្ចាស់ ព្រះយេស៊ូវគ្រីស្ទ នោះទេ ។ នៅក្នុងចំណោមគំនិត និងការសរសេរដ៏រីករាយបំផុតនៅក្នុងពិភពលោកនេះគឺមាននូវសេចក្ដីថ្លែងការណ៍ដ៏ទេវភាពពីសេចក្ដីពិតថា ‹ ដ្បិតព្រះទ្រង់ស្រឡាញ់មនុស្សលោកដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ › ( យ៉ូហាន ៣:១៦ ) » ( « Gifts » Ensign ខែ ឧសភា ឆ្នាំ ១៩៩៣ ទំព័រ ៥៩–៦២ ) ។
ការកែលម្អការបង្រៀនរបស់យើង
ការនិយាយពាក្យថា « ខ្ញុំមិនដឹងទេ » វាពុំមែនជាបញ្ហាឡើយ ។ ខណៈដែលអ្នកគួរធ្វើឲ្យអស់ពីលទ្ធភាពដើម្បីឆ្លើយសំណួរនានាដែលសិស្សរបស់អ្នកមានអំពីដំណឹងល្អ ព្រះអម្ចាស់ពុំរំពឹងទុកឲ្យអ្នកចេះអ្វីៗគ្រប់យ៉ាងនោះទេ ។ នៅពេលអ្នកពុំដឹងពីរបៀបឆ្លើយចំពោះបញ្ហាអ្វីមួយ សូមពិចារណានូវការឆ្លើយតបដោយអញ្ជើញសិស្សឲ្យស្រាវជ្រាវរួមគ្នារកចម្លើយមួយនៅក្នុងបទគម្ពីរ ហើយចែកចាយនូវអ្វីដែលពួកគេរកឃើញ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៤ ) ។