« ថ្ងៃទី ១-៧ ខែ កុម្ភៈ ។ គោលលទ្ធិ និង សេចក្តីសញ្ញា ១០-១១ ៖ ‹ ប្រយោជន៍ឲ្យអ្នកអាចក្លាយទៅជាអ្នកជម្នះបាន › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ឆ្នាំ ២០២១ ( ឆ្នាំ ២០២០ )

« ថ្ងៃទី ១-៧ ខែ កុម្ភៈ ។ គោលលទ្ធិ និង សេចក្តីសញ្ញា ១០-១១ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២១

សំណៅនៃសៀវភៅសរសេរដោយដៃនៃព្រះគម្ពីរមរមនច្បាប់ដើម ។

ថ្ងៃទី ១-៧ ខែ កុម្ភៈ

គោលលទ្ធិ និង សេចក្ដីសញ្ញា ១០-១១

« ប្រយោជន៍ឲ្យអ្នកអាចក្លាយទៅជាអ្នកជម្នះបាន »

តើអ្នកមានចំណាប់អារម្មណ៍អ្វីខ្លះ នៅពេលអ្នកអាន គោលលទ្ធិ និង សេចក្ដីសញ្ញា ១០-១១ ? តើអ្នកនឹកឃើញអ្វីខ្លះអំពីសេចក្ដីត្រូវការរបស់សិស្សអ្នក ?

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

ដើម្បីទុកឱកាសមួយឲ្យសិស្សនិយាយអំពីអ្វីដែលពួកគេបានរៀននៅក្នុងការសិក្សាព្រះគម្ពីរផ្ទាល់ខ្លួន និងជាគ្រួសាររបស់ពួកគេ អ្នកអាចសរសេរគោលលទ្ធិ និង សេចក្ដីសញ្ញា ១០ និង គោលលទ្ធិ និង សេចក្ដីសញ្ញា ១១ នៅលើក្ដារខៀន ។ សិស្សពីរបីនាក់អាចសរសេរ នៅក្រោមចំណងជើងណាមួយក៏បាន នូវលេខខគម្ពីរមួយដែលពួកគេបានរកឃើញនូវសេចក្ដីពិតដ៏សំខាន់មួយ ។ សូមជ្រើសយកខគម្ពីរពីរបីក្នុងចំណោមខគម្ពីរទាំងនោះ ហើយអញ្ជើញសិស្សឲ្យចែកចាយពីសេចក្ដីពិតដែលពួកគេបានរកឃើញក្នុងខគម្ពីរនោះ ។

បង្រៀនគោលលទ្ធិ

គោលលទ្ធិ និង សេចក្ដីសញ្ញា ១០:១–៣៣

សាតាំងខិតខំបំផ្លាញកិច្ចការរបស់ព្រះ ។

គោលលទ្ធិ និង សេចក្តីសញ្ញា ១០ អាចជួយសិស្សឲ្យស្គាល់ ហើយតតាំងនឹងការខិតខំរបស់សាតាំងដើម្បីបំផ្លាញសេចក្ដីជំនឿរបស់ពួកគេ ។ ដើម្បីផ្ដល់បរិបទប្រវត្តិសាស្ត្រមួយចំនួនសម្រាប់កណ្ឌនេះ អ្នកអាចអញ្ជើញសិស្សម្នាក់ឲ្យចែកចាយដំណើររឿងរបស់ ម៉ាទិន ហារីស ស្ដីពីការបាត់បង់ការបកប្រែ ១១៦ ទំព័រនៃព្រះគម្ពីរមរមន ( សូមមើល ក្បាលកណ្ឌសម្រាប់ គោលលទ្ធិ និង សេចក្តីសញ្ញា ៣ និង ពួកបរិសុទ្ធ, ១:៥០-៥៣ ) ។ បន្ទាប់មក សិស្សអាចស្រាវជ្រាវក្នុង គោលលទ្ធិ និង សេចក្ដីសញ្ញា ១០:១–៣៣ រកផែនការរបស់សាតាំងសម្រាប់ទំព័រដែលបានបាត់នោះ ។ តើយើងរៀនអ្វីខ្លះមកពីខគម្ពីរទាំងនេះអំពីវិធីដែលសាតាំងខិតខំធ្វើ និងហេតុផលដែលវាធ្វើរឿងទាំងនេះ ? ( សូមមើលផងដែរ ខទី ៦៣ ) ។ តើវាកំពុងធ្វើវិធីស្រដៀងគ្នានេះនៅក្នុងជំនាន់របស់យើងតាមរបៀបណា ? តើព្រះអម្ចាស់ជួយយើងឲ្យជម្នះនឹងសាតាំងនៅក្នុងជីវិតរបស់យើងតាមរបៀបណា ?

គោលលទ្ធិ និង សេចក្តីសញ្ញា ១០:៣៤–៥២

« ព្រះប្រាជ្ញារបស់[ព្រះអម្ចាស់]គឺធំជាងល្បិចកលរបស់អារក្ស » ។

នៅពេលយើងបាក់ទឹកចិត្តដោយសារតែអំពើបាបរបស់យើង យើងអាចស្វែងរកសេចក្ដីសង្ឃឹមដោយដឹងពីរបៀបដែលព្រះអម្ចាស់បានទូទាត់សងអំពើបាបដែលយ៉ូសែប ស្ម៊ីធ និងម៉ាទីន ហារីស បានធ្វើ នៅពេលពួកលោកពុំគោរពប្រតិបត្តិតាមព្រះអម្ចាស់ ហើយធ្វើឲ្យបាត់ការបកប្រែ ១១៦ ទំព័រនៃព្រះគម្ពីរមរមននោះ ។ សូមពិចារណាពីរបៀបដែលអ្នកអាចជួយសិស្សឲ្យរកឃើញសេចក្ដីសង្ឃឹមនៅក្នុងដំណើររឿងនេះ ។ ឧទាហរណ៍ អ្នកអាចអញ្ជើញពួកគេឲ្យចែកចាយអ្វីមួយដែលពួកគេរៀនអំពីព្រះអម្ចាស់មកពី គោលលទ្ធិ និង សេចក្ដីសញ្ញា ១០:៣៤–៥២ ( សូមមើលផងដែរ គោលលទ្ធិ និង សេចក្ដីសញ្ញា ៣:១–៣ ) ។ សិស្សអាចចែកចាយពីរបៀបដែលពួកគេធ្លាប់ឃើញថា « ព្រះប្រាជ្ញារបស់[ព្រះអម្ចាស់]គឺធំជាងល្បិចកលរបស់អារក្ស » ( គោលលទ្ធិ និង សេចក្ដីសញ្ញា ១០:៤៣ ) ។ តើចំណេះដឹងនេះពង្រឹងសេចក្ដីជំនឿរបស់យើងលើទ្រង់តាមរបៀបណា ?

មរមនសង្ខេបផ្ទាំងចំណារទាំងឡាយ ដោយ ថម ឡូវែល

គោលលទ្ធិ និង សេចក្ដីសញ្ញា ១១

ប្រសិនបើយើងសូមព្រះ យើងនឹងទទួលបាន ។

គម្រោងមេរៀនសម្រាប់សប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អញ្ជើញយើងឲ្យអាន គោលលទ្ធិ និង សេចក្តីសញ្ញា ១១ ដូចជាវាត្រូវបានសរសេរទុកសម្រាប់យើង ។ ប្រហែលជាសិស្សនឹងព្រមចែកចាយអ្វីមួយមកពីកណ្ឌនេះ ដែលវាមានទំនាក់ទំនងចំពោះពួកគេជាពិសេស ។ តើពួកគេមានគម្រោងអនុវត្តអ្វីដែលពួកគេបានរៀនតាមរបៀបណា ?
វិធីមួយដើម្បីលើកទឹកចិត្តឲ្យមានការពិភាក្សាអំពី គោលលទ្ធិ និង សេចក្ដីសញ្ញា ១១ គឺការអញ្ជើញសិស្សឲ្យស្វែងរកគោលការណ៍មួយនៅក្នុងកណ្ឌនេះ រួចហើយសរសេរសំណួរមួយអំពីគោលការណ៍នេះ ។ សំណួរនោះអាចរួមមាន « តើការនៅជាប់នឹងព្រះគ្រីស្ទឲ្យអស់ពីចិត្តរបស់អ្នកមានន័យដូចម្ដេច ? » ( ខទី ១៩ ) ឬ « តើយើងទទួលបានបន្ទូលរបស់ព្រះតាមរបៀបណា ? » ( ខទី ២១ ) ។ សិស្សអាចដាក់សំណួររបស់ពួកគេនៅផ្នែកខាងលើនៃក្រដាសមួយសន្លឹក ហើយហុចក្រដាសរបស់ពួកគេទៅវិញទៅមក ដោយបន្ថែមគំនិត និងចម្លើយដែលអាចមានចំពោះសំណួរពីគ្នាទៅវិញទៅមក ។ ( វាអាចជួយ ដោយបំបែកសិស្សជាក្រុមតូចៗជាមុនសិន ) ។ បន្ទាប់មក សិស្សអាចចែកចាយជាមួយនឹងសិស្សដទៃទៀតពីការយល់ដឹងមួយចំនួនដែលសិស្សដទៃទៀតបានសរសេរអំពីសំណួររបស់ពួកគេ ។

គោលលទ្ធិ និង សេចក្តីសញ្ញា ១១:៨-២៦

ព្រះនឹងប្រទានព្រះវិញ្ញាណរបស់ទ្រង់ដល់យើង នៅពេលយើងរៀបចំខ្លួនតាមរបៀបរបស់ទ្រង់ ។

តើសិស្សរបស់យើងនឹងទទួលបានប្រយោជន៍មកពីការពិភាក្សាស្ដីពីរបៀបដើម្បីស្គាល់វិវរណៈផ្ទាល់ខ្លួនតាមរយៈព្រះវិញ្ញាណបរិសុទ្ធដែរឬទេ ? ប្រសិនបើដូច្នេះមែន អ្នកអាចចាប់ផ្ដើមការពិភាក្សាមួយ ដោយអញ្ជើញពួកគេឲ្យនឹកស្រមៃថា ពួកគេត្រូវបានសុំឲ្យសរសេរពីសេចក្ដីពិតមួយចំនួនអំពីរបៀបទទួលវិវរណៈផ្ទាល់ខ្លួន ។ តើពួកគេនឹងដាក់បញ្ចូលអ្វីខ្លះចេញមកពី គោលលទ្ធិ និង សេចក្តីសញ្ញា ១១:៨-២៦ ? ឧទាហរណ៍ តើពួកគេនឹងសរសេរអ្វីខ្លះអំពីការរៀបចំខ្លួនទទួលការដឹកនាំសម្រាប់ជីវិតរបស់យើង និងចម្លើយចំពោះសំណួររបស់យើង ? តើពួកគេនឹងនិយាយអ្វីខ្លះអំពីរបៀបស្គាល់ចម្លើយនានា នៅពេលវាកើតមានឡើង ? សូមអញ្ជើញសិស្សឲ្យពិចារណាពីរបៀបដែលពួកគេនឹងអនុវត្តអ្វីដែលពួកគេបានរៀន នៅពេលពួកគេខិតខំស្វែងរកវិវរណៈផ្ទាល់ខ្លួន ។

ជាផ្នែកមួយនៃសកម្មភាពនេះ អ្នកអាចចែកចាយសេចក្ដីថ្លែងការណ៍នេះមកពី ស៊ិស្ទើរ ជូលី ប៊ី ប៊េក អតីតប្រធានសមាគមសង្គ្រោះទូទៅ ៖ « លទ្ធភាពដើម្បីមានគុណសម្បត្តិស័ក្ដិសម ទទួលបាន ហើយធ្វើតាមវិវរណៈផ្ទាល់ខ្លួនគឺជាជំនាញដ៏សំខាន់បំផុតដែលតម្រូវឲ្យមាននៅក្នុងជីវិតនេះ » ( « And upon the Handmaids in Those Days Will I Pour Out My Spirit » Ensign ឬ Liahona ខែ ឧសភា ឆ្នាំ ២០១០ ទំព័រ ១១ ) ។

ការកែលម្អការបង្រៀនរបស់យើង

សូមដាក់បញ្ចូលអ្នកដែលកំពុងជួបបញ្ហា ។ តើអ្នកអាចធ្វើអ្វីខ្លះ នៅពេលសិស្សម្នាក់ទំនងជានៅឯកោតែឯងពីសិស្សដទៃទៀត ? ពេលខ្លះ គាត់ ឬនាងគ្រាន់តែត្រូវការនូវការរាប់បញ្ចូល ។ សូមពិចារណាសុំសិស្សម្នាក់នោះឲ្យចូលរួមនៅក្នុងមេរៀនក្រោយៗទៀត ។ ប្រសិនបើគាត់ ឬនាងពុំឆ្លើយតបចំពោះការខិតខំរបស់អ្នកនៅលើកដំបូងទេ សូមបន្តបង្ហាញសេចក្ដីស្រឡាញ់ និងកង្វល់ចំពោះគាត់ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ, ទំព័រ ៨–៩ ) ។