11–17 ni Maji.

Maciu 10–12; Marika 2; Luke 7; 11

“Sa Talai Ira na Lewe Tinikarua Oqo ko Jisu”

Ena vukei iko na wilika na Maciu 10–12; Marika 2; kei na Luke 7; 11 ka vakasamataki ira era vuli tiko mo ciqoma na veivakauqeti ni Yalo Tabu baleta na nodra gagadre. Vola na veivakauqeti vakayalo o sa ciqoma, ka wilika na ituvatuva oqo baleta na ikuri ni veivakararamataki kei na vakasama ni veivakavulici.

Vola na Nomu Nanuma

Sureta na Veiwasei

Sureta e vica na lewe ni kalasi mera vakarautaka tiko mai eso na nodra taro baleta na Maciu 11:28–30. (Eso na ivakaraitaki ni taro, mo raica e na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.) Na isau ni taro cava era sa kunea?

Vakavulica na iVunau

Maciu 10

Sa solia na Turaga na kaukauwa vei ira na Nona italai mera cakava na Nona cakacaka.

• Na lewa ni iVakabula vei ira na Nona iApositolo ena rawa ni vukea na noda dui itavi. Era sa rairai vakararamataki na lewe ni kalasi ki na ulutaga oqo ni ra vulica vakai ira yadua; me vakataka na itaviqaravi ena ulutaga oqo ena Lako Mai, Mo Muri Au—Me Baleta na Tamata Yadua kei na Matavuvale. Sureta mera wasea na ka era sa vulica se mera cakacaka vakailawalawa mera cakava na itaviqaravi ena kalasi. Sureta na lewe ni kalasi mera wasea na gauna era a vakila kina na kaukauwa ni iVakabula ni ra cakava na nodra veikacivi.

• Dua tale na sala mera taleva kina na lewe ni kalasi na Maciu 10 o ya mera vakasaqara ena wase oqo e dua na ka a kerea na iVakabula vei ira na iApositolo, ka me droinitaki na ka o ya. Sa rawa mera wasea na nodra droini kei na ka era sa vulica baleta na nodratou lewa na iApositolo Le Tinikarua.

• Ena veivuke vakacava na kena vulici na lewa a solia na Karisito vei iratou na Nona iApositolo ena Maciu 10 ki na lewe ni kalasi mera kila vinaka na nodra itavi na parofita kei na iapositolo ena gauna oqo? Ena veivuke toka ke vakatauvatani na lewa ni iVakabula vei iratou na Le Tinikarua ki na lewa e solia ki na Kuoramu ni iApositolo Le Tinikarua ena itabagauna oqo, e tiko ena “iKuri ni iVurevure.” Era sa vakauqeti vakacava na kalasi ena nodra cakacaka vakalotu na iApositolo era bula tiko? Cavuta na nomu ivakadinadina baleta na nodra kacivi vakalou na parofita kei na iapositolo bula, ka sureta na lewe ni kalasi mera cakava vakakina.

• Me vakamatatataki na dina ni rawa vua e dua na lewe ni matabete me vakamuria lesu na nona lewa ki na gauna a tabaki iratou kina na Nona iApositolo o Jisu, sureta e dua na lewe ni matabete me wasea na nona veitarataravi ni lewa.

Era sa vakayacora tiko nikua na iApositolo Le Tinikarua na cakacaka ni Turaga.

Maciu 10:17–20

Ni da sa cakava tiko na veiqaravi ni Turaga, ena vakauqeti keda ena vosa meda cavuta.

• Eso na gauna era dau lomataqaya eso ni ra vakavulica se vosa vei ira eso baleta na kosipeli. Ia sa yalataka na Turaga vei iratou na tisaipeli ni na vukea me ratou kila na ka me tukuni. Na cava e gadrevi meda cakava meda ciqoma kina na veivuke yalataki ni Turaga? Sureta na lewe ni kalasi mera wilika na Maciu 10:19–20; Vunau kei na Veiyalayalati 84:85; kei na Vunau kei na Veiyalayalati 100:5–8 me kunei kina na isaunitaro oqo. Gauna cava e sa bau vukei iko kina na Yalo Tabu mo kila na ka mo kaya? Sa rawa mo wasea na gauna vaka o ya ka sureta na lewe ni kalasi mera wasea vakakina.

Maciu 12:1–13; Marika 2:23–28

Na Siga ni Vakacecegu e siga ni caka vinaka.

• Ni gadrevi me vakatabui na Siga ni Vakacecegu, era a bulia na Farisi na lawa kaukauwa kei na ivakarau vaka-tamata, ka sa laki yaco me matabutotaki na nodra rawa ni kila vinaka na inaki dina ni Siga ni Vakacecegu. Ena yaga beka vei ira o vakavulica tiko na veivosaki baleta na vuna e solia kina vei keda na Turaga na Siga ni Vakacecegu? Sa rawa mo sureta na lewe ni kalasi mera taleva na itukutuku ena Maciu 12:1–13 kei na Marika 2:23–28 ka wasea na veivakavulici ni iVakabula baleta na Siga ni Vakacecegu (raica talega na iVakadewa i Josefa Simici, Marika 2:26–27 [ena Bible appendix]). Na ikuri ni veivakararamataki cava eda na taura mai na Lako Yani 31:16–17; Aisea 58:13–14; kei na Vunau kei na Veiyalayalati 59:9–13? Na ivakarau vakatamata se lawa cava ena rawa me vagolei keda tani mai na inaki dina ni Siga ni Vakacecegu?

• Ni ra vakamacalataka na Farisi na lawa matailalai ni Siga ni Vakacecegu, a vakavulica na iVakabula e dua na ivakavuvuli rawarawa: “O koya gona oqo sa tara kina me caka na ka vinaka e na siga ni vakacecegu” (Maciu 12:12). O ira era bula voli ena ivakavuvuli oqo e dau sega ni dredre mera vakatabuya na Siga ni Vakacecegu. Na ivakavuvuli cava ena vukea na kalasi mera vakatabuya kina na Siga ni Vakacecegu? Na cava e mana cake kina na vakavulici ni ivakavuvuli mai na kena tuvai e dua na lawa me torocake kina na bula rawati koya? (raica na itukutuku nei Parofita Josefa Simici ena “iKuri ni iVurevure”). E tiko beka eso tale na ivakavuvuli ena rawa me vukea noda muria na ivakaro ni Kalou? Me vakataka, ni ivakavuvuli cava ena vukei ira na itubutubu mera vakauqeta na luvedra mera muria na Vosa ni Vuku se cakava na dikevi ni tuva kawa?

• Na itukutuku nei Peresitedi Russell M. Nelson “Me Ka e Rekitaki na Siga ni Vakacecegu” (Ensign se Liaona, Me 2015, 129–32) kei na vidio vata kei na ivakasala nei Elder Jeffrey R. Holland ena “iKuri ni iVurevure” ena rawa me ikuri ni veivosaki baleta na Siga ni Vakacecegu.

• Ena rawa me veivuke ki na lewe ni kalasi ena nodra taleva na “Sabbath Day Observance” ena Me iSakisaki ni iTabagone. Sa rawa mera dramataka nodra na vakamacalataka vua e dua eda sega ni lotu vata na vuna era vakatabuya kina na Siga ni Vakacecegu.

Luke 7:36–50

Ni sa vosoti na noda ivalavala ca, ena titobu na noda lomana na iVakabula.

• Na cava eda rawa ni vulica mai na ivakaraitaki ni yalewa kei na veivakavulici ni iVakabula ena Luke 7:36–50 ni da vakasaqara me vosoti na noda ivalavala ca? Ena vaqaqacotaki vakacava na noda veimaliwai kei na Karisito ni da sa veivutuni? Eda na taurivaka vakacava na itukutuku oqo meda vakavulica e dua ena ibalebale ni vakasaqara na veivosoti?

Vakayaloqaqataki na Vuli ena iTikotiko

Sa rawa mo bolei ira na lewe ni kalasi mera wilika na vosa vakatautauvata ena Maciu 13 kei na Luke 8; 13 ka vakarau mera wasea ena kalasi ni macawa mai oqo e dua na veivakararamataki ni dua na ivakavuvuli ni kosipeli era a rawata mai na dua na vosa vakatautauvata.

iKuri ni iVurevure

Maciu 10–12; Marika 2; Luke 7; 11

Na veivakalougatataki ni vakatabuya na Siga ni Vakacecegu.

Ena tolu na vidio, e vakavulica kina o Elder Jeffrey R. Holland na veivakalougatataki ni vakatabui na Siga ni Vakacecegu: “Upon My Holy Day—Getting Closer to God,” “Upon My Holy Day—Honoring the Sabbath,” kei na “Upon My Holy Day—Rest and Renewal” (LDS.org).

Na lewa vei ira na iApositolo edaidai.

Ena gauna a kacivi kina e so na imatai ni lewe ni Kuoramu ni iApositolo Le Tinikarua ena itabagauna oqo, a solia vei ira o Oliver Cowdery e dua na lewa e tautauvata na kena a solia o Jisu Karisito ena Maciu 10. A kaya o koya:

“‘Ena gadrevi mo ni valuta na nodra lewa vakatani na veimatanitu kece. … Au sa vakaroti kemuni kina, mo ni teivaka na yalomalumalumu cecere, niu sa kila tu na viavialevu ni yalo ni tamata. Qarauna, de ra laveti iko cake na dauveivakaisini kei vuravura. Qarauna, de yaco na nomu gagadre me na vesuki mai na veika ni vuravura. Me vakaliuci tikoga na nomu cakacaka vakalotu. … Sa ka bibi mo ciqoma e dua na ivakadinadina mai Lomalagi me baleti iko, mo rawa ni vakadinadinataka kina na ka dina. …

“‘… E dodonu mo cavuta na itukutuku oqo kivei ira era nanuma tu ni ra sa vuku. Era na vakacacani iko kina; ka ra na via vakamatei iko. Sa dau vakasaqara o vunimeca me vakamatei ira na italai ni Kalou. Mo tu vakarau tu mo ni na solia na nomuni bula, kevaka ena gadreva na Kalou mo solia taumada ena kena tarai cake ena Nona inaki. …

“A qai taura yadudua na ligadra ka kaya, ‘Sa lomamu taucoko dina sara mo vakaitavi ena cakacaka vakalotu oqo, mo kaburaka na kosipeli ena gugumatua taucoko vata kei ira na tacimu, me vaka na ivakaro kei na inaki ni lewa o sa ciqoma oqo?’ Era qai yadudua mai ni ra sa vakadonuya” (ena Joseph Smith Papers, Documents, Volume 4: April 1834–September 1835, ed. Matthew C. Godfrey and others [2016], 243–44, 247; na sipeli kei na pagitueti e vakatauvatataki).

Vakavulici ni ivakavuvuli dodonu.

E dua a taroga na Parofita Josefa Simici a rawa vakacava vua me liutaka vakavinaka e vuqa na tamata mai Nauvoo. A kaya na Parofita, “Au vakavulica vei ira na ivakavuvuli dodonu ka ra qai liutaki ira ga vakataki ira” (raica na Nodra iVakavuvuli na Peresitedi ni Lotu: Josefa Simici [2007], 284).

Vakatorocaketaki na Noda Veivakavulici

Kalougata yalataki. Ni ko veisureti mera na cakava, vakadinadinataka vei ira o vakavulica tiko ni ra na ciqoma na veivakalougatataki ni Kalou sa yalataki tu ni ra vakabauta tiko na Nona veivakavulici. Me kakua ni noda inaki taumada na veivakalougatataki ni talairawarawa, ia na gagadre nei Tamada Vakalomalagi me vakalougatataki ira na Luvena taucoko. (Raica na Veivakavulici ena iVakarau ni iVakabula, 35.)