sa matua na witi me tamusuki

18–24 ni Maji

Maciu 13; Luke 8; 13

“O Koya sa Vakadaligana me rogoca, Me Mani Rogoca Sara”

Ni wiliki tiko, vakasamataka eso beka na nodra taro na lewe ni nomu kalasi ni ra saga mera kila vinaka na itukutuku ni vosa vakatautauvata. Na cava beka e dredre me kilai vinaka? Ena vakarautaki iko vakacava nomu vuli me saumi kina na nodra taro?

Vola na Nomu Nanuma

ivakatakilakila ni veiwasei

Sureta na Veiwasei

Taleva lesu vata kei na kalasi na “Vakasama me Vakatorocaketaki Nomu Vulica na iVolanikalou” ena Lako Mai, Mo Muri Au—Me Baleta na Tamata Yadua kei na Matavuvale. Sureti ira na lewe ni kalasi mera wasea na iwalewale era a vakayagataka mera vulica kina na Maciu 13 kei na Luke 8; 13.

ivakatakilakila ni veivakavulici

Vakavulica na iVunau

Maciu 13:1–23

E dodonu mena vakarautaki na yaloda meda ciqoma kina na vosa ni Kalou.

• Ni gadrevi mera vukei o ira o vakavulica mera raitayalotaka na itukutuku ni vosa vakatautauvata ni daukakaburaki, mo kauta mai ki na kalasi eso na sorenikau, dua na bilo qele, kei na dua na bilo vatu lalai. Kerea e dua na lewe ni kalasi me tea e dua na sorenikau ena qele ka dua ena vatu lalai. Na sorenikau cava ena tubucake, ka cava na vuna? E sema vakacava na lesoni ivakaraitaki oqo ki na vosa vakatautauvata ena Maciu 13:1–23? Meda vakarautaka vakacava na yaloda meda ciqoma kina na vosa ni Kalou?

• Mo na vakayagataka vakacava na vosa vakatautauvata ni daukakaburaki mo vakauqeti ira kina na lewe ni kalasi mera vakarautaka na yalodra mera ciqoma na vosa ni Kalou? Sa rawa mo vola na Tisaipeli kei na Eso tale ena vava ni volavola. Sureti ira na lewe ni kalasi mera wilika na Maciu 13:10–17 ka raica na sala a vakamacalataka kina na iVakabula na kedrau duidui na Nona tisaipeli kei ira eso tale era a rogoca na Nona vosa vakatautauvata. Mo qai kerei ira na lewe ni kalasi mera vakasaqara ena tikina e 18–23, na veika e dau vakavuna na daligada me “didivara” se tabonaki na matada ki na veika vakayalo. Na veidusimaki cava eda sa ciqoma tiko nikua mai vua na Kalou kei ira na Nona italai? Na sala cava eda sa cukiraka tiko kina na “qele vinaka”? (tikina e 23).

• Sa rawa mo sureta e vica ena lewe ni kalasi mera na mai vakavulica e dua na tiki ni vosa nei Elder Dallin H. Oaks “Na Vosa Vakatautauvata ni Daukakaburaki” (Ensign se Liaona, Me 2015, 32–35). Na cava e vakaikuritaka na itukutuku oqo meda kila vinaka kina na vosa vakatautauvata?

Maciu -35: 13:24–35, 44–53

Ena vukei keda na vosa vakatautauvata i Jisu meda kila vinaka na tubu, icavacava, kei na yaga ni Nona Lotu.

• O na vukei ira vakacava na lewe ni kalasi mera kila vinaka na dina me baleta na Lotu e vakavulici tiko ena vosa vakatautauvata i Jisu ena Maciu 13? Sa rawa mo vola e vica na vosa vakatautauvata ena vava ni volavola (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale kei na Nodra iVakavuvuli na Peresitedi ni Lotu: Josefa Simici, 293–303). Kerea e vica na ilawalawa lalai vei ira na lewe ni kalasi mera vulica na vosa vakatautauvata yadua ka raica na veika era sa vulica baleta na tubu kei na icavacava ni Lotu. Dua na sala mera cokota vata kina na vakasama mai na ilawalawa yadua o ya me droinitaki e dua na wirini levu ena vava ni volavola ka vola kina Lotu i Karisito (“na matanitu vakalomalagi”). Ni ra veiwasei na ilawalawa yadua, mera vola e so na ka ena wirini era sa vulica baleta na tubu kei na icavacava ni Lotu.

  e qoli tiko ena lawa e dua na tagane

  Na matanitu vakalomalagi sa vaka nona lawa ni ika na gonedau.

• Na cava eda sa vulica me baleta na yaga ni noda sa mai itaukei nida sa mai lewena na Lotu mai na vosa vakatautauvata ni iyau vunitaki ena were kei na mataniciva vinaka, e tiko ena Maciu 13:44–46? Eso na lewe ni nomu kalasi (se so era kila) era sa solibula oti beka —ka lelevu se lailai—me yaco mera lewe ni Lotu. Sureti ira na lewe ni kalasi mera wasea nodra solibula se raica eso me rawa ni ra itaukei nira sa mai lewena na Lotu. Na veivakalougatataki cava sa yaco ena vuku ni ka oqo? Sa rawa mo wasea na italanoa i Peresitedi Gordon B. Hinckley me baleta na sotia ena mataivalu e wai ena “iKuri ni iVurevure.” Sureti ira na lewe ni kalasi mera vakasamataka vakatitobu na veika era sa vakauqeti kina mera solibula kina ena Lotu.

Maciu 13:24–30, 37-43

Ni na oti na vuravura, ena vakasokumuni ira na yalododonu na Turaga ka vakarusai ira na tamata ca.

• O na vukei ira vakacava na lewe ni kalasi mera vuli mai na vosa vakatautauvata ni witi kei na co ca ena vukea mera Yalododonu Edaidai ka dau yalodina tikoga? Tekivu ena nomu sureta e dua na lewe ni kalasi me vakalekalekataka na vosa vakatautauvata kei na kena ibalebale. Ena veivuke talega ni vakaraitaki na iyaloyalo ni witi kei na co ca mai na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Na cava eso na lesoni ena vosa vakatautauvata oqo me baleti keda nikua? Na cava e bibi kina meda kila ni sa vakatara na Turaga vei ira na Nona Yalododonu mera “tubu vata” (Maciu 13:30) kei na tamata ca me yacova na tatamusuki? Eda na vaqaqacotaka tiko vakacava na noda vakabauta ena ituvaki oqo, ni sa voliti keda tu na veika ca?Na Vunau kei na Veiyalayalati 86 e kuria na veivakararamataki me vakayagataki na vosa vakatautauvata oqo ki na siga edaidai.

• E tukuna tiko na itukutuku nei Elder L. Tom Perry ena “iKuri ni iVurevure” ni sila ca e matataka na “sala ca ka vakavuravura” e dau curuma na noda bula. Me vukei ira na lewe ni kalasi mera vakasamataka vakatitobu nodra rawa ni kila na mataqali sila ca vakayalo oqo, vola ena tiki ni pepa eso e vica na dina ni kosipeli kei na kena e lasu, na vakasama se ivakarau vakavuravura. Biuta na tikinipepa ena dua na koniteina. Mera qai digitaka na lewe ni kalasi e vica ka veivosakitaka na kena e dina kei na kena e lasu. (E vuqa vei ira na dina oqo kei na kena e lasu era sa vakatakilai tiko mai ena vosa ni koniferedi raraba; ka mo rai kina baleta na vakasama eso.) Eda na muria vakacava na ivakasala nei Elder Perry meda “vakabulabulataka na ka e vinaka” ki na noda bula?

ivakatakilakila ni vuli

Vakayaloqaqataki na Vuli ena iTikotiko

Mo tukuna ni iwiliwili ni macawa mai oqo e tukuni ira tiko era sa dau muri Jisu ia era “sa sega tale ni lako vata kaya” (Joni 6:66). Tukuna vei ira na lewe ni kalasi ni rawa mera kune vakararamataki ena vukei ira kei na so tale mera yalodina tikoga vua na iVakabula.

ivakatakilakila ni ivurevure

iKuri ni iVurevure

Maciu 13; Luke 8; 13

“E dina, se vavei?”

E wasea o Peresitedi Gordon B. Hinckley na gauna a sotava kina e dua na sotia ni mataivalu e wai mai Esia a se qai lewena walega na Lotu:

“A vakaveikilaitaki vei au o koya ni bera toka na nona lesu tale ki na nona vanua dina. Keirau a mai veitalanoataka tiko na [dina ni kopsipeli],kau kaya vua: ‘ko Ira na lewe ni nomuni vanua era sega ni lotu Vakarisiito. Na cava ena yaco ni ko sa lesu ki vale ka sa lotu va-Karisito, ka, vakabibi cake, e dua na Momani lotu va-Karisito?’

“A vakaturubuto na matana, ka sauma lesu, ‘Eratou na rarawa sara na noqu matavuvale. Eratou na vakasavi au tani beka ka okata niu sa mate. Ia me baleta na noqu veisiga ni mataka kei na noqu bula, sa na tasogo beka vei au na madigi kece sara.’

“Au a taroga yani, ‘O sa tu vakarau beka mo sotava na veika kece oqori ena vuku ni kosipeli?’

“A seraka mai, na yaloka ni matana buto, ka tonawanawa ena wainimata, … ka sauma mai, ‘E dina, se vavei?’

“Ena noqu madua niu a taroga na taro koya, au a sauma lesu yani, ‘Io, e sa dina.’

“Ka a sauma mai o koya, ‘Ia na cava tale e yaga cake?’” (“It’s True, Isn’t It?” Ensign, July 1993, 2).

E dodonu meda vakabulabulataka na veika vinaka.

E vakavulica o Elder L. Tom Perry: O koya na meca makawa oya ni kawatamata sa qai kunea e vuqa sara na sala e rawa ni vakasamataka me rabailevu kina na vanua e kaburaka tiko yani kina na sila ca. Sa kunea rawa o koya na sala me ra curubasikata yani kina na veitikina savasava ni noda veivuvale. Sa yaco me rabailevu sara na veika ca vakavuravura ka vaka me sega ni dua na sala dina me vakawabokotaki kina. Era yaco mai ena sala wa ni livaliva kei na maliwalala ki na veiyaya sara ga eda taracake me vakavulici keda ka vakamarautaki keda. Erau sa tubu vata vakaveivolekati na witi kei na sila ca. Na dauveiqaravi ena were e dodonu, ena nona igu taucoko me karona na ka vinaka ka vakaukauwataka ka vakarairaivinakataka me kakua kina ni taleitaka na mata se na daliga na sila ca” (“Kunea na Vakacegu e Tudei ka Tara Cake na Matavuvale Tawamudu,” Ensign se Liaona, Nove. 2014, 44).

Vakatorocaketaki ni Noda Veivakavulici

Me usutu ni nomu veivakavulici na ivunau. Raica me vakatabakidua na veivosaki ena vunau e vakayavutaki ena ivolanikalou. O na cakava oqo ena nomu kerea na kalasi mera wilika taumada mai na ivolanikalou, me usutu ni veivosaki ni kalasi na ivolanikalou, ka kerea na kalasi mera wasea na nodra i vakadinadina baleta na vunau dina. (Raica na Veivakavulici ena iVakarau ni iVakabula, 20–21.)