Sa vakabula o Jisu e dua na tamata wamalai

Sa Tu e Tabana na Veivakabulai, maivei Jon McNaughton

4–10 ni Maji

Maciu 8–9; Marika 2–5

“Sa Vakabulai Iko na Nomu Vakabauta”

Ena tekivu nomu vakarau veivakavulici ni ko vulica ena masumasu na Maciu 8–9 kei na Marika 2–5. Ena rawa ni qaqaco nomu vulica naLako Mai, Mo Muri Au—Me Baleta na Tamata Yadua kei na Matavuvale ka vakauqeta na vakasama ni veivakavulici me ikuri ni kena e vakavulici tiko oqo.

Vola na Nomu Nanuma

ivakatakilakila ni veiwasei

Sureta na Veiwasei

Mo kauta mai eso na iyaloyalo baleta na itukutuku e tiko ena Maciu 8–9 kei na Marika 2–5 (raica na Gospel Art Book, naba 40, 41, se LDS.org) se vola na veika oqo ena vava ni volavola. Kerea na lewe ni kalasi mera wasea na cava era kila me baleta na cakamana yadua. Na itukutuku cava era kunea ena caka mana oqo?

ivakatakilakila ni veivakavulici

Vakavulica na iVunau

Maciu 8–9; Marika 2; 5

E yaco na caka mana ena lewa ni Kalou kei na noda vakabauti Jisu Karisito.

• Era sa rairai kunea na kalasi na veivakararamataki kaukauwa ni ra vulica vakai ira na caka mana ena wase oqo (raica na levu ni veivakabulai ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Sa rawa mo sureta na lewe ni kalasi mera wasea nodra veivakararamataki vua e dua se ki na kalasi.

• Me vukei na lewe ni kalasi mera kila vinaka na kedrau isema na vakabauta kei na caka mana, me wiliki e vica na veivakabulai caka mana ena Maciu 8–9 kei na Marika 2; 5, ni vakasaqarai na vakabauta nei koya a vakabulai se nodra vakabauta na tamata. (Ke lailai na gauna me veivosakitaki kina na caka mana taucoko, taroga na lewe ni kalasi na caka mana cava e vakaibalebale cake vei ira.) Eso na ivolanikalou oqo ena laveta cake na nomudou veivosaki: Momani 9:15–21; Ica 12:12–16; Moronai 7:27–37; kei na Vunau kei na Veiyalayalati 35:8. Na cava e vakavulica na veivakabulai ni iVakabula kei ira na ivolanikalou oqo baleta na vakabauta kei na caka mana? Raica talega na Bible Dictionary, “Miracles.”

• Era tiko beka ena kalasi o ira sa vakabauta ka vakasaqara na caka mana, ia a sega ni yaco na caka mana ena sala era gadreva kina. Na cava era vakavulica na ivolanikalou kei ira na iliuliu ni Lotu? Ena vosa “Ciqoma na Lewa kei na Gauna ni Turaga,” a tukuna kina o Elder David A. Bednar na nona vakasalataka e dua na veiwatini ena ituvaki oqo (Ensign, Aug. 2016, 31–35; raica talega na 2 Korinica 12:7–10; V&V 42:43–52). Era sa raica beka na kalasi na veivakalougatataki ki na nodra bula se nodra bula eso tale ni sega ni yaco na caka mana a gadrevi?

• Ni wiliki na caka mana e tiko ena Maciu 8–9 kei na Marika 2; 5, eso era na vakataroga ena rawa beka me yaco na veika oqo nikua. A vakamacalataka o Moronai na noda siga nikua me “kainaki kina ni sa oti na gauna ni cakamana,” ia a yalataka talega ni Kalou sa Kalou tiko ga ni caka mana, ni Kalou sa “sega ni dauveisau ko Koya” (Momani 8:26; 9:18–21; raica talega na Moronai 7:27–29). O na vukea vakacava na kalasi me tubu cake na nodra vakabauta na kaukauwa ni Kalou me vakalougatataka na nodra bula? Sa rawa mo kerea mera wasea na caka mana eso era sa vakadinadinataka. Sa rawa talega mo wasea na caka mana eso mai na itukutuku makawa ni Lotu (raica na “iKuri ni iVurevure”).

e tara na nona isulu na iVakabula e dua na marama.

Vakararavi vua na Turaga, maivei Liz Lemon Swindle

Maciu 8:23-27; Marika 4:35-41

Sa tiko vei Jisu Karisito na kaukauwa me veivakacegui ena loma ni cava ni bula.

• O sa rairai kila tiko beka na ibolebole eso era sotava tiko na lewe ni kalasi. Ena vuku ga ni da sotava kece na vakatovolei ni noda bula, ni talevi na itukutuku ena Marika 4:35–41 ena rawa me tarai cake na nodra vakabauta na iVakabula ni ra na vakacegui kina. Solia ki na tamata yadua e dua na tiki ni pepa, ka kerea mera vola ena dua na yasana e dua na vakatovolei era sa sotava. Ena yasana ka dua, mera vola kina e dua na ka mai na Marika 4:35–41 e vakauqeti ira mera gole vua na iVakabula ni ra vakatovolei. Vakauqeti ira na lewe ni kalasi me ra wasea na veika era vola, kevaka era logaloga vinaka kina.

• Na serenilotu “Master, the Tempest Is Raging,” Serenilotu, naba 105, e yavutaki ena italanoa ena Maciu 8:23–27 kei na Marika 4:35–41. Sa rawa mera raica na lewe ni kalasi na qaqani sere e tukuna tiko na malanivosa ena ivolanikalou. Sa rawa mo vakaraitaka talega e dua na iyaloyalo e tukuna tiko na ka sa yaco (raica na Gospel Art Book, naba 40) ka veivosakitaka na cava e tukuna tiko o koya a droinitaka. Na cava tale eso na sala mo na vukea kina na lewe ni kalasi mera kila vinaka na ibalebale kei na kaukauwa ni caka mana oqo?

Marika 2:1–12

Na nodra vakabulai na yali tu e gadrevi kina na noda sasaga duavata.

• E vakavulica na itukutuku ni caka mana oqo na kena yaga na cakacaka ena duavata me vukei na iVakabula mera vueti era gagadre tu vakayalo ka vakayago. Na itukutuku nei Elder Chi Hong (Sam) Wong “Veivueti ena Duvata” (Ensign se Liaona, Nove. 2014, 14–16) me ikuri ni veivosakitaki na dina oqo. Sa rawa mo sureta e dua ena lewe ni kalasi me na mai taleva na itukutuku mai na ivolanikalou ka qai wasea na ka a vakavulica o Elder Wong. Na cava eda rawa ni vulica mai na Marika 2:1–12 me baleta na yaga ni cakacaka ena duavata mera vueti o ira era gagadre tu? (raica talega na Marika 3:24–25).

ivakatakilakila ni vuli

Vakayaloqaqataki na Vuli ena iTikotiko

Ni gadrevi mera vakayaloqaqataki na lewe ni kalasi mera wilika na Maciu 10–12; Marika 2; kei na Luke 7; 11 ena loma ni macawa mai oqo, tukuna ni ra na kunea ena wase oqo na ivakasala me na vukea nodra cakava nodra veikacivi kei na ilesilesi ena Lotu.

ivakatakilakila ni ivurevure

iKuri ni iVurevure

Maciu 8–9; Marika 2–5

Sa vakabula o Parofita Josefa Simici e dua e tauvimate.

Ena Julai 1839, e vuqa na Yalododonu era a vakasavi tani mai Missouri era a vakavale tiko ena qiqidreti, ena valelaca, kei na qele volekati Commerce, Illinois. E vuqa era a tauvimate, ka rau sa oca sara o Josefa kei Emma Simici ena sasaga mera vukei. E vakamacalataka vakaoqo o Wilford Woodruff na ka a yaco ena 22 ni Julai: “A siga ni Nona kaukauwa na Kalou. E vuqa sara na Yalododonu era a tauvimate ena tai ruarua ni Uciwai o [Mississippi], ka curumi ira yani o Josefa, taura na ligadra ka vakarota ena domo levu ena yaca i Jisu Karisito mera tucake mai na nodra idavodavo ka bula, ka ra sa tucake vakasauri mai na nodra idavodavo ena bula vinaka ena kaukauwa ni Kalou. … Sa dua na gauna dina ni reki” (Wilford Woodruff, Journal, July 22, 1839, Church History Library).

Sa vakamaravutaka na cava o Elder Franklin D. Richards.

E talanoataka o Elder LeGrand Richards, e dua na lewe ni Kuoramu ni iApositolo Le Tinikarua, e dua na gauna ni nona bula na tukana, o Elder Franklin D. Richards, ka a iliuliu tiko ni dua na ilawalawa ni Kai Bolatagane Yalododonu ena 1848, era a kosova tiko na Wasawasa Atalanitika ki Amerika: “Na waqa e vodo tiko kina o [Elder Richards] sa vakaleqai sara tiko mai na [dua na cava rerevaki], sa yaco sara me gole yani vua o kavetani ni waqa ka kerea me masuta na Turaga ena vuku ni waqa kei ira na kena pasidia; ena nona nanuma o Tukaqu ni sa yalataki tu vua na kaukauwa me vunauca na draki, a gole mai na dreke ni waqa ka laveta na ligana i lomalagi ka vunauca na wasawasa kei na uwa, ka vakasauri ga na kena sa maravu” (ena Conference Report, Apr. 1941, 84).

Vakatorocaketaki ni Noda Veivakavulici

Wasei wasoma ni ivakadinadina. Na nomu ivakadinadina, rawarawa ka dina baleta na dina vakayalo sa rawa me veivakauqeti kaukauwa vei ira o vakavulica. E sega ni gadrevi me titobu se balavu na nomu ivakadinadina. Sa rawa, me ivakadinadina rawarawa, ni sa caka mana na kosipeli sa tu ena nomu bula.