« 29 nō ’ēperēra–5 nō mē. Ioane 7–10 : ’O vau te tīa’i māmoe maita’i » Mai, pe’e mai—Nō te Ha’api’ira’a Sābati : Faufa’a ’Āpī 2019 (2019)
« ’29 nō ’ēperēra–5 nō mē. Ioane 7–10 », Mai, pe’e mai—Nō te Ha’api’ira’a Sābati : 2019
Nā te ta’ata hara ’ore, nā Liz Lemon Swindle
29 nō ’ēperēra–5 nō mē.
Ioane 7–10
« ’O vau te tīa’i māmoe maita’i »
E noa’a ia ’outou ’e i tā ’outou mau pīahi te mau ’ite ’a tai’o ai i te Ioane 7–10 i teie hepetoma. ’A ha’amana’o ē e ti’a i te mau mana’o i roto i teie arata’ira’a e tauturu ’eiaha rā e mono i te fa’aurura’a tā ’outou e fāri’i nā roto i te tai’ora’a i te mau pāpa’ira’a mo’a.
’A pāpa’o i tō ’outou mana’o
Ani ’ia fa’a’ite mai
’A fa’aha’amana’o i te mau pīahi nō ni’a i te faufa’a rahi i te fa’arirora’a i tō rātou ’utuāfare ’ei ha’apūra’a nō te ha’api’ira’a mai i te ’evānelia. E aha te mau pāpa’ira’a mo’a i roto i te Ioane 7–10 tā te mau pīahi i tuatāpapa ’e tō rātou mau ’utuāfare i roto i te hepetoma ? E aha te mau pōro’i tei tauturu rahi ia rātou ?
Ha’api’i i te ha’api’ira’a tumu
’O Iesu Mesia te Fa’aora o te ao nei.
-
I roto i te Ioane 7–10, ’ua parau te Fa’aora e rave rahi mau parau o te nehenehe e tauturu i te mau pīahi ’ia ta’a maita’i i tāna misiōni ’e ’ia ha’afātata atu ā iāna. ’A feruri i te ani i te mau pīahi ’ia tai’o i teie mau pāpa’ira’a mo’a ’e ’ia fa’a’ite mai e aha tā te reira e ha’api’i nei nō ni’a i te misiōni hanahana ’a te Fa’aora. Nāhea tō te Mesia rave fa’aotira’a i teie mau ’ohipa i roto i tō tātou orara’a ?
-
Ioane 7:37–39 : « Te ta’ata i hia’ai ra, e haere mai ’oia iā’u nei ’a inu ai »
-
Ioane 8:12 ; 9:4–5 : « Te māramarama o te ao »
-
Ioane 8:58 : « ’Aita Aberahama i fānau, tē vai nei au » (’a hi’o te arata’ira’a nō teie hepetoma i roto Mai, pe’e mai—Nō te mau ta’ata iho ’e te mau ’utuāfare nō te mau mana’o nō ni’a i teie ’īrava)
-
Ioane 9:8–10, 35–38 : « Te Tamaiti a te Atua »
-
Ioane 10:7–9 : « Te ’ūputa »
-
Ioane 10:11–14 : « Te tīa’i māmoe maita’i »
-
Māramarama o te Ao, nā Howard Lyon
’A ora ai tātou i te mau ha’api’ira’a a Iesu Mesia, e ’ite tātou ē e parau mau te reira.
-
E nehenehe te mau pīahi e ta’a maita’i a’e e nāhea te ha’apa’ora’a i te hō’ē fa’auera’a e patu ai i te hō’ē ’itera’a pāpū, ’ia fa’aauhia teie ravera’a i te ha’api’ira’a mai i te tahi ’ite nā roto i tō te ta’ata iho ha’ara’a. ’Ei hi’ora’a, e nehenehe tā ’outou e ani i te mau pīahi tei ’ite i te ha’uti ’aore rā i te fa’ata’i i te hō’ē tauiha’a ’upa nō tē fa’a’ite mai ē nāhea tō rātou fa’ananeara’a i teie mau ’ite. Nāhea tō rātou ha’utira’a o rātou iho i ha’api’i rahi ai ia rātou, ’eiaha rā i te māta’ita’i noa i te tahi atu ta’ata ’ia ha’uti ? ’Ei piha ha’api’ira’a, ’a tuatāpapa e nāhea te tauto’ora’a i te ha’api’ira’a i te hō’ē ’ite ’ia fa’aauhia i te ravera’a vārua tā te Fa’aora i fa’a’ite mai i roto i te Ioane 7:14–17. E aha te mau ’itera’a tā te mau pīahi e nehenehe e fa’a’ite mai nō ni’a i te pe’era’a i teie ravera’a nō te tītau i te ’ite vārua ?
-
Nāhea e nehenehe ai ia ’outou ’ia fa’ahōho’a i te mau parau mau tei ha’api’ihia i roto i te Ioane 7:14–17? Te hō’ē mana’o o te anira’a ïa i te mau pīahi ’ia fa’a’ite mai i te mau ’ohipa tā rātou i rave i noa’a mai ai ia rātou te hō’ē ’itera’a pāpū nō ni’a i te hō’ē parau mau o te ’evanelia nā roto i te orara’a i te reira. E hōho’a maita’i te ’ā’amu tei fa’ati’ahia mai e te tuahine Bonnie L. Oscarson i roto i « Te tahi atu mau rāve’a Tauturu ». ’A hōro’a te taime i te mau pīahi ’ia feruri i te hō’ē parau tumu o te ’evanelia o tā rātou e hina’aro e tītau i te mau ’itera’a pāpū pūai a’e, ’e ’a fa’aitoito ia rātou i muri iho ’ia ha’amau i te mau fā ta’a ’ē nō te ora hau atu ā i taua parau tumu ra.
’Ia ’ite ana’e tātou ia Iesu Mesia, e ’ite ato’a ïa tātou i te Metua.
-
’Ua parau o Elder Jeffrey R. Holland : « Tē māuiui nei te tahi i roto i teie ao i teie mahana nō te hō’ē ’itera’a hape nō ni’a i [te Atua te Metua]… E rave rahi mau ta’ata i teie tau e pārahi māhanahana nei i roto i te rima o Iesu, ’aita rā rātou e au maita’i i te feruri i te fārereira’a mata’u e te Atua » (« Te hanahana rahi o te Atua », Ensign ’aore rā Liahona, Novema 2003, 71). E aha tā te mau parau a te Fa’aora i roto i te Ioane 8:18–19, 26–29 e ha’api’i nei nō ni’a i te tū’atira’a i rotopū iāna ’e tōna Metua Tāne ? I muri a’e i te tai’ora’a ’e te tuatāpapara’a i teie mau ’īrava, e nehenehe tā te mau pīahi e pāpa’i i ni’a i te tāpura ’ere’ere te tahi mau mea tā Iesu i rave, i parau, ’aore rā i ha’api’i. E aha tā tātou i ha’api’i mai nō ni’a i te Atua te Metua nā roto mai i teie mau ’ohipa ?
’Ua fa’ataehia te aroha o te Fa’aora i te mau ta’ata ato’a o te tātarahapa.
-
Ia rātou o tē mana’o nei ē ’ua fa’ahapahia rātou nō tā rātou mau hara, e nehenehe te ’ā’amu ’o te Fa’aora tei hōro’a i te aroha ’e te tātarahapara’a i te vahine tei ro’ohia i roto i te fa’aturira’a e riro ’ei tumu nō te fa’aitoitora’a. ’Aore rā mai te mea e fa’ahemahia te mau pīahi e fa’ahapa ia vetahi ē nō tā rātou mau hara, e nehenehe teie ’ā’amu e riro ’ei fa’aarara’a. E nehenehe tā ’outou e ani ia rātou ’ia tai’o i te Ioane 8:1–11, ma te ’imi i te mau pāhonora’a i te mau uira’a mai teie : E aha tā teie ’ā’amu e ha’api’i nei nō ni’a i te aroha o te Fa’aora ? Nāhea te fāri’ira’a i tōna aroha ’ia hara ana’e tātou e tauturu ai ia tātou ’ia fa’ahema-ana’e-hia tātou ’ia ha’avā ia vetahi ’ē ? (’a hi’o Alama 29:9-10). E nehenehe ato’a tā ’outou e fa’a’ite i te video « ’A haere ’e ’ia ’ore e hara fa’ahou » (LDS.org).
-
Nō te tauturu i te mau pīahi ’ia ’ite i te aura’a nō rātou iho i roto i te Ioane 8:1–11, ’a feruri i te vāhi i te piha nā roto e toru pupu—hō’ē nō te fa’atumu i ni’a i te mau parau ’e te mau ’ohipa a te mau pharisea, te piti, nō te fa’atumu i ni’a i te mau parau ’e te mau ’ohipa a te Fa’aora, e te tahi nō te fa’atumu i ni’a i te mau parau ’e te mau ’ohipa a te vahine. ’A ani i te pupu tāta’itahi ’ia hāmani i te hō’ē tāpura nō te mau parau mau pae vārua tā te reira e ha’api’i mai nei nā roto i te tai’ora’a i te mau tufa’a ato’a o te ’ā’amu.
-
’Aita tātou i te tahi taime e ’ite ra i te mau huru ’a ha’avā ai tātou ia vetahi ’ē. Teie te tahi ’ohipara’a nō te tauturu i te mau pīahi ’ia ha’avī i teie peu : ’A ani i te mau pīahi ’ia hāmani i te hō’ē tāpura o te mau rāve’a e ha’avā ai tātou i te mau ta’ata (’ia au i tō rātou hōho’a mata, tō rātou huru, tō rātou orara’a na mua atu, ’e te tahi atu ā). ’A hōro’a i te mau pīahi te tahi mau ’api parau tāpūpūhia mai te hōho’a o te hō’ē ’ōfa’i, ’e ’a ani ia rātou ’ia mā’iti i te hō’ē rāve’a nō te ha’avā ia vetahi ’ē tā rātou i mana’o ē ’ua hape rātou, ’e ’a pāpa’i atu i te reira i ni’a i te hō’ē ’ōfa’i parau. E aha tā tātou i ha’api’i mai nā roto mai i te mau parau a te Fa’aora i te mau pharisea i roto i te Ioane 8:1–11 ? ’A ani i te mau pīahi ’ia pāpa’i i te tahi atu pae o tā rātou ’ōfa’i parau te tahi mea o te fa’aha’amana’o ia rātou ’eiaha e ha’avā (penei a’e te hō’ē pereota nō roto mai ia Ioane 8).
Fa’aitoito i te ha’api’ira’a mai i te fare
’A ani i te mau pīahi ’ia feruri i te hō’ē taime i mo’e ai te tahi mea faufa’a roa tā rātou. I roto i te mau pāpa’ira’a mo’a nō te ha’api’ira’a i te hepetoma i mua nei, e ha’api’i mai rātou e aha te mana’o ’o te Metua i te Ao ra ’e ’o Iesu Mesia nō ni’a i te mau ta’ata tei mo’e.
Te tahi atu mau rāve’a tauturu
Nā roto i te orara’a i te hō’ē parau tumu e tauturu ia tātou ’ia noa’a i te hō’ē ’itera’a pāpū nō te reira.
’Ua parau te tuahine Bonnie L. Oscarson:
« ’Ua ha’api’i te Fa’aora ē, ’o tei hina’aro māite i te ha’apa’o i tōna ra hina’aro, e ’ite ïa i ta’u e ha’api’i nei e na te Atua, e nā’u iho’ [Ioane 7:17]. I te tahi taime, e tāmata tātou e ha’amata nā te hope’a mai. ’Ei hi‘ora’a, e pe’e paha tātou i teie reni arata‘i : E ’oa’oa vau ia ora i te ture nō te tufa’a ’ahuru, e hina’aro rā vau na mua ’ia ’ite ē, e parau mau ānei te reira. Penei a’e tē pure atoa’ paha tātou nō te fari’i i te hō’ē ’itera’a pāpū nō ni‘a i te ture nō te tufa’a ’ahuru ma te ti‘aturi ē, e ha’amaita’i mai te Fatu ia tātou i teie ’itera’a pāpū nā mua tātou e fa’aī ai i te ’api parau hōro‘a. E ’ere mai te reira te huru. Tē tīaʻi nei te Fatu ’ia fa’a’ohipa tātou i te fa’aro’o. Tītauhia ia tātou ’ia ’aufau tāmau i te tufa’a ’ahuru ti’a ma te ha’avare ’ore nō te fāri’i i te hō’ē ’itera’a pāpū nō ni’a i te tufa’a ’ahuru …
’Ua hina’aro vau e fa’a’ite ia ’outou i te hō’ē hi’ora’a e nāhea ra te orara’a i te hō’ē parau tumu e tauturu ai ia tātou ’ia fa’afāriuhia i terā parau tumu… ’Ua ha’api’i maita’i mai tō’u nā metua ’e ’orometua i te fare purera’a i te faufa’a ’ia fa’atura i tō’u tino, ’ia vai te feruriraa mā, e hau roa atu, ’ia ha’api’i mai ’ia ti’aturi i te mau fa’auera’a a te Fatu. ’Ua fa’aoti a’era vau ’eiaha e haere i te mau vāhi ’ua mātau vau ē, e ava, e ’ava’ava ’e e rā’au ta’ero tō reira. Tē aura’a, ’aita ïa vau i roto i te reira mau fa’a’oa’oara’a, e mea varavara ato’a vau i te arapaehia e te tamāroa. Riro mai nei te rā’au ta’ero ’ei ’ohipa mātau nā te feiā ’āpī, ’e ’aita te fifi o te reira i ’ite-maita’i-hia i terā ra tau. E rave rahi o tō’u mau hoa tei ro’ohia i te tahi fifi i te roro nō terā mau rā’au ta’ero ’e ’aore rā, e’ita fa’ahou e nehenehe e fa’aea i teie ’ohipa. ’Ua māuruuru roa vau ē ’ua ha’api’ihia mai iā’u ’ia ora i te parau pa’ari i tō’u fare, ’e ’ua fāri’i au i te hō’ē ’itera’a pāpū hōhonu nō te reira parau tumu o te ’evanelia i tō’u fa’a’ohipara’a i te fa’aro’o ’e i tō’u orara’a i te reira. Te mana’o maita’i i tae mai nō tō’u orara’a i te hō’ē parau tumu mau nō te ’evanelia, o te Vārua ïa nō te Vārua Maita’i tei ha’apāpū mai ē, e parau tumu mau te reira » (« ’Ia fa’afāriuhia ’oe », Ensign ’aore rā Liahona, Novema 2013, 77).
Ha’amaita’ira’a i tā tātou ha’api’ira’a
’A ora parau-ti’a ’ia arata’ihia e te Vārua. ’Ia ora ana’e ’outou i te ’evanelia, ’ua ti’amā ïa ’outou i te auhoara’a a te Vārua, o te ’orometua ha’api’i maita’i roa a’e ïa. ’A ’imi ai ’outou i tāna arata’ira’a, e hōro’a mai te Vārua Maita’i ia ’outou te mau mana’o ’e te mau fa’a’itera’a e nāhea ’ia pāhono atu i te mau hina’aro o te feiā tā ’outou e ha’api’i ra (’a hi’o Ha’api’ira’a mai tā te Fa’aora, 5).