« 20–26 nō mē. Mataio 21–23 ; Mareko 11 ; Luka 19–20 ; Ioane 12 : ’A hi’o nā, te haere mai ra tō Ari’i‘ » Mai, pe’e mai—Nō te Ha’api’ira’a Sābati : Faufa’a ’Āpī 2019 (2019)
« 20–26 nō mē. Mataio 21–23 ; Mareko 11 ; Luka 19–20 ; Ioane 12 », Mai, pe’e mai—Nō te Ha’api’ira’a Sābati : 2019
Zakaio i ni’a i te tumu sukamino, nā James Tissot
20–26 nō mē.
Mataio 21–23 ; Mareko 11 ; Luka 19–20 ; Ioane 12
« ’A hi’o nā, te haere mai ra tō Ari’i »
’A tai’o ai ’outou Mataio 21–23 ; Mareko 11 ; Luka 19–20 ; ’e Ioane 12, ’a feruri i te mau uira’a o tā ’outou e nehenehe e ui atu nō te pāhono i te mau hina’aro o tā ’outou mau pīahi. E fa’auru mai te Vārua Maita’i ia ’outou ’ia ’ite e aha te mau uira’a ’e te mau parau tumu, tei fa’ahitihia i roto i teie arata’ira’a, o te pāhono maita’i atu i taua mau hina’aro ra.
’A pāpa’i i tō ’outou mana’o
Ani ’ia fa’a’ite mai
I roto i te hepetoma hou te ha’api’ira’a, ’a ani i te tahi mau pīahi ’ia haere ineine mai nō te fa’a’ite i te hō’ē ’ohipa i tupu ia rātou ’a tuatāpapa ai rātou i te mau pene tei fa’ata’ahia nō teie hepetoma. E aha te mau ha’amaita’ira’a tei tae mai ia rātou ’a tuatāpapa ai rātou i te mau pāpa’ira’a mo’a i roto i te hepetoma ?
Ha’api’i i te ha’api’ira’a tumu
’Ua mātau te Fa’aora ia tātou tāta’itahi.
-
’Ua mana’o paha tā ’outou mau pīahi ē e au ra ’ua mo’ehia rātou ’e ’aore rā ’ua mo’ehia rātou i te tahi mau taime o tō rātou orara’a. E nehenehe te ’ā’amu o Zakaio e tauturu ia rātou ’ia māramarama ē ’ua ’ite te Metua i te Ao ra ’e ’o Iesu Mesia ia rātou ’e tē tāu’a nei rāua ia rātou. Nō te tauturu i te mau pīahi ’ia fa’aau i teie ’ā’amu i tō rātou iho orara’a, ’a ani ia rātou ’ia mana’o ē, o Zakaio rātou. E aha tō ’outou mana’o i tāna i ha’api’i mai nō ni’a i te Fa’aora nā roto mai i tōna ’itera’a ? ’E aha tā tātou i ’apo mai nā roto i te mau tauto’ora’a a Zakaio i te ’imira’a i te Fa’aora ?
-
E riro ato’a paha ’ei tauturura’a ’ia ani i te mau pīahi ’ia feruri i te tahi atu mau hi’ora’a i roto i te mau pāpa’ira’a mo’a i raira te Fatu i te pi’ira’a i te mau ta’ata ma tō rātou iho i’oa. (Te vai nei te tahi mau hi’ora’a i roto i « Te tahi atu mau rāve’a tauturu ».) E nehenehe ato’a ’outou e ani i te mau pīahi ’ia fa’a’ite mai i te mau ’itera’a tei ha’apāpū ia rātou ē, ’ua mātau te Fatu ia rātou tāta’itahi.
Mataio 21:1–11 ; Mareko 11:1–11 ; Luka 19:29–44 ; Ioane 12:12–16
’O Iesu Mesia tō tātou Ari’i.
-
E nehenehe te hō’ē ’ohipara’a ’ōhie e ’ōmua i te hō’e tāu’ara'aparau nō ni’a i te tomora’a hanahana o te Fa’aora i Ierusalema : E nehenehe te mau pīahi e rave rahi e pāpa’i hōho’a i ni’a i te tāpura ’ere’ere te mau mea e tū’ati i te hō’ē ari’i, mai te hō’ē torōna ’e ’aore rā te hō’ē terōno ’a tamata ai te tahi atu mau pīahi i te ’imi e aha ra tā rātou e pāpa’i hōho’a. I muri iho e nehenehe tā te tahi atu mau pīahi e pāpa’i hōho’a i te hō’ē pua’arehenua ’āpī ’e te mau ’āma’a rā’au. E aha te tū’atira’a o teie mau mea i te hō’ē ari’i ? E nehenehe ’outou e fa’a’ite i muri iho i te hōho’a o te tomora’a hanahana o te Fa’aora i Ierusalema i roto i te arata’ira’a nō teie hepetoma i roto Mai, pe’e mai—Nō te mau ta’ata iho ’e te mau ’utuāfare ’e ’a ani i te mau pīahi ’ia tai’o Mareko 11:1–11. Nāhea teie mau ta’ata i te ’itera’a ia Iesu ’ei Ari’i nō rātou ? Nāhea tātou i te ha’amori ia Iesu Mesia mai tō tātou Ari’i nā roto i tā tātou mau parau ’e mau ’ohipa ?
-
Nō te tauturu i te mau pīahi ’ia ta’a maita’i ē o Iesu Mesia tō tātou Ari’i, e nehenehe tā ’outou e ani ia rātou ’ia tai’o fa’ahou i te hīmene « ’A Haere mai, Te Ari’i », Te Mau Hīmene, no. 27, ’e ’aore rā te tahi ’ē atu hīmene nō ni’a ia Iesu ’ei Ari’i nō tātou. E aha te mau parau i roto i te hīmene e fa’aha’amana’o mai nei ia tātou i te mau parau mau i roto ia Mataio 21:1–11 ; Mareko 11:1–11 ; Luka 19:29–44 ; ’e Ioane 12:12–16 ?
Nā fa’auera’a rahi e piti o te arohara’a i te Atua ’e te arohara’a ia vetahi ’ē ma tō aroha ia tātou iho.
-
’Ua ha’api’i te peresideni Dieter F. Uchtdorf ē te ravera’a i te mau mea ’ē atu i nā fa’auera’a rahi e piti i te pū nō tō tātou orara’a mai te te’ara’a ïa i te mau te’a i ni’a i te hō’ē patu āteatea ’e te nana’ora’a i te mau fā nā piha’i iho i te mau te’a (’a hi’o « Fa’atanora’a i rōpu », Ensign 'e ’aore rā Liahona, Tenuare 2017, 4–5). E tauturu ānei te hi’ora’a i teie fa’aaura’a i te mau pīahi ’ia māramarama i te Mataio 22:34–40 ? Te hō’ē rāve’a nō te rave i te reira o te hōhorara’a i te hō’ē ’api parau rahi i ni’a i te tahua ’e ’ia fa’atopa tāta’itahi atu i te hō’ē pēni ’aore rā pēnitara i ni’a i te ’api. E nehenehe tā rātou e pāpa’i i muri iho i te mau fā i topahia atu e tā rātou mau pēni ’aore rā pēnitara ’e ’ia tāpa’o i te hō’ē fa’auera’a i ni’a i te fā tāta’itahi. I muri iho i te tai’o-’āmui-ra’a Mataio 22:34–40 e nehenehe tā ’outou e pāpa’i hōho’a i te hō’ē fā ’āpī o te ha’amenemene i te mau fā ato’a ’e ’ia tāpa’o atu « aroha i te Atua ’e aroha i tō ta’ata tupu ». Nāhea te fa’atumura’a i ni’a i nā fa’auera’a rahi e piti e tauturu ai ia tātou ’ia ha’apa’o i te tahi atu mau fa’auera’a a te Atua ? Nāhea tātou e nehenehe ai e ha’apāpū ē tē fa’atumu nei tātou i tō tātou ha’apa’ora’a i ni’a i teie nā fa’auera’a e piti ?
E pāruruhia tātou ’ia ’ape ana’e tātou i te pe’e atu i te mau arata’i matapō.
-
E fana’o ānei tā ’outou mau pīahi i te ’āparaura’a i te tā’o « te mau arata’i matapō », tā te Fa’aora i fa’a’ohipa nō te fa’a’ite i te mau pharisea ’e te mau pāpa’i parau tei matapō i te pae vārua ? (Mataio 23:16). E mana’o paha ’outou i te hō’ē rāve’a nō te fa’a’ite e aha rā te huru ’ia pe’e ana’e te tahi ta’ata i te hō’ē ta’ata matapō. ’Aore rā e nehenehe tā te mau pīahi e pāpa’i i ni’a i te tāpura ’ere’ere te mau tāpa’o ’o te hō’ē arata’i matapō, mai tei fa’a’itehia i roto i te Mataio 23:13–33. Nō te tu’u fa’ahou i roto i te tāpura, ’a feruri i te ’imi i te tahi atu ā mau pāpa’ira’a mo’a o tē ha’api’i nei i te matapōra’a pae vārua mai te 2 Korinetia 4:3–4 ; 2 Nephi 9:28–32 ; ’e Iakoba 4:14. Nāhea e nehenehe ai ia tātou e ’ite ’e e ’ape atu i te mau arata’i matapō ?
-
E nehenehe ’outou e tauturu i te mau pīahi ’ia māramarama ē e mea ha’apa’o a’e te mau pāpa’i parau ’e te mau pharisea i te auro ’e te mau ō i roto i te hiero ’eiaha rā te aura’a mau o te hiero (’a hi’o ia Mataio 23:16–22). Nō te rave i te reira, ’a feruri i tē fa’a’ite atu i te parabole nō te poe ’e nō te ’āfata ’a te peresideni Boyd K. Packer i roto i « Te tahi atu mau rāve’a tauturu ». E aha te mea e fa’ahahi ’ē ia tātou ’ia ’oa’oa i te mau ha’amaita’ira’a mau o te hiero ? o te purera’a ’ōro’a ?
Te telona tātarahapa ’e te pharisea fa’ahua parau-ti’a i roto i te hiero, nā Frank Adams
E nehenehe te fa’atenitenira’a ’a te ta’ata e ha’afifi ia tātou ’ia riro ’ei mau pipi itoito nā Iesu Mesia.
-
E’ita paha te tahi mau ta’ata o te ti’aturi ia Iesu Mesia e hina’aro e pāruru i tāna ’evanelia, i roto ihoa rā i te mau tōtaiete o te ha’afaufa’a ’ore nei ’e ’aore rā o te vahavaha nei i te mau ti’aturira’a fa’aro’o. E aha te mau ha’api’ira’a i roto i te Ioane 12:42–43 nō tātou i teie mahana ? E nehenehe ’outou e ani i te mau pīahi ’ia ’imi i roto i te mau pāpa’ira’a mo’a i muri nei ’e ’ia mā’imi mai i te feiā tei hina’aro i te fa’a’oa’oa i te ta’ata ’e te feiā tei hina’aro i te fa’a’oa’oa i te Atua : Exodo 32:1–8 ; 1 Samuela 15:18–25 ; Mataio 14:1–10 ; 1 Nephi 6:1–6 ; Mosia 17:1–12 ; ’e Moroni 8:16. E aha tā tātou i ’apo nā roto mai i teie mau hi’ora’a ? Nō te ’ite hau atu nō ni’a i tā tātou hōpoi’a i te fa’a’itera’a i tō tātou fa’aro’o i mua i te ta’ata, ’a hi’o i te a’ora’a a Elder Robert D. Hales, « Fa’aherehere i te ti‘amāra’a ’ia mā‘iti, pāruru i te ti’amāra’a pae fa’aro’o », Ensign e ’aore rā Liahona, Me 2015, 111–13.
Fa’aitoito i te ha’api’ira’a mai i te fare
’Ua tohu te Fa’aora ē, i te mau mahana hope’a nei e nehenehe te feiā tei mā’itihia i te ha’avarehia (’a hi’o Iosepha Semita—Mataio1:22). Nō te fa’auru i te mau pīahi ’ia tai’o Iosepha Semita—Mataio 1 ; Mataio 25 ; Mareko 12–13 ; ’e Luka 21 i teie hepetoma i mua, e nehenehe ’outou e parau atu ia rātou ē, e ’ite rātou i roto i teie mau pene te tāviri nō te ’ape i te ha’avarera’a o te mau mahana hope’a nei.
Te tahi atu mau rāve’a tauturu
’Ua mātau te Metua i te ao ra ia ’outou tāta’itahi.
’Ua parau o Elder Neal A. Maxwell : « Te fa’a’ite pāpū atu nei au ia ’outou ē ’ua mātau te Atua ia ’outou tāta’itahi… e mea maoro roa i teie nei (’a hi’o PH&PF 93:23). ’Ua here ’oia ia ’outou e mea maoro i teie nei. ’Aita ’oia i ’ite noa i te i’oa o te mau feti’a ato’a (’a hi’o Salamo147:4; Isaia 40:26) ; ’ua ’ite ’oia i tō ’outou i’oa ’e tō ’outou mau māuiui ato’a ’e tō ’outou mau ’oa’oa ! » (« ’A ha’amana’o i te Aroha o te Fatu », Ensign ’aore rā Liahona, Me 2004, 46).
Te mau taime i pi’i ai te Fatu i te mau ta’ata ma tō rātou i’oa.
Te parabole nō te poe ’e te ’āfata.
’Ua fa’a’ite mai te peresideni Boyd K. Packer i teie parabole : « ’Ua ’itea i te hō’ē ta’ata ho’o tao’a e ’imi nei i te mau piru te poe maita’i roa i te pae hope’a. ’Ua fa’a’ohipa ’oia i te ta’ata rima ’ī ’aravihi roa a’e ’ia hāmani i te hō’ē ’āfata piru nehenehe mau ’e ’ua tāpiri i te terevete nīnamu nō te fa’anehenehe i te reira. ’Ua fa’a’ite’ite ’oia i tāna poe tao’a rahi ’ia nehenehe ia vetahi ’ē ’ia fana’o ato’a i tāna tao’a. ’Ua hi’o ’oia i te mau ta’ata ’a haere mai ai rātou nō te māta’ita’i i te reira. ’Aita i maoro roa ’ua fāriu ’ē atu ’oia mā te ’oto. O te ’āfata tā rātou i māta’ita’i e ’ere rā te poe » (« Te mau arero auahi », Ensign, Me 2000, 7).
Ha’amaita’ira’a i tā tātou ha’api’ira’a
’Aita ’outou i tītauhia ’ia ha’api’i i te mau mea ato’a. E rave rahi mau mea e tāu’aparauhia i roto i te ha’api’ira’a tāta’itahi, ’aita rā i tītauhia ’ia ha’api’i i te tā’āto’ara’a i roto i te hō’ē noa taime ha’api’ira’a nō te ha’aputapū i te ’ā’au o te ta’ata—pinepine, e nava’i noa hō’ē ’aore rā e piti tumu parau rahi. ’A feruri ai ’outou i te mau hina’aro o te mau pīahi, e tauturu mai te Vārua ia ’outou ’ia ’ite e aha te mau parau tumu, te mau ’ā’amu, ’aore rā te mau pāpa’ira’a mo’a faufa’a rahi nō rātou » (Ha’api’ira’a mai tā te Fa’aora, 7).