« ថ្ងៃទី ២៩ ខែ កក្កដា–ថ្ងៃទី ៤ ខែ សីហា ។ កិច្ចការ ២២–២៨ ៖ ‹ អ្នកធ្វើការងារបម្រើ ហើយជាទីបន្ទាល់ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ២៩ ខែ កក្កដា–ថ្ងៃទី ៤ ខែ សីហា ។ កិច្ចការ ២២–២៨ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០១៩
ថ្ងៃទី ២៩ ខែ កក្កដា–ថ្ងៃទី ៤ ខែ សីហា ។
កិច្ចការ ២២–២៨
« អ្នកធ្វើការងារបម្រើ ហើយជាទីបន្ទាល់ »
សូមអាន កិច្ចការ ២២–២៨ ដោយអធិស្ឋាននៅក្នុងចិត្តថា ព្រះវិញ្ញាណបរិសុទ្ធនឹងបំផុសគំនិតអ្នកឲ្យដឹងថាត្រូវផ្ដោតលើអ្វី ដែលវានឹងជួយសិស្សរបស់អ្នក ។ សូមកត់ត្រាគំនិតនានាដែលមាននៅក្នុងគំនិតរបស់អ្នក គំនិតទាំងនេះប្រហែលជាការចាប់ផ្ដើមនៃផែនការសម្រាប់ការបង្រៀនរបស់អ្នក ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមឲ្យសិស្សសរសេរសេចក្ដីយោងបទគម្ពីរមួយមកពី កិច្ចការ ២២–២៨ ដែលធ្វើឲ្យពួកគេចាប់អារម្មណ៍នៅសប្ដាហ៍នេះ ។ សូមប្រមូលចម្លើយរបស់ពួកគេ ហើយអានខគម្ពីរទាំងនោះមួយចំនួន ។ សូមអញ្ជើញសិស្សបីបួននាក់ឲ្យចែកចាយថា ហេតុអ្វីបានជាខគម្ពីរទាំងនេះមានន័យចំពោះពួកគេ ។
បង្រៀនគោលលទ្ធិ
ទីបន្ទាល់មួយគឺជាការប្រកាសមួយអំពីសេចក្ដីពិតដោយផ្អែកលើចំណេះដឹង ឬជំនឿផ្ទាល់ខ្លួន ។
-
ទីបន្ទាល់របស់ប៉ុលទៅកាន់លោកភេស្ទុស និងស្ដេចអ័គ្រីប៉ា អាចជាឱកាសមួយដើម្បីពិភាក្សាអំពីអត្ថន័យនៃការថ្លែងទីបន្ទាល់ ។ អ្នកអាចចាប់ផ្ដើមដោយសុំឲ្យសិស្សរំឭក កិច្ចការ ២២:១–២១ និង ២៦:១–២៩ ឡើងវិញ ។ តើយើងរៀនអ្វីខ្លះមកពីគំរូរបស់ប៉ុលស្ដីពីការថ្លែងទីបន្ទាល់ ? តើគោលការណ៍អ្វីខ្លះបន្ថែមទៀតស្ដីពីការថ្លែងទីបន្ទាល់ដែលយើងរៀនមកពីសេចក្ដីថ្លែងការណ៍របស់អែលឌើរ អិម រ័សុល បាឡឺដ នៅក្នុង « ធនធានបន្ថែមទាំងឡាយ » ? ការច្រៀង ឬការលេងទំនុកតម្កើង « ទីបន្ទាល់ » ( ទំនុកតម្កើង ល.រ. ៧៤ ) អាចនឹងជួយនាំយកព្រះវិញ្ញាណចូលមកក្នុងការពិភាក្សារបស់អ្នក ។
-
សិស្សអាចទទួលបានការយល់ដឹងផ្ទាល់ខ្លួន នៅពេលពួកគេបានសិក្សាទីបន្ទាល់របស់ប៉ុលទៅកាន់លោកភេស្ទុស និងស្ដេចអ័គ្រីប៉ា ។ សូមអញ្ជើញពួកគេឲ្យចែកចាយ ។ តើការឆ្លើយតបរបស់ស្ដេចអ័គ្រីប៉ាចំពោះទីបន្ទាល់របស់ប៉ុលអាចជាការព្រមានអ្វីខ្លះចំពោះយើងសព្វថ្ងៃនេះ ? ( សូមមើល កិច្ចការ ២៦:២៨ ) ។ សិស្សក៏អាចគិតអំពីទីបន្ទាល់ផ្សេងទៀតមកពីបទគម្ពីរដែលបានបំផុសគំនិតដល់ពួកគេផងដែរ ។ ( ឧទាហរណ៍ខ្លះរួមបញ្ចូលទាំង យ៉ូប ១៩:២៥–២៧, នីហ្វៃទី ២ ៣៣:១០–១៥, អាលម៉ា ៥:៤៥–៤៨ និង គ. និង ស. ៧៦:២២–២៤ ) ។ ឬប្រហែលជាពួកគេអាចចែកចាយបទពិសោធន៍ដែលពួកគេបានទទួលឥទ្ធិពលដោយទីបន្ទាល់របស់មនុស្សម្នាក់ ។
-
ព្យាការី យ៉ូសែប ស៊្មីធ បានប្រៀបធៀបបទពិសោធន៍របស់លោកជាមួយនឹងការថ្លែងទីបន្ទាល់អំពីការនិមិត្តដំបូងទៅនឹងបទពិសោធន៍របស់ប៉ុលនៅចំពោះមុខស្ដេចអ័គ្រីប៉ា ( សូមមើល យ៉ូសែប ស្ម៊ីធ––ប្រវត្តិ ១:២៤–២៥ ) ។ ប្រហែលជាសិស្សអាចធ្វើការជាដៃគូដើម្បីបង្កើតបញ្ជីមួយអំពីភាពស្រដៀងគ្នារវាងពួកអ្នកបម្រើទាំងពីររូបនេះ ។ តើសកម្មភាពនេះជួយយើងឲ្យយល់អំពីរបៀបចែកចាយទីបន្ទាល់របស់យើងតាមរបៀបណា ទោះជាពេលធ្វើរឿងបែបនោះមានការលំបាកក្ដី ?
-
ទោះជាប៉ុលមិនបានស្វែងរកសាក្សីខាងវិញ្ញាណដែលគាត់បានទទួលនៅលើផ្លូវទៅកាន់ស្រុកដាម៉ាសក្ដី ក៏គាត់បានចំណាយពេលវេលាដែលគាត់នៅសេសសល់ក្នុងជីវិតរបស់គាត់ខិតខំដើម្បីថែរក្សា ហើយការពារទីបន្ទាល់របស់គាត់ដែរ ( សូមមើល កិច្ចការ ២២:១០, ១៤–១៦, ២៦:១៩ ) ។ គំរូរបស់ប៉ុលអាចជួយសិស្សរបស់អ្នកឲ្យយល់ថា ទីបន្ទាល់មួយតម្រូវឲ្យមានការប្រព្រឹត្ត និងពលិកម្ម ។ ដើម្បីចាប់ផ្ដើមការពិភាក្សាមួយអំពីការណ៍នេះ ប្រហែលជាសិស្សម្នាក់អាចពិពណ៌នាការខិតខំរបស់គាត់ដើម្បីក្លាយជាតន្ត្រីករ សិល្បៈករ ឬអត្តពលករដ៏ជំនាញម្នាក់ ។ តើការអភិវឌ្ឍជំនាញមួយបែបនេះស្រដៀងគ្នានឹងការទទួល និងការពង្រឹងទីបន្ទាល់មួយតាមរបៀបណា ? តើយើងត្រូវធ្វើការខិតខំអ្វីខ្លះដើម្បីទទួលហើយពង្រឹងទីបន្ទាល់មួយ ? ( សូមមើល ផងដែរ អាលម៉ា ៥:៤៦ ) ។
យើងមានការទទួលខុសត្រូវមួយដើម្បីធ្វើការងារបម្រើដល់មនុស្សដទៃ ។
-
ព្រះអម្ចាស់បានហៅប៉ុលឲ្យធ្វើជា « អ្នកធ្វើការងារបម្រើ » ( កិច្ចការ ២៦:១៦ ) ប៉ុន្តែពាក្យនេះមានន័យដូចម្ដេច ? ដើម្បីជួយសិស្សឲ្យរុករករបៀបដែលពួកគេអាចធ្វើការងារបម្រើដល់មនុស្សដទៃ អ្នកអាចសរសេរនៅលើក្ដារខៀននូវសំណួរមួយដូចជា តើអ្នកធ្វើការងារបម្រើមានន័យដូចម្ដេច ? សូមអញ្ជើញសិស្សឲ្យរកមើលចម្លើយនៅក្នុងធនធានដូចតទៅនេះ ៖ ម៉ាថាយ ២០:២៥–២៨, កិច្ចការ ២៦:១៦–១៨, នីហ្វៃទី ៣ ១៨:២៩–៣២ សេចក្ដីណែនាំដល់បទគម្ពីរទាំងឡាយ « អ្នកធ្វើការងារបម្រើ » scriptures.lds.org ។ នៅពេលពួកគេចែកចាយអ្វីដែលពួកគេរកឃើញ សូមលើកទឹកចិត្តពួកគេឲ្យពិភាក្សាអំពីវិធីដែលពួកគេទាំងអស់គ្នាអាចធ្វើការងារបម្រើដល់មនុស្សដទៃ រួមបញ្ចូលទាំងនៅក្នុងការហៅរបស់យើងក្នុងសាសនាចក្រផងដែរ ។
-
បងប្រុស ដាវីឌ អិល ប៊េក បានថ្លែងអំពីការទទួលខុសត្រូវរបស់អ្នកកាន់បព្វជិតភាពដើម្បីធ្វើការងារបម្រើដល់មនុស្សដទៃ ហើយការយល់ដឹងជាច្រើនទៀតរបស់លោកអាចអនុវត្តចំពោះអស់អ្នកដែលកំពុងបម្រើនៅក្នុងសាសនាចក្រ ( សូមមើល « Your Sacred Duty to Minister » Ensign ឬ Liahona ខែ ឧសភា ឆ្នាំ២០១៣ ទំព័រ ៥៥–៥៧ ) ។ ឧទាហរណ៍ តើដំណើររឿងរបស់ឈី ចនសុនបង្រៀនយើងអ្វីខ្លះអំពីការងារបម្រើដល់មនុស្សដទៃ ? [NO TRANSLAION]. តើគំរូអ្វីផ្សេងទៀតដែលសិស្សអាចចែកចាយបាន ? សូមទុកពេលឲ្យសិស្សគិតអំពីមនុស្សម្នាក់ដែលពួកគេអាចធ្វើការងារបម្រើនៅសប្ដាហ៍នេះ និងរបៀបដែលពួកគេធ្វើកិច្ចការនោះ ។
ប្រសិនបើយើងស្ដាប់តាមពួកព្យាការីរបស់ព្រះអម្ចាស់ ទ្រង់នឹងដឹកនាំយើង ហើយការពារយើងពីអំពើអាក្រក់ ។
-
សិស្សរបស់អ្នកប្រហែលជាធ្លាប់មានបទពិសោធន៍ កាលដែលពួកគេបានធ្វើតាមការដឹកនាំរបស់ពួកព្យាការី សូម្បីតែនៅពេលវាខុសប្លែកពីការប្រឹក្សារបស់ពួកអ្នកជំនាញខាងលោកិយ ឬគំនិតរបស់មនុស្សជុំវិញខ្លួនពួកគេក្ដី ។ សូមអញ្ជើញសិស្សពីរបីនាក់ឲ្យមកថ្នាក់ត្រៀមខ្លួនចែកចាយបទពិសោធន៍បែបនេះ ។ បន្ទាប់មក សូមអញ្ជើញសិស្សឲ្យចែកចាយអំពីរបៀបដែលមនុស្សជិះនៅលើសំពៅឆ្លើយតប កាលប៉ុលបានព្យាករថា សំពៅនោះ « នឹងមានអន្តរាយ ហើយខូចខាតជាច្រើន » ( កិច្ចការ ២៧:១០ ) ។ តើការឆ្លើយតបរបស់មនុស្សមួយចំនួនចំពោះការប្រឹក្សារបស់ព្យាការីស្រដៀងគ្នានៅក្នុងជំនាន់របស់យើងតាមរបៀបណា ?
-
តើយើងរៀនអ្វីខ្លះមកពី កិច្ចការ ២៧ អំពីការធ្វើតាមពួកព្យាការីរបស់ព្រះអម្ចាស់ ? ពាក្យដកស្រង់មកពីអែលឌើរ រ៉ូណល អេ រ៉ាសបាន នៅក្នុង « ធនធានបន្ថែមទាំងឡាយ » មាននូវសំណួរដើម្បីសញ្ជឹងគិត និងបញ្ជីមួយស្ដីពីគ្រោះថ្នាក់ដែលពួកព្យាការីសម័យបច្ចុប្បន្នបានព្រមានដល់យើង ។ តើអ្នកធ្លាប់ទទួលពរជ័យតាមរយៈការធ្វើតាមការប្រឹក្សារបស់ពួកព្យាការីនៅរស់តាមរបៀបណា ?
លើកទឹកចិត្តឲ្យមានការរៀនសូត្រនៅឯគេហដ្ឋាន
ដើម្បីជួយបំផុសគំនិតសិស្សឲ្យចាប់ផ្ដើមអានសំបុត្ររបស់ប៉ុល សូមឲ្យពួកគេនឹកស្រមៃថា សមាជិកមួយរូបក្នុងកូរ៉ុមនៃពួកដប់ពីរនាក់បានសរសេរសំបុត្រផ្ទាល់ខ្លួនមួយមកកាន់វួដរបស់អ្នក ។ តើយើងនឹងមានអារម្មណ៍បែបណាចំពោះសំបុត្រនោះ ? តើលោកអាចនឹងថ្លែងអ្វីខ្លះមកកាន់យើង ? សូមអញ្ជើញសិស្សឲ្យរក្សាគំនិតទាំងនេះ នៅពេលពួកគេអានសំបុត្ររបស់ប៉ុលដល់ពួកបរិសុទ្ធរ៉ូម ។
ធនធានបន្ថែមទាំងឡាយ
ការថ្លែងទីបន្ទាល់ ។
អែលឌើរ អិម រ័សុល បាឡឺដ បានថ្លែងអំពីទីបន្ទាល់របស់ប៉ុលនៅចំពោះមុខស្ដេចអ័គ្រីប៉ា ហើយបានបង្រៀនដល់យើងអំពីអត្ថន័យនៃការថ្លែងទីបន្ទាល់ ៖
« ការប្រជុំថ្លែងទីបន្ទាល់របស់យើងត្រូវផ្ដោតលើព្រះអង្គ សង្គ្រោះ គោលលទ្ធិនៃដំណឹងល្អ ពរជ័យនៃការស្ដារឡើងវិញ និងការបង្រៀននៃបទគម្ពីរ ។ យើងត្រូវជំនួសដំណើររឿង សៀវភៅស្ដីពីការធ្វើដំណើរ និងការបង្រៀនជាមួយនឹងទីបន្ទាល់បរិសុទ្ធ ។ អស់អ្នកដែលបានទទួលការទុកចិត្តឲ្យថ្លែង ហើយបង្រៀននៅក្នុងការប្រជុំរបស់យើងចាំបាច់ត្រូវធ្វើកិច្ចការនេះជាមួយអនុភាពខាងគោលលទ្ធិដែលនឹងធ្វើឲ្យគេស្ដាប់ឮ ហើយទទួលអារម្មណ៍ ដោយលើកស្ទួយស្មារតី ហើយស្អាងសមាជិករបស់យើង ។ …
« … កាលការសម្ដែងសេចក្ដី ស្រឡាញ់ និងការដឹងគុណគឺជារឿងល្អ នោះការសម្ដែងបែបនេះមិនអាចជំនួសទីបន្ទាល់ដែលនឹងបង្កាត់ភ្លើងនៃជំនឿមួយនៅក្នុងជីវិតរបស់មនុស្សដទៃបានឡើយ ។ ការថ្លែងទីបន្ទាល់គឺជាការ ‹ ធ្វើសាក្សីដោយព្រះចេស្ដានៃព្រះវិញ្ញាណបរិសុទ្ធ ធ្វើសេចក្ដីថ្លែងដោយម៉ឺងម៉ាត់ពីសេចក្ដីពិត ដោយសំអាងទៅលើតម្រិះ ឬជំនឿរបស់ខ្លួនផ្ទាល់ › [ សេចក្ដីណែនាំដល់បទគម្ពីរទាំងឡាយ « ធ្វើបន្ទាល់ » scriptures.lds.org ] ។ ការប្រកាសដ៏ច្បាស់អំពីសេចក្ដីពិតធ្វើឲ្យមានភាពខុសប្លែកមួយនៅក្នុងជីវិតរបស់មនុស្ស ។ នោះគឺជាអ្វីដែលផ្លាស់ប្ដូរដួងចិត្ត ។ នោះគឺជាអ្វីដែលព្រះវិញ្ញាណបរិសុទ្ធអាចបញ្ជាក់នៅក្នុងដួងចិត្តនៃបុត្រាបុត្រីរបស់ព្រះ » ( « Pure Testimony » Ensign ឬ Liahona ខែ វិច្ឆិកា ឆ្នាំ២០០៤ ទំព័រ ៤១ ) ។
ការឈរជាមួយនឹងថ្នាក់ដឹកនាំសាសនាចក្រ ។
អែលឌើ រ៉ូណល អេ រ៉ាសបាន បានបង្រៀនថា
« យើងបានគាំទ្រដល់[ថ្នាក់ដឹកនាំរបស់យើង]ដែលបានហៅដោយការបំផុសគំនិតដ៏ទេវភាព ដើម្បីបង្រៀន ដឹកនាំយើង …ហើយដែលកំពុងស្រែកព្រមានប្រាប់យើងឲ្យដឹងពីគ្រោះថ្នាក់ដែលយើងជួបរាល់ថ្ងៃ—ដែលកើតឡើងពីការឥតខ្វល់ក្នុងការគោរពប្រតិបត្តិថ្ងៃឈប់សម្រាក កើតឡើងពីការសម្លុតគំរាមដល់គ្រួសារ កើតឡើងពីការបំពានលើសេរីភាពសាសនា និង កើតឡើងពីការជំទាស់នឹងវិវរណៈនាថ្ងៃចុងក្រោយនេះ ។ បងប្អូនប្រុសស្រី តើបងប្អូនកំពុងស្តាប់តាមការទូន្មានរបស់ពួកលោកដែរឬទេ ? …
នៅពេលយើងឈានទៅមុខ ដោយជ្រើសធ្វើតាមការប្រឹក្សា និង ការព្រមានពីថ្នាក់ដឹកនាំរបស់យើង នោះយើងជ្រើសរើសធ្វើតាមព្រះអម្ចាស់ ខណៈដែលពិភពលោកនេះកំពុងងាកដើរទៅទិសដៅផ្សេង ។ យើងជ្រើសរើសកាន់ខ្ជាប់នឹងដំបងដែកជានិច្ច ធ្វើជាពួកបរិសុទ្ធថ្ងៃចុងក្រោយ ស្ថិតនៅក្នុងកិច្ចការរបស់ព្រះអម្ចាស់ ហើយដើម្បីបានពោរពេញដោយ ‹ សេចក្តីអំណរជាអតិបរមា › [ នីហ្វៃទី ១ ៨:១២ ] ។
ការលើកឡើងនូវសំណួរថ្ងៃនេះគឺច្បាស់លាស់ថា តើបងប្អូនកំពុងឈរយ៉ាងរឹងមាំជាមួយថ្នាក់ដឹកនាំសាសនាចក្រនៅក្នុងពិភពលោកដ៏ខ្មៅងងឹតនេះ ប្រយោជន៍ឲ្យបងប្អូនអាចផ្សាយពន្លឺនៃព្រះគ្រីស្ទដែរឬទេ ? » ( « Standing with the Leaders of the Church » Ensign ឬ Liahona ខែ ឧសភា ឆ្នាំ ២០១៦ ទំព័រ ៤៧–៤៨ ) ។
ការកែលម្អការបង្រៀនរបស់យើង
រៀបចំខ្លួនទុកជាមុន « នៅពេលអ្នកពិចារណាអំពីរបៀបដែលគោលការណ៍ទាំងឡាយនៃដំណឹងល្អដែលអ្នកកំពុងបង្រៀននឹងផ្ដល់ពរជ័យដល់សមាជិកក្នុងថ្នាក់របស់អ្នក នោះគំនិត និងចំណាប់អារម្មណ៍ទាំងឡាយនឹងកើតមានមកក្នុងជីវិតប្រចាំថ្ងៃរបស់អ្នក––នៅពេលអ្នកធ្វើដំណើរទៅធ្វើការ ធ្វើការងារក្នុងផ្ទះ ឬប្រាស្រ័យទាក់ទងនឹងគ្រួសារ និងមិត្តភក្ដិ ។ សូមកុំគិតថាការរៀបចំខ្លួនខាងវិញ្ញាណជាអ្វីមួយដែលអ្នកត្រូវឆ្លៀតពេលធ្វើ ប៉ុន្តែផ្ទុយទៅវិញជាអ្វីមួយដែលអ្នកចង់ធ្វើជានិច្ច » ( ការបង្រៀនតាមរបៀបរបស់ព្រះអង្គសង្រ្គោះ ទំព័រ១២ ) ។