កាតព្វកិច្ចពិសិដ្ឋរបស់អ្នកដើម្បីបម្រើ

ដោយ ដេវីឌ អិល បែក

ប្រធានក្រុមយុវជនទូទៅ

អ្នកបានទទួលព្រះចេស្តា សិទ្ធិអំណាច និង កាតព្វកិច្ចដ៏ពិសិដ្ឋ ដើម្បីបម្រើនៅក្នុងគ្រាដែលអ្នកត្រូវបានតែងតាំងបព្វជិតភាពនោះឯង ។

សេចក្តីអំណរក្នុងការបម្រើ

ពួកយុវជននៃបព្វជិតភាពអើរ៉ុនអើយ អ្នកជាបុត្រាសំណប់របស់ព្រះអម្ចាស់ ហើយទ្រង់មាន កិច្ចការដ៏ធំមួយសម្រាប់អ្នកធ្វើ ។ ដើម្បីសម្រេចកិច្ចការនេះ អ្នកត្រូវតែបំពេញកាតព្វកិច្ចពិសិដ្ឋ របស់អ្នក ដើម្បីបម្រើអ្នកផ្សេងទៀត ។ ¹

តើអ្នកដឹងថា ការបម្រើមានន័យយ៉ាងណាទេ ? សូមគិតពីសំនួរនេះ ពេលខ្ញុំប្រាប់អ្នកអំពី យុវនារីម្នាក់ឈ្មោះ ឆាយ ចនសុន ។

នៅពេល ឆាយ បានចាប់ផ្តើមចូលរៀននៅវិទ្យាល័យកាលពីឆ្នាំមុន នាងបានក្លាយទៅជាជនរងគ្រោះនៃការគំរាមកំហែងយ៉ាងសាហាវ និង ដោយឥតគិតក្រែង ។ នាងត្រូវគេធ្វើបាប រុញច្រាន ហើយចំអក ពេលនាងដើរទៅថ្នាក់—ឯសិស្សខ្លះទៀតថែមទាំងគប់សម្រាមទៅលើនាងទៀតផង ។ អ្នកប្រហែលជាធ្លាប់បានឃើញ អ្នកដទៃត្រូវបានគេប្រព្រឹត្តិមិនសមរម្យដាក់បែបនេះ នៅសាលារៀនរបស់អ្នកផងដែរ ។

ចំពោះមនុស្សជាច្រើន ក្នុងវ័យជាយុវវ័យ គឺជាពេលវេលានៃភាពឯកកោ និង ភ័យខ្លាចមួយ ។ វាមិនចាំបាច់ត្រូវតែកើតឡើងបែបនេះឡើយ ។ ជាសំណាងល្អសម្រាប់ ឆាយ ដែលមានពួកយុវជនខ្លះនៅឯសាលារៀនរបស់នាង ដែលយល់ពីអត្ថន័យនៃការបម្រើ ។

ម្តាយរបស់ ឆាយ បានអង្វរសុំគ្រូបង្រៀននៅឯសាលារៀន ឲ្យជួយបញ្ឈប់ការគំរាមកំហែងនោះ ប៉ុន្តែវានៅតែបន្ត ។ ក្រោយមកគាត់បានទាក់ទងទៅ ខាសុន ចូនស៏ ជាអ្នកកាន់បព្វជិតភាពអើរ៉ុន និង ជាប្រធានក្រុមបាល់ឱប ។ គាត់បានសុំគេឲ្យជួយគាត់ ស្វែងរកអ្នកដែលធ្វើការគំរាមកំហែងនោះ ។

ខាសុន បានយល់ព្រមជួយ ប៉ុន្តែគាត់មានអារម្មណ៍នៅក្នុងដួងចិត្តគាត់ថា គាត់អាចធ្វើ លើសពីការគ្រាន់តែស្វែងរកជនដែលគម្រាមកំហែងនោះទៅទៀត ។ ព្រះវិញ្ញាណបានខ្សឹបប្រាប់គាត់ថា គាត់ត្រូវតែជួយ ឆាយ ឲ្យដឹងថាមានគេស្រឡាញ់នាង ។

ខាសុន បានស្នើរសុំឲ្យមិត្តរួមក្រុមរបស់គាត់ ចូលរួមនឹងគាត់ក្នុងការបម្រើ ឆាយ ។ ពួកគេបានអញ្ជើញនាងឲ្យអង្គុយញ៉ាំបាយថ្ងៃត្រង់ជាមួយពួកគេ ។ ពួកគេបានដើរជាមួយនាងទៅថ្នាក់ ដើម្បីប្រាកដថា នាងមានសុវត្ថិភាព ។ មិនជាការគួរឲ្យភ្ញាក់ផ្អើលទេ ដោយមានពួកអ្នកលេងបាល់ឱប ជាមិត្តជិតស្និទ្ធនាង នោះគ្មាននរណាម្នាក់ធ្វើការគម្រាមកំហែងចំពោះ ឆាយ ទៀតឡើយ ។

នេះគឺជារដូវកាលដ៏រំភើបរីករាយសម្រាប់ក្រុមបាល់ឱប ។ ប៉ុន្តែ ថ្វីបើវាជារដូវកាលនៃការប្រកួតដ៏រំភើបក៏ដោយ ក៏យុវជនទាំងនេះមិនភ្លេចអំពី ឆាយ ដែរ ។ ពួកគេបានអញ្ជើញនាង ឲ្យចូលរួម នឹងក្រុមនៅលើទីលានកីឡា បន្ទាប់ពីការប្រកួត ។ ឆាយ បានទទួលអារម្មណ៍នៃក្តីស្រឡាញ់ និង ការយកចិត្តទុកដាក់ ។ នាងបានទទួលអារម្មណ៍ដ៏មានសុវត្ថិភាព ។ នាងសប្បាយរីករាយ ។

ក្រុមកីឡាបាល់ឱបបានបន្តរហូតបានឈ្នះទទួលពានរង្វាន់ថ្នាក់រដ្ឋ ។ ប៉ុន្តែអ្វីដែលសំខាន់ជាងពានរង្វាន់នោះ បានកើតឡើងក្នុងសាលារៀនរបស់ពួកគេ ។ គំរូរបស់យុវជនទាំងនេះ បានជំរុញឲ្យសិស្សឯទៀតទទួលស្គាល់ មានចិត្តរាក់ទាក់ជាងមុន ។ ឥឡូវនេះ ពួកគេប្រព្រឹត្តិចំពោះគ្នា ទៅវិញទៅមក ដោយចិត្តល្អ និង ការគោរពជាងមុន ។

សារព័ត៌មានជាតិ បានដឹងនូវអ្វីដែលយុវជនទាំងនេះបានធ្វើ ហើយបានផ្សព្វផ្សាយរឿងរបស់ពួក គេពាសពេញប្រទេស ។ អ្វីដែលបានចាប់ផ្តើមពីការខិតខំបម្រើដល់មនុស្សម្នាក់ កំពុងតែបំផុសគំនិតជនរាប់ពាន់នាក់ទៀត ឲ្យធ្វើដូចគ្នាដែរ ។

ម្តាយរបស់ ឆាយ ហៅយុវជនទាំងនេះថាជា « ទេវតាបន្លំខ្លួន » ។ ខាសុន និងមិត្តគាត់ បាននិយាយយ៉ាងរហ័សថា ឆាយ បានផ្តល់ពរជ័យដល់ជីវិតពួកគេ ជាងដែលពួកគេបានផ្តល់ពរជ័យដល់នាង ។ នោះគឺជាអ្វីដែលកើតឡើង នៅពេលអ្នកលះបង់ខ្លួនអ្នកនៅក្នុងការបម្រើអ្នកដទៃទៀត—អ្នករកឃើញខ្លួនឯងវិញ ។ ² អ្នកនឹងផ្លាស់ប្តូរ ហើយរីកចម្រើននៅក្នុងរបៀប ដែលនឹងមិនអាចរកឃើញតាមរបៀបណាទៀតឡើយ ។ យុវជនទាំងនេះមានបទពិសោធន៍ក្តីអំណរនៃការបម្រើ ហើយបន្តស្វែងរកឱកាស ដើម្បីផ្តល់ពរជ័យដល់អ្នកដទៃទៀត ។ ពួកគេមានចិត្តអន្ទះសានឹងផ្តល់ការបម្រើរបស់ពួកគេនាប៉ុន្មានខែខាងមុខ ពេលដែលពួកគេបម្រើជាអ្នកផ្សព្វផ្សាយសាសនាពេញម៉ោង ។ ³

តម្រូវការ និង កាតព្វកិច្ច

មានមនុស្សដូច ឆាយ ចនសុន រាប់ពាន់អ្នកពាសពេញពិភពលោក—ជាមនុស្សដែលត្រូវការអារម្មណ៍នៃក្តីស្រឡាញ់របស់ព្រះវរបិតាសួគ៌ ។ ពួកគេស្ថិតនៅក្នុងសាលារៀនអ្នក កូរ៉ុមអ្នក ហើយនឹងគ្រួសារអ្នកផង ។ អ្នកខ្លះគឺស្រួលនឹងនឹកឃើញ ។ អ្នកខ្លះទៀតគឺពិបាកនឹងមើលឃើញពីសេចក្ដីត្រូវការបន្តិច ។ តាមពិតទៅ មនុស្សគ្រប់រូបដែលអ្នកស្គាល់ អាចទទួលបាននូវពរជ័យ តាមរយៈការបម្រើរបស់អ្នក ។ ព្រះអម្ចាស់ពឹងពាក់ទៅលើអ្នក ដើម្បីឈោងទៅជួយពួកគេ ។

អ្នកពុំចាំបាច់ជាកីឡាករដ៏ចំណាន ដើម្បីនឹងបម្រើអ្នកដទៃឡើយ ។ អ្នកបានទទួលនូវព្រះចេស្តា សិទ្ធិអំណាច និង កាតព្វកិច្ចដ៏ពិសិដ្ឋ ដើម្បីបម្រើ នៅក្នុងគ្រាដែលអ្នកត្រូវបានតែងតាំងបព្វជិតភាពនោះឯង ។ ប្រធាន ជែមស៍ អ៊ី ហ្វោស្ត បានបង្រៀនថា « បព្វជិតភាព គឺជាសិទ្ធិអំណាច ដែលបានផ្ទេរដល់មនុស្ស ដើម្បី បម្រើ នៅក្នុងព្រះនាមរបស់ព្រះ » ។ ⁴ បព្វជិតភាពអើរ៉ុនកាន់កូនសោ នៃការបម្រើរបស់ពួកទេវតា ។ ⁵

ពេលអ្នកស្រឡាញ់កូនចៅទ្រង់ ព្រះវរបិតាសួគ៌នឹងដឹកនាំអ្នក ហើយទេវតានឹងជួយអ្នក ។ ⁶ អ្នកនឹងត្រូវបានប្រទាននូវអំណាចដើម្បីផ្តល់ពរជ័យដល់ជីវិត និង ស្រោចស្រង់ព្រលឹងទាំងឡាយ ។

ព្រះយេស៊ូវគ្រីស្ទគឺជាគំរូរបស់អ្នក ។ ទ្រង់ « បានមក មិនមែនឲ្យគេបម្រើទ្រង់ទេ គឺនឹងបម្រើគេវិញ » ។ ⁷ ដើម្បីបម្រើមានន័យថា ស្រឡាញ់ និង ថែទាំអ្នកដទៃ ។ វាមានន័យថា យកចិត្តទុកដាក់លើសេចក្តីត្រូវការខាងវិញ្ញាណ និង ខាងសាច់ឈាមរបស់ពួកគេ ។ និយាយឲ្យសាមញ្ញទៅ វាមានន័យថាធ្វើនូវអ្វីដែលព្រះអង្គសង្គ្រោះនឹងធ្វើ បើទ្រង់នៅទីនេះ ។

គ្រួសាររបស់អ្នក

ចាប់ផ្តើមនៅក្នុងផ្ទះរបស់អ្នក ។ នេះគឺជាទីកន្លែងដែលអ្នកអាចធ្វើការបម្រើយ៉ាងសំខាន់បំផុត ។⁸

តើអ្នកចង់សាកល្បងនូវការពិសោធន៍ដ៏គួរឲ្យចាប់អារម្មណ៍មួយទេ? លើកក្រោយ ពេលម្តាយអ្នកសុំឲ្យអ្នកជួយធ្វើការនៅក្នុងផ្ទះ សូមនិយាយបែបនេះថា « សូមអរគុណដែលបានប្រាប់ដល់កូន ម៉ាក់ ។ កូនពេញចិត្តនឹងជួយ » ។ រួចហើយចាំមើលពីប្រតិកម្មរបស់គាត់ ។ អ្នកខ្លះគប្បីចេះជំនាញសង្គ្រោះបឋម មុននឹងគិតធ្វើបែបនេះ ។ អ្នកប្រហែលជាធ្វើឲ្យគាត់គាំងបេះដូង ។ បន្ទាប់ពីអ្នកបានធ្វើឲ្យគាត់ដឹងខ្លួនឡើងវិញ អ្នកនឹងឃើញនូវការរីកចម្រើនក្នុងទំនាក់ទំនងរបស់អ្នកជាមួយគាត់ និង ការកើនឡើងនូវព្រះវិញ្ញាណនៅក្នុងផ្ទះរបស់អ្នកទៀតផង ។

នោះគ្រាន់តែជារបៀបមួយ ដើម្បីបម្រើដល់គ្រួសារអ្នកប៉ុណ្ណោះ នៅមានរបៀបជាច្រើនទៀត ។ អ្នកបម្រើ ពេលអ្នកនិយាយពាក្យផ្អែមល្ហែមដល់សមាជិកគ្រួសារ ។ អ្នកបម្រើ នៅពេលអ្នកប្រព្រឹត្តិចំពោះបងប្អូនអ្នក ដូចជាមិត្តសម្លាញ់របស់អ្នក ។

ប្រហែលជាសំខាន់បំផុតនោះ គឺថា អ្នកបម្រើ នៅពេលអ្នកជួយឪពុករបស់អ្នក នៅក្នុងកាតព្វកិច្ចរបស់គាត់ ជាអ្នកដឹកនាំខាងវិញ្ញាណនៅក្នុងផ្ទះអ្នក ។ ផ្តល់នូវការគាំទ្រ និងការលើកទឹកចិត្តយ៉ាងពេញលេញរបស់អ្នក ចំពោះរាត្រីជួបជុំគ្រួសារ ការអធិស្ឋានជាគ្រួសារ និងការសិក្សាព្រះគម្ពីរជាគ្រួសារ ។ ចូរធ្វើនូវផ្នែករបស់អ្នក ធ្វើយ៉ាងណាឲ្យមានវត្តមានព្រះវិញ្ញាណនៅក្នុងផ្ទះរបស់អ្នក ។ ការណ៍នេះ នឹងពង្រឹងឪពុកអ្នក នៅក្នុងតំណែងរបស់គាត់ ហើយនិងរៀបចំអ្នក ដើម្បីធ្វើជាឪពុកនាពេលអនាគត ។ បើអ្នកពុំមានឪពុកក្នុងផ្ទះអ្នកទេ នោះការទទួលខុសត្រូវរបស់អ្នកក្នុងការបម្រើដល់គ្រួសារអ្នក គឺកាន់តែធំធេងថែមទៀត ។

កូរ៉ុមរបស់អ្នក

អ្នកក៏មានកាតព្វកិច្ចដើម្បីបម្រើនៅក្នុងកូរ៉ុមរបស់អ្នកផងដែរ ។

បព្វជិតភាពកំពុងតែពង្រីកនៅពាសពេញពិភពលោក ។ ពួកអ្នកជាច្រើនរូបកំពុងតែស្តាប់តាមការអញ្ជើញឲ្យជួយសង្គ្រោះរបស់ប្រធាន ម៉នសុន ។ មានយុវជនកាន់បព្វជិតភាពអើរ៉ុនសកម្ម កាន់តែច្រើននាសព្វថ្ងៃនេះ ជាងពេលណាៗទាំងអស់នៃប្រវត្តិសាស្ត្រសាសនាចក្រ ។ ប៉ុន្តែ នៅតែមានអ្នកដែលមិនសកម្ម និង អ្នកដែលត្រូវការឲ្យអ្នកទៅជួយ ។

កាលពីខែ មិថុនា នៅពេលដែលសាខាថ្មីមួយត្រូវបានបង្កើតឡើងនៅក្នុង ក្រុងបាំងកាល័រ ប្រទេសឥណ្ឌា មានយុវជនតែម្នាក់គត់ នៅក្នុងការប្រជុំបព្វជិតភាព ដែលជាឌីកុនទើបបានតែងតាំង ឈ្មោះ ក្លាតវីន ។

ក្លាតវីន ជាមួយនឹងប្រធានក្រុមយុវជន និង ប្រធានសាខា បានចាប់ផ្តើមហៅយុវជនដែលមិនសកម្ម ហើយសួរសុខទុក្ខពួកគេ ដល់ផ្ទះគេ ។ មិនយូរប៉ុន្មាន មានយុវជនទីពីរឈ្មោះ សាំយ៉ូអែល បានចាប់ផ្តើមទៅព្រះវិហារម្តងទៀត ។

រៀងរាល់សប្តាហ៍ ក្លាតវីន និង សាំយ៉ូអែល បានទូរស័ព្ទទៅអ្នកទាំងនោះដែលមិន បានចូលរួមក្នុងការប្រជុំកូរ៉ុម ហើយបានចែកចាយនូវអ្វីដែលពួកគេបានរៀន ។ ពួកគេក៏បានទូរស័ព្ទ ឬ ក៏បានលេងជាមួយពួកគេ ក្នុងថ្ងៃខួបកំណើតរបស់គេដែរ ។ ម្តងម្នាក់ៗ ពួកយុវជនដែលមិនសូវសកម្មបានក្លាយទៅជាមិត្តរបស់ពួកគេ ហើយបានចាប់ផ្តើមទទួលការអញ្ជើញឲ្យមកក្នុងកម្មវិធីទាំងឡាយរបស់កូរ៉ុម ចូលរួមការប្រជុំកូរ៉ុម និង ទីបំផុត ធ្វើការបម្រើរបស់ពួកគេដោយផ្ទាល់ ។ សព្វថ្ងៃនេះ ពួកយុវជនទាំងអស់នៅក្នុងសាខា គឺសកម្មនៅក្នុងសាសនាចក្រ ។

ព្រះគម្ពីរបង្រៀនថាកូរ៉ុមនៃបព្វជិតភាពអើរ៉ុនគឺត្រូវអង្គុយនៅក្នុងក្រុមប្រឹក្សា និងលើកស្ទួយ—ឬស្ថាបនា និងពង្រឹង—គ្នាទៅវិញទៅមក។ ⁹ អ្នកលើកស្ទួយ ក្នុងពេលអ្នកបង្រៀនសេចក្ដីពិតនៃដំណឹងល្អ ចែកចាយបទពិសោធន៍ខាងវិញ្ញាណ និងចែកចាយទីបន្ទាល់។ កម្មវិធីសិក្សារបស់យុវវ័យ លើកទឹកចិត្តឲ្យមាននូវទំនាក់ទំនងប្រភេទនេះ នៅក្នុងការប្រជុំកូរ៉ុម ប៉ុន្តែ ការណ៍នេះអាចកើតឡើងបាន តែនៅពេលដែលសមាជិកគ្រប់រូបនៃកូរ៉ុមមានអារម្មណ៍នៃក្តីស្រឡាញ់ និងការគោរពប៉ុណ្ណោះ។ ការលលេង ការសើចចំអក ពុំត្រូវមានចំណែកនៅក្នុងការប្រជុំកូរ៉ុមឡើយ—ជាពិសេសនៅពេលមាននូវការចែកចាយអារម្មណ៍ដោយឥតលាក់លាម។ គណៈប្រធានកូរ៉ុម ត្រូវតែដឹកនាំក្នុងការធ្វើយ៉ាងណាឲ្យ ការប្រជុំកូរ៉ុម គឺជាទីកន្លែងសុវត្ថិភាពសម្រាប់ឲ្យជនគ្រប់រូបចូលរួម។

សាវកប៉ុលបានទូន្មានថា « មិនត្រូវឲ្យមានពាក្យអាក្រក់ណាមួយ ចេញពីមាត់អ្នករាល់គ្នាឡើយ ចូរបញ្ចេញតែពាក្យណាដែលល្អៗ សម្រាប់នឹងស្អាងចិត្តតាមត្រូវការ ដើម្បីឲ្យបានផ្តល់ព្រះគុណដល់អស់ អ្នកដែលស្តាប់» ។ ¹⁰

អ្នកកាន់បព្វជិតភាពមិនដែលប្រើ ពាក្យជេរ ឬ ភាសាលាមកឡើយ ។ពួកគេមិនបន្ទាបបន្ថោក ឬធ្វើឲ្យអ្នកដទៃទៀតឈឺចាប់ឡើយ ។ ពួកគេតែងតែស្អាង និងពង្រឹងគ្នាឡើង ។ នេះគឺជារបៀបដ៏សាមញ្ញ តែមានអនុភាព ដើម្បីបម្រើ ។

នៅគ្រប់ពេលទាំងអស់

កិច្ចការនៃការបម្រើគឺមិនត្រឹមតែស្ថិតនៅក្នុងរង្វង់នៃពិធីបរិសុទ្ធ ឬការបង្រៀនតាមផ្ទះ ឬ គម្រោងបម្រើម្តងម្កាលនោះឡើយ។ យើងជាបុរសនៃបព្វជិតភាពជានិច្ច—មិនត្រឹមតែក្នុងថ្ងៃអាទិត្យ មិនត្រឹមតែ ពេលយើងពាក់អាវពណ៌ស និងក្រវាត់កទេ។ យើងមានកាតព្វកិច្ចដើម្បីបម្រើគ្រប់ទីកន្លែងដែលយើងនៅ។ ការបម្រើ គឺមិនត្រឹមតែជាអ្វីដែលធ្វើប៉ុណ្ណោះទេ—វាក៏បង្ហាញថាយើងគឺជានរណាផងដែរ។

ចូរបម្រើរៀងរាល់ថ្ងៃ ។ ឱកាសជាច្រើនគឺមាននៅជុំវិញអ្នក ។ ចូរស្វែងរកឱកាសទាំងនេះ ។ ចូរទូលសុំព្រះអម្ចាស់ ដើម្បីជួយអ្នកឲ្យរកឃើញឱកាសទាំងនេះ ។ អ្នកនឹងឃើញថា ភាគច្រើន ទង្វើដ៏តូចតាច ហើយស្មោះត្រង់ អាចជួយអ្នកដទៃឲ្យក្លាយទៅជាអ្នកដើរតាមព្រះយេស៊ូវគ្រីស្ទ ។ ¹¹

នៅពេលអ្នកខិតខំដើម្បីមានភាពសក្ដិសមនឹងព្រះវិញ្ញាណ នោះអ្នកនឹងដឹងពីគំនិត និងអារម្មណ៍ដែលបំផុសគំនិត អ្នកឲ្យបម្រើ ។ ក្នុងពេលអ្នកអនុវត្តតាមការបំផុសគំនិតទាំងនេះ អ្នកនឹងទទួលការបំផុសទាំងនោះកាន់តែច្រើនឡើង ហើយឱកាស និងសមត្ថភាពរបស់អ្នក ដើម្បីបម្រើ នឹងកើនឡើងបន្ថែមដែរ ។

ប្អូនប្រុសវ័យក្មេងរបស់ខ្ញុំអើយ ខ្ញុំថ្លែងទីបន្ទាល់ថា អ្នកត្រូវបានប្រទាននូវសិទ្ធិអំណាច និង អំណាចនៃបព្វជិតភាពអើរ៉ុនដ៏អស្ចារ្យ ដើម្បីនឹងបម្រើនៅក្នុងព្រះនាមរបស់ព្រះ ។

ខ្ញុំសូមថ្លែងទីបន្ទាល់ថា ពេលអ្នកធ្វើបែបនេះ អ្នកនឹងជាឧបករណ៍នៅក្នុងព្រះហស្ដនៃព្រះ ក្នុងការជួយអ្នកដទៃ ។ ជីវិតរបស់អ្នកនឹងកាន់តែមានអត្ថន័យ ។ អ្នកនឹងកាន់តែមានកម្លាំងដើម្បីទប់ទល់នឹងសាតាំង ។ អ្នកនឹងរកឃើញសុភមង្គលពិត—ជាប្រភេទសុភមង្គលដែលត្រូវបានរកឃើញតែនៅក្នុងចំណោមអ្នកដើរតាមព្រះយេស៊ូវគ្រីស្ទដ៏ពិតប៉ុណ្ណោះ ។

សូមឲ្យអ្នកទទួលនូវបទពិសោធន៍នៃក្តីអំណរពីការបំពេញកាតព្វកិច្ចដ៏ពិសិដ្ឋរបស់អ្នកក្នុងការបម្រើ ខ្ញុំសូមអធិស្ឋាននៅក្នុងព្រះនាមព្រះយេស៊ូគ្រីស្ទ អាម៉ែន ។