ព្រះអង្គសង្គ្រោះចង់អត់ទោសឲ្យ

ដោយអែលឌើរ ក្រេក អេ ខាតុន

នៃពួកចិតសិបនាក់

ព្រះអម្ចាស់ស្រឡាញ់យើង ហើយចង់ឲ្យយើងយល់ពីឆន្ទៈទ្រង់ក្នុងការអត់ទោសឲ្យ ។

អំឡុងការបម្រើរបស់ព្រះអង្គសង្គ្រោះយើងលើផែនដីមានមនុស្សជាច្រើនបានដើរតាមទ្រង់ រួមទាំងពួកអាចារ្យ និងពួកផារីស៊ី « ចេញពីគ្រប់ទាំងស្រុកកាលីឡេ ស្រុកយូដា និង ក្រុងយេរូសាឡឹម » ។¹ មានមនុស្សខ្វិនម្នាក់ដេកនៅមួយកន្លែងដែលមានបំណងចង់ជាសះស្បើយ បានត្រូវគេសែងចូលទៅក្នុងហ្វូងមនុស្សដ៏ច្រើន តែពុំអាចទៅជិតព្រះអង្គសង្គ្រោះ មិត្តគាត់បានសែងគាត់ឡើងដំបូលផ្ទះដែលព្រះអង្គសង្គ្រោះគង់នៅ ហើយសំរូតគាត់ចុះមក ។ ដោយឃើញពីការបង្ហាញសេចក្ដីជំនឿបែបនេះ ព្រះអង្គសង្គ្រោះបានប្រកាសជាមួយនឹងគោលបំណងដែលពួកអ្នកស្ដាប់ទ្រង់ពុំទាន់យល់ដឹងនៅឡើយថា « អ្នកអើយ បាបអ្នកបានអត់ទោសឲ្យអ្នកហើយ » ។²

ការណ៍នេះបានធ្វើឲ្យបុរសនោះភ្ញាក់ផ្អើល ---ហើយទោះជាព្រះគម្ពីរពុំបានចែងពីប្រតិកម្មគាត់ក្ដី ក៏គាត់ប្រហែលជាឆ្ងល់ថា តើហេតុអ្វីបានជាព្រះអង្គសង្គ្រោះដឹងថាគាត់មកដែរ ។

ព្រះអង្គសង្គ្រោះបានជ្រាបថា មនុស្សជាច្រើនបានដើរតាមទ្រង់ដោយសារតែអព្ភូតហេតុដ៏អស្ចារ្យរបស់ទ្រង់ ។ ពីមុននេះទ្រង់បានធ្វើឲ្យទឹកក្លាយជាស្រា³ បានបណ្ដេញវិញ្ញាណអាក្រក់⁴ និង បានប្រោសកូនប្រុសរបស់នាម៉ឺន⁵ ប្រោសមនុស្សឃ្លង់⁶ អ្នកបម្រើរបស់មេទ័ព⁷ ម្ដាយក្មេកពេត្រុស⁸។

តែជាមួយបុរសខ្វិនម្នាក់នេះ ព្រះអម្ចាស់បានជ្រើសរើសផ្ដល់ភស្ដុតាងដល់ទាំងសាវក និងពួកអ្នករិះគន់អំពីតួនាទីដ៏វិសេសរបស់ទ្រង់ ជាព្រះអង្គសង្គ្រោះនៃពិភពលោក ។ ដោយឮបន្ទូលព្រះអង្គសង្គ្រោះ ពួកអាចារ្យ និងពួកផារិស៊ីបានចាប់ផ្ដើមសួរគ្នា ដោយពោលពាក្យប្រមាថទាំងល្ងង់ខ្លៅ ពេលធ្វើការសន្និដ្ឋានថាមានតែព្រះទេទើបអាចអត់ទោសបាបបាន ។ ដោយជ្រាបពីគំនិតគេ ព្រះអង្គសង្គ្រោះបានមានបន្ទូលទៅកាន់ពួកគេថា ៖

« ហេតុអ្វីបានជារិះគិតក្នុងចិត្តដូច្នេះ ?

« ត្បិតដែលថាបាបអ្នកបានអត់ទោសឲ្យអ្នកហើយ ឬថាចូរអ្នកក្រោកឡើងដើរទៅ នោះតើពាក្យណាដែលងាយថាជាជាង ? »⁹

ដោយពុំរង់ចាំការតបរបស់គេ ព្រះអង្គបានបន្តទៀតថា ៖ « ប៉ុន្តែដើម្បីឲ្យអ្នករាល់គ្នាដឹងថាកូនមនុស្សមានអំណាចនឹងអត់ទោសបាបនៅផែនដី បាន [ នោះទ្រង់ក៏មានបន្ទូលទៅអ្នកស្លាប់ដៃស្លាប់ជើងវិញ ] ខ្ញុំប្រាប់អ្នកថា ចូរក្រោកឡើងយកគ្រែអ្នកដើរទៅផ្ទះទៅ » ។¹⁰ ហើយក៏ធ្វើតាម !

តាមរយៈការព្យាបាលខាងរូបកាយដ៏អស្ចារ្យនេះ ព្រះអង្គសង្គ្រោះបានបញ្ជាក់យើងពីសេចក្ដីពិតខាងវិញ្ញាណដ៏អស្ចារ្យបំផុតនេះថា ៖ កូនមនុស្សអភ័យទោសបាប !

ខណៈដែលសេចក្តីពិតនេះហៀបត្រូវបានទទួលយកដោយពួកអ្នកជឿទាំងអស់ នោះការពុំទទួលស្គាល់ដោយងាយគឺជាសេចក្តីពិតដ៏សំខាន់ថា ៖ ព្រះអង្គសង្រ្គោះអភ័យបាប « លើផែនដី » ហើយមិនមែននៅតែការជំនុំជំនះចុងក្រោយនោះទេ ។ ទ្រង់មិនអាចជួយយើងក្នុងអំពើបាបបានទេ ។ ¹¹ ទ្រង់មិនព្រមឲ្យយើងត្រឡប់ទៅរកបាបពីមុនវិញឡើយ ។ ¹² ប៉ុន្តែនៅពេលយើងប្រែចិត្ត ហើយធ្វើតាម នោះទ្រង់នឹងអត់ទោសឲ្យ ។¹³

ក្នុងការអត់ទោសនេះយើងឃើញពីលទ្ធភាព និង អំណាចប្រោសលោះដែលអាចធ្វើទៅបាននៃដង្វាយធួនត្រូវបានអនុវត្តដោយផ្អែមល្ហែម និងសប្បុរស ។ បើយើងអនុវត្តសេចក្ដីជំនឿលើព្រះអម្ចាស់ព្រះយេស៊ូវគ្រីស្ទ អំណាចដែលធ្វើឲ្យរួចនៃដង្វាយធួនទ្រង់ពង្រឹងយើងក្នុងគ្រាដែលយើងត្រូវការ¹⁴ ហើយអំណាចប្រោសលោះទ្រង់ប្រទានពរយើង ពេលយើង« [ សម្រាត ] ចោលភាពខាងសាច់ឈាម » ។¹⁵ ការណ៍នេះនាំក្ដីសង្ឃឹមដល់មនុស្សគ្រប់រូប ជាពិសេសដល់ជនដែលមានអារម្មណ៍ថា ការព្យាបាលភាពទន់ខ្សោយរបស់មនុស្ស គឺហួសពីឆន្ទៈរបស់ព្រះអង្គសង្គ្រោះក្នុងការជួយសង្គ្រោះ ។

ដោយការផ្ដល់ឱកាសឲ្យព្រះអង្គសង្គ្រោះ ដើម្បីបំភ្លឺដល់ការយល់ដឹងយើង¹⁶ គ្រាមួយពេត្រុសបានសួរថាតើគាត់គួរអត់ទោសដល់បងប្អូនប្រុសគាត់ប៉ុន្មានដង « តើដល់ប្រាំពីរដងឬអី ? » ពិតណាស់ នោះលើសពីគ្រប់គ្រាន់ទៅទៀត ។ តែចម្លើយរបស់ព្រះអង្គសង្គ្រោះបានបើកផ្លូវឲ្យយើងយល់ពីដួងចិត្តមេត្តាទ្រង់ថា ៖ « ខ្ញុំមិនថាឲ្យអ្នកអត់ទោសត្រឹមតែប្រាំពីរដងទេ គឺដល់ប្រាំពីរចិតសិបដងទៅទៀត » ។¹⁷

ព្រះអម្ចាស់ស្រឡាញ់យើង ហើយចង់ឲ្យយើងយល់ពីឆន្ទៈទ្រង់ក្នុងការអត់ទោសឲ្យ ។ ក្នុងគោលលទ្ធិ និងសេចក្ដីសញ្ញា ព្រះអម្ចាស់បានពោលពាក្យ « អំពើបាបរបស់អ្នកត្រូវបានអត់ទោសឲ្យហើយ » ជាពាក្យស្រដៀងគ្នានេះ ¹⁸ ដល់ជនដែលទ្រង់មានបន្ទូលជាមួយ ។ប្រហែលជាពាក់កណ្ដាលនៃគ្រាទាំងនោះ បន្ទូលព្រះអម្ចាស់ត្រូវបាននិយាយទៅកាន់ព្យាការី យ៉ូសែប ស្ម៊ីធ ពេលខ្លះសំដៅលើលោកតែម្នាក់ឯង ពេលខ្លះសំដៅទៅលើមនុស្សផ្សេងទៀត ។¹⁹ បន្ទូលដំបូងត្រូវកត់ត្រាក្នុងឆ្នាំ 1830 ហើយចុងក្រោយក្នុងឆ្នាំ 1843 ។ ដូច្នេះ ក្នុងរយៈពេលជាច្រើនឆ្នាំ ព្រះអម្ចាស់បានប្រាប់ យ៉ូសែប ម្ដងហើយម្ដងទៀតថា « អំពើបាបរបស់អ្នកត្រូវបានអត់ទោសឲ្យហើយ » ។

ខណៈ យ៉ូសែប គ្មាន « ទោសដ៏ធំ ឬមានបាបធ្ងន់នោះ » ²⁰ យើងត្រូវចាំថា ពាក្យ « ប្រាំពីរចិតសិបដង » របស់ព្រះអម្ចាស់ពុំកំណត់ការអត់ទោសឡើយ លើកលែងតែមួយចំនួនតូច ស្របតាមទំហំនៃអំពើបាប ។

ពេលមានបន្ទូលទៅកាន់ពួកអែលឌើរដែលបានប្រមូលផ្ដុំគ្នានៅ ខឺតឡង់ ព្រះអម្ចាស់បានមានបន្ទូលថា « យើងចង់ឲ្យអ្នករាល់គ្នាឈ្នះលើលោកិយ ហេតុដូច្នោះហើយ យើងនឹងមានចិត្តអាណិតមកលើអ្នក » ។²¹ ព្រះអម្ចាស់ជ្រាបពីភាពទន់ខ្សោយយើង និងការពិន័យអស់កល្បនៃ « លោកិយ » មកលើបុរសស្ត្រីដែលពុំល្អឥតខ្ចោះ ។²² ពាក្យហេតុដូច្នោះហើយក្នុងខ-នេះជាការអះអាងទ្រង់ថា មានតែតាមរយៈគុណធម៌នៃក្ដីមេត្តាទ្រង់ប៉ុណ្ណោះ ទើបយើងអាច « យកឈ្នះលោកិយ » យ៉ាងពិតប្រាកដ ។ តើក្ដីមេត្តាទ្រង់បានស្ដែងឡើងបែបណា ? ទ្រង់មានបន្ទូលទៅពួកអែលឌើរដដែលក្នុង ខឺតឡង់ ថា « យើងបានអត់ទោសឲ្យអ្នកនូវអំពើបាបរបស់អ្នកហើយ» ។²³ព្រះអង្គសង្គ្រោះចង់អត់ទោសឲ្យ ។

មនុស្សម្នាក់ៗ មិនត្រូវគិតថា ការអត់ទោសធ្វើឡើងដោយគ្មានការប្រែចិត្តសោះឡើយ ។ ពិតណាស់ ព្រះអម្ចាស់បានប្រកាសថា « យើងជាព្រះអម្ចាស់អភ័យទោសចំពោះអំពើបាបដល់អស់អ្នកណាដែលសារភាពអំពើបាបទាំងឡាយរបស់ខ្លួននៅចំពោះយើង » រួចហើយទ្រង់បានព្រមានពីតម្រូវការបន្ថែមទៀតដល់ « អ្នកដែលបានធ្វើបាបមិនដល់សេចក្ដីស្លាប់ » ។²⁴ ថ្វីបើ ព្រះអម្ចាស់ « ពុំអាចទតមើលអំពើបាបសូម្បីតែបន្តិចបន្តួច »²⁵ ក្ដី តែទ្រង់ញែកឲ្យដាច់ពីគ្នានូវភាពធ្ងន់ធ្ងរនៃអំពើបាបមួយចំនួន ។ ទ្រង់បានចែងលក្ខខណ្ឌថានឹងគ្មានការអត់ទោសដល់ « ការពោលពាក្យប្រមាថទាស់នឹងព្រះវិញ្ញាណបរិសុទ្ធ » ។²⁶ ទ្រង់ប្រកាសពីភាពធ្ងន់ធ្ងរនៃការសម្លាប់មនុស្ស²⁷ ហើយបញ្ជាក់ពីភាពធ្ងន់ធ្ងរនៃអំពើបាបខាងផ្លូវភេទ ដូចជាអំពើកំផិត ។²⁸ ដោយមានបន្ទូលម្ដងហើយម្ដងទៀតពីអំពើបាបខាងផ្លូវភេទដ៏ធ្ងន់ធ្ងរ ទ្រង់បានធ្វើឲ្យដឹងពីការលំបាកក្នុងការទទួលការអភ័យទោសរបស់ទ្រង់ ។²⁹ ហើយទ្រង់បានមានបន្ទូលថា « អ្នកណាដែលធ្វើបាបទាស់នឹងពន្លឺដ៏ធំជាង នោះនឹងត្រូវបានទទួលការដាក់ទោសដ៏ធំជាងដែរ » ។³⁰ តែដោយក្ដីមេត្តាទ្រង់ ទ្រង់អនុញ្ញាតឲ្យមានការកែលំអម្ដងហើយម្ដងទៀត ជាជាងការតម្រូវឲ្យមានភាពឥតខ្ចោះភ្លាមៗ ។ មិនថាអំពើបាបដែលកើតឡើងដោយភាពទន់ខ្សោយនៃជីវិតរមែងស្លាប់មានទំហំប៉ុណ្ណាទេ ដរាបណាយើងប្រែចិត្ត ហើយស្វែងរកការអភ័យទោសទ្រង់ នោះទ្រង់អត់ទោសម្ដងហើយម្ដងទៀត ។³¹

ដោយសារហេតុផលនេះ យើងទាំងអស់គ្នា រួមទាំងអ្នកដែលពិបាកយកឈ្នះលើឥរិយាបថញៀនដូចជា ថ្នាំញៀន ឬ រូបអាសគ្រាម និង អ្នកនៅជុំវិញខ្លួនពួកគេ អាចដឹងថាព្រះអម្ចាស់នឹងស្គាល់ពីការប្រឹងប្រែងដ៏សុចរិតរបស់យើង ហើយអភ័យទោសដោយក្ដីស្រឡាញ់ពេលការប្រែចិត្តបានបញ្ចប់ « រហូតដល់ប្រាំពីរចិតសិបដង » ។ តែការណ៍នេះពុំមានន័យថា ជនម្នាក់អាចត្រលប់ទៅរកអំពើបាបដោយចេតនាហើយគ្មានទោសនោះឡើយ ។³²

ព្រះអម្ចាស់តែងចង់ដឹងពីរឿង ក្នុងចិត្តយើង³³ ហើយបានជ្រាបថាការជឿខុសពុំការពារអំពើបាបឡើយ ។³⁴ ក្នុងគ្រាកាន់កាប់ត្រួតត្រានេះព្រះអម្ចាស់បានព្រមានអ្នកបម្រើទ្រង់ម្នាក់ពីការដឹងបែបនេះដោយប្រកាសថា « ចូរឲ្យ [ គាត់ ] មានចិត្តអាម៉ាស់ខ្មាសអំពីពួកនីកូឡា និងអំពីគ្រប់ទាំងអំពើគួរខ្ពើមឆ្អើមដ៏សម្ងាត់របស់ពួកគេ » ។³⁵ ពួកនីកូឡាជាក្រុមសាសនាមួយក្រុមពីបុរាណដែលបានប្រកាសថា មានសិទ្ធិអនុញ្ញាតឲ្យប្រព្រឹត្តអំពើបាបខាងផ្លូវភេទដោយគុណធម៌នៃក្ដីករុណារបស់ព្រះអម្ចាស់ ។³⁶ ការណ៍នេះធ្វើឲ្យព្រះអម្ចាស់មិនសព្វព្រះទ័យឡើយ ។ ³⁷ ក្ដីមេត្តា និងក្ដីករុណាទ្រង់ពុំមែនទុកឲ្យយើងដោះសាពេល « ចិត្ត [ យើង ] ពុំស្កប់ស្កល់ ... ហើយ [ យើង ] មិនគោរពតាមសេចក្ដីពិត ប៉ុន្តែបានត្រេកអរក្នុងសេចក្ដីមិនសុចរិតវិញ » ឡើយ ។³⁸ ជាងនេះទៀត ក្រោយពីយើងធ្វើអស់លទ្ធភាព³⁹ នោះក្ដីមេត្តា និង ក្ដីករុណាទ្រង់ ជាមធ្យោបាយដែល « ក្រោយមក » ⁴⁰ ដែលយើងយកឈ្នះលោកិយដោយអំណាចនៃដង្វាយធួន ។ នៅពេលយើងស្វែងរកអំណោយទានដ៏មានតម្លៃនេះដោយរាបសា នោះ« អ្វីដែលទន់ខ្សោយក្លាយទៅជាខ្លាំងពូកែចំពោះ [ យើង ] »⁴¹ ហើយដោយកម្លាំងទ្រង់ យើងអាចធ្វើនូវអ្វីដែលយើងមិនអាចធ្វើតែឯងបាន ។

ព្រះអម្ចាស់ទតមើលពន្លឺដែលយើងបានទទួល⁴² ក្ដីប្រាថ្នាក្នុងចិត្តយើង⁴³ និងទង្វើយើង,⁴⁴ ហើយពេលយើងប្រែចិត្ត រួចស្វែងរកការអត់ទោសពីទ្រង់ នោះទ្រង់នឹងអត់ទោសឲ្យ ។ ពេលយើងគិតពីជីវិតយើងផ្ទាល់ និងជីវិតនៃមនុស្សជាទីស្រឡាញ់របស់យើង និងមិត្តភ័ក្ដិយើង នោះយើងនឹងមានឆន្ទៈដូចគ្នាដើម្បីអត់ទោសឲ្យខ្លួនឯង និង អ្នកដទៃទៀត ។⁴⁵

សៀវភៅប្រកាសដំណឹងល្អទ្រង់ លើកឡើងពីការពិបាកយកឈ្នះឥរិយាបថញៀន ហើយជំរុញឲ្យថ្នាក់ដឹកនាំបព្វជិតភាព និងសមាជិក « មិនគួររន្ធត់ ឬបាក់ទឹកចិត្តទេ » បើសាសនាគន់ការី ឬសមាជិកថ្មីម្នាក់ ប្រហែលជាមានភាពស្មុគស្មាញនឹងបញ្ហាដូច្នេះនោះ ។ ផ្ទុយទៅវិញ យើងត្រូវបានទូន្មានឲ្យ « បង្ហាញនូវទំនុកចិត្តលើបុគ្គលម្នាក់ៗ ហើយមិនត្រូវវិនិច្ឆ័យ … [ ដោយចាត់ទុក ] វាជាបណ្ដោះអាសន្ន ហើយយល់អំពីការត្រលប់ថយមកក្រោយវិញ ។⁴⁶ តើយើងអាចធ្វើតែបន្តិចបន្តួចចំពោះកូនចៅយើងផ្ទាល់ ឬសមាជិកគ្រួសារយើងដែលមានបញ្ហាស្រដៀងគ្នានេះ ដែលបានវង្វេងចេញបណ្ដោះអាសន្នចេញពីផ្លូវសុចរិតបានទេ ? ពិតណាស់ ពួកគេសមនឹងទទួលនូវភាពរឹងមាំ ភាពអត់ធ្មត់ និងក្ដីស្រឡាញ់របស់យើង ---ហើយពិតណាស់គឺការអត់ទោសពីយើង ។

ក្នុងសន្និសីទទូទៅកាលពីខែតុលាឆ្នាំមុន ប្រធាន ម៉នសុន បានទូន្មានថា ៖

« យើងត្រូវចាំថា មនុស្សអាចផ្លាស់ប្ដូរ ។ ពួកគេអាចទុកចោលនូវទម្លាប់អាក្រក់នោះបាន ។ ពួកគេអាចប្រែចិត្តពីការរំលងនោះបាន ... ។

« ...យើងអាចជួយពួកគេឲ្យយកឈ្នះលើភាពបរាជ័យរបស់ពួកគេ ។ យើងត្រូវតែអភិវឌ្ឍសមត្ថភាពដើម្បីមើលមនុស្សមិនមែនត្រឹមតែថា ពួកគេជានរណាពេលបច្ចុប្បន្ននេះទេ ប៉ុន្ដែមើលពួកគេថា ពួកគេនឹងក្លាយជាអ្វី » ។⁴⁷

នៅសន្និសីទសាសនាចក្រកាលពីដើម ស្រដៀងគ្នានឹងសន្និសីទនេះ ព្រះអម្ចាស់បានប្រាប់សមាជិកថា ៖

« យើងប្រាប់អ្នកជាប្រាកដថា អ្នករាល់គ្នាស្អាតបាត ប៉ុន្តែមិនមែនទាំងអស់គ្នាទេ ...។

« ត្បិត គ្រប់អស់ទាំងសាច់សុទ្ធតែពុករលួយនៅចំពោះយើង ... ។

« ត្បិតអ្នកខ្លះក្នុងចំណោមអ្នករាល់គ្នាប្រាកដជាមានទោសនៅចំពោះយើង ប៉ុន្តែយើងនឹងមានចិត្តអាណិតអាសូរដល់ភាពកំសោយរបស់អ្នក » ។⁴⁸

សាររបស់ទ្រង់គឺដូចគ្នានៅសព្វថ្ងៃនេះ ។

ព្រះវរបិតាសួគ៌យើង ដឹងពីអ្វីដែលយើងកំពុងជួប ហើយដឹងថាយើងទាំងអស់គ្នាធ្វើបាប ហើយ « ខ្វះមិនដល់សិរីល្អនៃព្រះ »⁴⁹ ម្ដងហើយម្ដងទៀត ។ ទ្រង់បញ្ជូនព្រះរាជបុត្រាទ្រង់មក ទ្រង់ « ជ្រាបនូវសេចក្ដីកំសោយនៃមនុស្ស និងចេះជួយពួកគេដែលត្រូវល្បួង » ។⁵⁰ ព្រះរាជបុត្រាទ្រង់បង្រៀនយើងឲ្យ « អធិស្ឋានជានិច្ចប្រយោជន៍កុំឲ្យ [ យើង ] ធ្លាក់ក្នុងសេចក្ដីល្បួង » ។⁵¹ យើងត្រូវបានប្រាប់ឲ្យ « អំពាវនាវដល់ [ ព្រះ ]សេចក្ដីមេត្តាករុណា របស់ទ្រង់ ព្រះទ្រង់មានឫទ្ធិនឹងសង្គ្រោះ » ។⁵² ព្រះអង្គសង្គ្រោះ បញ្ជាយើងឲ្យប្រែចិត្ត⁵³ ហើយអត់ទោស ។⁵⁴ ហើយទោះជាការប្រែចិត្តមិនងាយស្រួលក្ដី ពេលយើងព្យាយាមឲ្យអស់ពីចិត្ត យើងគោរពតាមដំណឹងល្អទ្រង់ នោះទ្រង់ប្រទានការសន្យានេះថា ៖ « យើងប្រាប់អ្នកជាប្រាកដថា ទោះជា [ អ្នក ] មានបាបក៏ដោយគង់តែយើងពោរពេញទៅដោយសេចក្ដីអាណិតអាសូរ [ ដល់អ្នក ] ។ យើងនឹងមិនបណ្ដេញ [ អ្នក ] ចេញអស់រលីងឡើយ ហើយនៅថ្ងៃសេចក្ដីក្រោធ នោះយើងនឹងនឹកចាំដល់សេចក្ដីមេត្តាករុណា » ។⁵⁵ ព្រះអម្ចាស់ចង់អត់ទោសឲ្យ ។

រាល់សប្ដាហ៍ក្រុមចម្រៀងរោងឧបោសថ មរមនបានផ្ដើមការចាក់ផ្សាយដ៏បំផុសគំនិតរបស់ខ្លួនជាមួយនឹងពាក្យមានខ្លឹមសារនៃទំនុកតម្កើងពេញនិយមរបស់ វិលលាម ដ័បបុលយូ ហ្វែប្ស « Gently Raise the Sacred Strain » ។ ដោយពុំសូវបានគេច្រៀងច្រើននេះជាខ្លឹមសារក្នុងវគ្គទីបួន ៖

ព្រះអម្ចាស់​បរិសុទ្ធ ។
បន្ទូល​ទ្រង់​មាន​តម្លៃ​វិសេសវិសាល ៖
ប្រែចិត្ត​ ហើយ​រស់​នៅ ...
ទោះ​ជា​បាប​អ្នក​មាន​ពណ៌ក្រហម​ឆ្អិនឆ្អៅ
ចូរ​ប្រែចិត្ត ទ្រង់​នឹង​អត់ទោស ។56

ខ្ញុំអញ្ជើញអ្នកចងចាំ និង ជឿលើពាក្យនៃព្រះអម្ចាស់ ហើយអនុវត្តសេចក្ដជំនឿទៅលើទ្រង់ដើម្បីប្រែចិត្ត ។⁵⁷ ទ្រង់ស្រឡាញ់អ្នក ។ ទ្រង់ចង់អត់ទោសឲ្យ ។ ខ្ញុំសូមថ្លែងទីបន្ទាល់នេះក្នុងព្រះនាមពិសិដ្ឋនៃព្រះយេស៊ូវគ្រីស្ទ អាម៉ែន ។