មកកូនចៅទាំងអស់នៃព្រះ
ដោយប្រធាន ថូម៉ាស់ អេស ម៉នសុន
មជ្ឈមណ្ឌលសន្និសីទដ៏ប្រណិតនេះហាក់និយាយមកកាន់យើងពីរដងក្នុងមួយឆ្នាំ ដោយសំឡេងដ៏បំផុសគំនិតថា « មកកូនចៅទាំងអស់នៃព្រះ ដែលបានទទួលបព្វជិតភាព » 1 ។ វាមាននូវវិញ្ញាណដ៏ពិសេសដែលសាយភាយនៅក្នុងការប្រជុំបព្វជិតភាពនៃសាសនាចក្រ ។
នៅយប់នេះ មានអ្នកកាន់បព្វជិតភាពរាប់ពាន់នាក់នៅជុំវិញពិភពលោកដែលកំពុងបម្រើព្រះអម្ចាស់ក្នុងនាមជាអ្នកផ្សព្វផ្សាយសាសនាទ្រង់ ។ ដូចអ្វីដែលខ្ញុំបានលើកឡើងនៅក្នុងសារពេលព្រឹកមិញ បច្ចុប្បន្នយើងមានអ្នកផ្សព្វផ្សាយសាសនាជាង 65,000 នាក់នៅក្នុងតំបន់បេសកកម្ម និងជាងរាប់ពាន់នាក់ ដែលកំពុងរង់ចាំចូលក្នុងមជ្ឈមណ្ឌលបំពាក់បំប៉នអ្នកផ្សព្វផ្សាយសាសនា ឬ ដែលកំពុងតែរៀបចំពាក្យ ។ ហើយមានជាង 6,000 នាក់ទៀតដែលបច្ចុប្បន្ននេះកំពុងតែសម្ភាសជាមួយប៊ីស្សព និង ប្រធានស្តេករបស់គេ ។ ចំពោះអ្នកទាំងនោះដែលកំពុងបម្រើបានចាកចោលផ្ទះ គ្រួសារ មិត្តភក្តិ និង សាលា ហើយបានចេញទៅបម្រើ ។ យើងស្រឡាញ់ និង កោតសរសើរអ្នកទាំងនោះដែលមានបំណង និង ឆន្ទៈដើម្បីបម្រើ ។
នៅក្នុងព្រះគម្ពីរបរិសុទ្ធពុំមានការប្រកាសណាសំខាន់ គ្មានការទទួលខុសត្រូវណាដែលចងភ្ជាប់ គ្មានការណែនាំណាត្រង់ៗជាងបញ្ញត្តិដែលបានប្រទានឲ្យដោយព្រះអម្ចាស់ដែលមានព្រះជន្មរស់ឡើងវិញឡើយ កាលទ្រង់បានលេចមកពួកសាវកដប់មួយនាក់ នៅស្រុក កាលីឡេ ។ ទ្រង់មានបន្ទូលថា ៖
« ដូច្នេះ ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យដោយនូវព្រះនាមព្រះវរបិតា ព្រះរាជបុត្រា និងដោយព្រះវិញ្ញាណបរិសុទ្ធចុះ ៖
« ហើយបង្រៀនគេឲ្យកាន់តាមគ្រប់ទាំងសេចក្តីដែលខ្ញុំបានបង្គាប់មកអ្នករាល់គ្នាផង ហើយមើល ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប » ។ 2
ជាមួយនឹងការសន្យាដ៏រុងរឿង ការបញ្ជាដ៏ទេវភាពនេះ គឺជាការណែនាំដល់ការប្រព្រឹត្តិរបស់យើងនាពេលសព្វថ្ងៃ ឲ្យដូចកាលព្រះយេស៊ូវគង់នៅលើផែនដីដែរ ។ កិច្ចការផ្សព្វផ្សាយសាសនាគឺជាលក្ខណៈសម្គាល់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ កិច្ចការនេះនឹងនៅតែបន្តដូចនេះជារៀងរហូត ។ ដូចព្យាការី យ៉ូសែបស្ម៊ីធបានប្រកាសថា « បន្ទាប់ពីកិច្ចការទាំងអស់បាននិយាយចប់ហើយ ករណីយកិច្ចដ៏ធំជាងគេ និង សំខាន់ជាងគេគឺ ប្រកាសដំណឹងល្អ » ។ 3
ក្នុងរយៈពេលពីរឆ្នាំដ៏ខ្លីនេះ ពួកអ្នកផ្សព្វផ្សាយសាសនាពេញម៉ោងទាំងអស់ ដែលបច្ចុប្បន្នកំពុងបម្រើនៅក្នុងទ័ពដ៏ស្មោះត្រង់នៃព្រះ នឹងបញ្ចប់ការងារ និង បំណងរបស់ពួកគេ ត្រឡប់ទៅផ្ទះ និង ជួបមនុស្សជាទីស្រឡាញ់របស់គេវិញ ។ ចំពោះពួកអែលឌើរ អ្នកដែលជំនួសពួកគេ គឺជាពួកនៅក្នុងចំណោមបព្វជិតភាពអើរ៉ុននៃសាសនាចក្រនៅល្ងាចនេះ ។ យុវជនវ័យក្មេងអើយ តើអ្នកត្រៀមខ្លួនដើម្បីឆ្លើយតបហើយឬនៅ ? តើអ្នកនឹងមានបំណងដើម្បីធ្វើឬទេ ? តើអ្នកបានរៀបចំដើម្បីបម្រើឬទេ ?
ប្រសើរបំផុតនោះ កិច្ចការអ្នកផ្សព្វផ្សាយសាសនាតម្រូវឲ្យមានការសម្របរបៀបរស់នៅរបស់បុគ្គលម្នាក់ ។ វាតម្រូវឲ្យមានការខិតខំ និង ការលះបង់ច្រើន ពលិកម្មដោយមិនកំណាញ់ និង ការអធិស្ឋានដោយក្លៀវក្លា ។ ជាលទ្ធផលនៃការបម្រើជាអ្នកផ្សព្វផ្សាយសាសនាដ៏លះបង់ នោះផ្តល់មកវិញនូវអំណរដ៏អស់កល្ប ដែលនឹងមានពេញមួយជីវិតរមែងស្លាប់ និង រហូតដល់ជីវិតអស់កល្ប ។
សូមសំណូមពរអ្នកថា ឲ្យធ្វើជាអ្នកបម្រើកាន់តែមានប្រយោជន៍ក្នុងចម្ការទំពាំងបាយជូររបស់ព្រះអម្ចាស់ ។ ការណ៍នេះអនុវត្តចំពោះយើងគ្រប់គ្នា មិនថាវ័យប៉ុណ្ណាទេ ក៏មិនមែនសម្រាប់តែអ្នកដែលកំពុងរៀបចំដើម្បីបម្រើជាអ្នកផ្សព្វផ្សាយសាសនាពេញម៉ោងដែរ គឺសម្រាប់យើងគ្រប់គ្នាដើម្បីទទួលវេណក្នុងការចែកចាយដំណឹងល្អនៃព្រះគ្រីស្ទ ។
ខ្ញុំសូមផ្តល់នូវរូបមន្តមួយដែលនឹងធ្វើឲ្យយើងទទួលជោគជ័យ ៖ ទីមួយ សិក្សាព្រះគម្ពីរដោយព្យាយាម ទីពីរ រៀបចំជីវិតដោយមានគោលបំណង ( ហើយ ខ្ញុំអាចនឹងបន្ថែមថា សូមរៀបចំជីវិតរបស់អ្នក មិនថាអ្នកមានអាយុប៉ុណ្ណានោះទេ ) ទីបី បង្រៀនសេចក្តីពិតជាមួយនឹងទីបន្ទាល់ ហើយទីបួន បម្រើព្រះអម្ចាស់ដោយក្តីស្រឡាញ់ ។
សូមយើងទាំងអស់គ្នាពិចារណារូបមន្តនីមួយៗនៃផ្នែកទាំងបួន ។
ទីមួយ សិក្សាព្រះគម្ពីរដោយព្យាយាម ។
ព្រះគម្ពីរថ្លែងទីបន្ទាល់នៃព្រះ ហើយមានព្រះបន្ទូលអំពីជីវិតដ៏នៅអស់កល្បជានិច្ច ។ ការណ៍នោះក្លាយទៅជាមូលដ្ឋាននៃសារលិខិតរបស់យើង ។
ការសង្កត់ធ្ងន់ទៅលើកម្មវិធីសិក្សាសាសនាចក្រ គឺព្រះគម្ពីរបរិសុទ្ធទាំងឡាយ ដែលបានរៀបចំឡើង និង សម្របសម្រួលតាមរយៈកិច្ចប្រឹងប្រែងរួមគ្នា ។ យើងត្រូវបានលើកទឹកចិត្តដើម្បីសិក្សាព្រះគម្ពីរទាំងឡាយរាល់ថ្ងៃទាំងដោយផ្ទាល់ខ្លួន និងជាមួយគ្រួសារ ។
ខ្ញុំនឹងផ្តល់នូវឯកសារយោងតែមួយដែលមាននូវការអនុវត្តន៍ភ្លាមៗនៅក្នុងជីវិតរបស់យើង ។ ក្នុងព្រះគម្ពីរមរមន នៅអាលម៉ា ជំពូកទី 17 យើងអានពីព្រឹត្តិការណ៍នៃក្តីអំណររបស់អាលម៉ា ពេលលោកបានឃើញកូនប្រុសរបស់ម៉ូសាយ ហើយបានសង្កេតឃើញនូវភាពមាំមួននៅក្នុងបុព្វហេតុនៃសេចក្តីពិតម្តងទៀត ។ កំណត់ត្រាប្រាប់យើងថា « ពួកគេបានមាំមួននៅក្នុងការស្គាល់ពីសេចក្តីពិត ព្រោះពួកគេជាមនុស្សដែលមានយោបល់ដ៏ជ្រាលជ្រៅ ហើយគេបានព្យាយាមពិចារណាមើលបទគម្ពីរ ហើយគេអាចស្គាល់ព្រះបន្ទូលនៃព្រះ ។
« ប៉ុន្តែនេះពុំទាន់អស់នៅឡើយទេ ពួកគេបានប្រគល់ខ្លួនទៅក្នុងការអធិស្ឋាន និង តមអាហារជាច្រើន ហេតុដូច្នេះហើយពួកគេប្រកបដោយព្រះវិញ្ញាណនៃការព្យាករណ៍ និងវិញ្ញាណនៃវិវរណៈ ហើយកាលណាពួកគេបង្រៀន គឺបង្រៀនដោយអនុភាព និង សិទ្ធិអំណាចពីព្រះ » ។4
បងប្អូនប្រុសទាំងឡាយ សូមសិក្សាព្រះគម្ពីរដោយព្យាយាម ។
ទីពីរនៅក្នុងរូមមន្ដរបស់យើងគឺ ៖ រៀបចំជីវិតដោយមានគោលបំណង ។
ប្រហែលជាគ្មានជំនាន់នៃពួកយុវវ័យណាប្រឈមមុខនឹងការសម្រេចចិត្តដ៏វែងឆ្ងាយដូចជាយុវវ័យសម័យនេះទេ ។ ការរៀបចំត្រូវតែបានធ្វើឡើងសម្រាប់ចូលរៀន បេសកកម្ម និង អាពាហ៍ពិពាហ៍ ។ សម្រាប់យុវវ័យមួយចំនួន មានទាំងការបម្រើកងទ័ពទៀត ។
ការរៀបចំសម្រាប់បេសកកម្មចាប់ផ្តើមនៅក្មេង ។ បន្ថែមពីលើការរៀបចំខ្លួនខាងវិញ្ញាណ ឪពុកម្តាយឈ្លាសវៃ នឹងផ្ដល់មធ្យោបាយ ដែលរៀបចំកូនប្រុសវ័យក្មេង អាចចាប់ផ្តើមសន្សំលុយបេសកកម្មផ្ទាល់ខ្លួនកាលពីនៅវ័យកុមារ ។ បើចាំបាច់គាត់អាចនឹងត្រូវលើកទឹកចិត្ត ដើម្បីសិក្សាភាសាដទៃឲ្យបានល្អ ដើម្បីគាត់អាចប្រើជំនាញភាសារបស់គាត់បាន ។ នៅទីបំផុតថ្ងៃដ៏រុងរឿងនឹងមកដល់ នៅពេលដែលប៊ីស្សព និង ប្រធានស្តេកអញ្ជើញយុវជននោះមកជួបក្នុងការិយាល័យគាត់ ។ ភាពសក្តិសមត្រូវបានសម្ភាស ការចេញអនុសាសន៍បេសកកម្មត្រូវបានបំពេញ ។
គ្មានពេលណាដែលក្រុមគ្រួសារទាំងមូលទន្ទឹងរង់ចាំមើលអ្នករត់សំបុត្រ ជាមួយនឹងសំបុត្រដែលមានអាសយដ្ឋានផ្ញើរត្រឡប់គឺ 47 East South Temple, Salt Lake City , Utah ខ្លាំងជាងនេះនោះទេ។ សំបុត្រមកដល់ នោះភាពអន្ទះសារកើតមានឡើង សំបុត្រហៅនោះត្រូវបានអាន ។ ជាធម្មតា តំបន់បម្រើនោះនៅឆ្ងាយពីផ្ទះ ។ ទោះជាយ៉ាងនោះក៏ដោយ ដោយមិនខ្វល់ពីទីកន្លែង នោះអ្នកផ្សព្វផ្សាយសាសនាដែលបានរៀបចំ និង ដែលមានការគោរពតាម គឺឆ្លើយតបដូចគ្នាថា ៖ « ខ្ញុំនឹងបម្រើ » ។
ការរៀបចំដើម្បីចេញដំណើរបានចាប់ផ្តើម ។ យុវជនទាំងឡាយអើយ ខ្ញុំសង្ឃឹមថា អ្នកមានអំណរគុណចំពោះពលិកម្មដែលឪពុកម្តាយអ្នកបានធ្វើសម្រាប់អ្នកដោយសុទ្ធចិត្តដើម្បីអ្នកចេញបម្រើ ។ ការងារពួកគាត់នឹងគាំទ្រអ្នក សេចក្តីជំនឿពួកគាត់លើកទឹកចិត្តអ្នក ការអធិស្ឋានពួកគាត់ជួយទ្រអ្នក ។ បេសកកម្មគឺជាកិច្ចការក្រុមគ្រួសារ ។ ទោះបីជាអ្នកត្រូវបែកពីគ្នានៅទ្វីបផ្សេងពីគ្នាឆ្លងសមុទ្រក្តី ក៏ដួងចិត្តអ្នកនៅតែរួមគ្នា ។
បងប្អូនប្រុសទាំងឡាយ ពេលអ្នករៀបចំជីវិតរបស់អ្នកដោយមានគោលបំណង ចូរចាំថា ឱកាសជាអ្នកផ្សព្វផ្សាយសាសនារបស់អ្នក ពុំកំណត់តែក្នុងអំឡុងពេលនៃការហៅជាផ្លូវការនោះទេ ។ ចំពោះអ្នកទាំងឡាយណាដែលបម្រើក្នុងជួរកងទ័ព ពេលនោះក៏អាចជាប្រយោជន៍មួយដែរ ។ ជារៀងរាល់ឆ្នាំយុវជនដែលមានឯកសណ្ឋានរបស់យើងនាំមកនូវព្រលឹងជាច្រើនចូលក្នុងនគរនៃព្រះ ដោយការគោរពដល់បព្វជិតភាពរបស់ពួកគេ រស់នៅតាមបញ្ញត្តិនៃព្រះ ហើយបង្រៀនដល់អ្នកដទៃនូវព្រះបន្ទូលនៃព្រះដ៏ទេវភាព ។
សូមកុំមើលរំលងនូវឯកសិទ្ធិរបស់អ្នកដើម្បីធ្វើជាអ្នកផ្សព្វផ្សាយសាសនា នៅពេលដែលអ្នកកំពុងបន្តការអប់រំផ្លូវការរបស់អ្នក គំរូរបស់អ្នក ជាពួកបរិសុទ្ធថ្ងៃចុងក្រោយ នឹងត្រូវបានគេសង្កេត វិនិច្ឆ័យ និង ធ្វើត្រាប់តាមជាញឹកញាប់ ។
បងប្អូនប្រុសទាំងឡាយ មិនថាអ្នកមានអាយុប៉ុន្មាន ឬ កាលៈទេសៈបែបណាទេ ខ្ញុំដាស់តឿនអ្នកឲ្យ រៀបចំជីវិតរបស់អ្នកដោយមានគោលបំណង ។
ឥឡូវចំនុចទីបីនៅក្នុងរូបមន្ដយើងគឺ ៖ បង្រៀនសេចក្តីពិតជាមួយនឹងទីបន្ទាល់ ។
សូមធ្វើតាមពាក្យទូន្មានរបស់សាវក ពេត្រុស ដែលបានជំរុញថា ៖ « ប្រុងប្រៀបជានិច្ចដើម្បីដោយសុភាព ហើយកោតខ្លាច ដើម្បីនឹងឆ្លើយតបដល់អ្នកណាដែលសួរពីហេតុនៃសេចក្តីសង្ឃឹមរបស់អ្នករាល់គ្នា » ។ 5 ចូរនិយាយ ហើយថ្លែងទីបន្ទាល់នៃសេចក្តីពិតអំពីក្រុមព្រះ ។ ប្រកាសប្រាប់នូវសាក្សីរបស់អ្នកពីព្រះគម្ពីរមរមន ។ សូមសបញ្ជាក់ពីសេចក្តីពិតដ៏រុងរឿង និង ស្រស់ស្រាយដែលមាននៅក្នុងផែនការសង្រ្គោះ ។
កាលពីខ្ញុំបម្រើជាប្រធានបេសកកម្មនៅកាណាដា ជាង 50 ឆ្នាំមុន នោះមានអ្នកផ្សព្វផ្សាយសាសនាក្មេងម្នាក់ដែលមកពីតំបន់ដាច់ស្រយាលនៃសហគមន៍មួយ ភ្ញាក់ផ្អើលនឹងទំហំទីក្រុង តូរ៉ុនតូ ។ គាត់មានកម្ពស់ទាប តែមានទីបន្ទាល់ដ៏ខ្ពស់ ។ មិនយូរប៉ុន្មានបន្ទាប់ពីការមកដល់របស់គាត់ នោះគាត់នឹងដៃគូ បានទៅផ្ទះរបស់ អ៊ែលមើរ ផលឡឺដ នៅ អូសាវ៉ា, អនទែរីយ៉ូ, ប្រទេស កាណាដា ។ ដោយសារមានអារម្មណ៍អាណិតចំពោះយុវជននោះ ដែលដើរពីផ្ទះមួយទៅផ្ទះមួយនៅកណ្តាលព្យុះព្រិល នោះលោក ផលឡឺដ បានអញ្ជើញអ្នកផ្សព្វផ្សាយសាសនាឲ្យចូលទៅក្នុងផ្ទះគាត់ ។ ពួកអ្នកផ្សាយសាសនា បានបង្ហាញសារលិខិតពួកគេដល់គាត់ ។ គាត់ពុំមានអារម្មណ៍នៃព្រះវិញ្ញាណទេ ។ ក្នុងពេលនោះគាត់បានឲ្យពួកគេចេញពីផ្ទះរបស់គាត់ ហើយកុំត្រឡប់មកវិញឡើយ ។ ពាក្យសំដីចុងក្រោយរបស់គាត់ទៅកាន់អែលឌើរ ពេលពួកគេកំពុងចេញតាមរានហាលខាងមុខផ្ទះ ជាពាក្យចំអកថា « អ្នកមិនអាចប្រាប់ខ្ញុំថា អ្នកពិតជាជឿថា យ៉ូសែប ស្ម៊ីធ គឺជាព្យាការីនៃព្រះនោះទេ! » ។
ទ្វារត្រូវបានបិទ ។ ពួកអែលឌើរបានដើរចុះតាមផ្លូវ ។ អែលឌើរមកពីជនបទរបស់យើងនោះបាននិយាយទៅដៃគូគាត់ថា « អែលឌើរ យើងមិនបានឆ្លើយតបទៅលោក ផលឡឺដ ទេ ។ គាត់បាននិយាយថា យើងមិនជឿថា យ៉ូសែបស្ម៊ីធ គឺជាព្យាការីដ៏ពិតទេ ។ តោះត្រឡប់ទៅវិញ ហើយថ្លែងទីបន្ទាល់របស់យើងទៅគាត់ » ។ ដំបូងអ្នកផ្សព្វផ្សាយ ដែលមានបទពិសោធន៍ច្រើននោះ បានស្ទាក់ស្ទើរ តែនៅទីបញ្ចប់ក៏បានព្រមទៅជាមួយដៃគូរបស់ខ្លួន ។ ពួកគេបុកពោះ នៅពេលពួកគេបានទៅជិតទ្វារដែលពួកគេទើបតែត្រូវបានដេញចេញមកនោះ ។ ពួកគេបានគោះទ្វារ ដោយព្រួយចិត្ត ពួកគេបានឈរនៅចំពោះមុខលោក ផលឡឺដ ហើយបន្ទាប់មកដោយមានព្រះចេស្តារដែលបានប្រទានដោយព្រះវិញ្ញាណ នោះអ្នកផ្សព្វផ្សាយសាសនាដ៏មានបទពិសោធន៍របស់យើងបាននិយាយថា ៖ « លោក ផលឡឺដ លោកនិយាយថា យើងមិនបានជឿពិតប្រាកដថា យ៉ូសែបស្ម៊ីធ គឺជាព្យាការីនៃព្រះទេ ។ តែខ្ញុំថ្លែងទីបន្ទាល់ទៅអ្នកថា យ៉ូសែប គឺជា ព្យាការី ។ គាត់ បាន បកប្រែព្រះគម្ពីរមរមន ។ គាត់បានឃើញព្រះ ជាព្រះវរបិតា និង ព្រះរាជបុត្រា ។ ខ្ញុំដឹងថាជាការពិត » ។
មួយរយៈក្រោយមក លោក ផលឡឺដ ដែលឥឡូវនេះជាបងប្រុស ផលឡឺដ បានឈរនៅក្នុងការប្រជុំបព្វជិតភាព ហើយប្រកាសថា « នៅយប់នោះខ្ញុំគេងមិនលក់សោះ ។ ពាក្យនោះបានឮក្នុងត្រចៀកខ្ញុំម្តងហើយម្តងទៀតថា < យ៉ូសែបស្ម៊ីធ គឺជាព្យាការីនៃព្រះ។ ខ្ញុំដឹងថា ជាការពិត ខ្ញុំដឹងថា ជាការពិត ខ្ញុំដឹងថា ជាការពិត > ។ នៅថ្ងៃបន្ទាប់មក ខ្ញុំបានទូរស័ព្ទហៅអ្នកផ្សព្វផ្សាយសាសនា ហើយបានសុំឲ្យពួកគេមកផ្ទះខ្ញុំម្តងទៀត ។ សារដំណឹងពួកគេ គួបផ្សំនឹងទីបន្ទាល់របស់គេ បានផ្លាស់ប្តូរជីវិតរបស់ខ្ញុំ និង ជីវិតគ្រួសារខ្ញុំ » ។ បងប្អូនប្រុសទាំងឡាយ សូមបង្រៀនសេចក្តីពិតជាមួយនឹងទីបន្ទាល់ ។
ចំនុចចុងក្រោយនៅក្នុងរូបមន្ដរបស់យើងគឺ បម្រើព្រះអម្ចាស់ដោយក្តីស្រឡាញ់ ។ គ្មានអ្វីជំនួសសេចក្តីស្រឡាញ់បានឡើយ ។ អ្នកផ្សព្វផ្សាយសាសនាដ៏ជោគជ័យគឺ ចេះស្រឡាញ់ដៃគូខ្លួន អ្នកដឹកនាំបេសកកម្មពួកគេ និង មនុស្សដ៏មានតម្លៃ ដែលពួកគេបង្រៀន ។ នៅក្នុងកណ្ឌទីបួននៃគោលលទ្ធិ និង សេចក្តីសញ្ញា ព្រះអម្ចាស់បានបង្កើតនូវលក្ខណៈសម្បត្តិសម្រាប់កិច្ចការនៃការបម្រើ ។ ចូរយើងពិចារណានូវខមួយចំនួននេះ ៖
« ឱអ្នករាល់គ្នាដែលចាប់ផ្តើមធ្វើការបម្រើព្រះអើយ សូមឲ្យឃើញថា អ្នករាល់គ្នាបម្រើទ្រង់ ឲ្យអស់ពីចិត្ត អស់ពីគំនិត ហើយអស់ពីកម្លាំង ដើម្បីឲ្យអ្នករាល់គ្នាអាចបានឈរដោយឥតទោសនៅចំពោះព្រះ នៅថ្ងៃចុងក្រោយបំផុត...។
« ហើយសេចក្តីជំនឿ សេចក្តីសង្ឃឹម សេចក្តីសប្បុរស និង សេចក្តីស្រឡាញ់ ដោយភ្នែកស្មោះត្រង់ទាំងស្រុង ចំពោះសិរីល្អនៃព្រះ ទើបធ្វើឲ្យគេសមនឹងកិច្ចការ ។
« ចូរនឹកចាំពីសេចក្តីជំនឿ គុណធម៌ ដំរិះ សេចក្តីអត់សង្កត់ សេចក្តីអត់ធ្មត់ សេចក្តីរាប់អានគ្នាជាបងប្អូន សេចក្តីកោតខ្លាចដល់ព្រះ សេចក្តីសប្បុរស សេចក្តីទាបរាបសា សេចក្តីឧស្សាហ៍ចុះ ។ 6
ដោយនូវមូលហេតុល្អ សូមឲ្យអ្នកគ្រប់គ្នាដែលបានឮសំឡេងខ្ញុំសួរខ្លួនឯងនូវសំណួរថា « ថ្ងៃនេះ តើខ្ញុំបានបង្កើនសេចក្តីជំនឿ គុណធម៌ ចំណេះដឹង សេចក្តីកោតខ្លាចដល់ព្រះ សេចក្តីស្រឡាញ់ ឬទេ ?
តាមរយៈការលះបង់ដ៏ឧទ្ទិសរបស់អ្នក ទោះនៅផ្ទះ ឬនៅទីឆ្ងាយក្តី នោះព្រលឹងទាំងឡាយដែលអ្នកជួយសង្រ្គោះ គឺជាមនុស្សដែលអ្នកស្រឡាញ់បំផុត ។
ជាច្រើនឆ្នាំកន្លងទៅ មិត្តជាទីស្រឡាញ់របស់ខ្ញុំម្នាក់ ឈ្មោះ ក្រេហ្គ ស៊ូតបឺរី និង ម្តាយរបស់គាត់ឈ្មោះ ភើល បានមកការិយាល័យរបស់ខ្ញុំ មុនពេលការចេញដំណើររបស់ ក្រេហ្គ ទៅបេសកកម្មនៅ មែលប៊ើន អូស្ត្រាលី ។ ឪពុករបស់ ក្រេហ្គ ឈ្មោះ ហ្វ្រែឌ ស៊ូតបឺរី ត្រូវបានអវត្តមាន ។ កាលពី ម៉្ភៃប្រាំឆ្នាំមុន ម្តាយរបស់ ក្រេហ្គ បានរៀបការជាមួយ ហ្វ្រែឌ តែគាត់មិនបានចែកចាយក្តីស្រឡាញ់ជាមួយនឹងសាសនាចក្រទេ ព្រោះគាត់មិនមែនជាសមាជិក ។
ក្រេហ្គ ទុកចិត្តលើខ្ញុំ ហើយប្រាប់ខ្ញុំពីក្តីស្រឡាញ់ដ៏ជ្រាលជ្រៅចំពោះឪពុកម្តាយគាត់ ហើយសង្ឃឹមថា តាមរបៀបណាមួយ ដោយមធ្យោបាយណាមួយ នោះឪពុករបស់គាត់នឹងទទួលអារម្មណ៍ពីព្រះវិញ្ញាណបរិសុទ្ធចូលក្នុងដួងចិត្តរបស់គាត់ចំពោះដំណឹងល្អនៃព្រះយេស៊ូវគ្រីស្ទ ។ ខ្ញុំបានអធិស្ឋានសម្រាប់ការបំផុសគំនិតអំពីបំណងប្រាថ្នាដ៏ធំ នឹងត្រូវបានបំពេញ ។ ការបំផុសគំនិតក៏កើតមាន ហើយខ្ញុំបាននិយាយទៅ ក្រេហ្គ ថា « ត្រូវគោរពប្រតិបត្តិដល់ទ្រង់ ឲ្យអស់ពីចិត្តចុះ » ។ សូមគោរពប្រតិបត្តិចំពោះការហៅដ៏ពិសិដ្ឋរបស់អ្នក ។ សូមសរសេរសំបុត្រទៅឪពុកម្តាយអ្នករាល់សប្តាហ៍ ហើយជួនកាលសរសេរទៅឪពុកផ្ទាល់ ដើម្បីឲ្យគាត់ដឹងថា តើអ្នកស្រឡាញ់គាត់ប៉ុណ្ណា ហើយប្រាប់គាត់ពីមូលហេតុដែលអ្នកមានអំណរក្នុងការធ្វើជាកូនប្រុសគាត់ » ។ គាត់ និងម្តាយគាត់បានលាខ្ញុំ ហើយបានចាកចេញពីការិយាល័យខ្ញុំទៅ ។
ខ្ញុំមិនបានឃើញម្តាយរបស់ ក្រេហ្គ អស់រយៈពេល 18 ខែ នៅពេលគាត់បានមកការិយាល័យរបស់ខ្ញុំ គាត់និយាយមកខ្ញុំទាំងទឹកភ្នែកថា « រយៈពេលជិតពីរឆ្នាំហើយដែល ក្រេហ្គ បានចេញបេសកកម្ម ។ គាត់មិនដែលខកខានសរសេរសំបុត្ររាល់សប្តាហ៍មកយើងទេ ។ ថ្មីនេះ ប្តីរបស់ខ្ញុំ ហ្រ្វែឌ បានឈរឡើងជាលើកដំបូងនៅក្នុងការប្រជុំថ្លែងទីបន្ទាល់ ហើយធ្វើឲ្យខ្ញុំ និងអ្នករាល់គ្នាដែលនៅទីនោះភ្ញាក់ផ្អើល និងរំជួលចិត្ត ដោយគាត់ប្រកាសថា គាត់បានធ្វើការសម្រេចចិត្តដើម្បីក្លាយជាសមាជិកនៃសាសនាចក្រ ។ គាត់បានបង្ហាញថា គាត់ ហើយនឹងខ្ញុំនឹងទៅ អូស្រ្តាលីដើម្បីទៅជួប ក្រេហ្គ នៅពេលគាត់ចប់បេសកកម្ម ដូច្នេះ ហ្រ្វែឌ អាចធ្វើជាអ្នកជ្រមុជទឹកចុងក្រោយរបស់ ក្រេហ្គ ក្នុងនាមជាអ្នកផ្សព្វផ្សាយសាសនាពេញម៉ោង » ។
គ្មានអ្នកផ្សព្វផ្សាយសាសនាណា មានមោទនភាពដូច ក្រេហ្គ ទេ នៅពេលគាត់បានជួយដល់ឪពុករបស់គាត់ចូលទៅក្នុងទឹកត្រឹមចង្កេះ ហើយលើកដៃឡើងជាកែង ដោយនិយាយពាក្យពិសិដ្ឋនោះម្តងទៀត ទាំងនៅទីឆ្ងាយឯប្រទេស អូស្រ្តាលីថា « ហ្វ្រែឌើរិក ឆាល ស៊ូតបឺរី ដោយបានទទួលការអនុញ្ញាតពីព្រះយេស៊ូវគ្រីស្ទ ខ្ញុំធ្វើបុណ្យជ្រមុជទឹកឲ្យអ្នក ដោយនូវព្រះនាមនៃព្រះវរបិតា និងនៃព្រះរាជបុត្រា និងនៃព្រះវិញ្ញាណបរិសុទ្ធ » ។
សេចក្តីស្រឡាញ់បានទទួលជ័យជំនះ ។ បម្រើព្រះអម្ចាស់ដោយក្តីស្រឡាញ់ ។
បងប្អូនប្រុសទាំងឡាយ សូមឲ្យយើងគ្រប់គ្នា សិក្សាព្រះគម្ពីរដោយព្យាយាម រៀបចំជីវិតដោយមានគោលបំណង បង្រៀនសេចក្តីពិតជាមួយនឹងទីបន្ទាល់ ហើយ បម្រើព្រះអម្ចាស់ដោយក្តីស្រឡាញ់ ។
អ្នកគង្វាលផ្នែកព្រលឹងវិញ្ញាណដ៏ឥតខ្ចោះរបស់យើង គឺជាអ្នកផ្សព្វផ្សាយសាសនាដែលបាន សង្គ្រោះមនុស្សជាតិ បានផ្តល់នូវការអះអាងដ៏ទេវភាពថា៖
« បើសិនជាអ្នកត្រូវធ្វើការអស់មួយជីវិតអ្នក ដោយស្រែកប្រាប់ពីការប្រែចិត្តដល់ប្រជាជននេះ ហើយគ្រាន់តែនាំព្រលឹងតែមួយគត់ មករកយើង នោះអ្នកនឹងមានសេចក្តីអំណរដ៏មហិមាជាមួយអ្នកនោះ នៅក្នុងនគរនៃព្រះវរបិតារបស់យើង !
« ហើយឥឡូវនេះ បើសិនជាអ្នកនឹងមានសេចក្តីអំណរដ៏មហិមាដល់ព្រលឹងតែមួយ ហើយយ៉ាងណាទៅដែលអ្នកបាននាំមករកយើងនៅក្នុងនគរនៃព្រះវរបិតារបស់យើង នោះអ្នកនឹងមានសេចក្តីអំណរដ៏មហិមា បើសិនជាអ្នកបាននាំព្រលឹងជាច្រើនមករកយើង ! » 7
ទ្រង់ជាអ្នកមានបន្ទូលទាំងនេះ ខ្ញុំសូមប្រកាសនូវសាក្សីរបស់ខ្ញុំថា ៖ ទ្រង់គឺជាព្រះរាជបុត្រានៃព្រះ ជាព្រះប្រោសលោះរបស់យើង និង ព្រះសង្រ្គោះរបស់យើង ។
ខ្ញុំសូមអធិស្ឋានថា សូមឲ្យយើងអាចនឹងឆ្លើយតបនូវការអញ្ជើញដ៏សុភាពរបស់ទ្រង់ថា « ចូរឲ្យអ្នកមកតាមខ្ញុំចុះ » 8 នៅក្នុងព្រះនាមដ៏បរិសុទ្ធ—គឺព្រះនាមនៃព្រះអម្ចាស់ ព្រះយេស៊ូវគ្រីស្ទ—អាម៉ែន ។