« នេះហើយជាកិច្ចការ និង សិរីល្អរបស់យើង »

ដោយ អែលឌើរ អិម រ័សុល បាឡឺដ

នៃកូរ៉ុមនៃពួកសាវកដប់ពីរនាក់

ព្រះបានប្រទានអំណាចទ្រង់ដោយសេរីដល់ជនដែលទទួល ហើយគោរពបព្វជិតភាពទ្រង់ ដែលវាដឹកនាំទៅរកពរជ័យនៃអមតភាព និង ជីវិតអស់កល្បដែលបានសន្យា ។

ប្រធានផាកគឺ យើងទាំងអស់គ្នាទន្ទឹងរង់ចាំស្ដាប់កំណាព្យវគ្គ 98 ដ៏អស្ចារ្យនោះ ។ ឱនោះជាការណែនាំដ៏អស្ចារ្យមួយ ដែលលោកផ្ដល់ឲ្យយើង ។

កាលពីពីរបីសប្ដាហ៍មុន នៅយប់ដ៏ងងឹត នារដូវរងាដ៏ត្រជាក់មួយ ភរិយាខ្ញុំ បាបារ៉ា និង ខ្ញុំបានសម្លឹងមើលទៅមេឃដោយក្ដីស្ងើច ។ មានផ្កាយរាប់លានហាក់ដូចជាមានពន្លឺភ្លឺស្រស់ស្អាតខុសប្លែកពីធម្មតា ។ រួចមកខ្ញុំបានបើកទៅគម្ពីរមុក្ដាដ៏មានតម្លៃមហិមា ហើយអានម្ដងទៀតទាំងងឿងឆ្ងល់ពីអ្វីដែលព្រះអម្ចាស់ជាព្រះបានមានបន្ទូលទៅកាន់ ម៉ូសេ ថា ៖ « ហើយពិភពលោកដ៏ច្រើនឥតគណនា នោះយើងបានបង្កើតឡើង ហើយយើងបានបង្កើតរបស់ទាំងនោះឡើងសម្រាប់គោលបំណងរបស់យើងផ្ទាល់ ហើយដោយសារព្រះរាជបុត្រា នោះយើងបានបង្កើតរបស់ទាំងនោះមក គឺជាព្រះរាជបុត្រាបង្កើតតែមួយរបស់យើង » ( ម៉ូសេ 1:33 ) ។

នៅសម័យយើង កែវយឺត ហាប់ប៊ល សម្រាប់មើលលំហអាកាសបានបញ្ជាក់សារៈសំខាន់នៃអ្វីដែល ម៉ូសេ បានឃើញ ។ ពួកអ្នកវិទ្យាសាស្ត្រខាងហាប់ប៊ល បាននិយាយថា កញ្ចុំផ្កាយ មីលគី វ៉េ ដែលមានផែនដីយើង និង ព្រះអាទិត្យ ដែលគ្រាន់តែជាផ្នែកមួយដ៏តូចនោះ ត្រូវបានប៉ាន់ប្រមាណថាជាកញ្ចុំផ្កាយមួយក្នុងចំណោមកញ្ចុំផ្កាយ ជាង 200 កោដិ ដែលស្រដៀងគ្នា ។ ចំពោះខ្ញុំវាពិបាកណាស់ដើម្បីយល់ពីការបង្កបង្កើតដ៏ធំល្វឹងល្វើយរបស់ព្រះនេះ ។

បងប្អូនប្រុសស្រី អំណាចដែលស្ថានសួគ៌ និង ផែនដីត្រូវបានបង្កើតឡើងគឺជាបព្វជិតភាព ។ អ្នកដែលជាសមាជិកសាសនាចក្រនេះដឹងថា ប្រភពនៃអំណាចបព្វជិតភាពនេះ គឺព្រះដ៏មានមហិទ្ធិឫទ្ធិ និង ព្រះរាជបុត្រាទ្រង់ គឺព្រះយេស៊ូវគ្រីស្ទ ។ បព្វជិតភាពពុំមែនគ្រាន់តែត្រូវបានប្រើដើម្បីបង្កើតស្ថានសួគ៌ និង ផែនដីប៉ុណ្ណោះទេ តែវាជាអំណាចដែលព្រះអង្គសង្គ្រោះបានប្រើក្នុងការបម្រើរបស់ទ្រង់ក្នុងជីវិតរមែងស្លាប់ ដើម្បីធ្វើអព្ភូតហេតុ ប្រសិទ្ធពរ និងព្យាបាលអ្នកជំងឺ ប្រោសមនុស្សស្លាប់ឲ្យរស់ឡើងវិញ និង ដើម្បីស៊ូទ្រាំការឈឺចាប់ ដែលមិនអាចទ្រាំទ្របាននៅសួនច្បារ កេតសេម៉ានី ដែលព្រះរាជបុត្រាបង្កើតតែមួយរបស់ព្រះវរបិតាបានធ្វើ ---ដោយបំពេញនូវក្រឹត្យវិន័យនៃភាពយុត្តិធម៌ជាមួយក្ដីមេត្តាករុណា ហើយផ្ដល់នូវដង្វាយធួនដ៏គ្មានទីបញ្ចប់ ហើយឈ្នះលើការស្លាប់ខាងរូបកាយ តាមរយៈការរស់ឡើងវិញ ។

គឺសិទ្ធិអំណាច និង អំណាចនៃបព្វជិតភាពនេះហើយ ដែលទ្រង់បានផ្ដល់ឲ្យ ពេត្រុស យ៉ាកុប និងយ៉ូហាន និង ពួកសាវកទ្រង់ដទៃទៀត ដើម្បីប្រទានពរដល់អ្នកដទៃ និង ដើម្បីចងទុកអ្វីៗនៅស្ថានសួគ៌នូវអ្វីដែលបានចងទុកនៅផែនដី ។

អំណាចបព្វជិតភាពជាអំណោយពិសិដ្ឋដ៏សំខាន់មួយនៃព្រះ ។ វាខុសគ្នាពីសិទ្ធិអំណាចបព្វជិតភាព ដែលជាការអនុញ្ញាតឲ្យធ្វើកិច្ចការក្នុងព្រះនាមព្រះ ។ ការអនុញ្ញាត ឬ ការតែងតាំងនេះត្រូវបានផ្ដល់ឲ្យដោយការដាក់ដៃលើក្បាល ។ អំណាចបព្វជិតភាពកើតមានតែពេលអ្នកដែលប្រើវាមានភាពសក្ដិសម ហើយធ្វើតាមព្រះទ័យរបស់ព្រះ ។ ដូចប្រធាន ស្ពែនស៊ើរ ដបុលយូ ឃឹមបឹល បានប្រកាសថា « ព្រះអម្ចាស់បានប្រទានដល់យើងគ្រប់គ្នា ក្នុងនាមជាអ្នកកាន់បព្វជិតភាព នូវផ្នែកមួយនៃសិទ្ធិអំណាចទ្រង់ តែយើងអាចប្រើអំណាចនៃស្ថានសួគ៌នេះដោយអាស្រ័យលើក្ដីសុចរិតផ្ទាល់ខ្លួនរបស់យើងប៉ុណ្ណោះ » ( Boys Need Heroes Close By » Ensign ខែឧសភា ឆ្នាំ 1976 ទំព័រ 45 ) ។

នៅថ្ងៃដ៏រុងរឿងនៃការស្ដារឡើងវិញ និង ការស្ថាបនាឡើងវិញនៃសាសនាចក្រនៃព្រះយេស៊ូវគ្រីស្ទក្នុងពិភពលោកសព្វថ្ងៃនេះ យ៉ូហាន បាទីស្ទ ពេត្រុស យ៉ាកុប និង យ៉ូហាន ម៉ូសេ អេលីយ៉ាស និង អេលីយ៉ា បានមកកាន់ផែនដី ហើយបានស្ដារឡើងវិញនូវរាល់កូនសោ និង សិទ្ធិអំណាចបព្វជិតភាពសម្រាប់កិច្ចការរបស់ព្រះ នៅថ្ងៃចុងក្រោយនេះតាមរយៈព្យាការី យ៉ូសែប ស្ម៊ីធ ។

ដោយសារកូនសោទាំងនេះ សិទ្ធិអំណាច និង អំណាចនេះហើយទើបសាសនាចក្រនៃព្រះយេស៊ូវគ្រីស្ទត្រូវបានរៀបចំឡើងនៅសព្វថ្ងៃនេះ ដែលមានព្រះគ្រីស្ទជាអង្គគ្រប់គ្រង ហើយដឹកនាំដោយព្យាការីនៅរស់របស់ទ្រង់គឺ ថូម៉ាស អេស ម៉នសុន និង ពួកសាវកដែលត្រូវបានហៅ ហើយតែងតាំងយ៉ាងត្រឹមត្រូវ ។

នៅក្នុងផែនការប្រគល់បព្វជិតភាពដ៏អស្ចារ្យរបស់ព្រះវរបិតាសួគ៌យើង បុរសមានទំនួលខុសត្រូវដ៏សំខាន់ក្នុងការគ្រប់គ្រងបព្វជិតភាព តែពួកគេពុំមែនជាបព្វជិតភាពនោះទេ ។ បុរសស្ត្រីមានតួនាទីខុសគ្នា តែមានតម្លៃស្មើគ្នា ។ ដូចជាស្ត្រីមិនអាចមានកូនបានឡើយ បើគ្មានបុរស ដូច្នេះបុរសក៏មិនអាចអនុវត្តអំណាចពេញលេញនៃបព្វជិតភាព ដើម្បីបង្កើតគ្រួសារអស់កល្បមួយបានឡើយ បើគ្មានស្ត្រីនោះ ។ ម្យ៉ាងវិញទៀត ក្នុងទស្សនៈអស់កល្បនោះ ទាំងអំណាចបង្កើតជីវិត និង អំណាចបព្វជិតភាពត្រូវបានប្រើប្រាស់ ទាំងស្វាមី និង ភរិយា ។ ហើយក្នុងនាមជាស្វាមីភរិយា បុរសស្ត្រីម្នាក់គួរព្យាយាមធ្វើតាមព្រះវរបិតាសួគ៌យើង ។ គុណធម៌នៃក្ដីស្រឡាញ់ ភាពរាបសា និង ភាពអត់ធ្មត់នៃអ្នកជឿព្រះគ្រីស្ទគួរតែជាការយកចិត្តទុក្ខដាក់របស់គេ ពេលពួកគេស្វែងរកពរជ័យបព្វជិតភាពក្នុងជីវិតពួកគេ និង សម្រាប់គ្រួសារពួកគេ ។

ការយល់ដឹងថាព្រះវរបិតាសួគ៌ បានផ្ដល់វិធីមួយសម្រាប់បុត្រាបុត្រីទ្រង់គ្រប់រូបអាចទទួលបានពរជ័យ និង ទទួលការពង្រឹងនៃបព្វជិតភាព វាជារឿងសំខាន់ណាស់សម្រាប់យើង ។ កត្តាដ៏សំខាន់ក្នុងផែនការរបស់ព្រះសម្រាប់កូនចៅវិញ្ញាណទ្រង់ គឺការប្រកាសរបស់ទ្រង់ផ្ទាល់ថា ៖ « នេះហើយជាកិច្ចការរបស់យើង និង សិរីល្អរបស់យើង ---គឺដើម្បីនាំឲ្យមានអមតភាព និង ជីវិតដ៏នៅអស់កល្បជានិច្ចដល់មនុស្ស » ( ម៉ូសេ 1:39 ) ។

នៅក្នុងវិវរណៈមួយដែលបានផ្ដល់ទៅឲ្យព្យាការី យ៉ូសែប ស្ម៊ីធ ក្នុងកណ្ឌទី 81 នៃគោលលទ្ធិ និងសេចក្ដីសញ្ញា ព្រះអម្ចាស់ពន្យល់ថា អំណាចបព្វជិតភាពត្រូវយកទៅប្រើដើម្បី « ជួយអ្នកទន់ខ្សោយ ...លើកដៃដែលរោយ ហើយ ...ចម្រើនកម្លាំងដល់ក្បាលជង្គង់ដែលញ័រ » ( ខ 5 ) ។

« ហើយនៅក្នុងការប្រព្រឹត្តអ្វីៗទាំងនេះ នោះអ្នកនឹងប្រព្រឹត្តល្អបំផុតចំពោះមនុស្សទូទៅ ហើយនឹងតម្កើងសិរីល្អដល់ព្រះអង្គដែលជាព្រះអម្ចាស់របស់អ្នក » ( គ. និង ស. 81:4 ) ។

ពេលយើងគិតស្រម៉ៃពីការជួយអ្នកទន់ខ្សោយ លើកដៃដែលរោយ ហើយចម្រើនកម្លាំងដល់ក្បាលជង្គង់ដែលញ័រ ខ្ញុំបានចាំពីក្មេងស្រីទន់ភ្លន់ម្នាក់អាយុប្រាំពីរឆ្នាំ បង្ហាញដើមប៉េងប៉ោះតូចមួយដល់ជីតានាង ដែលនាងបានដាំវាជាផ្នែកមួយនៃគម្រោងសម្រាប់ថ្នាក់ទីពីរ ។

នាងបានពន្យល់ថា ចេញពីគ្រាប់ពូជតូចមួយ គ្រាប់នោះបានដុះជាដើមតូចមួយ ។ ហើយបើដើមនោះត្រូវបានមើលថែ នោះវានឹងមានផ្លែប៉េងប៉ោះជាច្រើនដែលផ្លែនីមួយៗមានគ្រាប់ជាច្រើន ។

នាងបាននិយាយថា « ហើយបើគ្រាប់ទាំងនោះត្រូវបានយកទៅដាំ នោះវានឹងផ្ដល់ផ្លែប៉េងប៉ោះច្រើនថែមទៀត ហើយពេលអ្នកដាំគ្រាប់ទាំងនោះតែប៉ុន្មានរដូវ នោះអ្នកនឹងបានផ្លែប៉េងប៉ោះរាប់លាន » ។

នាងបាននិយាយទាំងងឿងឆ្ងល់ថា « ផលទាំងអស់បានមកពីគ្រាប់ពូជតូចមួយតែប៉ុណ្ណោះ » ។

តែរួចមកនាងក៏បាននិយាយថា « ខ្ញុំស្ទើរតែធ្វើឲ្យវាងាប់ទៅហើយ ។ ខ្ញុំបានដាក់វាក្នុងបន្ទប់ដ៏ងងឹត ហើយភ្លេចស្រោចទឹកវា ។ ពេលខ្ញុំនឹកឃើញវា វាស្វិតស្រពោនទៅហើយ ។ ខ្ញុំបានយំ ដោយសារខ្ញុំបានគិតថា ផលផ្លែប៉េងប៉ោះរាប់លាននោះ នឹងមិនមានឡើយ » ។

រួចហើយនាងក៏បានប្រាប់ជីតានាងដោយចិត្តរីករាយពី « អព្ភូតហេតុ » ដែលបានកើតឡើង ។

នាងបានពន្យល់ថា « ម៉ាក់និយាយថា ដើមនោះប្រហែលជាមិនទាន់ងាប់ទេ ។ ហើយវាប្រហែលត្រូវការទឹក និង ពន្លឺដើម្បីអាចលូតលាស់វិញ ។

« អ្វីគាត់ថានោះត្រូវណាស់ ។ ខ្ញុំបានស្រោចទឹកវា ហើយដាក់ក្បែរបង្អួចឲ្យត្រូវពន្លឺ ។ ហើយសាកទាយមើល៍ ?» នាងបានសួរ ។ « វារស់ឡើងវិញ ហើយឥឡូវ វានឹងមានផ្លែប៉េងប៉ោះរាប់លានជាពុំខានឡើយ ! »

ដើមប៉េងប៉ោះតូចរបស់នាង ដែលពោរពេញដោយសក្ដានុពល តែបានទ្រុឌទ្រោមរៀបនឹងងាប់ដោយសារតែការធ្វេសប្រហែសដោយអចេតនានោះ បានទទួលកម្លាំងឡើងវិញ មកពីការជួយដ៏សាមញ្ញពីទឹក និង ពន្លឺ តាមរយៈដៃនៃក្ដីស្រឡាញ់ ហើយព្រួយបារម្ភរបស់ក្មេងស្រីតូចម្នាក់ ។

បងប្អូនប្រុសស្រី ក្នុងនាមជាកូនចៅវិញ្ញាណនៃព្រះវរបិតាសួគ៌ ជាទីស្រឡាញ់នៃយើង យើងមានសក្ដានុពលដ៏ទេវភាពរបស់យើងគ្មានដែនកំណត់ឡើយ ។ តែបើយើងធ្វេសប្រហែស យើងអាចក្លាយដូចជាដើមប៉េងប៉ោះដ៏ស្វិតស្រពោននោះដូច្នោះដែរ ។ យើងអាចឃ្លាតឆ្ងាយពីគោលលទ្ធិ និងដំណឹងល្អនៃព្រះគ្រីស្ទ ហើយក្លាយជាមានភាពស្គមស្គាំង ហើយស្វិតស្រពោនខាងវិញ្ញាណ ដោយការដកខ្លួនយើងចេញពីពន្លឺដ៏ទេវភាព និង ទឹករស់នៃក្ដីស្រឡាញ់ និង អំណាចបព្វជិតភាពអស់កល្បរបស់ព្រះអង្គសង្គ្រោះ ។

អ្នកដែលកាន់បព្វជិតភាព ហើយមិនព្យាយាមឲ្យតម្លៃវា ដោយការបម្រើដល់គ្រួសារយើង និង អ្នកដទៃប្រៀបបាននឹងអ្នកដែលមិនបានទទួលពរជ័យ ដែលមាននៅក្នុងអំណាចបព្វជិតភាពដូច្នោះដែរ ហើយវានឹងធ្វើឲ្យខាងវិញ្ញាណចុះខ្សោយ ដោយការដកខ្លួនឯងចេញពីសារធាតុចាំបាច់ដែលធ្វើឲ្យវិញ្ញាណធំធាត់ ចេញពីពន្លឺ និង អំណាចព្រះក្នុងជីវិតពួកគេជាប្រាកដ ---គឺដូចជាដើមប៉េងប៉ោះដែលពោរពេញដោយសក្ដានុពល តែត្រូវស្វិតស្រពោនដោយការធ្វេសប្រហែស ។

ដូចគ្នាទៅនឹងអំណាចបព្វជិតភាព ដែលបានបង្កើតពិភពលោក កញ្ចុំផ្កាយ និង សកលលោក អាចគួរតែជាផ្នែកមួយនៃជីវិតយើងក្នុងការជួយពង្រឹង ហើយប្រទានពរដល់គ្រួសារយើង មិត្តភ័ក្ដិ និងអ្នកជិតខាងយើង ---ម្យ៉ាងទៀត គឺត្រូវធ្វើកិច្ចការដែលព្រះអង្គសង្គ្រោះនឹងធ្វើ បើទ្រង់កំពុងបម្រើក្នុងចំណោមពួកយើងសព្វថ្ងៃនេះ ។

ហើយគោលបំណងចម្បងនៃអំណាចបព្វជិតភាព គឺដើម្បីប្រទានពរ ញែកឲ្យបរិសុទ្ធ ហើយបន្សុទ្ធយើង ដើម្បីយើងអាចរួមរស់នឹងគ្រួសារយើង ក្នុងវត្តមាននៃមាតាបិតាសួគ៌យើង ចងភ្ជាប់ដោយការផ្សារភ្ជាប់នៃបព្វជិតភាព ការចូលរួមក្នុងកិច្ចការដ៏អស្ចារ្យនៃព្រះ និង ព្រះយេស៊ូវគ្រីស្ទក្នុងការពង្រីកនូវពន្លឺ និង សិរីល្អទ្រង់ជារៀងរហូត ។

ដើម្បីសម្រេចការណ៍នេះ កាលពីប៉ុន្មានខែមុន ខ្ញុំមានឱកាសចូលរួមក្នុងការរៀបចំវីដេអូមួយសម្រាប់ជាបទបង្ហាញក្នុងការបំពាក់បំប៉នអ្នកដឹកនាំទូទាំងពិភពលោកដែលមានចំណងជើងថា ការពង្រឹងគ្រួសារនិង សាសនាចក្រតាមរយៈបព្វជិតភាព ។

ឌីវីឌី ណែនាំតាមរបៀបថ្មីនេះត្រូវបានបកប្រែជា 66 ភាសា ។ វាបង្រៀនពីរបៀបដែលអំណាចបព្វជិតភាព អាចប្រទានពរ ចម្រើនកម្លាំង និង ចម្រើនកម្លាំងឡើងវិញដល់ជីវិតយើង ជីវិតគ្រួសារយើង និង រាល់សមាជិកសាសនាចក្រទាំងអស់ ។

វាបង្ហាញយើងគ្រប់គ្នា ---ទាំងប្រុសទាំងស្រី ទាំងក្មេង ទាំងអ្នករៀបការ ស្ត្រីមេម៉ាយ ឬ អ្នកនៅលីវ មិនថាយើងស្ថិតក្នុងកាលៈទេសៈបែបណាទេ ---បង្ហាញពីរបៀបដែលយើងអាចក្លាយជាអ្នកទទួលទានពរជ័យនៃបព្វជិតភាព ។ មានវគ្គដែលមានរយៈពេលពី 8 ទៅ 12 នាទីមួយចំនួន ពន្យល់ពីកូនសោ សិទ្ធិអំណាច និង អំណាចបព្វជិតភាព និង របៀបដែលវាពង្រឹងបុគ្គលម្នាក់ៗ គ្រួសារ និង សាសនាចក្រ ។

មានឈុតដ៏ពិសេសមួយ ត្រូវបានគេថតនៅក្នុងផ្ទះត្រួសត្រាយផ្លូវដ៏តូចរបស់ជីដូនទួតម្ដាយខ្ញុំគឺ ម៉ារី ហ្វីលឌីង ស្ម៊ីធ ។ គាត់ជាភរិយារបស់ ហៃរ៉ុម បងប្រុសព្យាការី យ៉ូសែប ។ ដោយក្ដីជំនឿដ៏រឹងមាំរបស់គាត់ទៅលើបព្វជិតភាព ហើយក្នុងនាមជាម្ដាយទោលម្នាក់ គាត់បានទូលអង្វរ ហើយពឹងផ្អែកទៅលើអំណាចនោះដើម្បីចិញ្ចឹម ហើយប្រទានពរដល់កូនគាត់ដោយក្ដីស្រឡាញ់ និង ពន្លឺនៃដំណឹងល្អ ។ សព្វថ្ងៃនេះ ពូជពង្សរបស់គាត់រាប់ពាន់នាក់ ដែលជាអ្នកដឹកនាំ និង ជាសមាជិកសាសនាចក្រដ៏ស្មោះត្រង់ បានអរគុណគាត់ចំពោះក្ដីជំនឿ ភាពក្លាហាន និង គំរូរបស់គាត់ ។

ឥឡូវនេះ ការប្រជុំបំពាក់បំប៉នថ្នាក់ដឹកនាំថ្មីនេះ មាននៅលើអ៊ិនធើរណិត ក្នុងគេហទំព័រ LDS.org សម្រាប់មនុស្សទូទៅមើល ហើយទទួលយកបទពិសោធន៍ ។ អ្នកអាចមើលវីដេអូនេះផ្ទាល់ ក្នុង គេហទំព័រ LDS.org ឬ អ្នកអាចទាញយកវាដាក់ក្នុង កុំព្យូទ័រ ទូរស័ព្ទទំនើប ឬ ឧបករណ៍ tablet របស់អ្នក ។

គណៈប្រធានទីមួយ បានសុំឲ្យ « គណៈប្រធានស្តេក និង គណៈប៊ីស្សពយកពេលក្នុងការប្រជុំក្រុមប្រឹក្សាស្តេក ឬ វួដម្ដង ឬ ច្រើនដងមើល ឌីវីឌី នេះទាំងអស់ ។ ក្រុមប្រឹក្សាស្ដេក និង វួដគួរពិភាក្សាពីរបៀបដើម្បីអនុវត្តការបង្រៀនដែលបានលើកឡើង » (First Presidency letter ថ្ងៃទី1 ខែកុម្ភៈ ឆ្នាំ 2013 ) ។

មាតិកានៅក្នុងនោះនឹងបំផុសគំនិត ហើយលើកទឹកចិត្តសមាជិកក្នុងកូរ៉ុមបព្វជិតភាព សមាគមសង្គ្រោះ សាលាថ្ងៃអាទិត្យ យុវជន យុវនារី ( ជាពិសេសអ្នកដែលរៀបចំខ្លួនចេញបេសកកម្ម ) និង ក្នុងការប្រជុំថ្នាក់កុមារ ឬ ក្នុងការប្រជុំរួមគ្នានៅសប្ដាហ៍ទីប្រាំ ។ នៅពេលនោះ សមាជិកក្រុមប្រឹក្សានឹងអាចមានលទ្ធភាពដើម្បីលើកទឹកចិត្តបុគ្គលម្នាក់ និង ឪពុកម្ដាយឲ្យប្រើបទបង្ហាញនេះជាមួយគ្រួសារខ្លួន ។ បងប្អូនប្រុសស្រី ការប្រជុំបំពាក់បំប៉នថ្នាក់ដឹកនាំនេះ គឺសម្រាប់សមាជិកសាសនាចក្រគ្រប់រូប ។ ឪពុកម្ដាយទាំងឡាយអើយ ! សូមមើល ចែកចាយ ហើយពិភាក្សាពីអ្វីដែលអ្នកបានរៀនជាមួយនឹងកូនចៅអ្នក ហើយចូរឲ្យពួកគេមើល ហើយធ្វើដូចគ្នាជាមួយនឹងអ្នកដែរ ដើម្បីឲ្យគ្រួសារអ្នកអាចពង្រឹងតាមរយៈបព្វជិតភាព ។

ព្រះយេស៊ូវមានបន្ទូលថា ៖

« បើអ្នកណាស្រេក ចូរឲ្យអ្នកនោះមកឯខ្ញុំ ហើយផឹកចុះ » ( យ៉ូហាន 7:37 ) ។

« អ្នកណាដែលផឹកទឹកខ្ញុំហើយ នោះនឹងមិនស្រេកទៀតឡើយ ទឹកដែលខ្ញុំឲ្យនឹងត្រឡប់ជារន្ធទឹកនៅក្នុងអ្នកនោះ ដែលផុសឡើងដល់ទៅបានជីវិតអស់កល្បជានិច្ច » ( យ៉ូហាន 4:14 ) ។

« ខ្ញុំជាពន្លឺលោកិយ អ្នកណាដែលតាមខ្ញុំ នោះមិនដែលដើរក្នុងសេចក្ដីងងឹតឡើយ គឺនឹងមានពន្លឺនៃជីវិតវិញ » ( យ៉ូហាន 8:12 ) ។

បើមានអ្នករាល់គ្នាណាម្នាក់មានអារម្មណ៍ថា ក្ដីជំនឿ និង ទីបន្ទាល់របស់អ្នកពីផែនការរបស់ព្រះវរបិតាសួគ៌មានតិចជាងអ្វីដែលអ្នកគួរតែមាន នោះសូមផ្ដោតឲ្យខ្លាំងថែមទៀតលើព្រះអង្គសង្គ្រោះ ។ ចូរទុកឲ្យពន្លឺ និង ទឹករស់នៃទ្រង់ ធ្វើដូចជាអ្វីដែលទឹក និង ពន្លឺ បានធ្វើឲ្យដើមប៉េងប៉ោះស្វិតស្រពោន បានលូតលាស់វិញ ដល់អ្នក និង គ្រួសារអ្នក ។

ឥឡូវ ខ្ញុំបានចាប់ផ្ដើមជាមួយនឹងភាពងឿងឆ្ងល់ក្នុងការបង្កបង្កើតរបស់ព្រះ តាមរយៈអំណាចបព្វជិតភាព ។ ខ្ញុំបានឈរនៅទីនេះដោយងឿងឆ្ងល់ថា តើអំណាចរបស់ព្រះដើម្បីណែនាំ ហើយប្រទានពរយើងអាចយល់ដឹងបានទាំងស្រុងដែរឬទេ ខ្ញុំគិតថាអ្នករាល់គ្នាក៏គិតដូចគ្នាដែរ ។ វាពិតជាធំធេងណាស់ ខ្ពង់ខ្ពស់ណាស់ អស្ចារ្យណាស់ និង ប្រកបដោយអំណាចណាស់ ។

យ៉ូសែប ស៊្មីធ បានមានប្រសាសន៍ថា « បព្វជិតភាព គឺជាគោលការណ៍អស់កល្បមួយ ហើយវានឹងនៅជាមួយព្រះរហូតអស់កល្បជានិច្ច ដោយគ្មានថ្ងៃចាប់ផ្ដើម ឬ ឆ្នាំបញ្ចប់ឡើយ » ( Teachings of Presidents of the Church: Joseph Smith [ ឆ្នាំ 2007 ] ទំព័រ 104 ) ។

ខ្ញុំសូមថ្លែងទីបន្ទាល់ថា កិច្ចការនៃព្រះយេស៊ូវគ្រីស្ទសម្រេចទៅបាន តាមរយៈបព្វជិតភាព ។ វាជាអំណាចដែលព្រះវរបិតាសួគ៌យើង និង ព្រះរាជបុត្រាសំណប់ទ្រង់បានបង្កើតផែនដីនេះ ហើយបានចាប់ផ្ដើមនូវផែនការនៃសុភមង្គលដ៏ធំសម្រាប់ជាប្រយោជន៍ដល់យើង ។ សូមឲ្យយើងឈ្លាសវៃ ហើយព្យាយមពង្រឹងជីវិតយើង ជីវិតគ្រួសារយើង និង សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយតាមរយៈអំណាចនៃបព្វជិតភាពនៃព្រះ នេះជាការអធិស្ឋានដោយរាបសាររបស់ខ្ញុំក្នុងព្រះនាមព្រះយេស៊ូវគ្រីស្ទ អាម៉ែន ។