Jezusi duke i folur Pjetrit në breg të detit

Feed My Sheep [Kulloti Delet e Mia], nga Kamille Corry

26 Qershor – 2 Korrik

Mateu 28; Marku 16; Lluka 24; Gjoni 20–21

“U Ringjall”

Përpara se t’i shqyrtoni idetë për mësimdhënien në këtë përvijim të mësimit, lexoni te Mateu 28; Marku 16; Lluka 24 dhe Gjoni 20–21, si dhe përsiatni se si mund të përdoren këta kapituj për ta forcuar besimin e atyre të cilëve u jepni mësim.

ikona e të treguarit

Ftojini të Tregojnë

Për t’i ndihmuar anëtarët e klasës që të tregojnë atë që e mësuan në studimin e tyre vetjak dhe familjar, kërkojuni të shkruajnë një të vërtetë nga pjesa e caktuar për lexim e kësaj jave, të cilën mendojnë se duhet t’ia tregojnë “mbarë botë[s]” (shih Marku 16:15). Në fund të orës mësimore, pyetini nëse gjetën ndonjë të vërtetë shtesë të cilën do të donin ta tregonin.

ikona e mësimdhënies

Jepeni Mësim Doktrinën

Mateu 28; Marku 16; Lluka 24; Gjoni 20

Ngaqë Jezusi u ringjall, edhe ne do të ringjallemi.

• Mund t’u jepni anëtarëve të klasës disa minuta kohë për ta rishikuar detyrën e leximit të kësaj jave dhe temën “Ringjallje” tek Udhëzuesi për Shkrimet e Shenjta dhe të shkruajnë të vërteta që ata i mësuan rreth Ringjalljes. Lejojini disa vetë të tregojnë atë që shkruan dhe nxitini anëtarët e klasës që të ngrenë duart kur dëgjojnë se dikush po thotë një të vërtetë që është e ngjashme me atë që shkruan ata. Përse janë këto të vërteta të rëndësishme për ne? Si ndikojnë ato te marrëdhëniet tona? Si ndikojnë ato te zgjedhjet tona?

Lluka 24:13–35

Ne mund ta ftojmë Shpëtimtarin që të “rri[jë] me ne”.

• Për t’i ndihmuar anëtarët e klasës që të kuptojnë lidhjet midis përvojave të tyre dhe përvojës së dishepujve në udhën për në Emaus, vizatoni një rrugë në tabelë dhe ftojini anëtarët e klasës të shkruajnë hollësi nga tregimi te Lluka 24:13–35 në njërën anë të rrugës. Më pas, në anën tjetër të rrugës, ata mund të shkruajnë ngjashmëri që i shohin në vetë përvojat e tyre si pasues të Jezu Krishtit. Për shembull, ata mund të shkruajnë “Sytë e tyre ishin të penguar” (Lluka 24:16) në njërën anë të rrugës dhe Ne nganjëherë nuk e kuptojmë ndikimin e Zotit në jetën tonë në anën tjetër. Si mund ta ftojmë Shpëtimtarin që të qëndrojë me ne?

Krishti i Ringjallur u shfaqet Apostujve

Jezusi e mësoi Thomanë: “Mos ji mosbesues, por besues” (Gjoni 20:27).

Gjoni 20:19–29

“Lum ata që nuk kanë parë dhe kanë besuar.”

• Klasa juaj e Shkollës të së Dielës mund të jetë një vend për anëtarët e klasës që ta forcojnë besimin e njëri-tjetrit në gjëra që nuk mund t’i shohin. Ndoshta ju mund ta filloni duke i kërkuar dikujt që ta përmbledhë përvojën e Thomait te Gjoni 20:19–29. Ju gjithashtu mund të shfaqni materialin filmik “Blessed Are They That Have Not Seen, and Yet Have Believed” [“Lum Ata që Nuk Kanë Parë dhe Megjithatë Kanë Besuar”] (ChurchofJesusChrist.org). Anëtarët e klasës mund të renditin në tabelë disa gjëra që Perëndia na i kërkon t’i besojmë pa i parë. Më pas mund t’u kërkoni atyre që të tregojnë përvoja që i kanë forcuar dëshmitë e tyre për këto gjëra dhe bekime që u kanë ardhur ndërsa kanë ushtruar besim.

Gjoni 21:1–17

Shpëtimtari na fton t’i kullotim delet e Tij.

• Çfarë mund t’i ndihmojë anëtarët e klasës suaj për ta pranuar ftesën e Shpëtimtarit që t’i “kulloti[n] delet e [Tij]”? Ju mund të filloni duke i ftuar të lexojnë në heshtje te Gjoni 21:15–17, duke e zëvendësuar emrin e Simonit me vetë emrin e tyre dhe “qengjat e mi” dhe “delet e mia” me emrat e njerëzve që e ndiejnë se Zoti dëshiron që ata t’u shërbejnë – për shembull, njerëzve që u japin shërbesë, fqinjëve apo njerëzve që i njohin nga puna ose shkolla. Pas disa minutash, anëtarët e klasës mund të tregojnë mbresat që patën. Çfarë mësojmë rreth Shpëtimtarit nga veprimet e Tij te Gjoni 21:4–13? Çfarë mund të bëjmë për t’i kullotur qengjat dhe delet e Shpëtimtarit? Thënia nga Plaku Geri E. Stivenson te pjesa “Burime Shtesë” mund të ndihmojë për të dhënë përgjigje për këtë pyetje.

ikona e burimeve

Burime Shtesë

Si mund t’i “kulloti[m] delet e [Tij]”?

Plaku Geri E. Stivenson shpjegoi se si ne mund ta përmbushim urdhërimin e Zotit për t’i kullotur delet e Tij:

“Kush është bari? Çdo burrë, grua dhe fëmijë në mbretërinë e Perëndisë është bari. Nuk kërkohet asnjë thirrje për këtë. Nga çasti kur dalim nga ujërat e pagëzimit, ne jemi të ngarkuar me këtë punë. Ne u shkojmë të tjerëve në ndihmë, sepse kjo është ajo që na urdhëroi Shpëtimtari të bëjmë. … Sa herë që fqinjët tanë kanë shqetësime materiale ose shpirtërore, ne vrapojmë për t’i ndihmuar. Ne mbajmë barrët e njëri‑tjetrit, që ato të mund të jenë të lehta. Vajtojmë me ata që vajtojnë. I ngushëllojmë ata që kanë nevojë për ngushëllim [shih Mosia 18:8–9]. Zoti plot dashuri, e pret këtë prej nesh. Dhe do të vijë dita kur do të mbajmë përgjegjësi për kujdesin që tregojmë në dhënien e shërbesës për grigjën e Tij [shih Mateu 25:31–46]” (“Kujdestaria si Një Bari për Shpirtrat”, Liahona, nëntor 2018, f. 111).

Përmirësimi i Mësimdhënies Sonë

Lejoni kohë që ata që po mësojnë, të mund të tregojnë se çfarë mësuan. “Kur nxënësit tregojnë atë që po mësojnë, ata jo vetëm që e ndiejnë Shpirtin dhe i forcojnë vetë dëshmitë e tyre, por gjithashtu i nxitin anëtarë të tjerë të klasës për të zbuluar të vërteta për veten e tyre. … Ruani kohë që studentët të tregojnë në çdo mësim – në disa raste, ju mund të shihni se këto diskutime janë mësimi” (Mësimdhënia sipas Mënyrës së Shpëtimtarit, f. 30).