Agosto 7–13

Roma 1–6

“Ang Kapangyarihan ng Diyos para sa Kaligtasan”

Mapanalanging basahin ang Roma 1–6 na nasasaisip ang mga miyembro ng klase mo. Tutulungan ka nitong maging sensitibo sa mga pahiwatig ng Espiritu habang naghahanda kang magturo.

Mag-anyayang Magbahagi

Isiping bigyan ng ilang minuto ang mga miyembro ng klase upang saliksikin ang Roma 1–6 para sa isang talata na tinulungan sila ng Espiritu Santo na mas maunawaan. Pagkatapos ay maaari nilang ibahagi sa katabi nila ang talatang pinili nila.

Ituro ang Doktrina

Roma 1:16–17

“Hindi ko ikinahihiya ang ebanghelyo [ni Cristo].”

• Maraming tao ang nagkaroon na ng mga karanasan kung saan kinutya sila dahil sa kanilang mga paniniwala. Para matulungan ang mga miyembro ng klase kapag mayroon silang gayong mga karanasan, maaari mo silang anyayahang basahin ang Roma 1:16–17 at isipin ang mga pagkakataon sa aklat ng Mga Gawa kung saan ipinakita ni Pablo na hindi niya ikinahihiya ang ebanghelyo. Marahil ay maaari ding ibahagi ng mga miyembro ng klase ang mga dahilan kaya hindi nila ikinahihiya ang ebanghelyo ni Jesucristo. O maaari silang magbahagi ng mga karanasan kung saan ipinakita nila o ng iba na hindi nila ikinahihiya ang ebanghelyo.

  

  Hindi natin ikahihiyang ibahagi ang ating patotoo tungkol sa ebanghelyo.

Roma 2:28–29

Ang tunay na pagkadisipulo ay matatagpuan sa katapatan ng ating kalooban, hindi lamang sa ating mga kilos.

• Paano natin masusuri ang ating sariling pagkadisipulo? Ang payo ni Pablo sa mga taga-Roma ay maaaring magpaalala sa atin na mas magtuon sa “puso [at] sa espiritu” (Roma 2:29) kaysa sa ipinapakitang mga kilos. Para maipaunawa sa klase mo ang payo ni Pablo, maaari mong isulat ang teksto mula sa Roma 2:28–29 sa pisara. Palitan ng Banal sa mga Huling Araw ang salitang Judio at ng tipan ang salitang pagtutuli. Ano ang idinaragdag ng pagbabagong ito sa pagkaunawa natin sa mga turo ni Pablo? Maaari mo ring talakayin ang mga halimbawa ng mga bagay na ginagawa natin bilang mga miyembro ng Simbahan na mas makabuluhan at mabisa kapag ginawa nang “[taos-]puso, sa espiritu” (Roma 2:29).

Roma 3–6

“Kung saan marami ang kasalanan, ay lalong dumarami ang biyaya.”

• Paano mo maipauunawa sa mga miyembro ng klase ang mga turo ni Pablo tungkol sa pananampalataya, mga gawa, at biyaya? Isiping ibahagi ang sumusunod na dalawang sitwasyon para maipaunawa sa kanila na hindi natin dapat ituring na isang paraan ang ating mabubuting gawa para patunayan ang ating pagkamarapat, ni hindi natin dapat ituring na dahilan ang biyaya ni Cristo para pangatwiranan ang ating mga kamalian at kasalanan. Maaaring maghanap ng mga katotohanan ang mga miyembro ng klase sa Roma 3:20–31; 5:1–2; 6:1–2, 21–23 na maaaring makatulong kina Gloria at Justin. Anong iba pang mga katotohanan sa “Karagdagang Resources” ang magpapaunawa sa mga miyembro ng klase ng kahalagahan kapwa ng mabubuting gawa at ng biyaya ni Cristo?

  Sitwasyon 1

  Isang kaibigang nagngangalang Gloria ang nahihirapan sa kanyang mga pagsisikap na maging tapat na disipulo. Nagsisikap siyang gawin ang lahat ng sa pakiramdam niya ay dapat niyang gawin, ngunit madalas siyang mag-alala na kulang ang kanyang mga pagsisikap. “Sapat ba ang kabutihan ko?” naisip niya. “Tatanggapin ba ako ng Panginoon?”

  Sitwasyon 2

  Isang kaibigang nagngangalang Justin ang di-gaanong nag-aalala tungkol sa paggawa ng mga tamang pagpili. Naniniwala siya kay Jesucristo, dumadalo siya sa kanyang mga miting sa simbahan, at isa siyang mapagmahal na ama at mabuting kapitbahay. Gayunman, napili niyang hindi ipamuhay ang mga pamantayan na paraan para maging karapat-dapat sana siya para sa temple recommend. Nang subukan ng pamilya at mga kaibigan na hikayatin siyang maghanda para sa templo, ang sagot niya’y, “Mabuting tao ako. Sumasampalataya ako kay Jesucristo. Binayaran na Niya ang mga kasalanan ko, at palagay ko’y hindi Niya ako pagsasarhan ng pintuan ng kahariang selestiyal dahil lang sa maliliit na bagay.”

Karagdagang Resources

Pananampalataya, biyaya, at mga gawa.

Sitwasyon 1

• Eter 12:27

• Moroni 10:32–33

• J. Devn Cornish, “Sapat na ba ang Kabutihan Ko? Magiging Karapat-dapat ba Ako?,” Liahona, Nob. 2016, 32–34

• Itinuro ni Pangulong Dieter F. Uchtdorf: “Ang kaligtasan ay hindi natatamo sa pagsunod; natatamo ito sa pamamagitan ng dugo ng Anak ng Diyos. … Ang biyaya ay isang kaloob ng Diyos, at ang hangarin nating sundin ang bawat utos ng Diyos ay pag-uunat ng ating mortal na kamay upang tanggapin ang sagradong kaloob na ito mula sa ating Ama sa Langit” (“Ang Kaloob na Biyaya,” Liahona, Mayo 2015, 109–10).

Sitwasyon 2

• Santiago 2:17–26

• Helaman 12:23–24

• D. Todd Christofferson, “Magsipanahan sa Aking Pag-ibig,” Liahona, Nob. 2016, 48–51

• Itinuro ni Pangulong Uchtdorf: “Kung ang biyaya ay isang kaloob ng Diyos, bakit napakahalagang sumunod sa mga utos ng Diyos? Bakit tayo mag-aabala sa mga utos ng Diyos—o magsisisi, para diyan? … Ang ating pagsunod sa mga utos ng Diyos ay nagiging likas na bunga ng ating walang-hanggang pagmamahal at pasasalamat sa kabutihan ng Diyos. Ang anyong ito ng tunay na pagmamahal at pasasalamat ay mahimalang isasama ang ating mga gawa sa biyaya ng Diyos” (“Ang Kaloob na Biyaya,” 109).

Pagpapahusay ng Ating Pagtuturo

Ang pagtawag sa iyo ay binigyang-inspirasyon. Bilang guro, tinawag ka ng Panginoon para pagpalain ang Kanyang mga anak. Nais ng Panginoon na magtagumpay ka, kaya kapag namuhay ka nang marapat sa Kanyang tulong, ibibigay Niya sa iyo ang paghahayag na hinahangad mo. (Tingnan sa Pagtuturo sa Paraan ng Tagapagligtas, 5.)