Mwokozi aliyefufuka alimtembelea Paulo gerezani (ona Matendo ya Mitume 23:11). Yesu Kristo anaweza kutuweka huru kutokana na “nira ya utumwa” (Wagalatia 5:1).

Septemba 27–Oktoba 1

Wagalatia

“Tembea katika Roho”

Kwa maombi unaposoma na kutafakari Wagalatia, Bwana atakufundisha kile unachohitaji kushiriki pamoja na darasa lako. Kuandika misukumo yako kunaonyesha shukrani kwa Mungu kwa ajili ya msaada Wake.

Alika Kushiriki

Kujifunza maandiko mara nyingi hutupeleka kwenye mjadala wa injili wenye kuleta maana na wanafamilia au marafiki. Je, hii ilitokea kwa washiriki wa darasa lako wiki hii? Waalike kuelezea uzoefu wao.

Fundisha Mafundisho

Wagalatia 1:6–7; 3:1–5; 4:8–21; 5:1, 13–14

Injili ya Yesu Kristo hutoa uhuru.

• Kujifunza kitabu chochote cha maandiko ni rahisi zaidi pale tunapojua kwa nini kiliandikwa. Kwa sababu hii, ingeweza kuwa vizuri kuanza mjadala kuhusu Wagalatia kwa swali kama “Je, unadhani dhumuni la Paulo lilikuwa nini katika kuandika waraka huu?” au “Ni tatizo gani Paulo alikuwa akijaribu kutatua” Alika washiriki wa darasa kutafuta viashiria vya jibu katika Wagalatia 1:6–7; 3:1–5; 4:8–21. Je, ni kwa namna gani ujumbe wa Paulo unatuhusu sisi leo?

• Baadhi ya Watakatifu wa Galatia walidhani bado walihitajika kuishi sheria ya Musa. Kwa Paulo, hii ilikuwa kama kuishi na “nira ya utumwa” ikilinganishwa na “uhuru” uliotolewa katika sheria ya Kristo (Wagalatia 5:1). Ili kuwasaidia washiriki wa darasa lako kuchunguza mafundisho ya Paulo kuhusu uhuru na utumwa, ungeweza kuwaomba kuorodhesha mitazamo na matendo ambayo yanaweza kutupeleka kwenye kifungo cha kiroho (kama vile desturi za kitamaduni, tabia mbaya, imani potofu, au kuzingatia kwenye matendo ya nje kuliko uongofu wa ndani). Kulingana na Wagalatia 5:1, 13–14, tunapataje uhuru kutoka kwenye hii mitazamo na matendo? Je, ni kwa namna gani sisi tumepata uhuru unaopatikana kupitia kwa Yesu Kristo? Ungeweza kumjibu vipi mtu ambaye anahisi kwamba kuishi injili kunazuia uhuru binafsi wa mtu?

Wagalatia 5:16–26

Kama “tutatembea katika Roho,” tutapokea “tunda la Roho.”

• Watu wengi wanahangaika kutambua ushawishi wa Roho. Wagalatia 5 inaweza kusaidia. Labda ungeweza kuwaomba washiriki wa darasa kupekua Wagalatia 5:22–25 ili kupata maneno aliyoyatumia Paulo kuelezea tunda la Roho. Ni kwa nini tunda ni mfano mzuri wa kuelezea jinsi Roho anavyotushawishi sisi? Labda washiriki wa darasa wangeweza kuelezea ni kwa namna gani tunda hili limekuwa la wazi katika maisha yao au maisha ya watu wanaowajua. Baadhi ya nyenzo nyingine za kuchunguza hujumuisha Mathayo 7:16–18; Yohana 14:26–27; Moroni 7:13–17; Mafundisho na Maagano 11:12–13; na maneno ya Rais Gordon B. Hinckley katika “Nyenzo za Ziada.”

Tunaweza kupokea “tunda la Roho” tukilitafuta.

Wagalatia 6:7–10

Tunapopanda “katika roho,” tutavuna baraka kwa wakati wake.

• Kujifunza Wagalatia 6:7–10 kunaweza kuwasaidia washiriki wa darasa kufikiri zaidi kiundani kuhusu matokeo ya muda mrefu ya chaguzi zao. Ili kuwasaidia, ungeweza kuleta mbegu za aina tofauti tofauti, pamoja na mimea, matunda au mboga za majani zinazokua kutoka kwenye kila mbegu hizi (au ungeweza kuleta picha za vitu hivi). Washiriki wa darasa wangeweza kufanya kazi kwa pamoja kulinganisha kila mbegu na kile inachozalisha. Kisha wangeweza kusoma mstari wa 7–10 na kuzungumza kuhusu maana ya “kupanda katika mwili” na “katika Roho” (Ujumbe kutoka kwa Mzee Ulisses Soares katika “Nyenzo za Ziada” yawezekana ukasaidia.) Je, tunavuna nini tunapopanda katika mwili? Je, tunavuna nini tunapopanda katika Roho? (ona Wagalatia 5:22–23).

• Baadhi ya washiriki wa darasa wanaweza kujisikia “kuchoka katika kutenda mema” (Wagalatia 6:9)—labda kwa sababu hawana uhakika kwamba jitihada zao zinazaa matunda. Mjadala wa Wagalatia 6:7–10 ungeweza kusaidia. Ili kutambulisha mistari hii, ungeweza kumwalika mtu fulani katika darasa kuzungumza kwa ufupi kuhusu wakati ambapo alihitaji uvumilivu wakati alipokuwa akijaribu kupanda kitu. Je, uzoefu wa mtu huyu, pamoja na Wagalatia 6:7–10, ungeweza kutufundisha nini kuhusu jitihada zetu za “kutembea katika Roho”? (Wagalatia 5:25).

Nyenzo za Ziada

Tunda la Roho.

Rais Gordon B. Hinckley alifundisha: Unatambua ushawishi wa Roho kwa matunda ya Roho—kile ambacho huangaza, kile ambacho hujenga, kile ambacho ni chanya na cha uhakika na cha kuinua na kutuongoza katika maneno na mawazo mazuri zaidi na matendo mazuri zaidi ni kutoka kwa Roho wa Mungu” (Teachings of Presidents of the Church: Gordon B. Hinckley [2016], 121).

Kupanda katika Roho.

Mzee Ulisses Soares alifafafanua: “Kupanda katika Roho humaanisha kwamba mawazo yetu yote, maneno na matendo lazima yatuinue katika hali ya utakatifu wa wazazi wetu wa mbinguni. Hata hivyo, maandiko yanauzungumzia mwili kama wenye asili ya kufa au wenye uovu wa mwanadamu wa asili, ambao huwaruhusu watu kuathiriwa na matamanio, hamu na mihemko ya mwili badala ya kuangalia ushawishi kutoka kwa Roho Mtakatifu. (“Kaeni katika Himaya ya Bwana!,” Liahona, Mei 2012, 39).

Kuboresha Ufundishaji Wetu

Wasaidie wanafunzi kuinuana. “Kila mtu katika darasa lako ni chanzo kikubwa cha ushuhuda, utambuzi na uzoefu kutokana na kuishi injili. Waalike kushiriki wao kwa wao na kuinuana” (Kufundisha katika Njia ya Mwokozi, 5).