junkab’al yoo chirilb’aleb’ li jalam-uuch

2–8 octubre

Efesios

“Re xtz’aqob’resinkileb’ ru laj santil paab’anel”

Li na’leb’ ut li eek’ahom chirix li taak’ut ut chan ru taak’ut te’chalq aawik’in naq nakatzol rik’in tijok li hu Efesios, eb’ li aatin sa’eb’ li jolomil ch’utub’aj-ib’ li toja’ xe’nume’, li tusleb’ aatin a’in, ut li hu Kim, Taaqehin—Choq’ reheb’ li komon ut li junkab’al.

reetalil li wotzok

Xkanab’ankileb’ chi wotzok

Naru taapatz’ reheb’ li komon naq te’xtz’iib’a chiru li pizarron jun na’leb’ sa’ jun ajwi’ ch’ol aatin li xe’xtzol chiru li xamaan. Sik’ ru junjunq reheb’ li k’osb’il ru aatin a’in, ut b’oqeb’ li komon li xe’tz’iib’ank re naq te’xwotz li k’a’ru xe’xk’oxla.

reetalil li k’utuk

Xk’utb’al li tzolʼlebʼ

Efesios 2:19–22; 4:4–8, 11–16

Eb’ li profeet ut eb’ li apostol—jo’ ajwi’ chiqajunilo—naqak’e xkawil li Iglees ut naqatenq’a chi wank sa’ junajil.

• Ma texruuq laa’at ut laa tzoleb’aal chixkab’lankil k’a’ruhaq sa’ komonil re xk’utb’al chan ru naq li Iglees “kab’lanb’il sa’ xb’een rub’elahomeb’ li apostol ut eb’ li profeet,” ut chan ru naq li Kolonel “a’an li xnimal ru pek sa’ li kab’l”? (Efesios 2:20). Maare eb’ li komon te’ruuq chixletzb’al li aatin chiruheb’ li kok’ kaaxukuutil che’ malaj eb’ li sek’ re hu, ut te’xkab’la choq’ najt xteramil kab’l malaj po’lem, ut li Jesukristo ut eb’ li apostol ut profeet te’wanq chi rub’el. Chi jo’kan, taaruuq taak’ut k’a’ru taak’ulmanq wi taa’isimanq li Kristo, malaj eb’ li apostol ut profeet. K’a’ut naq li xnimal ru pek sa’ li kab’l a’an jun chaab’il jaljookil ruhil aatin chirix li Jesukristo ut lix k’anjel sa’ li Iglees? (Re rilb’al chik li na’leb’ chirix li xnimal ru pek sa’ li kab’l, chi’ilmanq “Xkomon chik li k’anjeleb’aal.”) Eb’ li komon sa’ li tzoleb’aal te’ruuq chixtz’ilb’al rix Efesios 2:19–22; 4:11–16, re rilb’aleb’ li osob’tesink naqak’ul sa’ xk’ab’a’eb’ li apostol, li profeet, ut xkomoneb’ chik aj b’eresinel re li Iglees. K’a’ru naru taqab’aanu re xkab’lankil li qayu’am sa’ xb’een li raatineb’?

xnimal ru pek sa’ xxuk jun li nimla kab’l

Li Jesukristo a’an li xnimal ru pek re li Iglees.

• Wi eb’ li komon sa’ laa tzoleb’aal xe’rab’i li jolomil ch’utub’aj-ib’ chirix li tzoleb’aal xnume’, b’oqeb’ chixwotzb’al chan ru naq tz’aqob’resinb’il ru li aatin sa’ Efesios 4:11–16rik’in li k’a’ru k’utb’il sa’ li jolomil ch’utub’aj-ib’.

• Naru taakanab’eb’ li komon chiru junpaat chixtz’iib’ankil k’a’ruheb’ “lix k’anjeleb’ ” malaj xteneb’ankileb’ sa’ li Iglees (chi’ilmanq Efesios 4:1)—maare jo’ aj ilol komon, jo’ na’b’ej yuwa’b’ej, jo’ xtzolom li Kristo, ut wan xkomon chik. Chirix a’an naru te’xk’ut lix tz’iib’ahom rik’in jun chik komon, te’ril Efesios 4:4–8, 11–16, ut te’xwotz chan ru naq lix b’oqb’aleb’ li xe’xtz’iib’a natenq’an chixkab’lankil lix tz’ejwal li Kristo. Chan ru nokoru chi k’anjelak sa’ komonil re naq toowanq sa’ junajil, rub’el “jun ajwi’ chi Qaawa’, jun chi paab’aal, jun chi kub’iha’ ”?

Efesios 5:25–6:4

Xtaaqenkil lix b’aanuhom li Kolonel naru chixkawob’resinkil li sahil wank sa’ li qajunkab’al.

• Re xtenq’ankileb’ li komon chixk’anjelankil lix na’leb’ laj Pablo chirix li wank sa’ junkab’al, naru taatz’iib’aheb’ chiru li pizarron li patz’om a’in: Chan ru naru naqataaqe lix b’aanuhom li Kolonel sa’ li qawanjik rik’ineb’ li qajunkab’al? (chi’ilmanq Efesios 5:25). K’a’ru naraj naxye choq’ aawe “chawoxloq’i laa na’ laa yuwa’ ”? (Efesios 6:1–3). Chan ru neke’qak’iresi li qakok’al “rik’in xtzolb’aleb’ ut xtijb’aleb’ jo’ naraj li Qaawa’ ”? (Efesios 6:4). Eb’ li komon naru neke’xwotz xna’leb’eb’ chirixeb’ li patz’om a’an, sa’ ch’uut malaj sa’ komonil, naq yooqeb’ chirilb’aleb’ li raqal. Naru taapatz’ reheb’ naq te’xwotz li rilomeb’ rik’ineb’ jalan chik kristiaan li neke’wan jo’ kixye laj Pablo.

Efesios 6:10–18

Li kolb’a-ib’ aq’ej re li Dios naru tixkol qix chiru li maa’usilal.

• K’a’ru taaruuq chixk’eeb’al xkawileb’ xch’ool li komon sa’ li tzoleb’aal re te’xyal xq’e chixtiqib’ankil rib’ rik’in li kolb’a-ib’ aq’ej re li Dios wulaj wulaj? Naru taakawresi jun ch’ina k’anjel sa’ li te’xjunaji ru li na’leb’ malaj chaab’ilal yeeb’il choq’ re li junjunq raqal re li kolb’a-ib’ aq’ej jo’ yeeb’il sa’ Efesios 6:14–17. Chan ru naq li junjunq cha’al re li kolb’a-ib’ aq’ej natenq’an chixkolb’al qix chiru li maa’usilal? (Re aatenq’ankil, chi’ilmanq “Xkomon chik li k’anjeleb’aal.”) Chan ru naqak’e chiqix lix kolb’a-ib’ aq’ej? K’a’ru naru naqab’aanu re xk’eeb’al reetal ut xtuq’ub’ankil ru li majelal sa’ li kolb’a-ib’ aq’ej li wan chiqix?

reetalil li kʼanjelebʼaal

Xkomon chik li k’anjeleb’aal

K’a’ru jun xnimal ru pek sa’ xxuk?

Li xnimal ru pek sa’ xxuk a’an li xb’een pek li nak’eeman sa’ xk’ojleb’aal jun kab’l. Nak’anjelak re xb’isb’al b’ar tz’aqal te’k’ojob’aaq li jun ch’ol chik chi pek, li tento te’wanq chi tzoltzo rik’in li xb’eenil pek sa’ xxuk. Rik’in naq wan raalil chixjunil li kab’l sa’ xb’een, li xb’eenil pek sa’ xxuk li kab’l tento taawanq chi kaw, chi k’ojk’o, ut chi ink’a’ na’eek’an (chi’ilmanq “The Cornerstone,” Ensign, enero 2016, 74–75).

Li kolb’a-ib’ aq’ej re li Dios

Jit’jooq lee sa’ rik’in li yaal:Li cha’al a’in re li kolb’a-ib’ aq’ej, chanchan jun k’aamal sa’. Li k’aamal sa’ a’in nak’anjelak ajwi’ re k’ehok kawilal.

Li ramb’al ru ch’oolej re tiikilal:Jun ramok ch’oolej naxkol rix li aamej ut xkomon chik xch’a’al li junxaqalil.

Chi tz’aptz’o eeroq rik’in li kawresink-ib’ re li evangelio re tuqtuukilal:A’in li k’a’ru naxkol rix li roq laj pleet.

Li ramok-ib’ re paab’aal:Jun ramleb’ naru naxkol rix chixjunil li junxaqalil chiru li rahilal.

Li xramb’al jolomej re li kolb’a-ib’:Lix tz’apb’al jolomej naxkol rix xjolom.

Lix yok’leb’ ch’iich’ li Musiq’ej:Li yok’leb’ ch’iich’ nak’anjelak re xkolb’al qib’ chiru li yoo chi pleetink qe.

Xchaab’ilob’resinkil li qak’utum

Yal aaq’e chi rahok jo’ kirahok li Kristo. Tento naq li k’a’ru nakab’aanu choq’ reheb’ li tzolb’ileb’ aab’aan taawanq chi b’aanunb’il rik’in rahok. Laa’at ut eb’ li nakatzoleb’ tex’osob’tesiiq naq nekextijok re xk’ulb’al li rahok jo’ li kirahok wi’ li Kristo, ut nekesik’ chan ru naq teek’ut li rahom a’an (chi’ilmanq Li k’utuk jo’ li Kolonel, 6; Moroni 7:48).