“9–15 octubre. Filipenses; Kolosenses: “Chixjunil ninkuy xnumsinkil sa‘ xk‘ab‘a‘ li nak‘ehok xkawub‘ inch‘ool,” ” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“9–15 octubre. Filipenses, Kolosenses,” Kim, Taaqehin—Choq‘ re li Dominkil Tzoleb‘aal: 2023
9–15 octubre
Filipenses; Kolosenses
“Chixjunil ninkuy xnumsinkil sa‘ xk‘ab‘a‘ li nak‘ehok xkawub‘ inch‘ool”
Tikib‘ rik‘in rilb‘al Filipenses ut Kolosenses, ut k‘oxla rik‘in tijok k‘a‘ru li tzol‘leb‘ taaraj li Qaawa‘ naq taak‘ut. Li Musiq‘ej chixk‘am aab‘e naq nakak‘oxlaheb‘ li patz‘om ut li k‘anjeleb‘aal li tatruuq chiroksinkil re xk‘utb‘al li tzol‘leb‘ a‘in.
Xkanab‘ankileb‘ chi wotzok
Patz‘ reheb‘ li komon naq te‘xye junaq aatin malaj ch‘ol aatin li tixch‘olob‘ li xe‘xtzol sa‘ Filipenses ut Kolosenses, ut chirix a‘an te‘xch‘olob‘ k‘a‘ut naq xe‘xsik‘ ru li aatin a‘an. Waklesi xch‘ooleb‘ chixwotzb‘aleb‘ li raqal sa‘eb‘ li loq‘laj hu naq yookeb‘ chixch‘olob‘ankil.
Xk‘utb‘al li tzol‘leb‘
Filipenses 2:1–5, 14–18; 4:1–9; Kolosenses 3:1–17
Nokowulak chi “ak‘ ” naq naqayu‘ami lix evangelio li Jesukristo.
-
Maare taawaj xtenq‘ankileb‘ li komon sa‘ li tzoleb‘aal chixtawb‘al ru k‘a‘ru xyaalalil “risinkil sa‘ xch‘ooleb‘ lix najteril yu‘ameb‘,” ut “xtiqib‘ankil rib‘eb‘ rik‘in li ak‘ yu‘am” sa‘ xk‘ab‘a‘ li Jesukristo (Kolosenses 3:9–10 Re xb‘aanunkil a‘an, naru taak‘ut xjalam-uuch jun k‘a‘aq re ru q‘e‘el li ki‘ak‘ob‘resiik (maare jun li tem, jun ochoch, malaj junaq b‘aqlaq ch‘iich‘). Eb‘ li komon sa‘ li tzoleb‘aal te‘ruuq chi aatinak chirix chan ru naq “noko‘ak‘ob‘resiik” rik‘in xpaab‘ankil li Jesukristo, ut rik‘in wank qach‘ool chixyu‘aminkil lix evangelio. Jo‘ jun raqal re li seraq‘ a‘in, taaruuq taapatz‘ re xyijach li tzoleb‘aal naq te‘xtzol Filipenses 2:1–5, 14–18; 4:1–9, ut lix yijach chik naq te‘xtzol Kolosenses 3:1–17, ut te‘xk‘e reetal chan ru naq wan li “najteril winq” ut li “ak‘ winq.” Naru ajwi‘ taab‘oq junjunq komon sa‘ li tzoleb‘aal chixwotzb‘al chan ru naq xb‘aan xpaab‘ankil li Jesukristo ut xyu‘aminkil lix evangelio neke‘tenq‘aak chi ak‘ob‘resiik.
Naru naqataw xsahil qach‘ool rik‘in li Kristo, maak‘a‘ naxye chan ru naq wanko.
-
Us ta li wanko wi‘ jalan wi‘ rik‘in li kiwan wi‘ laj Pablo, chiqajunil wan k‘a‘ru naru naqatzol rik‘in naq a‘an kiwan chi k‘ojk‘o xch‘ool ut chi sa xch‘ool sa‘ chixjunil li ch‘a‘ajkilal kixnumsi sa‘ xyu‘am. Re xtikib‘ankil aatinak chirix li na‘leb‘ a‘in, naru teenumsi wi‘chik junjunq li ch‘a‘ajkilal kixk‘ul laj Pablo (chi‘ilmanq, jo‘ eetalil, 2 Korintios 11:23–28). Taaruuq taapatz‘ reheb‘ li komon sa‘ li tzoleb‘aal naq te‘ril ru Filipenses 4:1–13re xtawb‘al li na‘leb‘ kixk‘e laj Pablo li taatenq‘anq qe chi saho‘k sa‘ qach‘ool, us ta sa‘ xkutankil li xyalb‘al qix.
-
Naru te‘xwotz junaq xk‘ulumeb‘ naq xe‘reek‘a “li tuqtuukil usilal li nachalk rik‘in li Dios, ut naxq‘ax ru chixjunil li na‘leb‘ ” (Filipenses 4:7) malaj naq xe‘reek‘a naq kawresinb‘ileb‘ “sa‘ xk‘ab‘a‘ li Kristo” (raqal 13) chixb‘aanunkil k‘a‘ruhaq li ink‘a‘ raj xe‘ru chixb‘aanunkil.
-
Wi nakawaj aatinak chi us chirix li na‘leb‘ a‘in, naru nakapatz‘ re jun li komon naq tixwotz junaq seraq‘ malaj junjunqaq reheb‘ li raatin li Awa‘b‘ej Russell M. Nelson sa‘ “Li sahil ch‘oolejil ut kole‘k sa‘ musiq‘ejil” (Jolomil ch‘utub‘aj-ib‘ re octubre 2016). ¬ Chan ru naq eb‘ li kristiaan sa‘ li raatin li Awa‘b‘ej Nelson, malaj li ixq sa‘ li video, xe‘xtaw li sahil ch‘oolejil, us ta ch‘a‘aj xe‘wan wi‘?
-
Rik‘in naq yoo chi nimank li maa‘usilal sa‘ li ruchich‘och‘ anajwan, eb‘ li komon sa‘ laa tzoleb‘aal maare te‘usaaq rik‘in li raatin laj Pablo naq “chiwanq sa‘ xch‘ooleb‘ ” li k‘a‘ru tiik, li maak‘a‘ reek‘, li ka‘loq‘ oxloq‘, li chaab‘il, ut li xk‘ulub‘ nimaak ru (Filipenses 4:8). Maare tatruuq chixk‘eeb‘al re li junjunq komon sa‘ li tzoleb‘aal (malaj reheb‘ li kok‘ ch‘uut chi komon) jun reheb‘ li aatin yeeb‘il sa‘ Filipenses 4:8 malaj sa‘ Eb‘ lix Raqalil li Paab‘aal 1:13. Naru te‘roksi li K‘utul Raqal reheb‘ li Loq‘laj Hu re xtawb‘aleb‘ li raqal chirix li aatin xe‘xk‘ul, ut te‘xwotz chiru li tzoleb‘aal li k‘a‘ru xe‘xtaw. Naru ajwi‘ te‘xwotz chan ru naq xe‘ril reetalil li aatin a‘an sa‘ xyu‘ameb‘ li ras riitz‘ineb‘. Chan ru naq “naqasik‘ li k‘a‘aq re ru a‘in”?
Naq “xe‘enb‘ilo” rik‘in li Jesukristo, nokokawob‘resiik chiru lix na‘leb‘ li ruchich‘och‘.
-
Lix ch‘olob‘ahom laj Pablo chirix li Kolonel li natawman sa‘ Kolosenses 1:12–23; 2:2–8 naru naxtenq‘aheb‘ li komon chixk‘oxlankil ut chixkawob‘resinkil tz‘aqal lix paab‘aaleb‘. Eb‘ li komon sa‘ li tzoleb‘aal te‘ruuq chixtz‘ilb‘aleb‘ rix li raqal a‘in re xtawb‘al li k‘a‘aq re ru naxkawob‘resi lix paab‘aaleb‘ chirix li Jesukristo. K‘a‘ru xyaalalil naq “xe‘enb‘ilaqex ut kab‘lanb‘ilaqex sa‘ xb‘een” li Jesukristo? (Kolosenses 2:7). Lix jalam-uuch li toon che‘ sa‘ li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut junkab‘al ut li video “Torbellinos espirituales” (ChurchofJesusChrist.org) naru naxtenq‘aheb‘ li komon chi aatinak chirix li raqal a‘in. Ani naru chixkawob‘resinkil malaj chixq‘unob‘resinkil lix xe‘ jun toon che‘? Chan ru nokokawob‘resiik wi “xe‘enb‘ilo ut kab‘lanb‘ilo sa‘ xb‘een [li Kristo]”? (chi‘ilmanq Kolosenses 2:7–8; chi‘ilmanq ajwi‘ Helaman 5:12; Eter 12:4).
-
Naru taapatz‘ reheb‘ li komon naq te‘xye k‘a‘ru nak‘utman sa‘ Kolosenses 1:12–23; 2:2–8 li naru naqoksi re elk chiruheb‘ li “b‘alaq‘il aj na‘leb‘ ” li naru neke‘xk‘os ru li qapaab‘aal chirix li Kristo (Kolosenses 2:8). Chan ru naru naqatenq‘a qib‘ chiqib‘il qib‘ sa‘ xtaaqenkil li Kolonel, ut risinkil qib‘ chiru lix b‘alaq‘il na‘leb‘ laj Satanas?
Xkawresinkil qib‘ jo‘ aj k‘utunel
Oksiheb‘ li b‘ich. Li loq‘laj b‘ich naxk‘e xb‘oqb‘al lix wankil li Santil Musiq‘ej. Naru ajwi‘ nokoxkanab‘ chireek‘ankil li oxloq‘ink, ut chixk‘eeb‘al qach‘ool chi k‘anjelak. K‘oxla chan ru naq naru taawanq sa‘ li tzoleb‘aal li “xtzolb‘al eerib‘ ut xk‘eeb‘al eena‘leb‘ cherib‘il eerib‘ ” rik‘ineb‘ li b‘ich (Kolosenses 3:16; chi‘ilmanq ajwi‘ Li k‘utuk jo‘ li Kolonel, 22).