eb’ li misioneer ixq yookeb’ chi aatinak rik’in jun saaj winq

16–22 octubre

1 ut 2 Tesalonicenses

“Re xtz’aqob’resinkil jo’nimal chik naraj lee paab’aal”

Laj Alma kixye, “Maajun teekanabʼ chi wank choqʼ aj tzolonel malaj aj kʼehol naʼlebʼ cheru, kaʼajwiʼ wi re li Dios li winq aʼan, ut nabʼeek saʼ lix bʼe ut naxpaabʼ lix taqlahom” (Mosiah 23:14). K’a’ru naxye li raqal a’in chirix chan ru xkawresinkil aawib’ chi k’utuk?

reetalil li wotzok

Xkanab’ankileb’ chi wotzok

Kanab’eb’ li komon chirilb’al chiru junpaat 1 and 2 Tesalonicenses ut chixtawb’al junaq raqal li nawulak chiruheb’. Ye reheb’ naq te’xwotz li raqal xe’xtaw rik’in jun chik komon sa’ li tzoleb’aal, ut chirix a’an patz’ re junjunq li sumal naq te’xwotz li k’a’ru xe’xtzol chirib’ileb’ rib’.

reetalil li k’utuk

Xk’utb’al li tzolʼlebʼ

1 Tesalonicenses 1:5–8; 2:1–13

Eb’ lix moos li Qaawa’ neke’xjultika li aatin rik’in x’anchalileb’ xch’ool ut rik’in rahok.

• Laj Pablo kixtikib’ lix hu reheb’ laj Tesalonika rik’in xjultikankil reheb’ laj santil paab’anel chan ru naq a’an ut eb’ lix komon xe’xwotz li evangelio rik’ineb’. Maare us choq’ reheb’ li komon sa’ laa tzoleb’aal sa’ li hoonal a’in xtz’ilb’al rix chan ru naq yookeb’ chixtzolb’al rib’eb’ ut chi tzolok li jun rik’in li jun chik. Naru taab’oqeb’ li komon sa’ li tzoleb’aal chirilb’al ru 1 Tesalonicenses 1:5–8; 2:1–13, ut te’xk’e reetal li na’leb’ chirix chan ru xwotzb’al chi us li evangelio. Chirix a’an te’ruuq chixtz’iib’ankileb’ li patz’om chirixeb’ li raqal a’in, li taatenq’anq reheb’ chixk’eeb’al reetal chan ru naq wankeb’ sa’ xk’utb’al li evangelio chiruheb’ li ras riitz’ineb’. Qayehaq, taaruuq raj te’xpatz’ “Ma yookin chixyu’aminkil li k’a’ru ninnaw? (chi’ilmanq 1 Tesalonicenses 1:7). Chan ru naq xtaaqenkileb’ li na’leb’ sa’eb’ li raqal a’in tooxtenq’a chi k’anjelak chi us chiruheb’ li tzolb’ileb’ qab’aan?

1 Tesalonicenses 3:9–134:1–12

Naq naqataaqe li Jesukristo, naru naqak’ul qasantilal.

• Laj Pablo kixk’ut chiruheb’ laj santil paab’anel aj Tesalonika naq “Li Dios ink’a’ xooxb’oq chi wank sa’ tz’ajnij-ib’, sa’ santilal b’an wanko” (1 Tesalonicenses 4:7 Re xtikib’ankil li aatinak chirix li santilal, naru teeb’icha li b’ich “K’e insantilal” (Eb’ li B’ich, 74). Ye reheb’ li komon sa’ li tzoleb’aal naq te’aatinaq chirix k’a’ru xraqalil li santilal li yeeb’il resil sa’ li b’ich, li wan xwankil choq’ reheb’. Tz’iib’a chiru li pizarron, K’e insantilal, k’e … , ut b’oqeb’ li komon sa’ li tzoleb’aal chixsik’b’aleb’ li aatin sa’ 1 Tesalonicenses 3:9–13; 4:1–12 re xtz’aqob’resinkil ru li tz’iib’anb’il. Chan ru naru chiqu xtawb’aleb’ li chaab’ilal a’in?

• Maare chanchan ch’a’aj li wank chi sant. Maare us raj wi eb’ li komon sa’ li tzoleb’aal te’xtaw ru naq li santob’resiik nak’ulman chi timil timil, ut naq tento naq “yooqo xb’aanunkil” chiru naab’al kutan (1 Tesalonicenses 4:10). Re xk’utb’al xyaalal a’in, naru taab’oq junaq komon sa’ li tzoleb’aal chi aatinak chirix junaq maatan li xk’anjelak chiru naab’al kutan re xk’ulb’al, jo’ xkemb’al jun li isb’, malaj xwajb’ankil jun wajb’. Chan ru naq a’in chanchan li santob’resiik? B’oqeb’ li komon sa’ li tzoleb’aal chixnumsinkil wi’chik 1 Tesalonicenses 3:9–13; 4:1–12, ut chixwotzb’al chirib’ileb’ rib’ li k’a’ru neke’xk’oxla chirix k’a’ru tento xb’aanunkil xk’ulb’al qasantilal, jo’ kixye laj Pablo. K’a’ru nokoxtenq’a sa’ li qab’eenik re xk’ulb’al li santilal?

1 Tesalonicenses 4:11–12; 2 Tesalonicenses 3:7–13

Tento took’anjelaq re xk’ulb’al li nak’anjelak chiqu, ut li nak’anjelak chiruheb’ li neke’raj xtenq’ankil.

• Rik’ineb’ li patz’om jo’ a’in, naru taatiklaaq li aatinak chirix li na’leb’ kixk’e laj Pablo chirix li k’anjelak: “K’a’ru na’uxman xb’aan li q’emal?” K’a’ chi osob’tesiik neke’k’ulman xb’aan li trab’ajik? K’a’ru nekek’oxla naq yoo chixyeeb’al laj Pablo rik’in li aatin “sa’ tuqtuukilal,” ut “sa’ xyaalalil”? (1 Tesalonicenses 4:11; 2 Tesalonicenses 3:12). Naru taatz’iib’aheb’ li patz’om a’in chiru li pizarron, re naq eb’ li komon te’xtz’ileb’ rix naq yookeb’ chirilb’al 1 Tesalonicenses 4:11–12 ut 2 Tesalonicenses 3:7–13. K’a’ chik chi raqalil re li loq’laj hu nokohe’xtenq’a chixtawb’al ru xnimal ru li trab’ajik ut li xiwxiw naxk’am chaq li q’emal? (chi’ilmanq li na’leb’ sa’ “Xkomon chik li k’anjeleb’aal”).

2 Tesalonicenses 2

Kinawman naq taa’uxq jun q’etok paab’ank rub’elaj li xkab’ xk’ulunik li Jesukristo.

• Maare us raj ajwi’ aatinak chirix junjunq li jaljookil ru aatin oksinb’il xb’aaneb’ li profeet re aatinak chirix li q’etok paab’ank, jo’ xtz’eqtaanankil li paab’ank (chi’ilmanq 2 Tesalonicenses 2:3), li tz’okaaq (chi’ilmanq Amos 8:11–12), li josq’ aj xojb’ li te’ok sa’ xyanqeb’ li karneer (chi’ilmanq Hechos 20:28–30), ut xq’esnal li xikej (chi’ilmanq 2 Timoteo 4:3–4). Naru taajacheb’ ru li komon chi ka’kab’il, ut taaye reheb’ naq te’ril ru jun malaj xkomoneb’ chik li raqal a’in (malaj jalaneb’ chik raqal taasik’ ru), ut te’xye k’a’ru neke’xye li raqal a’an chirix li nimla q’etok paab’ank. K’a’ru ke’xye li profeet chirix li q’etok paab’ank, ut li k’a’ru taa’uxq xb’aan a’an?

• Us ta li Iglees ink’a’ chik taanume’q sa’ jun “q’etok paab’ank” (2 Tesalonicenses 2:3), jo’ kik’ulman sa’ najter kutan, toj naru nokoq’etok paab’ank sa’ junjunqal. K’a’ru naxye sa’ 2 Tesalonicenses 2 chirix li q’etok paab’ank a’an (chi’ilmanq li raqal 9–10) ut chan ru naru naqakol qib’ chiru (che’ilmanq li raqal 15–17).

reetalil li kʼanjelebʼaal

Xkomon chik li k’anjeleb’aal

Eb’ li raqal chirix li k’anjelak ut li q’emal

• Genesis 3:19

• Mateo 21:28–32

• Mosiah 2:10–16

• Tzol’leb’ ut Sumwank 42:42; 58:27; 60:13; 75:29

Xchaab’ilob’resinkil li qak’utum

Oksi jalan jalanq paay chan ru naq nakatk’utuk. Wan naq ink’a’ ch’a’aj yal xb’aanunkil jun paay chi k’utuk, a’ut jalan jalanq paay chi k’utuk naru naxtenq’a chixjunqaleb’ li komon sa’ li tzoleb’aal. Sik’ chan ru tatruuq chixjalb’al b’ayaq chan ru naq nakatk’utuk, jo’ roksinkileb’ li video, li jalam-uuch, malaj li b’ich, malaj xkanab’ankileb’ li komon chi k’utuk jun sut (chi’ilmanq Li k’utuk jo’ li Kolonel, 22).