« ថ្ងៃទី ២–៨ ខែ តុលា ។ អេភេសូរ ៖ ‹ ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២១ )

« ថ្ងៃទី ២–៨ ខែ តុលា ។ អេភេសូរ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

ថ្ងៃទី ២–៨ ខែ តុលា

អេភេសូរ

« ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង »

គំនិត និងចំណាប់អារម្មណ៍ថាត្រូវបង្រៀនអ្វី ហើយបង្រៀនតាមរបៀបណានឹងកើតមាន នៅពេលបងប្អូនសិក្សាគម្ពីរ អេភេសូរ សុន្ទរកថាសន្និសីទថ្មីៗ គម្រោងមេរៀននេះ និង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ប្រកបដោយការអធិស្ឋាន ។

អញ្ជើញឲ្យចែកចាយ

សូមពិចារណាអញ្ជើញសមាជិកក្នុងថ្នាក់ឲ្យសរសេរនៅលើក្ដារខៀន នូវសេចក្ដីសង្ខេបជាប្រយោគមួយអំពីអ្វីមួយ ដែលពួកគេបានរៀនសូត្រនៅក្នុងការសិក្សារបស់ពួកគេនៅសប្ដាហ៍នេះ ។ សូមជ្រើសយកសេចក្ដីសង្ខេបមួយចំនួនដោយចៃដន្យ ហើយអញ្ជើញសមាជិកក្នុងថ្នាក់ដែលសរសេរវាឲ្យចែកចាយគំនិតរបស់ពួកគេ ។

បង្រៀនគោលលទ្ធិ

អេភេសូរ ២:១៩–២២; ៤:៤–៨, ១១–១៦

ពួកព្យាការី និងពួកសាវក—ព្រមទាំងយើងទាំងអស់គ្នាផងដែរ—ផ្ដល់កម្លាំង និងសាមគ្គីភាពដល់សាសនាចក្រ ។

តើបងប្អូន និងសមាជិកក្នុងថ្នាក់របស់បងប្អូនអាចស្ថាបនាអ្វីមួយរួមគ្នា ដើម្បីបង្ហាញអំពីរបៀបដែលសាសនាចក្រត្រូវបាន « ស្អាងឡើងលើជើងជញ្ជាំងនៃពួកសាវ័ក និងពួកហោរា » និងរបៀបដែលព្រះអង្គសង្គ្រោះគឺជា « ថ្មជ្រុងយ៉ាងឯក » បានដែរឬទេ ? ( អេភេសូរ ២:២០ ) ។ ប្រហែលជាសមាជិកក្នុងថ្នាក់អាចបិទស្លាកលើដុំឈើ ឬពែងក្រដាស ហើយតម្រៀបវាជាប៉ម ឬរាងជាពីរ៉ាមីតមួយ ដោយមានព្រះយេស៊ូវគ្រីស្ទ ព្រមទាំងពួកសាវក និងព្យាការីធ្វើជាគ្រឹះ ។ បន្ទាប់មក បងប្អូនអាចបង្ហាញអ្វីដែលនឹងកើតឡើង ប្រសិនបើគេដកយកព្រះគ្រីស្ទ ឬពួកសាវក និងព្យាការីចេញនោះ ។ ហេតុអ្វីថ្មជ្រុងយ៉ាងឯកនោះគឺជាពាក្យប្រៀបធៀបដ៏ល្អមួយសម្រាប់ព្រះយេស៊ូវគ្រីស្ទ និងតួនាទីរបស់ទ្រង់នៅក្នុងសាសនាចក្រ ? ( សម្រាប់ការពិពណ៌នាមួយអំពីថ្មជ្រុងយ៉ាងឯកមួយ សូមមើល « ធនធានបន្ថែមទាំងឡាយ » ) ។ សមាជិកក្នុងថ្នាក់អាចស្រាវជ្រាវក្នុង អេភេសូរ ២:១៩–២២; ៤:១១–១៦ រកមើលពរជ័យដែលយើងទទួលបាន ដោយសារតែពួកសាវក ពួកព្យាការី និងថ្នាក់ដឹកនាំផ្សេងទៀតក្នុងសាសនាចក្រ ។ តើយើងអាចធ្វើអ្វីបានខ្លះ ដើម្បីស្ថាបនាជីវិតរបស់យើងនៅលើការបង្រៀនរបស់ពួកលោក ?

ថ្មជ្រុងនៃអគារមួយ — ព្រះយេស៊ូវគ្រីស្ទគឺជាថ្មជ្រុងយ៉ាងឯកនៃសាសនាចក្រ ។

ប្រសិនបើសមាជិកក្នុងថ្នាក់របស់បងប្អូនបានស្ដាប់សន្និសីទទូទៅ ចាប់តាំងពីពេលចុងក្រោយដែលបងប្អូនបានជួបគ្នា សូមអញ្ជើញពួកគេឲ្យចែកចាយអំពីរបៀបដែលអ្វីៗត្រូវបានបង្រៀនអំឡុងសន្និសីទនេះ បានជួយបំពេញគោលបំណងដែលបានចែងនៅក្នុង អេភេសូរ ៤:១១–១៦ ។
ប្រហែលជាបងប្អូនអាចទុកពេលមួយសន្ទុះឲ្យសមាជិកក្នុងថ្នាក់សរសេរពាក្យមួយចំនួនអំពី « ការងារ » ឬការទទួលខុសត្រូវមួយចំនួនដែលពួកគេមានក្នុងនាមជាសមាជិកនៃសាសនាចក្ររបស់ព្រះគ្រីស្ទ ( សូមមើល អេភេសូរ ៤:១ )—ឧទាហរណ៍ ជាបងប្អូនប្រុស ឬបងប្អូនស្រីដែលផ្ដល់ការងារបម្រើ ជាឪពុក ឬម្ដាយដ៏សុចរិត ជាសិស្សរបស់ព្រះគ្រីស្ទជាដើម ។ បន្ទាប់មក ពួកគេអាចប្ដូរបញ្ជីជាមួយនឹងសមាជិកក្នុងថ្នាក់ម្នាក់ទៀត អាន អេភេសូរ ៤:៤–៨, ១១–១៦ ហើយចែកចាយរបៀបដែលការបំពេញតាមទំនួលខុសត្រូវទាំងនេះនៅលើបញ្ជីរបស់ពួកគេ ជួយស្អាងដល់ព្រះកាយរបស់ព្រះគ្រីស្ទ ។ តើយើងអាចធ្វើការរួមគ្នាដើម្បីមានសាមគ្គីភាពនៅក្រោម « ព្រះអម្ចាស់តែមួយ សេចក្តីជំនឿតែមួយ បុណ្យជ្រមុជតែមួយ » តាមរបៀបណា ?

អេភេសូរ ៥:២៥–៦:៤

ការធ្វើតាមគំរូរបស់ព្រះអង្គសង្គ្រោះអាចពង្រឹងដល់ទំនាក់ទំនងគ្រួសាររបស់យើងបាន ។

ដើម្បីជួយសមាជិកក្នុងថ្នាក់ឲ្យអនុវត្តតាមពាក្យទូន្មានរបស់ប៉ុលអំពីទំនាក់ទំនងគ្រួសារ នោះបងប្អូនអាចសរសេរសំណួរដូចតទៅនេះដាក់នៅលើក្ដារខៀនបាន ៖ តើយើងអាចធ្វើតាមគំរូរបស់ព្រះអង្គសង្គ្រោះ ពេលយើងប្រព្រឹត្តចំពោះសមាជិកគ្រួសាររបស់យើងដោយរបៀបណា ? ( សូមមើល អេភេសូរ ៥:២៥ ) ។ តើការ « គោរពប្រតិបត្តិដល់មាតាបិតាខ្លួន » មានន័យយ៉ាងណាចំពោះបងប្អូន ? ( អេភេសូរ ៦:១–៣ ) ។ តើយើងចិញ្ចឹមកូនៗតាម « ដំបូន្មាន និងសេចក្តីដាស់តឿនរបស់ព្រះអម្ចាស់ » ដោយរបៀបណា ? ( អេភេសូរ ៦:៤ ) ។ សមាជិកក្នុងថ្នាក់អាចពិភាក្សាអំពីសំណួរទាំងនេះជាក្រុម ឬរួមគ្នាក្នុងថ្នាក់ទាំងមូល នៅពេលពួកគេអានបទគម្ពីរដែលទាក់ទងគ្នានេះ ។ បងប្អូនអាចអញ្ជើញសមាជិកក្នុងថ្នាក់ឲ្យចែកចាយឧទាហរណ៍នានា ដែលពួកគេបានឃើញមនុស្សរស់នៅតាមរបៀបដែលប៉ុលបានពិពណ៌នានេះ ។

អេភេសូរ ៦:១០–១៨

គ្រឿងសឹកនៃព្រះនឹងជួយការពារយើងពីអំពើអាក្រក់ ។

តើអ្វីទៅដែលនឹងជួយបំផុសគំនិតសមាជិកក្នុងថ្នាក់ ឲ្យខិតខំពាក់គ្រប់គ្រឿងសឹករបស់ព្រះជារៀងរាល់ថ្ងៃ ? បងប្អូនអាចរៀបចំសកម្មភាពមួយ ដែលសមាជិកក្នុងថ្នាក់អាចផ្គូផ្គងផ្នែកមួយនៃគ្រឿងសឹកជាមួយនឹងគោលការណ៍ ឬគុណធម៌ ដែលវាតំណាងឲ្យ ដូចដែលបានពិពណ៌នានៅក្នុង អេភេសូរ ៦:១៤–១៧ ។ តើផ្នែកនីមួយៗនៃគ្រឿងសឹកអាចជួយការពារយើងពីអំពើទុច្ចរិតតាមរបៀបណា ? ( សម្រាប់ជំនួយមួយចំនួន សូមមើល « ធនធានបន្ថែមទាំងឡាយ » ) ។ តើយើងពាក់គ្រឿងសឹកនេះដោយរបៀបណា ? តើយើងអាចធ្វើអ្វីខ្លះ ដើម្បីស្គាល់ ហើយពង្រឹងភាពទន់ខ្សោយនានានៅក្នុងគ្រឿងសឹករបស់យើង ?

ធនធានបន្ថែមទាំងឡាយ

តើថ្មជ្រុងយ៉ាងឯកគឺជាអ្វី ?

ថ្មជ្រុងយ៉ាងឯកគឺជាថ្មដំបូងគេដែលបានដាក់នៅក្នុងគ្រឹះមួយ ។ វាដើរតួជាចំណុចយោងមួយសម្រាប់ការវាស់វែង និងការដាក់ថ្មផ្សេងទៀត ដែលត្រូវតែស្របជាមួយនឹងថ្មជ្រុងយ៉ាងឯកនោះ ។ ដោយសារវាទ្រនូវទម្ងន់អគារទាំងមូល នោះថ្មជ្រុងយ៉ាងឯកត្រូវតែរឹងមាំ មានលំនឹង ហើយអាចទុកចិត្តបាន ( សូមមើល « The Cornerstone » Ensign ខែ មករា ឆ្នាំ ២០១៦ ទំព័រ ៧៤–៧៥ ) ។

គ្រឿងសឹកនៃព្រះ ។

ក្រវាត់ចង្កេះដោយសេចក្ដីពិត ៖គ្រឿងសឹកផ្នែកនេះប្រៀបបាននឹងខ្សែក្រវាត់មួយ ដែលបានចងព័ទ្ធជុំវិញចង្កេះដែរ ។ ពាក្យថា ក្រវាត់ ក៏អាចមានន័យថា រឹងមាំ មានកម្លាំង ឬពង្រឹងជាថ្មីផងដែរ ។

ប្រដាប់បាំងទ្រូងនៃសេចក្តីសុចរិត ៖ប្រដាប់បាំងទ្រូងមួយការពារបេះដូង និងសរីរាង្គសំខាន់ៗផ្សេងទៀត ។

ពាក់សេចក្តីប្រុងប្រៀបរបស់ដំណឹងល្អនៃសេចក្តីសុខសាន្ត ទុកជាស្បែកជើង ៖ពាក្យនេះសំដៅទៅលើការគ្របការពារជើងរបស់កងទ័ពម្នាក់ ។

ខែលនៃសេចក្ដីជំនឿ ៖ខែលមួយអាចការពារស្ទើរតែគ្រប់ផ្នែកនានានៃរូបកាយពីការវាយប្រហារផ្សេងៗ ។

មួកសឹកនៃសេចក្តីសង្គ្រោះ ៖មួកសឹកការពារក្បាល ។

ដាវនៃព្រះវិញ្ញាណ ៖ដាវមួយអនុញ្ញាតឲ្យយើងធ្វើសកម្មភាពប្រឆាំងនឹងសត្រូវ ។

ការកែលម្អការបង្រៀនរបស់យើង

ខិតខំមានសេចក្ដីស្រឡាញ់ដូចជាព្រះគ្រីស្ទ ។ ការប្រាស្រ័យទាក់ទងរបស់បងប្អូនជាមួយនឹងសមាជិកក្នុងថ្នាក់របស់បងប្អូន គួរតែមានការជំរុញចិត្តពីសេចក្ដីស្រឡាញ់ ។ បងប្អូន និងអ្នករៀនរបស់បងប្អូននឹងមានពរជ័យ នៅពេលបងប្អូនអធិស្ឋានដើម្បីអភិវឌ្ឍឲ្យមានសេចក្ដីស្រឡាញ់ដូចជាព្រះគ្រីស្ទ ហើយស្វែងរកវិធីដើម្បីបង្ហាញវា ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៦; មរ៉ូណៃ ៧:៤៨ ) ។