baam̧le eo ej lale pija ko

Oktoba 2–8

Epesōs

“Bwe En Koweeppānḷọk Ro Reṃṃan”

Ļōmņak ko im im̧weo ko kōn ta im ekōkjan katakin enaaj itok ilo ad jar ilo ekkatak Epesōs, ekōnono ko ilo kweilo̧k eo eļap kiiō epaak, unin tōl in, im Itok, Ļoor Eō—N̄an Kajjojo Armej im Baam̧le ko.

pija ej bōk jikin kwaļo̧k

Kajjitōk bwe ren Kwaļo̧k

Ļōmņak in kajjitōk ippān ro uwaan kūlaaj eo n̄an je ioon boot eo juon jāntōj eo ej kwalo̧k ilo tukadu in juon men eo raar ekkatak ilo ekkatak eo aer ilo wiik in. Jotok wōt ilo kāālet jejjo ennaan ko ilo tukaduier, im kajjitōk ippān ro uwaan kūlaaj eo ro raar je n̄an kwaļo̧k ļōmņak ko aer.

pija eo ej bōk jikin katakin

Katakin Katak eo

Epesōs 2:19–22; 4:4–8, 11–16

Rikanaan ro im rijilōk ro—im aolepād wōj—jej kōkajoorļo̧k im kobaik Kabun̄ in.

• Kwe im kūlaa jeo am̧ kom̧ maron̄ ke kalōk juon men ippān doon n̄an kōmeļeļeik ekōjkan an Kabun̄ in “ kalōk koṃ ioon foundesōn an rū jelōk kab ri kanaan” im ekōjkan an Rilo̧mo̧o̧r eo “ lukkuun deṃan eṃ”? (Epesōs 2:20). Bōlen ro uwaan kūlaaj eo remaron̄ kakōļļeik block ko ak kab peba ko im karōki ippān doon n̄an juon tawōr ak pyramid, kōn Jisōs Kraist im rijilōk ro im rikanaan ro rej ejake pedped eo. Innām kwomaron̄ kwaļo̧k ta eo enaaj waļo̧k eļan̄n̄e Kraist ak rijilōk ro im rikanaan ro kar kōm̧akūt er. Etke dekā in jabōn em̧ eo ej juon waanjon̄ak kōn Jisōs Kraist im jerbal eo An ilo Kabun̄ in? (Kōn juon kōmeļeļe kōn juon dekā in jabōn em̧, lale “Kein Jipan̄ ko Jet.”) Ro uwaan kūlaaj eo remaron̄ etale Epesōs 2:19–22; 4:11–16 kōn kōjeraam̧m̧an ko jej būki kōnke kōn rijilōk ro, rikanaan ro, im ritōl ro jet an Kabun̄ in. Ta eo jemaron̄ kōm̧m̧ane n̄an kalōk mour ko ad ioon katak ko aer?

dekā in jabōn em̧ an juon em̧.

Jisōs Kraist ej dekā in jabōm em̧ eo an Kabun̄ in.

• Eļan̄n̄e ro uwaan kūlaaj eo am̧ rekar ron̄jake kweilo̧k eo eļap jān iien eo ālikata kom̧ kar kweilo̧k, kajjitōk ippāer n̄an kwaļo̧k ekōjkan an men ko kar katakin ilo kweilo̧k eo kar jipan̄ kakūrm̧ool jibadbad ko kar kwaļo̧k kaki ilo Epesōs 4:11–16.

• Bōlen kwomaron̄ leļo̧k n̄an ro uwaan kūlaaj eo juon iien n̄an kōllaajrak jet iaan “jerbal ko” ak eddo ko ewōr ippād āinwōt membōr ro an Kabun̄ eo an Kraist (lale Epesōs 4:1)—n̄an waanjon̄ak, juon ministering brother ak sister, juon jinen ak jemen jim̧we, juon rikaļoor an Kraist, im ro eierļo̧k wōt. Innām remaron̄ jāniji laajrak ko ippān bar juon uwaan kūlaaj eo, riiti Epesōs 4:4–8, 11–16, im kwaļo̧k ekōjkan kūrm̧ool in eddo ko ilo laajrak ko aer jipan̄ kōkōm̧anm̧aļo̧k ānbwin eo an Kraist. Ekōjkan ad maron̄ jerbal ippān doon n̄an erom juon wōt ium̧win “Juon Irooj, juon tōmak, juon peptaij”?

Epesōs 5:25–6:4

Ļoor waanjon̄ak eo an Rilo̧mo̧o̧r eo emaron̄ kōkajoorļo̧k jemjerā ko an baam̧le eo ad.

• N̄an jipan̄ ro uwaan kūlaaj eo kōjerbal kapilōk eo an Paul kōn jemjerā ko an baam̧le, kwomaron̄ je kajjitōk ko āinwōt kein ioon boot eo: Ekōjkan ad maron̄ ļoor waanjon̄ak eo an Rilo̧mo̧o̧r eo ilo wāween ad kōm̧m̧an n̄an ro uwaan baam̧le eo ad? (lale Epesōs 5:25). Ta meļeļe in n̄an kwe n̄an “koutiej jemaṃ im jinōṃ”? (Epesōs 6:1–3). Ekōjkan ad karūttoļo̧k ajri ro ilo “kōkaajjiririik er ilo kaje im katak ko an Irooj”? (Epesōs 6:4). Ro uwaan kūlaaj eo remaron̄ ekōnono kōn kajjitōk kein, ilo kumi ko ak āinwōt juon kūlaaj, ilo aer riiti eoon in jeje ko rekwojarjar rej iookiļo̧k. Kwomaron̄ kajjitōk ippān ro uwaan kūlaaj eo n̄an kwaļo̧k waanjon̄ak ko em̧ōj kar aer loi kōn an armej ro mour ilo wāween ko me Paul ej kōmeļeļeik.

Epesōs 6:10–18

Kein tariņae an Anij enaaj jipan̄ kōjparok kōj jān nana.

• Ta eo enaaj jipan̄ im̧we ro uwaan kūlaaj eo n̄an kajjieon̄ in kōṇak aolepān kein tariṇae an Anij kajjojo raan? Kwomaron̄ kōpooj juon m̧akūtkūt eo me ro uwaan kūlaaj eo rej kōkkar m̧ōttan kein tariņae eo ippān pedped in katak ko ak wānōk ko rej jutak kaki, āinwōt kar kōmeļeļeik ilo Epesōs 6:14–17. Ekōjkan an kajjojo m̧ōttan kein tariņae eo jipan̄ kōjparok kōj jān nana? (Kōn jet jipan̄, lale “Kein Jipan̄ ko Jet.”) Ekōjkan ad kōņak kein tariņae in? Ta eo jemaron̄ kōm̧m̧ane n̄an kile im kōkajoorļo̧k jabdewōt m̧ōjņo ko ilo kein tariņae eo ad?

pija ej bōk jikin kein jipan̄ ko

Kein Jipan̄ ko jet

Ta eo ej lukkuun dekā in jabōn em̧?

Lukkuun dekā in jabōn em̧ ej dekā eo im̧aan tata kōļake ilo juon pedped. Ej jerbal āinwōt juon jikin ijjino n̄an jon̄ak eo im ekkejel an dekā ko jet, eo ej aikuj in ekkejel ippān lukkuun dekā in jabōn em̧ eo. Kōnke ej ineek eddo eo an aolepān m̧weo, lukkuun dekā in jabōn em̧ eo ej aikuj in pen, jab m̧akūtkūt, im kōjatdikdik kake (lale “The Cornerstone,” Ensign, Jān. 2016, 74–75).

Kein tariņae eo an Anij

kan̄ūrn̄ūr ipimi kōn ṃool:M̧ōttan kein tariņae in ej āinwōt juon kan̄ūr kar lukōje ilo iip eo. Naan eo kan̄ūrn̄ūr (grit) emaron̄ barāinwōt meļeļe in kakūjin̄en̄eļo̧k, kōkajoorļo̧k, ak bar kapenļo̧k.

Penjān ob an jim̧we:Juon penjān ob ej kōjparok menono eo im m̧ōttan ānbwin (organ) ko jet raorōk.

Juuj in ne eo kōn m̧aanjabpopo eo an gospel in aenōm̧m̧an eo:Menin ej kōnono kōn kein kōjparok in kalibubu eo n̄an neen juon ritariņae.

Kein tōrak in tōmak:Juon kein tōrak emaron̄ kōjparok enan̄in jabdewōt m̧ōttan ānbwin eo jān elōn̄ kain lukwo̧rkwo̧r.

At (helmet) in lọmọọr:Juon at ej kōjparok bar eo.

Jāje an Jetōb:Juon jāje ej kōm̧m̧an bwe jen jino kiltōn ņae rikōjdāt eo.

Kōkōm̧anm̧anļo̧k Ad Katakin

Kajjieon̄ bōk iakwe eo an Kraist. Ikitōltōl ko am̧ ippān ro kwoj katakin er rej aikuj in kōjjerak kōn iakwe. Kwe im rūkkatak ro am̧ naaj jeraam̧m̧an ilo ami jar n̄an kōļapļo̧k iakwe eo āinwōt an Kraist im pukōt wāween ko n̄an kwaļo̧ke (lale Teaching in the Savior’s Way, 6; Moronai 7:48).