Oktoba 23–29

1 im 2 Timote; Taitōs; Pailimōn

“A Kwōn Juon Jon̄ak n̄an ro Rej Tōmak”

Riiti 1 im 2 Timote; Taitōs; im Pailimōn ippān ro uwaan kūlaaj eo am̧ ilo ļōmņak. Ļōmņak ko im im̧weo ko me renaaj jipan̄ eok tōl ro uwaan kūlaaj eo n̄an eoon in jipan̄ ko an jeje ko rekwojarjar rejetjet im bōktok Jetōb eo n̄an kūlaajruum̧ eo am̧.

Kajjitōk bwe ren Kwaļo̧k

Emaron̄ jipan̄ ro uwaan kūlaaj eo n̄an ron̄ an doon kōnono kōn tōprak ko aer im kapan̄pan̄ ko kōn ekkatak eoon in jeje ko rekwojarjar, jim̧or kajjojo armej ak āinwōt baam̧le ko. Ļōmņak in jino kūlaaj eo kōn kajjitōk ippān ro uwaan kūlaaj eo n̄an kōnono kōn ta eo enaaj em̧m̧an ilo ekkatak jeje ko rekwojarjar aer.

Katakin Katak eo

1 im 2 Timote; Taitōs

Meļeļe katak eo em̧ool enaaj jipan̄ kōj joļo̧k ad po.

• Ro uwaan kūlaaj eo am̧ rej mour ilo juon iien n̄e emaron̄ in pen n̄an kōmlet ta eo em̧ool im ta eo ebōd. Timote im Taitōs raar barāinwōt mour ilo kain iien rōt in, kōn menin bōlen kapilōk eo an Paul n̄an er emaron̄ in aorōk rainin. Erkein jet iaan eoon in jipan̄ ko repād ilo kapilōk eo an Paul: 1 Timote 1:1–7; 4:1–2, 6; 6:3–5, 20–21; 2 Timote 3:13–17; 4:2–4; Taitōs 1:7–9; 2:1, 7–8. Kwomaron̄ kappeik kajjojo ro uwaan kūlaaj eo n̄an riiti juon iaan eoon in jipan̄ kein im kwaļo̧k ta eo ej ekkatak kōn aorōk eo an katak eo em̧ool (lale barāinwōt Alma 31:5). Ekōjkan an katak eo an Rilo̧mo̧o̧r eo jipan̄ kōj joļo̧k kapo? Ro uwaan kūlaaj eo remaron̄ barāinwōt kwaļo̧k en̄jake ko me kajoor eo an katak eo em̧ool kar kōjeraam̧m̧an er.

“Ejjeļo̧k armej en kajeko̧o̧n eok kōn am̧ likao, a kwōn juon jon̄ak n̄an ro rej tōmak” (1 Timote 4:12).

1 Timote 4:10–16

“A kwōn juon Jon̄ak n̄an ro rej tōmak.”

• Emaron̄ in bwe bwe ro uwaan kūlaaj eo am̧ rejjab kile kajoor eo an waanjon̄ak eo em̧m̧an rej kōm̧m̧ane. Ļōmņak in kajjitōk ippāer n̄an kōnono kōn ekōjkan an armej ro rejeļā kajjier, ekoba ro m̧ōttaer ilo kūlaaj eo, rekar waanjon̄ak ko an rikaļoor an Kraist. Emaron̄ in jipan̄ iien ekōnono eo eļan̄n̄e kwoj laajrake ioon boot eo naan ko ilo eoon 12 me rej kōmeļeļeik ekōjkan ad aikuj in erom juon waanjon̄ak—naan, bwebwenato (eo emaron̄ barāinwōt meļeļe in ad m̧akūtkūt ak m̧wil), iakwe em̧ool, jetōb, tōmak, im erreo. Ro uwaan kūlaaj eo remaron̄ kōnono kōn ekōjkan ad maron̄ erom waanjon̄ak ko an ro rej tōmak ilo kajjojo wāween kein.

2 Timote 1

“Bwe Anij ear jab letok n̄an kōj jetōb in lōln̄o̧n̄; a jetōb in kajoor im yokwe im kajim̧we.”

• Unin Tōl eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakote lale ilo 2 Timote kōn kapilōk eo Paul ekar leļo̧k n̄an kōketa Timote ilo jerbal in karejar eo an. Kajjitōk ippān ro uwaan kūlaaj eo n̄an kwaļo̧k jabdewōt kōļmenļo̧kjeņ ko raar loi. Ak kwomaron̄ leļo̧k n̄an er jejjo minit ko ilo kūlaaj n̄an pukōt im kwaļo̧k jet iaan kapilok ko an Paul (jepta 1 ewōr jet waanjon̄ak ko rem̧m̧an). Remaron̄ barāinwōt kwaļo̧k juon en̄jake ilo iien eo Anij ekar jipan̄ er anjo̧ ioon mijak ko aer im kar leļo̧k n̄an er “jetōb in … kajoor, im yokwe im kajim̧we” (2 Timote 1:7).

2 Timote 3

Ekkatak eoon in jeje ko rekwojarjar emaron̄ jipan̄ kōj anjo̧ ioon iien ko renana an raan ko āliktata.

• Ālkin kakkōl Timote kōn “iien ko re nana” renaaj itok, Paul ekar kam̧ool kōn kajoor eo im aorōk eo an jeje ko rekwojarjar (lale 2 Timote 3:1, 14–17). N̄an jino juon iien ekōnono kōn ekōjkan an jeje ko rekwojarjar maron̄ kōkajoorļo̧k kōj ilo iien ko reppen, kwomaron̄ kajjitōk ippān ro uwaan kūlaaj eo n̄an etale kōmeļeļe eo an Paul kōn iien ko renana an raan ko āliktata, loi ilo 2 Timote 3:1–7. Innām remaron̄ etale im kwaļo̧k eoon in jeje ko rekwojarjar me raar jipan̄ er bōbrae iien ko renana āinwōt kein (jet waanjon̄ak ko rej ellaajrak ilo “Kein Jipan̄ ko Jet”). Ekōjkan an kar ekkatak jeje ko rekwojarjar kōjparok kōj jān jorrāān ko ilo laļ in rainin?

• Ekkatak kapilōk eo an Paul kōn kajoor eo an jeje ko rekwojarjar emaron̄ in juon iien em̧m̧an n̄an ro uwaan kūlaaj eo n̄an kōketak doon ilo kijejeto ko aer n̄an ekkatak naan eo an Anij. Bōlen ro uwaan kūlaaj eo remaron̄ riiti 2 Timote 3:14–17 im kwaļo̧k kōjeraam̧m̧an ko im kōjparok ko me rej itok jān ekkatak jeje ko rekwojarjar. Innām remaron̄ kwaļo̧k en̄jake ko ilo iien eo rekar bōk kōjeraam̧m̧an kein kōnke kōn ekkatak jeje ko rekwoarjar aer. Kwomaron̄ barāinwōt leļo̧k n̄an ro uwaan kūlaajeo jidik iien n̄an kejekļo̧kjeņ kōn ta eo remaron̄ kōm̧m̧ane n̄an an ļapļo̧k meļeļe en̄jake ko ippān jeje ko rekwojarjar, jim̧or an kajjojo armej im āinwōt baam̧le ko.

Kein Jipan̄ ko jet

M̧ool ko an jeje ko rekwojarjar me rej kōjparok kōj ņae iien ko renana an raan ko āliktata (lale 2 Timote 3:2).

Iien ko Renana an Raan ko Āliktata	M̧ool ko Me Rej Kōjparok Kōj
Iien ko Renana an Raan ko Āliktata Armej ro renaaj yokwe er make	M̧ool ko Me Rej Kōjparok Kōj Jon 15:12–13
Iien ko Renana an Raan ko Āliktata Riaņokņak ro	M̧ool ko Me Rej Kōjparok Kōj Katak im Bujen Ko 88:123
Iien ko Renana an Raan ko Āliktata Rikōmjāje ro	M̧ool ko Me Rej Kōjparok Kōj Mosaia 2:24–25
Iien ko Renana an Raan ko Āliktata Riutiej bōro ro	M̧ool ko Me Rej Kōjparok Kōj Alma 5:27–28
Iien ko Renana an Raan ko Āliktata Rikōtrai ro	M̧ool ko Me Rej Kōjparok Kōj Katak im Bujen Ko 63:64
Iien ko Renana an Raan ko Āliktata Jab pokake ro jemer im jinier	M̧ool ko Me Rej Kōjparok Kōj Epesōs 6:1–3
Iien ko Renana an Raan ko Āliktata Jab kam̧m̧oolol	M̧ool ko Me Rej Kōjparok Kōj Katak im Bujen Ko 78:19
Iien ko Renana an Raan ko Āliktata Jab kwojarjar	M̧ool ko Me Rej Kōjparok Kōj Duteronomi 7:6

Kōkōm̧anm̧anļo̧k Ad Katakin

Eddōkļo̧k ilo jetōb ej waļo̧k ilo m̧weo. Kwoj pād ippān ro uwaan kūlaaj eo ium̧win juon iien ekadu ruo alen juon allōn̄. Elōn̄ iaer ewōr ippāer en̄jake ko ilo jetōb eļap meļeļeier itulikin kūlaaj eo, im en̄jake kein remaron̄ kōkajoorļo̧k ro jet uwaan kūlaaj eo. Kajjitōk kajjitōk me rej kōketak ro uwaan kūlaaj eo n̄an kwaļo̧k ta eo rej ekkatak ilo aer ekkatak gospel eo ilo m̧weo. (Lale Teaching in the Savior’s Way, 18.)