Kraist ej jutak ippān juon leddik jiron̄

Toļaj in Gilead, jān Ann Adele Henrie

Oktoba 30–Nobōm̧ba 5

Ri Hibru 1–6

Jisōs Kraist, “Rikōm̧anm̧an Lo̧mo̧o̧r Indeeo’”

Ļōmņak in kwaļo̧k ippān ro uwaan kūlaaj eo am̧ jet iaan im̧we ko kwoj būki jān Jetōb Kwojarjar eo kōn Hibru 1–6. Ilo kōm̧m̧ane menin emaron̄ im̧we er n̄an pukōt im̧we ko aer make ilo aer ekkatak jeje ko rekwojarjar.

pija ej bōk jikin kwaļo̧k

Kajjitōk bwe ren Kwaļo̧k

Jet ro uwaan kūlaaj eo me ejjab emakijkij aer kwaļo̧k ilo kūlaaj eo remaron̄ baj aikuj juon kūr ejenolo̧k im jidik iien n̄an kōppopo. Kwomaron̄ kepaak jejjo iaer juon ak ruo raan m̧oktakļo̧k im kajjitōk ippāer n̄an itok ilo aer pojak n̄an kwaļo̧k juon eoon jān Hibru 1–6 me eļap meļeļe in n̄an er.

pija eo ej bōk jikin katakin

Katakin Katak eo

Hibru 1–5

Jisōs Kraist ej “rikōm̧anm̧an an lo̧mo̧o̧r indeeo.”

• Ekōjkan am̧ maron̄ kōketak ro uwaan kūlaaj eo n̄an kwaļo̧k eoon in jeje ko rekwojarjar eļap meļeļeier kōn Jisōs Kraist me raar loi ilo ekkatak eo aer make im baam̧ļe wiik in? Ļōmņak in ejake ļalem kaļōm̧ ko ioon boot eo, juon n̄an kajjojo jepata ko ļalem im̧aan ilo Hibru. Kajjitōk ippān ro uwaan kūlaaj eo n̄an je ilo kaļōm̧ eo ejetjet eoon ko jān jepta kein me raar katakin er kōn Jisōs Kraist im nōm̧ba in eoon eo ijo kajjojo eoon kar loe ie. Ekōjkan an jeļā men kein kōn Rilo̧mo̧o̧r eo jelet tōmak eo ad ilo E im m̧ōņōņō eo n̄an ļoor E?

Hibru 2:9–18; 4:12–16; 5:7–8

Jisōs Kraist ekar en̄taan ilo aolep men ko bwe En maron̄ meļeļe im jipan̄ kōj n̄e jej en̄taan.

• Hibru 2:9–18; 4:12–16; 5:7–8 emaron̄ jipan̄ armej eo ej watatae en̄taan eo ilo laļ in im ļōmņak eļan̄n̄e Anij ej kile ak kea. Bōlen ro uwaan kūlaaj eo remaron̄ etale eoon kein n̄an lo m̧ool ko me renaaj jipan̄ ilo kain kajjitōk kein. Ta eo eoon kein rej katakin kōn ekōjkan an Rilo̧mo̧o̧r eo ņa mejļan en̄taan an armej? Emaron̄ in barāinwōt jipan̄ n̄an kajjitōk ippān ro uwaan kūlaaj eo n̄an kwaļo̧k waanjon̄ak ko jān jeje ko rekwojarjar ijo Jisōs Kraist ekar rie im kaenōm̧m̧an armej ro ilo en̄taan ko aer (lale “Kein Jipan̄ ko Jet”) ak kwaļo̧k pija in alooj eo “Mountains to Climb” (ChurchofJesusChrist.org). Ro uwaan kūlaaj eo remaron̄ kōnono kōn ta eo rej ekkatak kōn ekōjkan an Rilo̧mo̧o̧r eo maron̄ jipan̄ kōj n̄e jej jelm̧ae kapan̄pan̄ ko reppen.

Hibru 3:7– 4: 2

Kōjeraam̧m̧an ko an Anij rej pād n̄an ro me “ rej jab kapene [burueer].”

• Hibru 3 im 4 epād ie juon kallim̧ur n̄an Armej ro Rekwojarjar n̄an jab kapen būruier im kōn menin kowaan kōjeraam̧m̧an ko Anij ekar kōņaan liļo̧k n̄an er. Ilo am̧ im kūlaaj eo am̧ riiti Hibru 3:7–4:2, ekōnono kōn wāween ko en̄jake ko an armej in Israel ro etto maron̄ jerbal n̄an kōj rainin, ejja āinwōt aer kar jerbal n̄an armej in Hibru ro ilo Kabun̄ eo m̧okta (lale bok in katakin eo kōn eoon kein ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko). Ta eo jemaron̄ kōm̧m̧ane n̄an dāpij wōt an mera būruwōd im ron̄jake ankilan Irooj? (lale Jabōn Kōnnaan Ko 3:5–6; Alma 5:14–15; Ether 4:15). Ro uwaan kūlaaj eo remaron̄ kwaļo̧k ekōjkan aer ak ro jet rejeļā kajjier kar jeraam̧m̧an kōnke ewōr ippāer juon bōro emera im ettā.

Hibru 5:1–5

Ro me rej jerbal ilo aelōn̄ in kiin̄ eo an Anij rej aikuj in kar kūr jān Anij.

• Ennaan eo ilo Hibru 5 kōn rikabwijer ro an priesthood eo kōn aer kar kūr jān Anij emaron̄ jerbal n̄an aolep ro me rej kōjenolo̧k er jān eo ewōr ippān mālim eo an priesthood n̄an jerbal ilo kūr ko ilo Kabun̄ in. N̄an jipan̄ kūlaaj eo am̧ ekkaktak ta meļeļe in “Anij e jab kūr e, āinwōt Aron” ļōmņak in kajjitōk ippāer n̄an etale bwebwenato eo kōn an Aron bōk kūr eo an ilo Exodus 4:10–16, 27–31; 28:1. Ta kōļmenļo̧kjeņ ko jān bwebwenato in ejipan̄ kōj meļeļe kōn Hibru 5:1–5? Ro uwaan kūlaaj eo remaron̄ kwaļo̧k ekōjkan aer kar bōk kapene eo bwe juon ekar kūr jān Anij n̄an kakūrm̧ool juon kūr ejenolo̧k—ekoba, bōlen, er make. Ekōjkan an kapene jab in jipan̄ er em̧m̧anļo̧k aer rejtake armej eo ilo kūr eo an?

Moses ej kapit Aron

“Ejjeļo̧k armej ej bōk jerbal in em̧m̧an n̄an e, elan̄n̄e Anij ejjab kūr e, āinwōt kar Aron” (Hebru 5:4). Moses ej Kūr Aron n̄an Jerbal in Karejar, jān Harry Anderson.

pija ej bōk jikin kein jipan̄ ko

Kein Jipan̄ ko jet

Waanjon̄ak ko an jeje ko rekwojarjar kōn an armej ro kar kaenōm̧m̧an jān Jisōs Kraist.

• Jon 8:1–11: Irooj ekar kaenōm̧m̧an kōrā eo ekar ļōn̄.

• Jon 11:1–46: Irooj ekar kaenōm̧m̧an Mary im Martha ālkin mej eo an ļeo jatierro, Lazarus.

• Enos 1:4–6: Irooj ekar jeorļo̧k jerawiwi ko an Enōs im kar kōm̧akūtļo̧k bōd eo an.

• Mosaia 21:5–15: Irooj ekar kōmeraikļo̧k bōro ko būruōn Rilemōn ro bwe ren kōm̧eraikļo̧k eddo ko an armej ro an Limai.

• Mosaia 24:14–15: Irooj ekar kōkajoorļo̧k armej ro an Alma bwe ren maron̄ ineek eddo ko aer.

• Ether 12:23–29: Naan ko an Irooj raar kaenōm̧m̧an Moronai.

• 3 Nipai 17:6–7: Rilo̧mo̧o̧r eo ekar kemour Rinipai ro jān m̧ōjņo̧ in ānbwin im kōļmenļo̧kjeņ ko aer.

• Katak im Bujen Ko 121:7–10: Irooj ekar kaenōm̧m̧an Josep Smith (lale barāinwōt Katak im Bujen Ko 123:17).

Kōkm̧anm̧anļo̧k Ad Katakin

Ejake juon mejatoto in jetōb. N̄e kwoj kōjparok juon mejatoto ejakwōne, em̧m̧an ilo kūlaaj ruum̧ eo am̧, Jetōb eo emaron̄ ļapļo̧k an pidodo an un̄ur būruōn ro kwoj katakin er. Ta eo kwomaron̄ kōm̧m̧ane n̄an akjo̧kwetok kareel eo an Jetōb eo n̄an lowaan kūlaaj ruum̧ eo am̧? Kwomaron̄ ke bar karōk jea ko ak kōjerbal pija ko ak al ko n̄an akjo̧kwetok Jetōb eo? (Lale Teaching in the Savior’s Way, 15.)