Oktoba 9–15.

Pilippai; Kolosse

“I Maron̄ In Kōm̧m̧an Men Otemjej Ilo Eo [Kraist] Ej Kōkajoor Eō”

Jino kōn riiti Pilippai im Kolosse, im jar ilo kejekļo̧kjeņ kōn katak eo Irooj ej kōņaan bwe kwon katakin. Kōtļo̧k bwe Jetōb eo en tōl eok ilo am̧ ļōmņak kōn kajjitōk ko im kein jipan̄ ko kwomaron̄ kōjerbali n̄an katakin katak in.

Kajjitōk bwe ren Kwaļo̧k

Kajjitōk ippān ro uwaan kūlaaj eo n̄an kwaļo̧k juon naan ak eoon me ej ba ilo tukadu in ta eo raar ekkatak jān Pilippai im Kolosse innām kōmeļeļeik etke raar kāālet bwe en ennaan eo eo ak eoon eo eo. Kōketak er n̄an kwaļo̧k eoon in jeje ko rekwojarjar ejja m̧ōtta wōt kōmeļeļe eo aer.

Katakin Katak eo

Pilippai 2:1–5, 14–18; 4:1–9; Kolosse 3:1–17

Jej erom “kaāl” ilo ad mour kōn gospel eo an Jisōs Kraist.

• Kwomaron̄ kōņaan jipan̄ ro uwaan kūlaaj eo am̧ pijaikļo̧k ta meļeļe in n̄an utūk armej eo ṃokta” im “kōṇak armej ekāāl” kōn Jisōs Kraist (Kolosse 3:9–10). N̄an kōm̧m̧ane menin, kwomaron̄ kwaļo̧k m̧okta ak ālkin pija ko kōn juon men em̧or me ekar oktak n̄an juon men kāāl (ko āinwōt juon wujkinen em̧, juon em̧, ak juon wōtbai). Ro uwaan kūlaaj eo remaron̄ ekōnono kōn ekōjkan ad erom “kāāl” kōn ad tōmak ilo Jisōs Kraist im ad m̧ōņōņō in mour kōn gospel eo An. Ejja m̧ōtttan wōt ekōnono in, kwomaron̄ kajjitōk ippān jimettan in kūlaaj eo n̄an ekkatak kōn Pilippai 2:1–5, 14–18; 4:1–9 im jimettan eo juon ekkatak kōn Kolosse 3:1–17, kwaļo̧k men ko bōnjen “armej eo m̧okta” im “armej ekāāl.” Kwomaron̄ kajjitōk ippān jejjo ro uwaan kūlaaj eo n̄an kwaļo̧k ekōjkan an wōr tōmak ilo Jisōs Kraist im mour kōn gospel eo An kar jipan̄ er erom armej kāāl.

Pilippai 4:1–13

Jemaron̄ lo lan̄lōn̄ ilo Kraist, jekdo̧o̧n ta jekjek ko ad.

• Em̧ool men̄e jekjek ko ad roktak jān ko an Paul, jemaron̄ aolep ekkatak jān kōņaan eo an n̄an po bōro im n̄an lem̧ōņōņō ilo aolep jekjek ko an mour eo an. N̄an jino juon iien ekōnono kōn unin kōnono in, kwomaron̄ etale jet iaan mālijjon̄ ko Paul ekar iooni (lale, n̄an waanjon̄ak, 2 Korint 11:23–28). Innām kwomaron̄ kajjitōk ippān ro uwaan kūlaaj eo n̄an etale Pilippai 4:1–13 n̄an pukōt kapilōk eo Paul ekar letok me emaron̄ jipan̄ kōj lem̧ōņōņō, men̄e ilo iien mālijjon̄ ko.

• Bōlen ro uwaan kūlaaj ko remaron̄ kwaļo̧k en̄jake ko ke rekar en̄jake “ aenōṃṃan jān Anij, eo ej eḷḷā jān jeḷā otemjej” (Pilippai 4:7) ak ke rekar en̄jake kōkajoorļo̧k “ilo Kraist” (eoon 13) n̄an kōtōprak juon men remaron̄ kar jab kōm̧m̧ane.

• Eļan̄n̄e kwoj kōņaan etale unin kōnono in eļapļo̧k, kwomaron̄ kajjitōk ippān ro uwaan kūlaaj eo n̄an kwaļo̧k jet bwebwenato ko reim̧we ak ennaan jān kōnono eo an Būreejtōn Russell M. Nelson “Lan̄lōn̄ im Mour ilo Jetōb” (Liaona, Nob. 2016, 81–84). Ak kūlaaj eo emaron̄ alooje pija in looj eo “Trial of Adversity” (ChurchofJesusChrist.org). Ekōjkan an kar armej ro ilo kōnono eo an Būreejtōn Nelson ak kōrā eo ilo pija in alooj eo lo lan̄lōn̄, kōjekdo̧o̧n jekjek ko aer reppen?

• Kōnke kōn an nana ļapļo̧k ilo laļ in rainin, ro uwaan kūlaaj eo am̧ renaaj jeraam̧m̧an jān kapilōk eo an Paul n̄an “ļōmņak kōn” men ko me rej errro, karbōb, em̧m̧an kōnono kaki, wānōk, ak nōbare (Pilippai 4:8). Bōlen kwomaron̄ kappeik kajjojo ro uwaan kūlaaj eo (ak kumi jiddik ko an ro uwaan kūlaaj eo) juon iaan m̧wil ko kar kōllaajraki ilo Pilippai 4:8 ak Laajrak in Tōmak ko 1:13. Er kajjojo remaron̄ kōjerbal Topical Guide eo n̄an pukōt eoon in jeje ko rekwojarjar kōn m̧wil eo aer kar kappeik im kwaļo̧k ippān kūlaaj eo ta eo raar loe. Remaron̄ barāinwōt kwaļo̧k waanjon̄ak ko kōn m̧wil jab eo ilo mour ko an armej ro. Elmen ad “kappukoti men kein”?

Kolosse 1:12–23; 2:2–8

N̄e jej “katōk okrad” ilo Jisōs Kraist, jej kajoorļo̧k ņae kareel ko an laļ.

• Naan in kam̧ool eo an Paul kōn Rilo̧mo̧o̧r eo leo ilo Kolosse 1:12–23; 2:2–8 ej leļo̧k juon iien em̧m̧an n̄an ro uwaan kūlaaj eo n̄an kejekļo̧kjeņ im kōkajoorļo̧k tōmak eo aer make. Ro uwaan kūlaaj eo remaron̄ etale eoon kein n̄an lo men ko me rej kōkajoorļo̧k tōmak eo aer ilo Jisōs Kraist. Ta meļeļe in n̄an “likūt okraṃ im kalōk koṃ ilo [Jisōs Kraist]”? (Kolosse 2:7). Pija in wōjke eo ilo unin tōl eo a wiik in ilo Itok, Ļoor Eō—N̄an Kajjojo Armej im Baam̧le ko im pija in alooj eo “Spiritual Whirlwinds” (ChurchofJesusChrist.org) maron̄ jipan̄ ro uwaan kūlaaj eo ekōnono kōn eoon in. Ta eo emaron̄ kōkajoorļo̧k ak kōm̧ōjņo̧ikļo̧k okar ko an juon wōjke? Ekōjkan an “likūt okraṃ im kalōk koṃ ilo [Jisōs Kraist]” kōkajoorļo̧k kōj ņae kareel ko an laļ? (lale Kolosse 2:7–8; lale barāinwōt Hilamōn 5:12; Ether 12:4).

• Kwomaron̄ kajjitōk ippān ro uwaan kūlaaj eo n̄an laajrake men ko me Kolosse 1:12–23; 2:2–8 ej katakin bwe jemaron̄ kōm̧m̧ani n̄an joļo̧k “ṃoṇ pata” me emaron̄ “rakimi (spoil)” tōmak eo ad ilo Kraist (Kolosse 2:8). Ekōjkan ad maron̄ rejtake doon ilo kijejeto ko ad n̄an ļoor Rilo̧mo̧o̧r eo im joļo̧k jeļā m̧oņ ko an Setan?

Kōkōm̧anm̧an Ad Katakin

Kōjerbal al. Al ko rekwojarjar ekkā aer akjo̧ketok kareel eo an Jetōt Kwojarjar. Emaron̄ in ejake juon mejatoto in kautiej eo im kallim̧ur eo im jerbal eo eim̧we. Ļōmņak kōn ekōjkan an “katakin im kauwe doon kōn sam ko im al ko” maron̄ in m̧ōttan kūlaaj eo am̧ (Kolosse 3:16; lale barāinwōt Teaching in the Savior’s Way, 22).