2–8 ʻOkatopa

ʻEfesō

“Ko Hono Fakahaohaoaʻi ʻo e Kakai Māʻoniʻoní”

ʻE maʻu ha ngaahi fakakaukau mo ha ngaahi ongo fekauʻaki mo e ngaahi meʻá pea mo e founga ke akoʻi aí ʻi hoʻo ako ʻi he faʻa lotu ʻa e tohi ʻEfesoó, ngaahi malanga ʻo e konifelenisi lahi kimui ní, fokotuʻutuʻu ko ʻení mo e Haʻu, ʻo Muimi ʻIate Au—Maʻá e Fakafoʻituituí mo e Ngaahi Fāmilí.

Fakaafeʻi e Feʻinasiʻakí

Fakakaukau ke fakaafeʻi e kau mēmipa ʻo e kalasí ke nau hiki ʻi he palakipoé ha fakamatala fakanounou sētesi ʻe taha ʻo ha meʻa ne nau ʻilo ʻi heʻenau ako he uike ní. Fili ha ngaahi fakamatala nounou ʻe niʻihi, pea fakaafeʻi e kau mēmipa ʻo e kalasí ne nau hiki iá ke vahevahe ʻenau ngaahi fakakaukaú.

Akoʻi ʻa e Tokāteliné

ʻEfesō 2:19–22; 4:4–8, 11–16

ʻOku hanga ʻe he kau palōfitá, mo e kau ʻaposetoló—mo kitautolu kotoa—ʻo fakamālohia mo fakauouangatahaʻi ʻa e Siasí.

• Te ke lava nai mo hoʻo kalasí ke langa fakataha ha meʻa ke ne fakahaaʻi ʻa e founga ʻoku “fokotuʻu [ai ʻa e Siasí] ki he tuʻunga [ʻo] e kau ʻaposetoló mo e kau palōfitá” pea mo e founga ʻoku hoko ai ʻa e Fakamoʻuí “ko hono fuʻu maka tulikí”? (ʻEfesō 2:20). Mahalo naʻa lava ʻe he kau mēmipa ʻo e kalasí ʻo fakahingoa ha ngaahi konga papa pe ipu pepa pea fokotuʻutuʻu kinautolu ke hoko ko ha taua pe pilamitia, pea ko e fakavaʻé ʻa Sīsū Kalaisi mo e kau ʻaposetoló mo e kau palōfitá. Hili ia peá ke fakatātaaʻi leva ʻa e meʻa ʻe hoko kapau ʻe toʻo ʻa Kalaisi pe kau ʻaposetoló mo e kau palōfitá. Ko e hā ʻoku hoko ai ʻa e fungani maka tulikí ko ha fakafofonga lelei ʻo Sīsū Kalaisi mo Hono fatongia ʻi he Siasí? (Ke maʻu ha fakamatala ʻo e fungani maka tulikí, vakai, “Ngaahi Maʻuʻanga Tokoni Kehé.”) ʻE lava ke kumi e kau mēmipa ʻo e kalasí ʻi he ʻEfesō 2:19–22; 4:11–16 ki he ngaahi tāpuaki ʻoku tau maʻu koeʻuhí ko e kau ʻaposetoló, kau palōfitá, mo e kau taki kehe ʻo e Siasí. Ko e hā te tau lava ʻo fai ke langa ai ʻetau moʻuí ʻi heʻenau ngaahi akonakí?

Ko Sīsū Kalaisi ʻa e makatuliki ʻo e Siasí.

• Kapau naʻe fanongo e kau mēmipa hoʻo kalasí ki he konifelenisi lahí talu mei he taimi fakaʻosi ne mou fakataha aí, fakaafeʻi kinautolu ke nau vahevahe ʻa e founga naʻe tokoni ai e ngaahi meʻa naʻe akoʻi ʻi he konifelenisí ke fakahoko ʻa e taumuʻa ʻoku ʻasi ʻi he ʻEfesō 4:11–16.

• Mahalo te ke lava ʻo tuku ki he kau mēmipa ʻo e kalasí ha kiʻi miniti ke lisi ai ha niʻihi ʻo e “ngaahi ngāue” pe ngaahi fatongia ʻoku tau maʻu ʻi heʻetau hoko ko e kau mēmipa ʻo e Siasí (vakai, ʻEfesō 4:1)—hangē ko ʻení, ko ha tangata pe fefine ngāue fakaetauhi, ko ha mātuʻa angatonu, ko ha ākonga ʻa Kalaisi, pea pehē ai pē. Pea nau toki fetongi lisi mo ha mēmipa ʻe taha ʻo e kalasí, lau ʻa e ʻEfesō 4:4–8, 11–16, pea vahevahe e founga ʻoku tokoni ai e ngaahi fatongia ʻi heʻenau lisí ke langaki e sino ʻo Kalaisí. Te tau lava fēfē ʻo ngāue fakataha ke tau hoko ʻo taha ʻi he malumalu ʻo e “ʻEiki pē taha, tui pē taha, mo e papitaiso pē tahá”?

ʻEfesō 5:25–6:4

ʻE lava ke fakamālohia ʻe he sīpinga ʻa e Fakamoʻuí ʻetau ngaahi vā fetuʻutaki fakafāmilí.

• Ke tokoni ʻi hono fakaʻaongaʻi ʻe he kau mēmipa ʻo e kalasí e faleʻi ʻa Paula fekauʻaki mo e ngaahi vā fetuʻutaki fakafāmilí, te ke ala hiki ʻa e ngaahi fehuʻi ko ʻení ʻi he palakipoé: Te tau lava fēfē ke muimui ʻi he sīpinga ʻa e Fakamoʻuí ʻi he anga ʻetau feohi mo e kau mēmipa hotau fāmilí? (vakai, ʻEfesō 5:25). Ko e hā ʻene ʻuhinga kiate koe ke fakaʻapaʻapa ki hoʻo tamaí mo hoʻo faʻeé”? ʻEfesō 6:1–3). ʻOku tau ohi fēfē hake ʻetau fānaú ʻi he “akonaki mo e fakapoto ki he ʻEikí”? ʻEfesō 6:4). ʻE lava ke aleaʻi ʻe he kau mēmipa ʻo e kalasí ʻa e ngaahi fehuʻi ko ʻení, fakakulupu pe fakakalasi, ʻi heʻenau lau e ngaahi potufolofola fekauʻaki mo iá. Te ke ala fakaafeʻi e kau mēmipa ʻo e kalasí ke nau vahevahe ha ngaahi sīpinga kuo nau mamata ai ʻi ha kakai ʻoku nau moʻui ʻi he ngaahi founga ʻoku fakamatalaʻi ʻe Paulá.

ʻEfesō 6:10–18

ʻE tokoni e teunga tau ʻo e ʻOtuá ke maluʻi kitautolu mei he koví.

• Ko e hā ʻe ala tokoni ke ueʻi e kau mēmipa ʻo e kalasí ke nau feinga ke tui ʻa e teunga tau kakato ʻo e ʻOtuá ʻi he ʻaho kotoa peé? Te ke lava ʻo teuteu ha ʻekitivitī ʻe fakatauhoa ai ʻe he kau mēmipa ʻo e kalasí ha ngaahi kongokonga ʻo e teunga taú mo e ngaahi tefitoʻi moʻoni pe ʻulungaanga ʻoku nau fakafofongaʻí, hangē ko hono fakmatalaʻi ʻi he ʻEfesō 6:14–17. ʻE tokoni fēfē ʻa e konga takitaha ʻo e teunga taú ke maluʻi kitautolu mei he faiangahalá? (Ke maʻu ha tokoni, vakai, “Ngaahi Maʻuʻanga Tokoni Kehé.”) ʻOku tau tui fēfē ʻa e teunga tau ko ʻení? Ko e hā te tau lava ʻo fai ke ʻilo mo fakamālohia ai ha faʻahinga matavaivai ʻi hotau teunga taú?

Ngaahi Maʻuʻanga Tokoni Kehé

Ko e hā ʻa e fungani makatuliki?

Ko e fungani makatulikí ko e fuofua foʻi maka ia ʻoku fokotuʻu ʻi ha fakavaʻe. ʻOku hoko ia ko ha fakaʻilonga ki hono fua mo hono fokotuʻu ʻo e ngaahi maka kehé, ʻa ia kuo pau ke fenāpasi mo e makatulikí. Koeʻuhí ʻokú ne fuesia e mamafa ʻo e toenga ʻo e falé, kuo pau ke fefeka, mo tuʻu maʻu, pea mo falalaʻanga ʻa e fungani makatulikí (vakai, “The Cornerstone,” Ensign, Jan. 2016, 74–75).

Ko e teunga tau ʻo e ʻOtuá.

Nonoʻo ʻaki ʻa e moʻoní e kongalotó:ʻOku hangē e konga ko ʻeni ʻo e teunga taú ko ha leta ʻoku nonoʻo takai ʻi he kongalotó. ʻE lava foki ke ʻuhinga ʻe foʻi lea nonoʻó ke maluʻi, fakamālohia, pe fakafefekaʻi.

Sifa-fatafata ʻo e māʻoniʻoní:ʻOku maluʻi ʻe he sifa-fatafatá ʻa e mafú mo e ngaahi kongokonga mahuʻinga kehé.

Topuvaʻe ʻaki ʻa e teuteu ʻo e ongoongolelei ʻo e melinó:ʻOku ʻuhinga ʻeni ki he sū maluʻi ʻo e ongo vaʻe ʻo ha sōtia:

Pā ʻo e tuí:ʻE lava ʻe ha pā ʻo maluʻi ha faʻahinga konga pē ʻo e sinó mei ha faʻahinga ʻohofi kehekehe.

Tatā ʻo e fakamoʻuí:ʻOku maluʻi ʻe he tataá ʻa e ʻulú.

Heletā ʻo e Laumālié:ʻOku ʻai ʻe he heletaá ke tau lava ʻo fakafepakiʻi hotau filí.

Ko Hono Fakatupulaki ʻEtau Founga Akoʻí

Feinga ke maʻu ʻa e ʻofa faka-Kalaisí. ʻOku totonu ke tākiekina ʻe he ʻofá hoʻo fengāueʻaki mo kinautolu ʻokú ke akoʻí. ʻE faitāpuekina koe mo hoʻo kau akó ʻi hoʻomou lotua ke fakatupulaki ʻa e ʻofa faka-Kalaisí mo fekumi ki ha ngaahi founga ke fakahaaʻi ai iá (vakai, Ko e Faiako ʻi he Founga ʻa e Fakamoʻuí. 6; Molonai 7:48).