Okitobwa 9–15

I-Biribi; I-Korote

“I Boni Konai Bwaai ni Kabane ni Karaoi Iroun Teuare Kakorakoraai.”

Waaki ni wareka I-Biribi ao I-Korote, ao tataro mwaaka ni iangoa ana reirei te Uea are e tangiria n reireiniko. Kariaia te Tamnei bwa e na kairiko ngkai ko iangoi titiraki ao bwaai n ibuobuoki ake ko kona ni kabonganai n reiakina te reirei aei.

Kaunga te Tibwatibwa

Kaoia kain te kiraati bwa a na tibwa teuana te taeka ke te kibu are e kakimototoa te bwai are a reiakinna man I-Biribi ao I-Korote ao imwiina kabwarabwara bwa bukin tera a rinea te taeka ke te kibu anne. Kaungaia bwa a na tibwai kibu n koroboki aika a tabu bwa mwakoron aia kabwarabwara.

Reirei te Reirei

I-Biribi 2:1–5, 14–18; 4:1–9; I-Korote 3:1–17

Ti riki bwa“aomata aika boou” ngkai ti maiuakina ana euangkerio Iesu Kristo.

• Ko na bae n tangiria ni buokiia kain am kiraati ni katamneia te bwai are e nanonaki ni “kaki te aomata ni kawai ” ao “ni karina te aomata nabangkai” rinanon Iesu Kristo (I-Korote 3:9–10). Ni karaoan aei, ko na bae ni katokai tamnei mai imwaina ao imwina tamnein te bwai are e a tia ni bitaki nakon te bwai ae boou (n aron bwain te auti, te mweenga, ke te bwatika). Kain te kiraati a kona ni maroroakina arora ni kona n riki “nabangkai” rinanon ara onimaki inanon Iesu Kristo ao n katauraoira ni maiuakina Ana euangkerio. Ni mwakoron te maroro aei, ko kona n tuangiia iteran te kiraati bwa a na kamatebwaia I-Biribi 2:1–5, 14–18; 4:1–9 ao are te iterana bwa a na kamatebwaia I-Korote 3:1–17, katebenakoi anuan “te aomata ni kawai” ao te “aomata nabangkai.” Ko kona naba ni kaoia tabeman kain te kiraati bwa a na tibwa aron karekean onimakinan Iesu Kristo ao ni maiuakina Ana euangkerio n tia n buokiia n riki bwa aomata nabangkai.

I-Biribi 4:1–13

Ti kona ni karekea te kimwareirei iroun Kristo, n aki taraia bwa tera ae ti mena inanona.

• E ngae ngke arora a kakaokoro mairoun Bauro, ti kona ni bane n reiakinaki man ana tatauraoi n rauaki ao ni kimwareirei n aro ni kabane inanon maiuna. Ni wakina te maroro iaon atuun te maroro aei, ko kona n rinanon tabeua kataaki ake e rinanona Bauro (taraa, ibukin te katoto, 2 I-Korinto 11:23–28). Ko kona ngkanne ni butiia kain te kiraati bwa a na rinanon I-Biribi 4:1–13 ni kakaea ana reirei Bauro are e anga are kona ni buokiira ni kimwareirei, riki inanon tai ni kataaki.

• Tao kain te kiraati a kona n tibwai taneiai ake a rinanona ngke a namakina “te rau are mairoun te Atua, are te rau are aki konaki n ataki teutana” (I-Biribi 4:7) ke ngke a namakina te kakorakoraki “i nanoni Kristo Iesu” (kibu 13) ni katiai bwaai ake a na bon aki kona ni katiai.

• Ngkana ko kan atai riki kanoan te maroro aei, kona bae n tuangiia kain te kiraati bwa a na tibwai tabeua rongorongo ke taekan ana maroro Beretitenti Russell M. Nelson “Joy and Spiritual Survival” (Riaona, Nov. 2016, 81–84). Ke te kiraati e kona ni mataku n te witeo “Trial of Adversity” (ChurchofJesusChrist.org). A kanga aomata n ana maroro Beretitenti Nelson ke aine n te witeo ni karekea te kimwareirei, n aki tarai kanganga ake a mena inanona?

• Ibukina bwa te buakaka e rikirake n te aonaaba ni boong aikai, kain am kiraati a na bae n reke tibwangaia man ana reirei Bauro n “iango iaon” bwaai aika itiaki, bwai aika tangiraki ngkai a raraoi, bwai aika riai ni kamoamoaki (I-Biribi 4:8). Tao ko kona ni katabeia kain am kiraati n tatabemaniia (ke kurubu aika uarereke aika kain te kiraati) teuana te anua are e koreaki n I-Biribi 4:8 ke Taekan te Onimaki 1:13. A kona n tatabemaniia ni kabongana te Topical Guide ni kakai koroboki aika a tabu iaon anua ake a katabeaki iai ao n tibwaia ma te kiraati te bwai are a kunea. A kona naba n tibwai banna ni katoto n anuan maiuia aomata. Ti kanga n “ukori bwaai aikai”?

I-Korote 1:12–23; 2:2–8

Ngkana ti “kanenei wakaara” inanon Iesu Kristo, ti na kakorakoraaki ni kaitara ana kariiri te aonaaba.

• Ana kakoaua Bauro iroun te Tia Kamaiu are e reke n I-Korote 1:12–23; 2:2–8 e karekea aia tai ae tamaroa kain te kiraaki n iangoi ao ni kakorakorai aia onimaki. Kain te kiraati a kona ni kakaei kibu aikai ni karekei bwaai ake a kakorakora aia onimaki iroun Iesu Kristo. Tera ae e nanonaki n “kaneneaki wakaami ao ni kateaki inanon [Iesu Kristo]”? (I-Korote 2:7). Tamnein te aroka n bwaai aika a kakaawaki n te wiiki aei n Nakomai, Iriirai—Ibukiia Aomata n Tatabemaniia ao Utu ao te witeo “Spiritual Whirlwinds” (ChurchofJesusChrist.org) e kona ni buokiia kain te kiraati ni maroroakina te kibu aei. Tera ae e kona ni kakorakora ke ni kamamara wakaan te aroka? E kanga te “kaneneaki wakaami ao ni kateaki inanon [Iesu Kristo]” ni kakorakoraira ni kaitara ana kairoro te aonaaba? (taraa I-Korote 2:7–8; tara naba Ereman 5:12; Ita 12:4).

• Ko na bae ni kaoia kain te kiraati bwa a na karinani bwaai ake I-Korote 1:12–23; 2:2–8 n reiakin ake ti kona n totokoa “mwamwanan te aba” are e kona n “uruira” n ara onimaki iroun Kristo (I-Korote 2:8). Ti na kanga ni boutoka imarenara inanon ara kekeiaki n iriiira te Tia Kamaiu ao n totokoi ana kamwane Tatan?

Kanakoraoan Ara Anga reirei

Kabongana te katangitang. Katangitang aika tabu a kaoa ana kairoro te Tamnei ae Raoiroi. E kona ni karika te tabo ni karinerine ao ni kaunga te motinnano ao te mwakuri. Iangoia kam na kanga n “reirei ao ni kauringa temanna n te rabakau ni kabanea, n taian areru ma anene” ni kona n riki bwa mwakoron am kiraati (I-Korote 3:16; taraa naba Teaching in the Savior’s Way, 22).