« ថ្ងៃទី ១១–១៧ ខែ ធ្នូ ។ វិវរណៈ ៦–១៤ ៖ ‹ គេបានឈ្នះ … ដោយសារឈាមនៃកូនចៀម › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២១ )
« ថ្ងៃទី ១១–១៧ ខែ ធ្នូ ។ វិវរណៈ ៦–១៤ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣
សិល្បៈរួមគ្នាដោយ អេរិក ចនសុន ៖ ក្រុមប្រឹក្សាដ៏ធំ ដោយ រ៉ូប៊ើត ធី បារែត; រូបបណ្ដុំផ្កាយបញ្ចេញរស្មីរបស់ភ្នាក់ងារលំហអាកាសសហព័ន្ធអឺរ៉ុប
ថ្ងៃទី ១១–១៧ ខែ ធ្នូ
វិវរណៈ ៦–១៤
« គេបានឈ្នះ … ដោយសារឈាមនៃកូនចៀម »
យ៉ូសែប ស៊្មីធ បានថ្លែងថាគម្ពីរ វិវរណៈ គឺជា « គម្ពីរដ៏ច្បាស់បំផុតមួយ ដែលព្រះបានបណ្ដាលឲ្យសរសេរទុក » ( នៅក្នុង Journal, December 1842–June 1844; Book 2, 10 March 1843–14 July 1843 ទំព័រ ៩៨ នៅលើគេហទំព័រ JosephSmithPapers.org ) ។ តើបងប្អូនអាចជួយសមាជិកក្នុងថ្នាក់ឲ្យរកឃើញសេចក្ដីពិតដ៏ច្បាស់ទាំងឡាយនៅក្នុងជំពូកទាំងនេះតាមរបៀបណា ?
អញ្ជើញឲ្យចែកចាយ
ដើម្បីជួយសមាជិកក្នុងថ្នាក់ឲ្យរំឭកដល់ការយល់ដឹងមួយចំនួន ដែលពួកគេមាន នៅពេលពួកគេបានសិក្សា វិវរណៈ ៦–១៤ សូមសរសេរលេខពី ៦ ដល់ ១៤ ដាក់នៅលើក្ដារខៀន ។ សមាជិកក្នុងថ្នាក់អាចសរសេរនៅក្បែរលេខនោះ នូវការយល់ដឹងនានាដែលពួកគេរកឃើញនៅក្នុងជំពូកដែលត្រូវគ្នានោះ ដែលទាក់ទងនឹងនរណាម្នាក់ដែលកំពុងរស់នៅក្នុងថ្ងៃចុងក្រោយ ។
បង្រៀនគោលលទ្ធិ
ព្រះយេស៊ូវគ្រីស្ទបើកត្រានៃគម្ពីរ ។
-
ដើម្បីជួយសមាជិកក្នុងថ្នាក់ឲ្យស្រមៃឃើញគម្ពីរដែលមានត្រាប្រាំពីរ ( សូមមើល វិវរណៈ ៥:១ ) បងប្អូនអាចពន្យល់ថា រមូរពីបុរាណត្រូវបានបិទត្រាដោយដីឥដ្ឋ ឬក្រមួនជាញឹកញាប់ ។ ចិញ្ចៀន ឬត្រានឹងសង្កត់លើដីឥដ្ឋ ឬក្រមួននោះ មុនពេលវាឡើងរឹង ដែលជាសញ្ញាប្រាប់ពីសិទ្ធិអំណាចរបស់បុគ្គល ដែលបានបិទត្រាលើរមូរនោះ ហើយកុំឲ្យមនុស្សដែលគ្មានសិទ្ធិអំណាចមកបើកវាមើលឡើយ ។ បន្ទាប់មក សមាជិកក្នុងថ្នាក់អាចចែកចាយយោបល់ ឬចំណាប់អារម្មណ៍នានាដែលពួកគេមានខណៈដែលកំពុងអានអំពីគម្ពីរនេះនៅក្នុង វិវរណៈ ៦; គោលលទ្ធិ និង សេចក្ដីសញ្ញា ៧៧:៦–៧ និង គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ ហេតុអ្វីបងប្អូនគិតថា វាសំខាន់ដើម្បីដឹងពីអត្ថន័យជានិមិត្តរូបនៃគម្ពីរនេះ ? ហេតុអ្វីបងប្អូនគិតថា វាសំខាន់ដើម្បីដឹងថា ព្រះអង្គសង្គ្រោះគឺជាព្រះតែមួយអង្គគត់ដែលអាចបើកត្រានីមួយៗនៃគម្ពីរនេះបាន ? ( សូមមើល វិវរណៈ ៥:១–៩ ) ។
« នគរទាំងប៉ុន្មាននៅលោកីយ៍ បានត្រឡប់ជានគររបស់ព្រះអម្ចាស់នៃយើងរាល់គ្នា » ។
-
វិវរណៈ ៧–១១ អាចពិបាកយល់ណាស់ ។ ពរជ័យមួយនៃថ្នាក់សាលាថ្ងៃអាទិត្យគឺថា សមាជិកក្នុងថ្នាក់អាចជួយគ្នាទៅវិញទៅមកដើម្បីយល់ពីបទគម្ពីរ ។ បងប្អូនអាចធ្វើបញ្ជីមួយអំពីសំណួរ ដែលសមាជិកក្នុងថ្នាក់មានអំពីជំពូកទាំងនេះ ហើយអញ្ជើញពួកគេឲ្យចែកចាយការយល់ដឹងនានាជាមួយគ្នាទៅវិញទៅមក ។ សូមលើកទឹកចិត្តសមាជិកក្នុងថ្នាក់ទាំងអស់—អស់អ្នកដែលអាចមានអារម្មណ៍ថាចេះដឹងច្រើន និងអស់អ្នកដែលអាចមានអារម្មណ៍ថា ពួកគេមិនសូវដឹងច្រើន—ឲ្យចែកចាយការយល់ដឹងរបស់ពួកគេអំពីជំពូកទាំងនេះ ។
-
បងប្អូនអាចចាប់ផ្ដើមការពិភាក្សាមួយ តាមរយៈការសួរសមាជិកក្នុងថ្នាក់ថា តើពួកគេបានរកឃើញប្រធានបទដដែលៗអ្វីនៅក្នុង វិវរណៈ ៧–១១ ។ ពួកគេអាចចែកចាយខគម្ពីរ ដែលថ្លែងពីប្រធានបទទាំងនេះ ហើយពន្យល់ពីមូលហេតុដែលថា ប្រធានបទទាំងនេះគឺសំខាន់ ។ ប្រសិនបើពួកគេត្រូវការជំនួយ នោះបងប្អូនអាចផ្ដល់យោបល់ឲ្យពួកគេអានក្នុង វិវរណៈ ១១:១៥–១៧ ។ តើពួកគេរកឃើញប្រធានបទអ្វីខ្លះនៅក្នុងខគម្ពីរទាំងនេះ ហើយតើប្រធានបទនេះបានបង្ហាញឡើងនៅក្នុងខគម្ពីរផ្សេងទៀតនៅក្នុង វិវរណៈ ៧–១១ ដោយរបៀបណា ? ទោះបីជាជំពូកទាំងនេះពិពណ៌នាអំពីសង្គ្រាម និងគ្រោះកាចក្ដី តើយើងរកឃើញអ្វីខ្លះ ដែលផ្ដល់ដល់យើងនូវសេចក្ដីសង្ឃឹម និងទំនុកចិត្តលើព្រះយេស៊ូវគ្រីស្ទ ?
យើងយកឈ្នះសាតាំង « ដោយសារឈាមនៃកូនចៀម ហើយដោយសារសេចក្តីបន្ទាល់របស់ [ យើង ] » ។
-
ការរៀនសូត្រអំពីសង្គ្រាមនៅស្ថានសួគ៌អាចជួយយើងឲ្យយល់បានកាន់តែច្បាស់អំពីជីវិតនៅលើផែនដី ។ សមាជិកក្នុងថ្នាក់អាចអាន ការបកប្រែដោយ យ៉ូសែប ស្ម៊ីធ វិវរណៈ ១២:៧–១១ ( នៅក្នុងសេចក្ដីណែនាំដល់បទគម្ពីរទាំងឡាយ ) ហើយកំណត់ពីរបៀបដែលយើងយកឈ្នះលើសាតាំង និងពលបរិវារបស់វា ។ តើការយល់ដឹងផ្សេងទៀតអ្វីខ្លះ ដែលយើងទទួលបានមកពីប្រធានបទស្ដីពីសង្គ្រាមនៅស្ថានសួគ៌ក្នុង សេចក្ដីណែនាំដល់បទគម្ពីរទាំងឡាយ ឬ Gospel Topics ? ( នៅលើគេហទំព័រ scriptures.ChurchofJesusChrist.org ) ។ តើយើងរៀនបានអ្វីខ្លះ ដែលអាចជួយយើងឲ្យយកឈ្នះមារសត្រូវបាន ?
-
សង្គ្រាមរវាងសេចក្ដីល្អ និងសេចក្ដីអាក្រក់ត្រូវបានពិពណ៌នានៅក្នុង វិវរណៈ ១៣–១៤ ។ តើ ជំពូក ១៣ បង្រៀនយើងអ្វីខ្លះ អំពីរបៀបដែលនាគបានប្រយុទ្ធក្នុងសង្គ្រាមនេះ ? ស្របតាម ជំពូក ១៤ តើកូនចៀមប្រយុទ្ធនឹងសង្គ្រាមនេះដូចម្ដេចដែរ ? វាអាចគួរឲ្យចាប់អារម្មណ៍ ពេលធ្វើបញ្ជីមួយអំពីរបៀបដែលក្រុមនីមួយៗប្រយុទ្ធក្នុងសង្គ្រាមនេះស្របតាមជំពូកទាំងពីរនេះ ។ តើយើងឃើញមានភាពស្រដៀងគ្នា និងភាពខុសគ្នាអ្វីខ្លះ ?
-
តើឃ្លាថា កូនចៀម « ត្រូវគេសម្លាប់តាំងពីកំណើតលោកិយមក » មានន័យដូចម្ដេច ? ( វិវរណៈ ១៣:៨; សូមមើលផងដែរ វិវរណៈ ៥:៦ ) ។ សូមពិចារណាជួយសមាជិកក្នុងថ្នាក់របស់បងប្អូនឲ្យស្វែងរកចម្លើយចំពោះសំណួរនេះ ដោយការអាន ម៉ូសាយ ៣:១៣ និង ម៉ូសេ ៧:៤៧ រួមគ្នាក្នុងថ្នាក់ ។ តើការយកឈ្នះលើសាតាំង « ដោយសារឈាមនៃកូនចៀម » មានន័យដូចម្ដេច ? ( វិវរណៈ ១២:១១ ) ។
« ខ្ញុំក៏ឃើញទេវតាមួយទៀត … មានដំណឹងល្អដ៏នៅអស់កល្បជានិច្ច » ។
-
គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ណែនាំឲ្យរៀនពីទេវតាផ្សេងៗ ដែលបានស្ដារឡើងវិញនូវ « ដំណឹងល្អដ៏នៅអស់កល្បជានិច្ចសម្រាប់ … មនុស្សនៅផែនដី » ( វិវរណៈ ១៤:៦ ) ។ សូមអញ្ជើញសមាជិកក្នុងថ្នាក់ឲ្យចែកចាយអ្វីដែលពួកគេបានរៀន ។ តើ គោលលទ្ធិ និង សេចក្ដីសញ្ញា ១៣៣:៣៦–៤០ បង្រៀនយើងអ្វីខ្លះអំពី វិវរណៈ ១៤:៦–៧ ? តើយើងចូលរួមនៅក្នុងកិច្ចការរបស់ទេវតា ដែលបានលើកឡើងនៅក្នុង វិវរណៈ ១៤:៦–៧ ដោយរបៀបណា ? បងប្អូនក៏អាចបង្ហាញវីដេអូ « The Work of These Last Days » ( នៅលើគេហទំព័រ ChurchofJesusChrist.org ) បានផងដែរ ។
ការកែលម្អការបង្រៀនរបស់យើង
ការនិយាយពាក្យថា « ខ្ញុំមិនដឹងទេ » វាពុំមែនជាបញ្ហាឡើយ ។ « ទោះជាវាជារឿងធម្មតាដែលបងប្អូនចង់ឆ្លើយគ្រប់សំណួរក៏ដោយ ក៏នៅក្នុងស្ថានភាពខ្លះ វាសមរម្យដើម្បីនិយាយដោយសាមញ្ញថា ‹ ខ្ញុំមិនដឹងទេ ។ ចូរយើងសិក្សាសំណួរនោះដោយខ្លួនឯងនៅសប្ដាហ៍នេះ ហើយយើងអាចពិភាក្សាវានៅពេលក្រោយបាន › » ( ការបង្រៀនតាមរបៀបរបស់ព្រះអង្គសង្រ្គោះ ទំព័រ ២៤ ) ។ បន្ទាប់មក សូមឲ្យសិស្សស្វែងរកចម្លើយនៅក្នុងបទគម្ពីរ និងធនធានផ្សេងទៀតក្នុងសាសនាចក្រ ។