langi ʻo Sīsuú ʻoku maamangia ʻi ha teʻelango ʻi ha loki fakapoʻuli

Bread of Life [Mā ʻo e Moʻuí], tā ʻe Chris Young

14–20 Nōvema

ʻĀmosi; ʻOpataia

“Kumi ki [he ʻEikí], pea Te Mou Moʻui”

ʻI hoʻo ako ʻa ʻĀmosi mo ʻOpataiá, mateuteu ki ha ngaahi ongo fekauʻaki mo e meʻa ʻoku totonu ke ke akoʻi ki he kau mēmipa ʻo hoʻo kalasí. Lekooti e ngaahi fakakaukau ko ʻení, pea kumi ha ngaahi faingamālie ke vahevahe ia ʻi hoʻo kalasi he Sāpaté.

Lekooti e Ngaahi Ongo ʻOkú ke Maʻú

fakaʻilonga feʻinasiʻakí

Fakaafeʻi e Feʻinasiʻakí

ʻI he founga tatau pē naʻe fakahoko ai ʻe ʻĀmosi mo ʻOpataia ʻa e ngaahi fakatokanga ki he kakaí ʻi hona kuongá, ʻoku pehē pē ʻa e hoko ʻena ngaahi leá ko ha ngaahi fakatokanga kiate kitautolu he ʻaho ní. Te ke lava ʻo fakaafeʻi e kau mēmipa ʻo e kalasí ke nau vahevahe ʻa e ngaahi akonaki meia ʻĀmosi mo ʻOpataia ʻoku fakaʻaongaʻi kiate kitautolú.

fakaʻilonga akoʻí

Akoʻi e Tokāteliné

ʻĀmosi 3:7–8; 7:10–15

ʻOku fakahā ʻe he ʻEikí ʻa e moʻoní ʻi Heʻene kau palōfitá.

• Fakaafeʻi e kau mēmipa ʻo e kalasí ke nau vahevahe ʻa e ngaahi moʻoni fekauʻaki mo e kau palōfita ne nau ʻilo ʻi heʻenau ako fakataautaha pe fakafāmili ʻo e ʻĀmosi 3 mo e ʻĀmosi 7. Te ke lava ʻo lisi ʻenau ngaahi talí ʻi he palakipoé. Ko e hā mo ha toe ngaahi moʻoni ʻoku tau ʻilo fekauʻaki mo e kau palōfitá? (Ke maʻu ha ngaahi fakakaukau, vakai ki he Ngaahi Tefito ʻo e Ongoongoleleí “Kau Palōfitá” [topics.ChurchofJesusChrist.org].) Poupouʻi ha kau mēmipa tokolahi ʻo e kalasí ke nau vahevahe ʻa e founga ne nau maʻu ai ʻenau fakamoʻoni ki he fatongia mahuʻinga ʻo e kau palōfitá ʻi he palani ʻa e ʻOtuá.

• Ko e hā nai ha founga te tau vahevahe ai mo ha kaungāmeʻa ʻa e ʻuhinga ʻoku mahuʻinga ai ke ʻi ai ha palōfita ʻi hotau kuongá? Te ke lava ʻo lisi ʻi he palakipoé ʻa e ngaahi fehuʻi ʻe ala ʻeke ʻe ha taha ʻoku ʻikai mēmipa ʻi he Siasí fekauʻaki mo e kau palōfitá. Te tau tali fēfē ha niʻihi ʻo e ngaahi fehuʻi ko ʻení ʻo ngāue ʻaki ʻa e ʻĀmosi 3:7–8 mo e 7:10–15?

ʻĀmosi 5; 8:11–12

Ko e hē mei he moʻoní ʻoku tatau ia mo e honge ʻi he fanongoa e ngaahi folofola ʻa e ʻEikí.

• Ke kamata ha talatalanoa fekauʻaki mo e honge ne fakamatalaʻi ʻe ʻĀmosi ʻi he ʻĀmosi 8:11–12, ʻe ʻaonga ke mou toe vakaiʻi nounou ʻa e tūkunga fakalaumālie ʻo e kakai naʻá ne malanga ki aí. Ko e hā ha founga kuo tafoki ai ʻa e kau ʻIsilelí mei he ʻEikí? (hangē ko ʻení, vakai ki he ʻĀmosi 2:6–8; 5:11–12). Ko e hā ʻoku mahuʻinga ai ke ʻilo fekauʻaki mo ʻenau tōnounoú? ʻE lava leva ke lau ʻe he kau mēmipa ʻo e kalasí ʻa e ʻĀmosi 8:11–12 pea talanoa ki he ʻuhinga ʻoku hoko ai ʻa e “hongé” mo e “fieinú” ko e ongo foʻi lea lelei ke fakamatalaʻi ʻa e tūkunga ʻo kinautolu ʻoku tafoki mei he ʻEikí. ʻE lava foki ke fekumi ʻe he kau mēmipa ʻo e kalasí ʻi he ʻĀmosi 5 ki ha ngaahi veesi ʻe ala tokoni ke tau fakaʻehiʻehi ai mei heʻetau hē mei he moʻoní ʻi heʻetau moʻuí (hangē ko ʻení, vakai ki he, veesi 4, 11–12, 14–15, 25–26).

• ʻOku tokoni ʻa hono maʻu ha mahino ki he fiekaia fakalaumālie ʻoku ʻalu fakataha mo e hē mei he moʻoní ke te tau maʻu ai ha mahino ki he keinanga fakalaumālie ʻoku tau fiefia ai koeʻuhí ko hono Fakafoki Mai ʻo e Ongoongoleleí. Te ke lava ʻo hiki ha ngaahi fehuʻi ʻe niʻihi ʻi he palakipoé fekauʻaki mo e Hē mei he Moʻoní mo hono Fakafoki Mai ʻo e Ongoongoleleí, hangē ko e Ko e hā ne hoko ai ʻa e Hē mei he Moʻoní? Ko e hā e tākiekina ne fakahoko ʻe he Hē mei he Moʻoní ki he fānau ʻa e ʻOtuá? Ko e hā e tākiekina ne fakahoko ʻe he Fakafoki Mai ʻo e Ongoongoleleí? Poupouʻi e kau mēmipa ʻo e kalasí ke nau fekumi ki he ngaahi tali ki he ngaahi fehuʻi ko ʻení ʻo fakaʻaongaʻi ʻa e ngaahi maʻuʻanga tokoni hangē ko ʻení: fakamatala mei he Ngaahi Tefito ʻo e Ongoongoleleí “Hē mei he Moʻoní” (topics.ChurchofJesusChrist.org); mo e fakamatala ʻi he “Ngaahi Maʻuʻanga Tokoni Lahi Ange.” Fakaafeʻi e kau mēmipa ʻo e kalasí ke nau talanoa kau ki he ngaahi moʻoni ne fakafoki mai ʻi hotau kuongá ʻa ia ʻoku ʻuhingamālie kiate kinautolu.

kulupu ʻo e toʻu tupu ʻoku tuʻu ʻi muʻa he temipalé

Te tau lava ʻo hoko ko e kau fakamoʻui ʻi he Moʻunga ʻo Saioné ʻaki ʻetau fakahoko ʻa e ngāue fakatemipalé mo e hisitōlia fakafāmilí.

ʻOpataia 1:21

“ʻE ʻalu hake ʻa e kau fakamoʻui ki he Moʻunga ko Saioné.”

• Ko e hā e ʻuhinga ʻoku hoko ai ʻa e kupuʻi lea “kau fakamoʻui ki he moʻunga ko Saioné” (ʻOpataia 1:21) ko hano fakamatalaʻi lelei ʻo kitautolu ʻi he taimi ʻoku tau fakahoko ai ʻa e ngāue fakatemipalé mo e hisitōlia fakafāmilí? ʻOku tokoni fēfē ʻa e ngāue ʻoku tau fakahoko maʻa ʻetau ngaahi kuí ʻi he temipalé ke tau ongoʻi ofi ange ki he Fakamoʻui ko Sīsū Kalaisí? ʻE lava ke vahevahe ʻe he kau mēmipa ʻo e kalasí haʻanau aʻusia kimuí ni ʻi hono fakahoko e ngāue fakatemipalé mo e hisitōlia fakafāmilí.

fakaʻilonga ki he ngaahi maʻuʻanga tokoni lahi angé

Ngaahi Maʻuʻanga Tokoni Lahi Ange

Ngaahi lēsoni mei he kuohilí.

Naʻe akonaki ʻa Palesiteni M. Lāsolo Pālati ʻo pehē:

“ʻI he ngaahi taʻu siʻi ʻoku fakamatala ki ai ʻa e Fuakava Foʻoú, … naʻe angatuʻu ʻa e kakaí kia Kalaisi mo ʻEne kau ʻAposetoló. Naʻe fuʻu tōtuʻa ʻa e tō naʻe hokó ʻo tau iku ai ki he Hē Fakaʻaufuli mei he Moʻoní, ʻa ia naʻe iku ki ha laui senituli ʻo e honge mo e taʻeʻilo fakalaumālie naʻe ʻiloa ko e Kuonga Fakapoʻulí.

“…ʻOku ʻofa ʻetau Tamai Hēvaní ki Heʻene fānaú, pea ʻokú Ne finangalo ke nau maʻu ʻa e ngaahi tāpuaki kotoa ʻo e ongoongoleleí ʻi heʻenau moʻuí. ʻOku ʻikai mole ʻa e maama fakalaumālié koeʻuhí ko e tafoki ʻa e ʻOtuá mei Heʻene fānaú. Ka ʻoku hoko ia ko e ola ʻo e tafoki ʻa ʻEne fānaú meiate Iá. Ko ha nunuʻa fakanatula pē ia ʻo e ngaahi fili hala ʻoku fai ʻe he kakaí, ʻi he fakafoʻituituí, fakakoló, fakafonuá, pea mo ha puleʻanga kakato. Kuo toutou fakamoʻoniʻi ʻeni ʻi he hisitōlia ʻo taimí. Ko e taha ʻo e ngaahi lēsoni maʻongoʻonga ʻo e sīpinga fakahisitōlia ko ʻení, ko ʻetau ngaahi filí, ʻo tatau pē ki he fakafoʻituituí mo e fakalūkufuá, ʻa ia ko hono nunuʻa fakalaumālié ʻoku tau inu mo hotau hakó” (“Ako e Ngaahi Lēsoni ʻo e Kuohilí,” Ensign , pe Liahona, Mē 2009, 32).

Ko Hono Fakatupulaki ʻEtau Founga Akoʻí

Tokoniʻi e kau akó ke nau ʻiloʻi ʻa e Laumālie Māʻoniʻoní. “ʻI hono ueʻi koe ʻe he Laumālie Māʻoniʻoní, fehuʻi ki he kau akó e ongo ʻoku nau maʻú pea mo e meʻa ʻoku ueʻi kinautolu ke nau faí. Tokoniʻi ke nau fakafehokotaki ʻenau ngaahi ongoʻi fakalaumālié ki he ivi tākiekina ʻo e Laumālie Māʻoniʻoní” (Ko e Faiako ʻi he Founga ʻa e Fakamoʻuí, 11).