Kapitulo 6
Tibuok Kalibutan nga Sirkulo sa Sisterhood
Dihang nakighimamat si Propeta Joseph Smith sa mga sister sa Relief Society didto sa Nauvoo, iyang gitudlo nga agi og dugang sa paghatag og temporal nga serbisyo, kinahanglan nga maglig-on sila sa mga tawo sa espirituhanong paagi (tan-awa sa kapitulo 2). Uban niini nga tambag isip usa ka pundasyon, ang mga sister sa Relief Society nakakaplag og gugma ug kasiguroan gikan sa mga unos sa kinabuhi samtang nagserbisyo sila sa usag usa. Ilang gipakigbahin ang ebanghelyo ni Jesukristo ngadto sa usag usa ug ngadto sa nanaglibut kanila. Ang Relief Society nahimo nga panalipod gikan sa kalibutan—usa ka dapit nga kapasilongan—ug sentro sa kahayag sa kalibutan—usa ka dapit sa impluwensya.
Sa usa ka miting sa Relief Society didto sa Ogden, Utah, si Sister Eliza R. Snow, ang ikaduha nga kinatibuk-ang presidente sa Relief Society, mapasalamatong miila sa paningkamot sa mga sister sa paglig-on sa usag usa sa temporal ug sa espiritwal. Miingon siya kanila nga bisan ang Simbahan walay gihimong rekord sa matag donasyon nga ilang gihatag sa pagtabang sa mga nanginahanglan, ang Ginoo naghimo og hingpit nga rekord sa ilang makaluwas nga buhat:
“Nahibalo kaayo ako nga dagkong butang ang gidonar nga wala masulat sa libro sa [rekord]. Si Presidente Joseph Smith miingon nga kini nga kapunongan giorganisar aron pagluwas sa mga kalag. Unsa man ang nahimo sa mga sister aron makabalik kadtong mga nahisalaag?—sa pagpainit niadtong nabugnaw sa ebanghelyo?—Lain nga basahon gitipigan para sa inyong hugot nga pagtuo, inyong kamabination, inyong maayong mga buhat ug mga pulong. Lain nga rekord ang gitipigan. Walay nawala.”1
Usa ka langitnong rekord ang gitipigan kabahin sa buhat sa mga sister sa Relief Society samtang nagtabang sila niadtong mga kasingkasing nga nawad-an og kadasig ug kinsa nagkinahanglan og hugot nga pagtuo, kamabination, maayong mga buhat, ug maayong mga pulong.
Tibuok Kalibutan nga Sisterhood
Sa tunga-tunga sa mga 1900, samtang ang kalibutan nag-antus sa mga epekto sa gubat ug natural nga mga katalagman, ang buhat sa Relief Society padayon nga naglambo. Matinud-anon sa katuyoan sa organisasyon—sa pagpalambo sa pagtuo ug personal nga pagkamatarung, sa paglig-on sa mga pamilya ug mga panimalay, ug sa pagpangita ug pagtabang sa mga nanginahanglan—ang Relief Society misangkap og kasilongan alang sa mga sister nga mga Santos sa Ulahing mga Adlaw ug mga impluwensya sa pagkamaayo. Niadtong 1947 ang kinatibuk-ang kapangulohan sa Relief Society nga sila si (Sister Belle S. Spafford, Marianne Sharp, ug Gertrude Garff) mitudlo, “Ato ang usa ka misyon sa pagpang-ayo nga nagkinahanglan sa mas dako nga kasingkasing, mas mabinationg paghikap, ug mas lig-on nga tinguha.”2
Niana nga panahon, ang ubang mga gobyerno miestablisar og mga politikanhong pagpig-ot ug gani nagtukod og pipila ka pisikal nga mga babag. Kini nga mga pagpig-ot ug mga babag, nga nailhan sa mga ngalan nga Iron Curtain ug Berlin Wall, gidesinyo aron sa pagpugong sa pipila ka mga tawo ug sa dili pagpaapil sa uban. Agi og sukwahi, ang mga sister sa Relief Society mitukod og espirituhanong mga bongbong nga kapasilongan nga gidesinyo sa pagpanalipod ug pagpalakip. Nag-abut sila sa usa ka tibuok kalibutan nga sirkulo sa sisterhood ug midapit sa uban sa pag-apil kanila.
Bisan sa mga nasud nga anaa ang politikanhong mga utlanan ug mga balaod nga nagpugong sa bukas nga partisipasyon sa relihiyon, ang mga sakop sa mga Relief Society mibati og usa ka koneksyon ngadto sa ilang mga sister sa tibuok kalibutan. Padayon silang nagmatinud-anon sa ilang mga pagpamatuod sa gipahiuli nga ebanghelyo ug sa mga katuyoan sa Relief Society.
Niadtong 1980, si Presidente Boyd K. Packer sa Korum sa Napulog Duha ka mga Apostoles ug ang iyang asawa, si Donna, mibisita sa Relief Society sa Czechoslovakia (karon mao ang Czech Republic ug Slovakia). Sa kaulahian siya nahinumdom:
“Dili sayon ang pagkuha og mga visa, ug among gigamit ang tumang kamabinantayon aron dili maamong ang kasiguroan ug kaayohan sa atong mga miyembro, kinsa sulod sa mga henerasyon nanglimbasug sa paghimo nga padayong buhi ang ilang hugot nga pagtuo ubos sa mga kahimtang sa dili matukib nga pagpanglupig.
“Ang pinakahalandumon nga miting gihimo sa kwarto sa taas. Ang mga tabil gitabon. Bisan sa gabii, ang mga nanambong nangabut sa lain-laing mga panahon, usa gikan sa usa ka direksyon ug ang usa gikan sa lain, aron dili maalinggatan ang ilang mga kaugalingon.
“Adunay 12 ka sister ang nanambong. Among gikanta ang mga himno sa Zion gikan sa mga songbook—mga pulong nga walay musika—nga giimprinta mga 50 ka tuig nang milabay. [Usa ka leksyon] gihatag uban sa balaang pagtahud gikan sa mga pahina sa usa ka hinimo sa kamot nga manwal. …
“Akong giingnan kadto nga mga sister nga nasakop sila sa pinakadako ug sa pinakalapad nga organisasyon sa mga babaye dinhi sa yuta. Akong gikutlo si Propeta Joseph Smith dihang siya ug ang mga Kaigsoonan miorganisar sa Relief Society. …
“Diha ang Espiritu. Ang matahum nga sister kinsa mi-conduct uban ang kalumo ug balaang pagtahud dayag nga mibakho.
“Sila akong giingnan nga sa among pagbalik gi-assign ako sa pagpamulong sa usa ka komperensya sa Relief Society; mahimo bang mokuha ako og mensahe gikan kanila? Pipila kanila mihimo og mubo nga mga sulat; ang matag ekspresyon, matag usa, anaa sa espiritu sa paghatag—dili sa pagpangayo bisan unsa. Dili gayud ako makalimot sa gisulat sa usa ka sister: ‘Ang gamay nga sirkulo sa mga sister mipadala sa kaugalingon nilang mga kasingkasing ug mga hunahuna ngadto sa tanang sister ug mihangyo sa Ginoo sa pagtabang kanamo nga makapadayon.’
“Kadto nga mga pulong, sirkulo sa mga sister, midasig kanako. Sila gayud akong makita nga nagbarug sa usa ka sirkulo nga misangko lapas niana nga kwarto ug misirkulo sa kalibutan.”3
Naghinumdom niana nga miting, si Presidente Packer miingon, “Ako mibarug, sa makadiyot, niana nga sirkulo ug mibati sa pinitik sa hugot nga pagtuo ug kaisug ug sa gugma nga nagsingabut ug milibut sa bisan asa nga kilid.”4
Ang ingon nga hugot nga pagtuo og kaisug ug gugma naghiusa sa pagporma og panulundon alang sa mga sister sa Relief Society bisan asang dapit. Si Presidente Henry B. Eyring, magtatambag sa Unang Kapangulohan, miawhag sa mga sister sa Relief Society sa pagpakigbahin niini nga panulundon. “Gipasa ninyo kini nga panulundon samtang nagtabang kamo sa uban sa pagdawat sa gasa sa gugma nga putli diha sa ilang mga kasingkasing,” miingon siya. “Makahimo na dayon sila sa pagpasa niini ngadto sa uban. Ang kasaysayan sa Relief Society narekord pinaagi sa mga pulong ug mga numero, apan ang panulundon gipasa gikan sa kasingkasing ngadto sa kasingkasing.”5 Nahitabo kini diha sa sirkulo sa sisterhood sa Relief Society.
Usa ka Dapit nga Kapasilongan
Sukad sa sayo nga mga adlaw sa Relief Society, ang mga sister mihimo og usa ka dapit nga kapasilongan—usa ka dapit sa pagpang-ayo, gugma, kamabination, pag-amping, ug pagkahisakop. Sa Nauvoo, ang mga sister nakakaplag og kapasilongan diha sa Relief Society samtang sila misalig sa hugot nga pagtuo sa uban ug mga kahanas ug samtang mipakigbahin sila sa pagkaon ug sinina. Nagpadayon kini samtang ilang gitadlas ang mga kapatagan ug samtang giestablisar nila ang ilang mga kaugalingon didto sa Teritoryo sa Utah. Karon, samtang nagtubo ang Simbahan sa tibuok kalibutan, ang mga sister padayon nga nangita og kapasilongan diha sa Relief Society.
Si Presidente Boyd K. Packer miingon: “Kining talagsaon nga sirkulo sa mga sister mamahimo nga panalipod sa matag usa kaninyo ug sa inyong mga pamilya. Ang Relief Society tingali ikapahisama sa usa ka kapasilongan—usa ka dapit sa kasiguroan ug proteksyon—ang sanktwaryo sa karaang mga panahon. Luwas kamo diha sa sulod niini. Nagliyok kini sa mga sister sama sa usa ka nagpanalipod nga bongbong.”6
Niadtong 1999, si Bobbie Sandberg, usa ka batan-ong asawa ug inahan, mibalhin uban sa iyang pamilya gikan sa Estados Unidos ngadto sa Taiwan. Bisan og adto siya didto sulod lamang sa unom ka bulan samtang siya ug ang iyang bana magtudlo og Iningles, ang iyang Taiwanese nga mga sister misirkulo kaniya pinaagi sa makapanalipod nga impluwensya sa Relief Society.
Kini nga panalipod makita gayud ilabi na dihang usa ka grabeng linog mitay-og sa nasud, nga ang gigikanan sa linog diha duol sa panimalay sa mga Sandberg. Nangahugno ang mga building sa tanang dapit sa eskwelahan nga ilang gipuy-an. Sulod sa mga oras sa unang grabe nga pagtay-og, ang presidente sa Relief Society ni Sister Sandberg miabut ngadto sa pamilya sama sa usa ka anghel sa kalooy aron sa pagsusi sa ilang mga gikinahanglan ug mitabang kanila. Tungod kay daghang mga karsada ug mga building ang nangahagsa ug tanang linya sa komunikasyon nawala, kini nga mapinanggaong presidente migamit sa bugtong paagi nga pagbiyahi nga iyang magamit. Iyang gibisiklita tadlas ang nangaguba nga dalan hangtud iyang nabisitahan ang daghang mga sister sa ward.
Taliwala niining pisikal nga kasamok, si Sister Sandberg diha ubos sa luwas nga panalipod sa Relief Society. Ang iyang presidente sa Relief Society naghunahuna kabahin sa kasiguroan ug panginahanglan sa matag usa nga sister sa iyang ward.
Sama ni Sister Sandberg, daghang mga Santos sa Ulahing mga Adlaw sa tibuok kalibutan ang makapamatuod sa kamatuoran niini nga pahayag ni Presidente Packer: “Pagkamakahupay nga masayud nga bisan asa [ang usa ka pamilya] moadto, ang Church family nagahulat kanila. Gikan sa adlaw nga sila moabut, mahisakop sila sa usa ka korum sa priesthood ug siya mahisakop sa Relief Society.”7
Usa ka Dapit sa Impluwensya
Si Sister Belle S. Spafford gitawag isip ikasiyam nga kinatibuk-ang presidente sa Relief Society niadtong Abril 1945, ug si Presidente George Albert Smith gi-set apart isip ikawalo nga Presidente sa Simbahan mga unom ka semana ang milabay. Si Presidente Smith miawhag kang Sister Spafford ug sa tanang sister sa Relief Society sa paghatag og temporal nga suporta ngadto sa mga tawo kinsa padayong nag-antus gikan sa mga epekto sa Ikaduhang Gubat sa Kalibutan. Mihangyo usab siya kanila sa paghimo nga ang ilang impluwensya mabatyagan sa tanang mga babaye sa kalibutan. Miingon siya, “Dihang si Propeta Joseph Smith mihatag sa yawe aron sa paghimong gawasnon sa mga babaye, kini gihatag alang sa tibuok kalibutan.”8
Ang Building sa Relief Society, usa ka Sentro sa Impluwensya
Niadtong Oktubre 1945, ang mga plano gipahibalo sa pagtukod og usa ka building sa Relief Society.9 Niadtong Oktubre 1947, ang Unang Kapangulohan miaprubar og usa ka plano nga gisugyot ni Sister Belle S. Spafford: ang matag sakop sa Relief Society, nga may gidaghanon nga mga 100,000, gihangyo sa pagdonar og lima ka dolyares sa proyekto. Ang mga Sister gikan sa tanang dapit sa kalibutan mipadala og mga donasyon. Ang uban mipadala og mga artifacts [hinimo nga art] gikan sa ilang mga lumad nga yuta aron idayan-dayan sa sulod sa building. Sulod sa usa ka tuig, ang mga sister nakatigom og $554,016.
Si Sister Spafford mipahayag: “Kini nga kalampusan nagrepresentar og dakong kantidad nga kwarta, apan dili sa kantidad sa kwarta lamang. Girepresentahan dinhi ang daghang dili mahikap nga mga kantidad—mga kantidad nga may hilabihan ka dako nga bili—pagpasalamat sa gitahud nga katungdanan nga gitugyan sa mga babaye diha sa plano sa ebanghelyo, pagpamatuod sa kabalaan sa buhat sa kapunongan; ug pagpasalamat sa oportunidad nga gihatag ngadto sa mga sister sa Simbahan alang sa pagserbisyo … ; kamaunungon sa pagpangulo; walay hinakog nga debosyon alang sa mahinungdanong katuyoan. Usa kini ka aninag sa katalagsaon nga anaa nang daan sa kapunongan.”10
Ang building, nga nahimutang sa amihanang silangan sa Templo sa Salt Lake, gipahinungod niadtong Oktubre 3, 1956. Sa pagpahinungod nga pag-ampo, si Presidente David O. McKay, ang ikasiyam nga Presidente sa Simbahan, namulong kabahin sa tibuok kalibutan nga impluwensya nga maggikan sa mao nga building: “Aron sa paghimong mas epektibo sa ilang serbisyo ngadto sa nanginahanglan ug nag-antus niadtong anaa sa Simbahan ug anaa sa Kalibutan, ang Relief Society mitukod inabagan sa mga miyembro sa Simbahan niini nga matahum nga panimalay sa Relief Society.”11
Sukad niadtong 1984 ang building naglangkob usab sa mga opisina sa kinatibuk-ang kapangulohan sa Young Women ug sa kinatibuk-ang kapangulohan sa Primary.
Impluwensya tali Niadtong anaa sa Ubang mga Tinuohan
Si Sister Spafford nakakat-on og mahinungdanong leksyon gikan ni Presidente George Albert Smith mahitungod sa pagpakigbahin sa mga mithi sa Simbahan ngadto sa mga babaye sa kalibutan. Human dayon sa pag-sustain kaniya isip kinatibuk-ang presidente sa Relief Society, “usa ka sulat gikan sa National Council of Women, nagpahibalo sa tinuig nga miting nga ipahigayon sa Siyudad sa New York.
“Si Sister Spafford nakatambong na niana nga miting kaniadto, ug tungod sa iyang nangagi nga kasinatian, siya ug ang iyang mga magtatambag mainampingong mikonsiderar sa imbitasyon sulod sa pipila ka semana.
“Mihukom sila sa pagrekomendar ngadto sa Presidente sa Simbahan nga ang Relief Society moputol sa ilang pagkasakop niadto nga mga council. Giandam nila ang pahayag sa rekomendasyon, nga naglangkob sa mga rason sa paghimo niini.
“Nagkurog ug dili sigurado, si Sister Spafford mibutang sa papel sa lamesa ni Presidente George Albert Smith, nag-ingon, ‘Ang Kapangulohan sa Relief Society nanghinaot sa pagrekomendar nga ang General Board moputol sa pagkasakop niini sa National Council ug sa International Council of Women, tungod sa mga rason nga nakasulat dinhi sa papel.’
“Mainampingon nga gibasa ni Presidente Smith ang papel. Dili ba sakop na man sila kapin sa tunga sa siglo? Nangutana siya.
“Mipasabut si Sister Spafford kon unsa ka dakong gasto ang pag-adto sa New York, ang oras nga magahin, ug mihulagway sa kaulawan nga usahay ilang masinati. Mirekomendar siya nga dili na sila mopadayon tungod kay ‘wala kami makuha niini nga mga council.’
“Ang maalamon, tigulang na nga propeta misandig sa iyang lingkuranan ug mitan-aw kaniya uban ang nahasol nga panagway. ‘Gusto ninyong dili na ipadayon tungod kay wala kamoy makuha gikan niini?’ nangutana siya.
“‘Kana maoy among pagbati,’ mitubag siya.
“‘Sultihi ako,’ miingon siya, ‘unsa man ang inyong gikatampo didto?
“‘Sister Spafford,’ mipadayon siya, ‘gipakalitan ko nimo. Kanunay ba ninyong gihunahuna kon unsa ang inyong makuha? Wala ba usab ninyo mahunahuna kon unsa ang inyong ikahatag?’
“Iyang giuli kadto nga papel kaniya ug mitunol sa iyang kamot. Uban sa dili matarug nga hunahuna miingon siya, ‘Ipadayon ninyo ang inyong pagkasakop niini nga council ug ipabatyag ang inyong impluwensya.’”12
Nahimo gayud niya nga mabatyagan ang iyang impluwensya. Miapil siya sa National Council of Women ug sa International Council of Women ug mihupot og mga katungdanan sa pagkalider niadto nga mga organisasyon sulod sa mga katuigan. Lig-on niyang gibarugan ang mga baruganan sa ebanghelyo ni Jesukristo ug ang katuyoan sa Relief Society.
Sa matag higayon nga si Sister Spafford moadto sa International Council of Women (ICW), i-assign siya ngadto sa sesyon sa “social ug moral welfare”. Iyang giasoy:
“Sa usa ka higayon misupak ako sa pagbalik ngadto sa social ug moral welfare [nga sesyon], ug mahigalaon kaayo ako nianang panahona sa presidente sa ICW. … Miingon ko, ‘kanunay ko nga moadto niini nga sesyon, ug sum-ol na lang gyud kaayo nga gusto ko og lahi.’ Miingon siya, ‘Nan, ikaw may katungod niini, ug akong tan-awon nga matuman kini.’
“Dayon mibalik siya ug miingon, ‘Dili kami makahatag sa imong hangyo tungod kay ang kaugalingon nimong council miinsister nga magpabilin ka sa social ug moral welfare.’ Miingon siya, ‘Tingali mainteres ka kon imong mahibaloan ang rason. Ang imong national president miingon nga kanunay nimong barugan ang baruganan sa inyong Simbahan niining mga butanga ug nahibalo sila sa baruganan sa Mormon nga Simbahan ug gibati nilang aduna silay kasiguroan kon tua ka didto. ’”13
Ang mga babaye niini nga organisasyon nahibalo nga ang ilang higala nga si Belle Spafford mobarug gayud sa mga baruganan sa Simbahan, ug ilang gikinahanglan kana nga matang sa kaalam ug kalig-on. Niadtong 1954 gipili siya nga lider sa delegasyon sa Estados Unidos sa International Council of Women sa Helsinki, Finland. Sa dihang gipangulohan niya ang dakong martsa sa pagbukas sa komperensya, ang iyang mga hunahuna mibalik sa nangagi:
“Samtang nagtan-aw ako sa makadasig nga mga tumatan-aw nga gilangkuban sa mga tawo gikan sa daghang mga nasud … , sa kalit ang akong hunahuna mibalik ngadto sa mga pulong sa atong pioneer [Relief Society] nga mga lider … ‘nagbarug sama kanamo nga nangulo sa mga babaye sa kalibutan,’ … ‘alang sa katungod sa mga babaye sa Zion ug sa katungod sa mga babaye sa tanang kanasuran.’ … Nasayud ako nga ang atong mga pioneer nga mga lider nga babaye gihatagan pinaagi sa balaanong pagtulun-an sa kahibalo sa padulngan sa Relief Society. … Akong kombiksyon nga moabut ang panahon nga ang impluwensya sa Relief Society makita sa tibuok kalibutan nga kababayen-an.”14
Niadtong 1987 ang Unang Kapangulohan mitambag sa Relief Society sa dili na pagpadayon og apil sa National Council of Women ug sa International Council of Women. Miabut na ang panahon alang sa kinatibuk-ang kapangulohan sa Relief Society nga maka-focus og dugang enerhiya sa paspas nga nagtubo nga tibuok kalibutan nga organisasyon kay sa ubang tibuok nasud ug tibuok kalibutan nga mga kawsa. Apan samtang milambo ang Simbahan, ang mga Babaye nga Santos sa Ulahing Adlaw padayon nga mipakita sa ilang impluwensya sa tibuok kalibutan—sa ilang mga komunidad, eskwelahan, ug takus nga mga organisasyong lokal. Ilang nasunod ang sumbanan nga giestablisar ni Presidente Smith ug ni Sister Spafford, nga maghunahuna kon unsa ang ilang ikahatag, dili kay unsa ang ilang makuha.
Pag-alima ug Pagtudlo sa mga Investigator ug sa Bag-ong mga Kinabig
Uban sa tibuok kalibutan nga paglambo sa Simbahan, ang Relief Society nahimo na nga usa ka dapit sa impluwensya alang sa mga investigator ug sa bag-ong mga kinabig. Kini nga impluwensya naglakip sa paghatag sa bag-ong mga miyembro og oportunidad sa pagserbisyo ug sa pagpangulo. Si Sister Silvia H. Allred, magtatambag sa kinatibuk-ang kapangulohan sa Relief Society, naghisgot kabahin sa iyang inahan, si Hilda Alvarenga, nga nagserbisyo isip presidente sa Relief Society sa branch didto sa San Salvador, El Salvador:
“Ang akong mama usa ka bag-o nga kinabig sa Simbahan dihang gitawag siya nga presidente sa Relief Society sa gamay namong branch sa San Salvador. Giingnan niya ang presidente sa branch nga siya walay kasinatian, dili andam, ug dili sarang. Siya mga 30 ang pangidaron, gamay ra kaayo og pormal nga edukasyon, ug ang tibuok niyang kinabuhi gigahin sa pag-atiman sa iyang bana ug sa pito ka anak. Apan ang presidente sa branch mitawag gihapon kaniya.
Hilda Alvarenga
“Akong nakita ang akong inahan nga nagmalampuson. Samtang nagserbisyo, nakakat-on siya og mga kahanas sa pagpangulo ug nakapalambo og bag-ong mga gasa sama sa pagtudlo, pagpamulong, ug pagplano ug pag-organisar sa mga miting, mga kalihokan, ug mga proyekto sa pagserbisyo. Iyang naimpluwensya ang mga babaye sa branch. Siya miserbisyo kanila ug mitudlo kanila sa pagserbisyo sa usag usa. Ang mga sister nahigugma ug mirespeto kaniya. Gitabangan niya ang ubang mga babaye sa pagdiskobre, paggamit, ug pagpalambo og mga gasa ug mga talento; siya mitabang kanila nga mahimong mga tigtukod sa gingharian ug sa lig-on, espirituhanong mga pamilya. Padayon siyang nagmatinud-anon sa mga pakigsaad sa templo nga iyang gihimo. Sa dihang siya namatay, malinawon siya uban sa iyang Magbubuhat.
“Usa ka sister kinsa miserbisyo uban kaniya isip magtatambag sa Relief Society misulat kanako paglabay sa mga tuig: ‘Ang imong mama mao ang tawo nga nagtudlo kanako sa paagi nga naghimo kon unsa ako karon. Gikan kaniya, nakakat-on ako og gugma nga putli, kamabination, kamatinuoron, ug responsibilidad sa among mga calling. Siya ang akong tigtudlo ug akong ehemplo. Karon 80 anyos na ako, apan nagpabilin akong matinud-anon sa Manluluwas ug sa Iyang ebanghelyo. Nakaserbisyo ako og misyon, ug ang Ginoo mipanalangin kanako sa hilabihan. ’”15
Kini nga mapahinunguron nga presidente sa Relief Society nakatabang sa paglig-on sa mga pagpamatuod sa mga sister nga miyembro nang daan sa branch. Iya usab nga naalimahan ang hugot nga pagtuo sa mga babaye kinsa nagtuon pa sa Simbahan ug sa bag-ong mga nabunyagan ug nakumpirmahan. Gipangulohan niya ang mga paningkamot sa paghimo sa Relief Society nga usa ka maabi-abihon, maalimahon nga dapit.
Pag-impluwensya sa Uban pinaagi sa Pagpakigbahin sa Ebanghelyo
Dili pa lang dugay human sa pagbisita nila ni Presidente ug Sister Packer niana nga gamayng sirkulo sa mga sister sa Czechoslovakia, usa ka batan-ong babaye kinsa nagpangita og espirituhanong kasilongan, gugma, ug kahulugan sa iyang kinabuhi naapil niana gayud nga sirkulo. Ang iyang ngalan si Olga Kovářová, ug nianang panahona estudyante siya sa pagkadoktor sa unibersidad sa siyudad sa Brno. Ang unibersidad mipatuman sa patulun-an nga walay Dios [atheism] ngadto sa mga estudyante. Gibati ni Olga nga ang mga estudyante ug ang tanan sa iyang palibut walay direksyon. Gutom siya sa mas lawom nga espirituhanong kinabuhi, ug iyang gibati ang sama nga kagutom sa iyang mga higala ug mga kaubanan.
Sa panahon ni Olga niana nga unibersidad, nahimamat niya si Otakar Vojkůvka, 75 anyos nga Santos sa Ulahing mga Adlaw nga lalaki. Sa wala madugay nahinumdom siya: “Siya akong nakita nga 75 ang pangidaron apan ang iyang kasingkasing magdiseotso anyos pa ug puno sa kalipay. Talagsa ra kaayo kini sa Czechoslovakia sa mga panahon sa pagkamaduha-duhaon. … Akong nakita nga siya dili lamang edukado apan nahibalo unsaon sa pagpuyo nga malipayon.” Iya siyang gipangutana ug ang iyang pamilya mahitungod sa kahulugan sa kinabuhi, ug sa katapusan sila mipaila kaniya ngadto sa laing mga miyembro sa Simbahan. Gusto siyang mahibalo kon giunsa nila sa pagkakaplag og kalipay ug diin sila nakabasa mahitungod sa Dios. Sila mihatag kaniya og kopya sa Basahon ni Mormon, nga mahinamon niyang gisugdan sa pagbasa.
Si Olga nakabig sa gipahiuli nga ebanghelyo, ug mihukom siya sa pagpabunyag. Kinahanglan siyang mabunyagan sa gabii dapit sa kakahoyan aron paglikay nga mahibaloan ang relihiyuso nga kalihokan. Subo lang, daghang mangingisda ang didto sa kakahoyan sa gabii sa iyang pagbunyag. Apan human si Olga ug ang iyang mga higala naghulat ug sa katapusan mihalad og kinasingkasing nga pag-ampo, namiya ang mga mangingisda.
Usa ka miyembro sa Simbahan nga mitambong sa bunyag ni Olga nangutana kaniya, “Nahibalo ka ba nganong dunay daghang mangingisda duol sa tubig karong gabhiona?” Dayon siya miingon, “Hinumdumi nga si Jesus, samtang naglakaw siya sa Dagat sa Galilea, miingon ngadto kang Simeon Pedro ug kang Andres, kinsa nanglaya ngadto sa dagat, ‘Sumunod kamo kanako , ug himoon ko kamong mga mangingisdag tawo.’” Si Olga mibati nga “ang iyang ipasabut mao nga ako sa dili madugay mahimong instrumento sa mga kamot sa Dios sa pagdala sa mga batan-on ngadto sa iyang Simbahan.”
Gihimo gayud kadto ni Olga. Nakaimpluwensya siya og daghan kinsa nagpangita sa kamatuoran ug kalipay. Tungod kay ang pagpangita og katudloan wala itugot sa ilang nasud, siya ug ang pamilyang Vojkůvka mipahigayon og klase nga gitawag og “Eskwelahan sa Kaalam.” Niini nga kahimtang, gitudlo nila ang moral ug matarung nga mga hiyas aron matabangan ang mga tawo nga makakita sa espiritwalidad ug kalipay sa kinabuhi. Daghan sa ilang mga estudyante mibati sa impluwensya sa Espiritu, ug ang mga oportunidad sa kasagaran mibukas alang sa mga diskusyon uban sa pinili nga mga indibidwal mahitungod sa Langitnong Amahan ug sa ebanghelyo ni Jesukristo.16
Sa kaulahian, dihang si Sister Barbara W. Winder nagserbisyo isip ikaonse nga kinatibuk-ang presidente sa Relief Society, aduna siyay oportunidad sa pagbiyahi ngadto sa Czechoslovakia kuyog sa iyang bana, si Richard W. Winder, kinsa nakaserbisyo didto isip batan-ong misyonaryo kaniadto. Sa ilang pagsulod sa balay diin ang miting pagahimoon, usa ka malipayon nga batan-ong babaye misugat kanila sa kahinam ug miingon, “Maayong pag-abut! Ako si Olga, ug ako ang presidente sa Relief Society.” Sila si Brother ug Sister Winder nakamatikod sa kasanag sa iyang panagway ug sa Espiritu sa Ginoo nga diha kaniya. Isip presidente sa Relief Society sa gamay nga branch, si Olga Kovářová usa ka impluwensya alang sa kamaayo sa kalibutan nga anaa ang politikanhong pagpanglupig ug pagpanggukod sa relihiyon, ug mitabang siya sa paghatag og kapasilongan niadtong mga namiyembro sa Simbahan ug nahimong sakop sa Relief Society. Mitabang siya sa pagluwas og mga kalag sa uban pinaagi sa pagdala kanila ngadto kang Kristo.
Ang istorya sa pagkakabig ni Sister Kovářová ug ang iyang misyonaryo nga buhat mga tipik sa katumanan sa panagna ni Presidente Spencer W. Kimball, ikadose nga Presidente sa Simbahan: “Kadaghanan sa dagkong kalamboan nga nagsingabut sa Simbahan sa katapusang mga adlaw moabut tungod sa daghang mga babaye sa kalibutan (kinsa anaa ang kanunay nga pagbati sa pagkaespirituhanon) nga madala ngadto sa Simbahan nga dinaghan. Mahitabo kini sumala sa matang sa pagkamatarung ug pagkamaayo nga gipakita sa mga babaye sa Simbahan sa ilang kinabuhi ug sumala sa matang nga ang mga babaye sa Simbahan nakita nga talagsaon ug lahi—sa malipayong mga paagi—kay sa mga babaye sa kalibutan.”17
Pag-impluwensya sa Uban pinaagi sa Pagserbisyo
Niadtong 1992, ang mga sister sa tibuok kalibutan nagsaulog sa ika-150 nga anibersaryo sa Relief Society pinaagi sa pag-apil sa mga proyekto sa pagserbisyo sa ilang mga komunidad. Pinaagi niini nga paningkamot, nga giorganisar ubos sa pagdumala sa kinatibuk-an ug mga lokal nga mga lider sa priesthood, ang mga sister mipakigbahin sa impluwensya sa Relief Society sa tibuok kalibutan. Si Sister Elaine L. Jack, kinsa nagserbisyo isip ikadose nga kinatibuk-ang presidente sa Relief Society niana nga panahon, miingon:
“Among gihangyo ang matag-usa sa among lokal nga mga yunit sa pagsusi sa mga kaugalingong panginahanglan sa ilang komunidad ug sa paghukom unsa nga serbisyo sa komunidad ang gikinahanglan kaayo. Inyo bang mahunahuna unsa ang nahimo niana sa kalibutan?
“Usa sa atong mga presidente sa Relief Society miadto sa council sa siyudad sa California ug miingon, ‘Unsang mga butanga nga sa inyong pagtuo gikinahanglan niini nga komunidad nga among mahimo?’ Ug ang mga tawo miingon, ‘Buot nimong ipasabut nga 20,000 ka pundok sa tibuok kalibutan mohimo sa samang butang?’ Ug siya miingon oo. Ug [usa sa sakop sa council] miingon, ‘Inyong mausab ang kalibutan.’ Ug nagtuo ko nga ato kanang nahimo … alang sa mas maayo. Usa kana sa makapahiusa nga mga butang. Ug [anaa ang] ingon ka daghang pamaagi sa pagserbisyo. … Ang mga [Sister] nanghimo og mga hapin sa paa didto sa South Africa alang sa mga tigulang sa balay. … Nananom sila og mga bulak sa palibut [sa usa] ka tore nga relo didto sa Samoa. Ug mihimo sila og daghan kaayong butang ngadto sa walay mga kapasilongan o nanghatag og mga libro alang sa mga bata o namintal og mga balay alang sa dili minyo nga mga inahan, ingon nianang mga butanga. Among gibati nga sa tibuok kalibutan kini nga mga service project sa komunidad usa ka mahinungdanon nga butang, alang sa mga sister ug alang sa komunidad.”18
Pag-impluwensya sa Uban pinaagi sa Literasiya [Pagkat-on sa Pagbasa ug Pagsulat]
Samtang ang mga sister sa Relief Society miorganisar og mga service project sa komunidad, si Sister Jack ug ang iyang mga magtatambag mihatag og dakong pagtagad sa usa ka paningkamot sa tibuok kalibutan nga pagserbisyo: pagtabang sa mga sister aron makakat-on sa pagbasa. “Among gibati nga ang mga babaye sa tibuok kalibutan kinahanglan nga makakat-on sa pagbasa, ug daghan ang dili makabasa,” miingon siya. “Inyo bang mahunahuna—nga kon sila dili kamaong mobasa, unsaon man nila sa pagtudlo ang ilang mga anak, unsaon man nila sa pagpalambo ang ilang mga kahimtang, unsaon man nila sa pagtuon sa ebanghelyo? Busa naghunahuna kami nga walay laing mas makatabang kay sa pasiugdahan ang paningkamot nga makakat-on sa pagbasa. … Apan usab ang among tuyo mao ang pag-awhag og usa ka tibuok kinabuhi nga pagkat-on sa matag sister.”19
Thomas S. Monson
Si Presidente Thomas S. Monson, ikadise-sais nga Presidente sa Simbahan, kausa nakighimamat og usa ka babaye didto sa Monroe, Louisiana, kinsa napanalanginan pinaagi niining pagserbisyo sa Relief Society ug kinsa mipakigbahin sa panalangin ngadto sa uban. Ang sister miduol kaniya didto sa airport ug miingon: “Presidente Monson, sa wala pa ko mamiyembro sa Simbahan ug nasakop sa Relief Society, dili pa ko kahibalong mobasa. Dili ko kahibalong mosulat. Walay bisan usa sa among pamilya ang makahibalo.” Giingnan niya si Presidente Monson nga gitudloan siya sa mga sister sa Relief Society sa pagbasa ug karon mitabang siya sa uban unsaon sa pagbasa. Human sa pagpakig-istorya kaniya, si Presidente Monson “nakapamalandong sa labihang kalipay nga tingali gibati sa maong sister dihang giablihan niya ang Biblia ug nakabasa sa unang higayon sa mga pulong sa Ginoo. … Nianang adlawa sa Monroe, Louisiana,” miingon siya, “Nakadawat ako og kumpirmasyon gikan sa Espiritu sa mahimayaon ninyong katuyoan sa pagpalambo sa literasiya tali sa inyong mga sister.”20
Pag-impluwensya ug Paglig-on sa mga Sister diha sa mga Ward ug Branch
Bisan ang matinud-anong mga sister sa Relief Society nagpakita sa ilang impluwensya diha sa ilang komunidad ug sa tibuok kalibutan, wala nila makalimti ang paglig-on sa usag usa sa kaugalingon nilang mga ward ug mga branch. Si Sister Julie B. Beck, kinsa sa ulahi miserbisyo isip ikakinse nga kinatibuk-ang presidente sa Relief Society, nakakita sa sisterhood, kapasilongan, ug impluwensya sa Relief Society sa batan-on pa siya, walay kasinatian nga inahan ug tig-atiman sa panimalay [homemaker]. Nahinumdom siya:
“Ang Relief Society kinahanglan nga maorganisar, hapsay, ug molihok sa paglig-on sa mga pamilya ug motabang sa atong mga panimalay nga mahimong sagrado nga sanktuwaryo gikan sa kalibutan. Kini akong nakat-unan mga tuig na ang milabay sa bag-o pa kong naminyo. Ang akong mga ginikanan, kinsa akong mga silingan, mipahibalo nga mamalhinay sila ngadto sa laing dapit sa kalibutan. Ako kanunay nga nagsalig sa maalimahon, maalamon, ug makadasig nga ehemplo sa akong inahan. Karon mawala na siya sa dugayng panahon. Nahitabo kini nga wala pa ang e-mail, mga fax machine, cell phone, ug mga Web camera, ug ang pagpadala sa sulat grabe ka dugay moabut. Usa ka adlaw sa wala pa siya mobiya, naglingkod ko nga nagbakho uban kaniya ug nangutana, ‘Kinsa man unya ang akong mama?’ Si mama naghunahuna pag-ayo, ug uban sa Espiritu ug gahum sa pagpadayag nga moabut sa mga babaye nga ingon niini nga matang, miingon siya kanako, ‘Kon dili na ko mobalik, kon ikaw dili na makakita kanako, kon ako dili na makatudlo kanimo og laing butang, ipahiluna ang imong kaugalingon ngadto sa Relief Society. Ang Relief Society maoy mahimo nimong inahan.’
“Si mama nahibalo nga kon magkasakit ako, ang mga sister moatiman kanako, ug kon anaa ang akong mga anak, motabang sila kanako. Apan ang pinakadakong panghinaut sa akong mama mao nga ang mga sister sa Relief Society mahimo nga gamhanan, espirituhanong mga lider ngari kanako. Akong gisugdan nianang panahona ang pagkat-on og mas daghan gikan sa mga babaye nga may baruganan ug hugot nga pagtuo.”21
Ang Padayon nga Nagkadako nga Sirkulo sa mga Sister
Boyd K. Packer
Sa unang higayon nga mihisgot ni Presidente Boyd K. Packer sa publiko kabahin sa iyang kasinatian uban sa mga sister sa Relief Society didto sa Czechoslovakia, namulong siya panahon sa kinatibuk-ang miting sa Relief Society niadtong 1980. Miingon siya, “Akong nakita ang panan-awon sa usa ka dako nga sirkulo sa mga sister.”22 Niadtong 1998 gipaambit niya pag-usab ang maong kasinatian, niining panahona sa pagpamulong sa kinatibuk-ang komperensya alang sa tibuok Simbahan. Nakamatikod siya, “Ang Relief Society labaw pa sa usa ka sirkulo karon; labaw pa kini sa usa ka de laso nga panapton nga mikatap tabok sa mga kontinente.”23
Ang mga sister sa Relief Society mga kabahin sa dinasig sa Dios nga organisasyon nga giestablisar ni Propeta Joseph Smith ubos sa awtoridad sa priesthood. Samtang ang mga babaye moapil sa Relief Society ug mopahinungod sa ilang kaugalingon niini, padayon silang maghatag og kapasilongan ug sisterhood ug mamahimong gamhanang mga impluwensya sa pagkamaayo. Si Presidente Packer misaad og talagsaong mga panalangin ngadto sa mga sister nga nagserbisyo niini nga katuyoan:
“Ang inyong matag panginahanglan matuman, karon, ug sa kahangturan; ang matag walay pagpakabana mapapas; ang tanang pang-abuso pagakorihian. Kining tanan mahimong moabut kaninyo, ug daling moabut, kon inyong ipahinungod ang inyong kaugalingon sa Relief Society.
“Ang pagserbisyo diha sa Relief Society magpalambo ug magbalaan sa matag usa ka sister. Ang inyong pagkasakop sa Relief Society kinahanglan nga kanunayng maanaa kaninyo. Kon inyong ipahinungod ang inyong kaugalingon ngadto sa Relief Society ug organisahon kini ug gamiton kini ug moapil niini, inyong gisuportahan ang katuyoan nga mopanalangin sa matag babaye kinsa anaa nga maabut sa impluwensya niini.”24
Paglig-on sa Sisterhood pinaagi sa mga Pagpahayag sa Gugma nga Putli
Sa usa ka pakigpulong alang sa mga sister sa Relief Society, si Presidente Thomas S. Monson mipakigbahin sa mga hunahuna kon sa unsang paagi ang pagpahayag sa gugma nga putli makapalig-on sa bugkos sa sisterhood diha sa Relief Society:
“Akong gikonsiderar ang gugma nga putli—o ‘tiunay nga gugma ni Kristo’—nga usa ka kaatbang sa pagpanaway ug paghukom. Sa paghisgot kabahin sa gugma nga putli, sa pagkakaron wala sa akong hunahuna ang paghupay sa pag-antus pinaagi sa paghatag sa atong kabtangan. Kana, sa tinuod, kinahanglanon ug tukma. Karon, hinoon, ania sa akong hunahuna ang gugma nga putli nga makapakita sa iyang kaugalingon kon kita masinabuton ngadto sa uban ug matugtanon sa ilang mga binuhatan, ang matang sa gugmang putli nga mopasaylo, ang matang sa gugmang putli nga mapailubon.
“Ania sa akong hunahuna ang gugma nga putli nga modala kanato sa pagkamabination, manggiloy-on, ug puno sa kalooy, dili lamang sa mga panahon sa sakit ug mga kasakit ug kasagmuyo apan usab sa mga panahon sa kahuyang o kasaypanan sa uban.
“Adunay dili tiaw nga pangingahanglan sa gugmang putli nga naghatag og pagtagad niadtong wala matagad, paglaum alang sa mga nawad-an og kadasig, tabang alang sa mga nagkasakit. Ang matuod nga gugmang putli mao ang gugma inubanan sa buhat. Ang panginahanglan sa gugmang putli anaa bisan asa.
“Ang gikinahanglan mao ang gugmang putli nga dili matagbaw lamang sa pagpaminaw o sa pagsubli sa mga report sa dautang palad nga miabut sa uban, gawas lang kon ang paghimo niini, makaayo sa tawo nga nahitaboan. …
“Ang gugmang putli mao ang pagbaton og pailub ngadto sa tawo nga mipasakit kanato. Mao kini ang pagbatok sa pagbati nga daling masilo. Mao kini ang pagdawat sa kahuyang ug mga kasaypanan. Mao kini pagdawat sa mga tawo kon unsa gayud sila. Mao kini ang pagtan-aw lapas sa pisikal nga panagway ngadto sa mga hiyas nga dili mapalong paglabay sa panahon. Mao kini ang pagbatok sa pagbati nga adunay palabihon.
“Ang gugmang putli, ang tiunay nga gugma ni Kristo, ikapakita kon ang pundok sa mga batan-ong babaye gikan sa singles ward magbiyahe og gatusan ka mga milya aron pagtambong sa mga funeral service alang sa inahan sa usa sa ilang mga sister sa Relief Society. Ang gugmang putli ikapakita kon ang mapahinunguron nga mga visiting teacher mobalik sa matag bulan, sa matag tuig sa mao gihapon nga walay interes, may pagkahinawayon nga sister. Makita kini kon ang usa ka tigulang na nga biyuda mahinumduman ug madala ngadto sa mga kalihokan sa ward ug sa mga kalihokan sa Relief Society. Mabatyagan kini kon ang sister nga nag-inusarang naglingkod sa Relief Society makadawat sa imbitasyon nga, ‘Dali—tapad kanamo.’
“Sa gatusan ka ginagmayng mga paagi, tanan kamo nagsul-ob sa kupo sa gugma nga putli. Walay perpekto nga kinabuhi alang kanatong tanan. Imbis nga magmahukmanon kita ug hinawayon sa usag usa, unta magbaton kita sa tiunay nga gugma ni Kristo alang sa atong isig ka tigbiyahe niini nga panaw sa kinabuhi. Unta kita makamatikod nga ang matag usa naghimo sa tanan aron maatubang ang mga hagit nga moabut sa iyang agianan, ug unta atong paningkamutan ang paghimo sa atong pinakamaayo sa pagtabang.
“Ang gugmang putli nangahulugan isip ang ‘pinakataas, pinakahalangdon, pinakalig-ong matang sa gugma,’ ang ‘tiunay nga gugma ni Kristo … ; ug bisan kinsa nga makaplagan nga anaa niini sa katapusan nga adlaw, kini makaayo [kaniya].’
“‘Ang gugma nga putli dili gayud mopakyas.’ Unta kining taas og lahutay nga motto sa Relief Society, kining walay utlanan nga kamatuoran, mogiya sa tanan ninyong buhaton. Unta kini mosulod diha gayud sa inyong mga kalag ug mopadayag diha sa tanan ninyong mga hunahuna ug mga buhat.”25
Ang mga sister sa Relief Society makakaplag og gugma ug kasiguroan gikan sa mga unos sa kinabuhi samtang sila nagserbisyo.
Ang mga sakop sa Relief Society nanag-abut sa usa ka sirkulo sa sisterhood.
“Bisan asa [ang usa ka pamilya] moadto, ang Church family nagahulat kanila” (Boyd K. Packer).
Relief Society Building, Salt Lake City, Utah, 1956
Si Sister Belle S. Spafford, sa wala, sa International Council of Women convention
Mga sister sa Relief Society ug full-time misyonaryo sa San Antonio, Texas, mga 1950
Sama sa karaang mga Apostoles sa Manluluwas, ang mga sister sa Relief Society mahimo nga instrumento sa mga kamot sa Dios.
Ang pagserbisyo makausab sa kalibutan ngadto sa pagka mas maayo.
Ang pagkahibalo nga mobasa nagtabang sa mga babaye nga molambo sa ilang mga kahimtang, pagtuon sa ebanghelyo, ug pagtudlo sa ilang mga anak.
Ang Choir sa Relief Society nga nanganta didto sa Salt Lake Tabernacle, 1956
“Ang tinuod nga gugmang putli mao ang gugma inubanan sa buhat. Ang panginahanglan sa gugmang putli anaa bisan asa” (Thomas S. Monson).
Ang gugmang putli mabati pinaagi sa pagdapit nga “Dali—tapad kanamo.”