Lesona 1: Fanambarana momba ny Famerenana amin’ny laoniny

Ny Apôstazia Lehibe

Ny filana ny Famerenana amin’ny laoniny ny Fiangonan’ny Mpamonjy

Nanangana ny Fiangonany nandritra ny asa fanompoany tety an-tany i Jesoa Kristy. Naniraka ny Apôstôliny hitarika ny Fiangonana amin’ny alalan’ny fahefana sy fanalahidin’ny fisoronany ny Mpamonjy taorian’ny fahafatesany sy ny Fitsanganany tamin’ny maty. Tsy nahazo ny fitarihan’ Andriamanitra tamin’ny alalan’ny mpaminany velona intsony ny olona noho ny fanenjehana mivaivay sy ny fahafatesan’ny Apôstôly. Niova ny fampianarana sy ny fotopampianaran’i Jesoa Kristy, ka niteraka vanim-potoana nantsoina hoe Apôstazia Lehibe. Afaka manampy ny mpianatra hahatakatra hoe nahoana no nilaina ny famerenana amin’ny laoniny ny Fiangonana marin’i Jesoa Kristy amin’izao andro farany izao ity lesona ity.

Ireo sahanasa fianarana azo atao

Velona talohan’ny Famerenana amin’ny laoniny

Hevero ny hanasa ny mpianatra hifanakalo hevitra momba ity fanontaniana manaraka ity miaraka amina namana iray na vondrona kely. Azonao atao ihany koa ny mangataka ny mpianatra hifanakalo hevitra amina fanontaniana manontany zavatra amin’ny antsipiriany kokoa, toy ny hoe inona no mety ho nataon’izy ireo rehefa miasa na maka rivotra, mety ho taiza no nipetraka izy ireo, mety hanao ahoana ny tranon’izy ireo, ary ny karazana sakafo mety ho nohanin’izy ireo.

Azonao atao ihany koa ny mampiasa ny sahanasa fianarana fanampiny hoe “Alaovy sary an-tsaina ny safotofoto ara-pivavahana izay nisy nandritra ny Apôstazia Lehibe” mandritra ity ampahany amin’ny lesona ity.

Alaovy sary an-tsaina hoe niaina tamin’ny taona 1800 ianao fa tsy ankehitriny.

• Mety ho hafa toy ny ahoana ny fiainanao tamin’izany?

  Hazavao fa anisan’ny fahasamihafana ny hoe niaina tsy misy ny filazantsaran’i Jesoa Kristy tety ambonin’ny tany ny olona tamin’izany. Mba hanampiana ny mpianatra hieritreritra hoe mety ho nanao ahoana izany, dia hevero ny hametraka fanontaniana toy ireto manaraka ireto:

• Mety ho nanao ahoana ny fifandraisanao tamin’ny Ray any An-danitra sy i Jesoa Kristy?

• Inona avy no fanontaniana na fanahiana mety ho nanananao?

Ny Apôstazia Lehibe

Mba hanampiana ny mpianatra hahatakatra ny sasany amin’ireo zava-niseho izay nitarika ho amin’ny Apôstazia Lehibe, dia azonao atao ny manasa azy ireo hizara ny zavatra fantatr’izy ireo momba ireny zava-niseho ireny na mampiasa ny sasany amin’ireto famintinana manaraka ireto. Afaka mampiasa ihany koa ianao ilay horonan-tsary “ What Is the Restoration? ” manomboka amin’ny kaodim-potoana 0:32 ka hatramin’ny 2:08. Hita ao amin’ny ChurchofJesusChrist.org io horonan-tsary io.

Mitranga ny Apôstazia rehefa miala amin’ny fotopampianarana marin’ny filazantsara ny olona ka mandà ireo mpanompo nahazo lalana tamin’ny Tompo. Niseho taorian’ny vanim-potoan’ny Testamenta Vaovao ny vanim-potoana apôstazia iray, taorian’ny nananganan’ny Mpamonjy ny Fiangonany sy nanirahany ireo Apôstôliny hitarika izany.

“Taorian’ny nahafatesan’ny Mpamonjy sy ireo Apôstôly dia nolotoin’ny olona ny fitsipiky ny filazantsara ary nanao fanovana tsy nahazoana lalana teo amin’ny rafitry ny Fiangonana sy ny ôrdônansin’ny fisoronana izy ireo. Noho ny fielezan’izany apôstazia izany dia nesorin’ny Tompo teto an-tany ny fahefan’ny fisoronana” (Lohahevitra sy fanontaniana, “Apôstazia,” topics.ChurchofJesusChrist.org).

Vakio ireto soratra masina manaraka ireto, hitadiavana hoe toy ny ahoana ny toe-javatra nisy teto an-tany nandritra ny Apôstazia Lehibe.

• Amosa 8:11–12

• 2 Nefia 26:20

• Fotopampianarana sy Fanekempihavanana 1:15–16

• Fotopampianarana sy Fanekempihavanana 112:23

Azon’ny mpianatra atao ny mandalina ireo andinin-tsoratra masina ireo samirery na miaraka amina vondrona. Azonao atao koa ny manome andraikitra ny vondrona tsirairay handalina andian’andininy iray sy hizara amin’ny kilasy ny zavatra hitan’izy ireo.

Mampiasà fanontaniana toy ireto manaraka ireto mba hifanakalozana hevitra mikasika ny zavatra nianaran’ny mpianatra avy amin’ireo andinin-tsoratra masina ireo ireo. Mety ho zava-dehibe ny hanazavana ao anatin’io fifanakalozan-kevitra io, fa na dia tsy teto an-tany aza ny Fiangonan’ny Mpamonjy sy ny fahefany nandritra ny Apôstazia Lehibe, dia maro ny olona niaina nandritra izany fotoana izany no tia an’ Andriamanitra sy niezaka ny hanara-dia Azy tamim-pahatokiana araka ny fahatakarana nananan’izy ireo.

• Inona avy no teny na andian-teny hitanao izay mamaritra ny toetoetran’izao tontolo izao nandritra ny Apôstazia Lehibe?

• Nahoana no mety ho azo ampitahaina amin’ny mosary ny tsy fahafahana nahazo ny filazantsara marin’i Jesoa Kristy? Inona no atolotr’i Jesoa Kristy sy ny filazantsarany izay mitondra fiainana sy sakafo mahavelona ho an’izao tontolo izao?

• Nahoana, araka ny hevitrao, no zava-dehibe ny mahatakatra ny Apôstazia Lehibe sy ny vokatr’izany?

Mety hilaza zavatra mitovitovy amin’ity fahamarinana manaraka ity ny mpianatra mba hamaliana ilay fanontaniana teo aloha: Tsy maintsy naverina tamin’ny laoniny ny fotopampianarana sy ny fahefan’i Jesoa Kristy mba handresena ny vokatry ny Apôstazia Lehibe. Hevero ny hanoratra io fahamarinana io eny amin’ny solaitrabe.

Ny Famerenana amin’ny laoniny ny filazantsaran’ny Mpamonjy

Imbetsaka teo amin’ny tantaran’izao tontolo izao ny Ray any An-danitra no nanampy ny zanany izay tafaroboka tao anatin’ny apôstazia, tamin’ny alalan’ny fiantsoana mpaminany mba hametraka ny fahamarinana amin’ny toerany sy hanambara ny filazantsara. Amin’izao fotoampitantanana misy antsika izao dia nanomboka ny Famerenana amin’ny laoniny ny filazantsara tamin’ny alalan’ny Mpaminany Joseph Smith Izy (Jereo ny Joseph Smith—Tantara 1:15–20; Fotopampianarana sy Fanekempihavanana 1:17).

Ny lesona manaraka, “Ny Famerenana amin’ny laoniny ny fahafenoan’ny Filazantsaran’i Jesoa Kristy: Fanambarana ho an’izao tontolo izao nandritra ny fankalazana ny faha-roanjato taona,” dia hanome ny mpianatra fahafahana handalina misimisy kokoa momba ny Famerenana amin’ny laoniny ny filazantsaran’ny Mpamonjy amin’ny andro farany.

Hevero ny hanehoana ilay horonan-tsary “ Dispensations: The Pattern of Apostasy and Restoration ” (6:52), izay hita ao amin’ny ChurchofJesusChrist.org mba hanampiana ireo mpianatra hamantatra ny lamin’ Andriamanitra amin’ny fitahiany ny zanany amin’ny filazantsara aorian’ny fotoana nisian’ny apôstazia. Asao ny mpianatra hieritreritra ny zavatra nianarany na tsapany momba ny Ray any An-danitra sy i Jesoa Kristy rehefa mijery ilay horonan-tsary.

• Inona no ianaranao momba ny Ray any An-danitra sy i Jesoa Kristy avy amin’ny fahavononan’ Izy Ireo hamerina amin’ny laoniny ny filazantsara etỳ an-tany nandritra ny vanim-potoan’ny apôstazia?

• Inona no zavatra omen’ny filazantsaran’i Jesoa Kristy naverina tamin’ny laoniny izay manampy anao hivoatra ara-panahy?

Hazavao ny Apôstazia Lehibe sy ny filana ny Famerenana amin’ny laoniny

Hevero ny hizara ity rafi-tantara manaraka ity sy hanome ny mpianatra fahafahana hamaly izany mba hanampiana ny mpianatra haneho ny fahatakaran’izy ireo ny zavatra nianaran’izy ireo.

Alaovy sary an-tsaina hoe manana namana iray izay tsy mpikamban’ny Fiangonana kanefa liana ny amin’ny finoanao ianao. Rehefa avy miresadresaka kely dia hoy ny namanao: “Efa nisy fotoana ve ianao nanontany tena hoe nahoana no misy fiangonana Kristianina be dia be eto an-tany? Tsy azoko hoe ahoana no ahafahan’ny olona manapa-kevitra hoe iza no fiangonana hidirana ho mpikambana satria tena betsaka izy ireo.”

Mamoròna, ao amin’ny diary fandalinanao, drafitra fohy izay ahitana soratra masina sy hevitra azonao zaraina ka mety hanampy ny namanao. Aza hadinoina ny mampiditra ny zavatra nianaranao androany momba ny Apôstazia Lehibe sy ny filana ny Famerenana amin’ny laoniny. Miezaha hampiasa ny teninao manokana mba hanehoana hoe nahoana no tena nilaina ny famerenana amin’ny laoniny ny fotopampianaran’ny Mpamonjy, ny fahefany, ary ny Fiangonany mba handresena ny vokatry ny Apôstazia Lehibe.

Hevero ny hizara ny fijoroana ho vavolombelona anananao momba ireo fahamarinana noresahinareo tao amin’ity lesona ity. Azonao atao ny manasa ny mpianatra hivavaka mba hahazo fahafahana hizara amin’ny olona iray hafa ny zavatra nianaran’izy ireo androany sy ny lanjan’ny Famerenana amin’ny laoniny.

Loharanom-pitaovana fanampiny

Inona no zavatra very nandritra ny Apôstazia Lehibe?

Nampianatra toy izao ny Loholona Robert D. Hales tao amin’ny Kôlejin’ny Apôstôly Roambinifolo:

Taorian’ny Fitsanganan’ny Mpamonjy tamin’ny maty, dia naniraka ny Apôstôliny Izy hitarika ny Fiangonana sy hitantana ireo ôrdônansin’ny filazantsara. Nahatoky tamin’io andraikitra io izy ireo ka dia nenjehina, ary ny sasany dia maty maritiora tamin’ny farany. Vokatr’izany dia tsy teto an-tany intsony ny fahefan’ny fisoronan’ny Tompo, ary latsaka tao anaty haizina ara-panahy izao tontolo izao. Tao anatin’ireo taonjato maro taorian’izay dia nanana ny Fahazavan’i Kristy ny zanak’ Andriamanitra rehetra, afaka nivavaka, ary afaka nahatsapa ny fitaoman’ny Fanahy Masina. Saingy very ny fahafenoan’ny filazantsara. Tsy nisy na iza na iza intsony teto an-tany nanana ny hery sy fahefana hitarihana ny Fiangonana na hanatanteraka ôrdônansy masina toy ny batisa, ny fanolorana ny fanomezana ny Fanahy Masina, ary ireo ôrdônansy mamonjin’ny tempoly. (Robert  D. Hales, “Preparations for the Restoration and the Second Coming: ‘My Hand Shall Be over Thee,’” Liahona, Nov. 2005, 89)

Ahoana no nanomanan’ny Tompo ny Famerenana amin’ny laoniny nandritra ny Apôstazia Lehibe?

Nampianatra ny fomba nanomanan’ny Tompo ny Famerenana amin’ny laoniny ny filazantsara ny Filoha M. Russell Ballard ao amin’ny Kôlejin’ny Apôstôly Roambinifolo:

Rehefa mihevitra ny fomba nanomanan’ny Tompo izao tontolo izao ho amin’ny Famerenana amin’ny laoniny isika, dia tokony hahatsiaro mandrakariva fa betsaka amin’ny zavatra notanterahiny no tamin’ny alalan’ny fiainan’olona—lehilahy sy vehivavy tsotra izay nahavita zavatra miavaka be mihitsy tamina tranga maromaro. (M. Russell Ballard, “How the Lord Prepared the World for the Restoration,” Ensign, Jan. 2020, 19)

Hevero ny hamaky manontolo ny lahatsoratranosoratan’ny Filoha Ballard mba hahafantarana misimisy kokoa momba io fanomanana io.

Nahafantatra ve ny olona tamin’ny andron’i Joseph Smith fa nilaina ny hisian’ny famerenana amin’ny laoniny?

Ilay horonan-tsary hoe “ La quête de la vérité ” (15:43) dia mitantara ny tantara nikarohan’i Wilford Woodruff ny Fiangonan’ny Mpamonjy.

Sahanasa fianarana fanampiny

Singa tena ilaina

Hevero ny hitondra piesy mekanika iray tena ilaina mba hahafahan’ny milina na fitaovana iray handeha (ohatra hoe tariby mitondra ny herinaratra amina fitaovana ampiasaina ao an-trano na solosaina, rojo na kodiaram-bisikileta, na bozia amina fiara), mba hanampiana ny mpianatra hahatakatra ny ampahany tena ilaina amin’ny Fiangonan’ny Mpamonjy sy ny zavatra very nandritra ny Apôstazia Lehibe . Asehoy ny mpianatra ilay piesy ary anontanio azy ireo hoe amin’inona no ampiasana ilay izy na hoe inona no asan’ilay izy. (Raha tsy mahita piesy mekanika ianao, dia ataovy sary eny amin’ny solaitrabe izany). Hevero ny hametraka fanontaniana toy ireto manaraka ireto:

• Inona no mitranga rehefa tsy eo amin’ilay fitaovana tokony hisy azy io piesy io?

• Inona avy no singa tena ilain’ Ny Fiangonan’i Jesoa Kristy ho an’ny Olomasin’ny Andro Farany? Inona no mety hitranga amin’ny Fiangonana raha tsy misy ireo singa ireo?

Soraty eny amin’ny solaitrabe ny lohateny hoe Singa tena ilaina ao amin’ny Fiangonan’i Jesoa Kristy. Ampio ny mpianatra hamantatra singa tena ilaina ao amin’ny soratra masina, toy ireto manaraka ireto:

• Apôstôly sy mpaminany no mandrafitra ny fototra iorenan’ny Fiangonan’i Jesoa Kristy (jereo ny Efesiana 2:19–22).

• Nomen’i Jesoa Kristy ny fahefan’ny fisoronana (jereo ny Marka 3:13–14).

• Afaka mandray ôrdônansy izay tena ilaina amin’ny famonjena antsika isika ao amin’ny Fiangonan’i Jesoa Kristy (jereo ny Jaona 3:5; Asan’ny Apostoly 2:37–39).

• I Jesoa Kristy no mitarika ny Fiangonany amin’ny alalan’ny fanambarana amin’ireo mpaminany sy apôstôliny (jereo ny Matio 16:15–19; Efesiana 4:11–13).

Alaivo sary an-tsaina ny safotofoto ara-pivavahana nandritra ny Apôstazia Lehibe

Mety ho tombony ho an’ny mpianatra ny mandre ity zavatra niainana manaraka ity rehefa misaintsaina izy ireo hoe mety ho nanao ahoana izany niaina nandritra ny Apôstazia Lehibe izany:

Teo am-panomanana ny fihaonambe maneran-tanin’ny Fiangonana tamin’ny taona 2020, ny Loholona Jeffrey R. Holland ao amin’ny Kôlejin’ny Apôstôly Roambinifolo sy Rahavavy Patricia Holland vadiny dia naka sary an-tsaina hoe niaina taoriana kelin’ny fiafaran’ny taonjato faha-18 izy ireo. Nosaintsainin’izy ireo ny savorovoron-tsaina mety ho tsapan’izy ireo sy ny zavatra mety ho nantenain’izy ireo ara-panahy (jereo ny Jeffrey R. Holland, “Fanantenana mamirapiratra tonga lafatra,” Liahona, mey 2020, 81–84).

Raha azo atao dia hevero ny hijery ny “Fanantenana mamirapiratra tonga lafatra” manomboka eo amin’ny mari-potoana 0:00 hatramin’ny 7:16.

Sakafo ara-panahy avy amin’i Jesoa Kristy sy ny filazantsarany

Hevero ny hampiseho sarina zavamaniry maty iray sy zavamaniry velona iray alohan’ny handalinana ireo andininy momba ny Apôstazia. Azonao atao ihany koa ny mitondra ireo zavatra ireo ao am-pianarana raha manana ianao. Asao ny mpianatra hifanakalo hevitra momba an’izay nahatonga ireo zavamaniry ireo tsy hitovy mihitsy sy ny fanoharana ara-panahy azontsika atao avy amin’ireo zavamaniry ireo. Ifanakalozy hevitra ihany koa hoe nahoana no manampy antsika hijanona ho velona sy salama ara-panahy ny fifandraisana foana amin’i Jesoa Kristy. Azon’ny mpianatra atao ny mamaky ny Jaona 15:4–6 sy hihevitra ny fomba nifandraisan’ny fampianaran’ny Mpamonjy tamin’ireo Olomasina voalohany nandritra ny Apôstazia Lehibe.