Lesson 1: Proklamasyon ng Pagpapanumbalik

Ang Malawakang Apostasiya

Ang Pangangailangan para sa Pagpapanumbalik ng Simbahan ng Tagapagligtas

Itinatag ni Jesucristo ang Kanyang Simbahan noong Kanyang mortal na ministeryo. Kasunod ng Kanyang kamatayan at Pagkabuhay na Mag-uli, inatasan ng Tagapagligtas ang Kanyang mga Apostol na gabayan ang Simbahan sa pamamagitan ng Kanyang awtoridad at mga susi ng priesthood. Dahil sa matinding pag-uusig at pagkamatay ng mga Apostol, ang mga tao ay naiwan nang walang banal na patnubay mula sa mga buhay na propeta. Ang mga turo at doktrina ni Jesucristo ay binago, na humantong sa panahong tinatawag na Malawakang Apostasiya. Ang lesson na ito ay makatutulong sa mga estudyante na maunawaan na kailangan ang pagpapanumbalik ng totoong Simbahan ni Jesucristo sa mga huling araw.

Mga Posibleng Aktibidad sa Pag-aaral

Pamumuhay bago ang Pagpapanumbalik

Maaari mong anyayahan ang mga estudyante na talakayin ang sumusunod na tanong kasama ng ka-partner o sa maliit na grupo. Maaari mo ring sabihin sa mga estudyante na talakayin ang mas detalyadong mga tanong, tulad ng mga ginagawa nila sa trabaho at paglilibang, kung saan sila nakatira, kung ano kaya ang hitsura ng kanilang bahay, at mga uri ng pagkain na nakain na nila.

Maaari mo ring gamitin ang karagdagang aktibidad sa pag-aaral na “Isipin ang kalituhan sa relihiyon sa panahon ng Malawakang Apostasiya” sa bahaging ito ng lesson.

Isipin na kunwari ay nabuhay kayo noong taong 1800 sa halip na ngayon.

• Paano kaya maiiba ang inyong buhay?

  Ipaliwanag na ang isang kaibhan ay ang pamumuhay nang wala ang ebanghelyo ni Jesucristo sa lupa. Upang matulungan ang mga estudyante na pag-isipan kung ano kaya ang pakiramdam nito, maaari mong itanong ang tulad ng mga sumusunod:

• Ano kaya ang magiging kaugnayan ninyo sa Ama sa Langit at kay Jesucristo?

• Ano kaya ang mga tanong o alalahanin ninyo?

Ang Malawakang Apostasiya

Upang matulungan ang mga estudyante na maunawaan ang ilan sa mga pangyayaring humantong sa Malawakang Apostasiya, maaari mo silang anyayahang ibahagi ang nalalaman nila tungkol sa mga pangyayaring ito o gamitin ang ilan sa sumusunod na buod. Maaari mo ring gamitin ang video na “Pagpapanumbalik ng Simbahan ni Cristo?” mula sa time code na 0:32 hanggang 2:08. Ang video na ito ay matatagpuan sa ChurchofJesusChrist.org.

Nangyayari ang apostasiya kapag tumatalikod ang mga tao sa totoong doktrina ng ebanghelyo at hindi nila tinatanggap ang mga awtorisadong tagapaglingkod ng Panginoon. Isang panahon ng apostasiya ang naganap kasunod ng panahon ng Bagong Tipan, matapos itatag ng Tagapagligtas ang Kanyang Simbahan at atasan ang Kanyang mga Apostol na pamunuan ito.

“Pagkatapos ng kamatayan ng Tagapagligtas at ng Kanyang mga Apostol, binaluktot ng mga tao ang mga alituntunin ng ebanghelyo at gumawa ng mga di-awtorisadong pagbabago sa organisasyon ng Simbahan at sa mga ordenansa ng priesthood. Dahil sa laganap na apostasiyang ito, kinuha ng Panginoon ang awtoridad ng priesthood mula sa mundo” (Mga Paksa at Mga Tanong, “Apostasiya,” topics.ChurchofJesusChrist.org).

Basahin ang mga sumusunod na banal na kasulatan, at alamin ang mga kalagayan sa mundo noong panahon ng Malawakang Apostasiya.

• Amos 8:11–12

• 2 Nephi 26:20

• Doktrina at mga Tipan 1:15–16

• Doktrina at mga Tipan 112:23

Maaaring pag-aralan ng mga estudyante ang mga talatang ito nang mag-isa o kasama ang isang grupo. Maaari mo ring atasan ang bawat grupo na pag-aralan ang isang set ng mga talata at ibahagi sa klase ang natutuhan nila.

Gamitin ang mga tanong na tulad ng mga sumusunod para talakayin ang natutuhan ng mga estudyante mula sa mga talatang ito. Bilang bahagi ng talakayang ito, maaaring mahalagang ipaliwanag na bagama’t ang Simbahan at awtoridad ng Tagapagligtas ay wala sa mundo sa panahon ng Malawakang Apostasiya, maraming tao ang nabuhay noong panahong iyon na nagmahal sa Diyos at nagsikap na tapat na sundin Siya ayon sa pag-unawang mayroon sila.

• Ano ang ilang salita o parirala na natuklasan ninyo na naglalarawan sa kalagayan ng mundo noong panahon ng Malawakang Apostasiya?

• Paano maihahambing ang hindi pagkakaroon ng totoong ebanghelyo ni Jesucristo sa taggutom? Ano ang ibinibigay ni Jesucristo at ng Kanyang ebanghelyo na naghahatid ng buhay at pangangalaga sa mundo?

• Sa inyong palagay, bakit mahalaga na maunawaan ang Malawakang Apostasiya at ang mga ibinunga nito?

Bilang sagot sa naunang tanong, maaaring sabihin ng mga estudyante ang isang bagay na tulad ng sumusunod na katotohanan: Ang doktrina at awtoridad ni Jesucristo ay kailangang ipanumbalik upang madaig ang mga epekto ng Malawakang Apostasiya. Maaari mong isulat sa pisara ang katotohanang ito.

Ang Pagpapanumbalik ng ebanghelyo ng Tagapagligtas

Maraming beses sa kasaysayan ng mundo, tinulungan ng Ama sa Langit ang Kanyang mga anak na nag-apostasiya sa pamamagitan ng pagtawag sa mga propeta na magtatag ng katotohanan at ipahayag ang ebanghelyo. Sa ating dispensasyon, pinasimulan Niya ang Pagpapanumbalik ng ebanghelyo sa pamamagitan ni Propetang Joseph Smith (tingnan sa Joseph Smith—Kasaysayan 1:15–20; Doktrina at mga Tipan 1:17).

Ang susunod na lesson, “Ang Pagpapanumbalik ng Kabuuan ng Ebanghelyo ni Jesucristo: Isang Proklamasyon sa Mundo para sa Ika-200 Taong Anibersaryo,” ay magbibigay sa mga estudyante ng pagkakataong pag-aralan pa ang tungkol sa Pagpapanumbalik ng ebanghelyo ng Tagapagligtas sa mga huling araw.

Upang matulungan ang mga estudyante na maunawaan ang pattern ng Diyos sa pagpapala ng Kanyang mga anak sa pamamagitan ng ebanghelyo matapos ang mga panahon ng apostasiya, isiping ipanood ang video na “Mga Dispensasyon: Ang Pattern ng Apostasiya at Pagpapanumbalik” (6:52), matatagpuan sa ChurchofJesusChrist.org. Anyayahan ang mga estudyante na pag-isipan ang natutuhan at nadama nila tungkol sa Ama sa Langit at kay Jesucristo nang panoorin nila ang video na ito.

• Ano ang natututuhan ninyo tungkol sa Ama sa Langit at kay Jesucristo sa Kanilang kahandaang ipanumbalik ang ebanghelyo sa mundo sa mga panahon ng apostasiya?

• Ano ang ibinibigay ng ipinanumbalik na ebanghelyo ni Jesucristo na tumutulong sa inyo na espirituwal na umunlad?

Ipaliwanag ang Malawakang Apostasiya at ang pangangailangan para sa Pagpapanumbalik

Upang matulungan ang mga estudyante na maipakita ang kanilang pagkaunawa sa natutuhan nila, maaari mong ibahagi ang sumusunod na sitwasyon at bigyan ang mga estudyante ng pagkakataong tumugon dito.

Kunwari ay may kaibigan kayo na hindi miyembro ng Simbahan pero gustong malaman ang inyong mga paniniwala. Pagkatapos ng kaunting talakayan, sinabi ng kaibigan ninyo, “Naisip mo na ba kung bakit napakaraming simbahang Kristiyano sa mundo? Hindi ko nauunawaan kung paano nakapagpapasiya ang mga tao kung aling simbahan ang sasalihan sa dami ng mga ito.”

Sa inyong study journal, gumawa ng maikling outline na naglalaman ng mga banal na kasulatan at ideya na maibabahagi ninyo na maaaring makatulong sa inyong kaibigan. Tiyaking isama ang natutuhan ninyo ngayon tungkol sa Malawakang Apostasiya at sa pangangailangan para sa Pagpapanumbalik. Subukang gamitin ang sarili ninyong mga salita upang ipahayag kung bakit kailangan ang pagpapanumbalik ng doktrina, awtoridad, at Simbahan ng Tagapagligtas para madaig ang mga epekto ng Malawakang Apostasiya.

Maaari mong ibahagi ang iyong patotoo sa mga katotohanang tinalakay ninyo sa lesson na ito. Maaari mong anyayahan ang mga estudyante na manalangin para sa pagkakataong ibahagi sa iba ang natutuhan nila ngayon at ang kahalagahan ng Pagpapanumbalik.

Karagdagang Resources

Ano ang nawala sa panahon ng Malawakang Apostasiya?

Itinuro ni Elder Robert D. Hales ng Korum ng Labindalawang Apostol:

Matapos ang Pagkabuhay na Mag-uli ng Tagapagligtas, inatasan Niya ang Kanyang mga Apostol na pamunuan ang Simbahan at pangasiwaan ang mga ordenansa ng ebanghelyo. Tapat sa utos na ito, sila’y pinahirapan, at pinaslang pa ang iba kalaunan. Bunga nito, nawala ang awtoridad ng priesthood ng Panginoon sa daigdig, at nasadlak sa espirituwal na kadiliman ang mundo. Sa sumunod na mga siglo, ang mga anak ng Diyos ay nagkaroon ng Liwanag ni Cristo, makapagdarasal at madarama ang impluwensya ng Espiritu Santo. Ngunit nawala na ang kaganapan ng ebanghelyo. Walang natira sa daigdig na may kapangyarihan at awtoridad na pamunuan ang Simbahan o magsagawa ng mga sagradong ordenansang tulad ng binyag, paggagawad ng kaloob na Espiritu Santo, at ng nakapagliligtas na mga ordenansa ng templo. (Robert D. Hales, “Mga Paghahanda para sa Panunumbalik at ang Ikalawang Pagparito: ‘Ang aking Kamay ang Gagabay sa Iyo,’” Liahona, Nob. 2005, 89)

Paano naghanda ang Panginoon para sa Pagpapanumbalik noong panahon ng Malawakang Apostasiya?

Itinuro ni Pangulong M. Russell Ballard ng Korum ng Labindalawang Apostol kung paano naghanda ang Panginoon para sa Pagpapanumbalik ng ebanghelyo:

Habang pinag-iisipan natin kung paano inihanda ng Panginoon ang mundo para sa Panunumbalik, dapat nating tandaan na ginawa Niya ang karamihan sa mga ito sa pamamagitan ng buhay ng mga indibiduwal—mga ordinaryong kalalakihan at kababaihan na nakagawa ng mga pambihirang bagay sa ilang pagkakataon. (M. Russell Ballard, “Paano Inihanda ng Panginoon ang Mundo para sa Panunumbalik,” Liahona, Ene. 2020, 19)

Para malaman ang iba pa tungkol sa paghahandang ito, isiping basahin ang buong artikulo ni Pangulong Ballard.

Alam ba ng mga tao noong panahon ni Joseph Smith na kinakailangan ang pagpapanumbalik?

Ang video na “ A Search for Truth ” (15:43) ay nagsasalaysay tungkol sa paghahanap ni Wilford Woodruff sa Simbahan ng Tagapagligtas.

Mga Karagdagang Aktibidad sa Pag-aaral

Mahahalagang bahagi

Upang matulungan ang mga estudyante na maunawaan ang mahahalagang bahagi ng Simbahan ng Tagapagligtas at kung ano ang nawala sa panahon ng Malawakang Apostasiya, pag-isipang magdala sa klase ng isang piyesa na kailangan para gumana ang isang makina o kagamitan (tulad ng power cord mula sa appliance o computer, kadena o gulong mula sa bisikleta, o mga spark plug mula sa kotse). Ipakita sa mga estudyante ang bahagi o piyesa at itanong sa kanila kung para saan ito. (Kung wala kang makuhang piyesa, magdrowing na lang nito sa pisara.) Maaari kang magtanong ng tulad ng mga sumusunod:

• Ano ang mangyayari kapag nawala ang piyesang ito sa kagamitan kung saan ito nakalagay?

• Ano ang ilang mahahalagang bahagi ng Ang Simbahan ni Jesucristo ng mga Banal sa mga Huling Araw? Ano ang mangyayari sa Simbahan kung wala ang mga bahaging ito?

Isulat sa pisara ang heading na Mahahalagang Bahagi ng Simbahan ni Jesucristo. Tulungan ang mga estudyante na tukuyin ang mahahalagang elemento mula sa mga banal na kasulatan, tulad ng mga sumusunod:

• Ang mga apostol at mga propeta ang bumubuo ng saligan ng Simbahan ni Jesucristo (tingnan sa Efeso 2:19–22).

• Ang awtoridad ng priesthood ay ibinigay ni Jesucristo (tingnan sa Marcos 3:13–14).

• Sa Simbahan ni Jesucristo, maaari tayong tumanggap ng mga ordenansa na kailangan para sa ating kaligtasan (tingnan sa Juan 3:5; Mga Gawa 2:37–39).

• Pinamumunuan at ginagabayan ni Jesucristo ang Kanyang Simbahan sa pamamagitan ng paghahayag sa Kanyang mga propeta at apostol (tingnan sa Mateo 16:15–19; Efeso 4:11–13).

Isipin ang kalituhan sa relihiyon sa panahon ng Malawakang Apostasiya

Habang pinag-iisipan ng mga estudyante kung ano kaya ang pakiramdam ng mabuhay sa panahon ng Malawakang Apostasiya, makatutulong sa kanila na marinig ang sumusunod na karanasan:

Bilang paghahanda para sa pangkalahatang kumperensya ng Simbahan noong Abril 2020, inisip ni Elder Jeffrey R. Holland ng Korum ng Labindalawang Apostol at ng kanyang asawang si Sister Patricia Holland na kunwari ay nabuhay sila noong simula ng 1800s. Pinagnilayan nila ang kalituhan na maaaring nadama nila at ang mga bagay na maaaring inaasam nila sa espirituwal (tingnan sa Jeffrey R. Holland, “Ganap na Kaliwanagan ng Pag-asa,” Liahona, Mayo 2020, 81–84).

Kung mayroon, maaari ninyong panoorin ang video na “Ganap na Kaliwanagan ng Pag-asa” mula sa time code na 0:00 hanggang 7:16.

Espirituwal na pangangalaga mula kay Jesucristo at sa Kanyang ebanghelyo

Bago pag-aralan ang mga talata tungkol sa Apostasiya, maaari mong ipakita ang mga larawan ng isang patay at isang buhay na halaman. Maaari mo ring dalhin ang mga bagay na ito sa klase kung mayroon ka nito. Sabihin sa mga estudyante na talakayin kung ano ang dahilan kung bakit napakalaki ng pagkakaiba ng dalawang halamang ito at kung anong mga espirituwal na analohiya ang magagawa natin mula sa mga halamang ito. Talakayin din kung paano nakatutulong sa atin ang pananatiling nakaugnay kay Jesucristo para patuloy na mapangalagaan at maging malakas sa espirituwal. Maaaring basahin ng mga estudyante ang Juan 15:4–6 at maaari nilang pag-isipan kung paano nauugnay ang mga turo ng Tagapagligtas sa mga naunang Banal noong panahon ng Malawakang Apostasiya.