“3-р хичээл—Сургаал ба Гэрээний удиртгал: Есүс Христийн дуу хоолойг сонсох,” Сургаал ба Гэрээний семинарын багшийн гарын авлага (2025)
“Сургаал ба Гэрээний удиртгал,” Сургаал ба Гэрээний семинарын багшийн гарын авлага
3-р хичээл: Сэргээлтийн тунхаг
Сургаал ба Гэрээний удиртгал
Есүс Христийн дуу хоолойг сонсох
Сургаал ба Гэрээнээс бид Их Эзэний үгийг уншиж болохоос гадна энэ нь бидэнд Түүний дуу хоолой өнөөгийн хүмүүст, тэр ч байтугай бидэнд хувь хүнд маань хандан ярьж байгааг сонсоход тусалдаг. Энэхүү хичээл нь Сургаал ба Гэрээг судалж эхлэхдээ Аврагчийг илүү сайн таньж мэдэхэд өөрсдийгөө бэлтгэхэд суралцагчдад тусална.
Боломжит суралцах үйл ажиллагаа
Бусдыг таньж мэдэх
Суралцагчдыг ангийнхаа хүүхдийг илүү сайн таньж мэдэхэд туслах зүйлийг асуухад урьснаар хичээлээ эхлүүлэхийг бод. Жишээлбэл: Тэд “Та чөлөөт цагаараа юу хийх дуртай вэ?” асууж болох юм.
Суралцагчдад ангийнхаа хүүхэдтэй ярилцах цаг гаргаж өгснийхөө дараа, дараах зүйлсийн талаар ярилцаж болно.
Та хамгийн сайн мэддэг гэж боддог хүнийхээ талаар бод.
-
Уг хүнийг илүү сайн таньж мэдэхэд юу танд тусалсан бэ?
Суралцагчдыг Есүс Христийг хэр сайн мэддэгээ мөн Түүнийг илүү сайн таньж мэдэхийн тулд одоо юу хийж байгаагаа тунгаан бодоход урь.
Сургаал ба Гэрээнд Есүс Христ Өөрийг нь илүү сайн таньж мэдэх зарим арга замыг бидэнд тайлбарласан ба ийнхүү үйлдсэнээр бид адислал хүлээн авах болно хэмээн амласан.
Сургаал ба Гэрээ 19:23–24-ийг уншаад, Аврагчийн урилга болон амлалтыг хайж ол.
-
Эдгээр шүлэг дэх Аврагчийн урилга бидэнд Түүнийг илүү сайн таньж мэдэхэд хэрхэн тусална гэж та бодож байна вэ?
-
Эдгээр шүлэг дэх Аврагчийн үгсээс бид Түүний талаар юу сурч мэдэх боломжтой вэ?
23-р шүлэгт бид Аврагчийн тухай сурч мэдэж, үгийг нь сонссоноор Түүнээс ирдэг амар амгаланг мэдрэх боломжтой гэх амлалтыг нь онцол. Энэ амлалтын талаар илүү гүнзгий тунгаан бодоход суралцагчдыг урих нь тустай байж болох юм. Та тэднээс Есүс Христээс ирдэг амар амгаланг байнга мэдэрдэг эсэхээ мөн амар амгаланг илүү их мэдрэх нь амьдралд нь хэрхэн нөлөөлөх талаар дүгнэхийг хүсэж болно.
Сургаал ба Гэрээг судлах
Энэ жил та Сургаал ба Гэрээг гэртээ, сүм дээр мөн семинар дээр судлах боломжтой байх болно. Судлах явцдаа та Есүс Христийн талаар суралцаж, Түүний үгсийг сонсох олон боломжийг олж авна. Энэ нь танд Түүнийг бүрэн дүүрэн таньж мэдэн, Түүний амладаг амар амгаланг мэдрэхэд тусална.
-
Та Сургаал ба Гэрээний талаар юу мэддэг вэ?
Зарим суралцагчийн хувьд нэн учир утгатай Сургаал ба Гэрээний судрын хэсэг байж болно. Та хэдэн суралцагчаас, хэрэв хүсвэл тэдгээр судрын хэсгээсээ хуваалцахыг мөн энэ нь яагаад тэдний хувьд чухал болохыг тайлбарлахыг хүсэж болно. Та бас дуртай судрын хэдэн хэсгээ хуваалцаж болно.
Дараа нь суралцагчдыг судрынхаа Сургаал ба Гэрээний удиртгал хэсгийг нээхийг хүс.
Сургаал ба Гэрээний удиртгал хэсгийн 1–3-р догол мөрийг мөн 8-р догол мөрийг унш. Уншиж байхдаа та Сургаал ба Гэрээг судлах нь хэрхэн танд Есүс Христийг илүү бүрэн дүүрэн таньж мэдэхэд тусалдаг талаар өгүүлсэн үг хэллэгийг хайж ол.
-
Сургаал ба Гэрээ нь бусад судраас юугаараа өөр талаар та юу сурч мэдсэн бэ?
-
Сургаал ба Гэрээг “агуу үнэ цэнтэй” болгодог зүйл юу вэ?
Сургаал ба Гэрээн дэх Аврагчийн дуу хоолой
Дээрх догол мөрүүдээс бид Сургаал ба Гэрээг судалснаар энэ цаг үед бидэнд хандан ярих Аврагчийн дуу хоолойг сонсож, Түүний талаар илүү ихийг мэдэж авч чадна гэх үнэнийг мэдэж авч болно.
Сургаал ба Гэрээ 18:33–36-г уншаад, энэ үнэнийг заасан Аврагчийн сургаалыг хайж ол.
Сургаал ба Гэрээн дэх Есүс Христийн ярьж буй хэдэн жишээг олох цагийг суралцагчдад гаргаж өгөх нь тустай байж болох юм. Та тэднийг Сургаал ба Гэрээний аль нэгэн хэсгийг нээж, Их Эзэний ярьж буй жишээг олоход урьж болно.
-
Сургаал ба Гэрээн дэх Аврагчийн үгсийг унших нь амьдралыг тань хэрхэн адисална гэж та бодож байна вэ?
Шаардлагатай бол, Аврагчийн үгсийг судлах тусам бидэнд Түүний талаар сурах зүйл их гардгийг онцол. Бид Түүний зан чанар, хүсэл, чухалчлан үздэг зүйлийнх нь талаар илүү сайн ойлгож чадна. Мөн Есүс Христ, Тэнгэрлэг Эцэг хоёр төгс байдал, зан чанарын хувьд адилхан төдийгүй нэгдмэл зорилготой гэдгийг онцлох нь тустай байж болох юм. Түүнчлэн суралцагчид Есүс Христийг таньж мэдэх гэж ирснээр Тэнгэрлэг Эцэгийн талаар илүү ихийг олж мэддэг (Иохан 14:9-ийг үзнэ үү).
Тэнгэрлэг эцэг, Есүс Христ хоёрыг таньж мэдэх нь тэднийг хайрлах бидний хайрыг өсгөж, гагцхүү Тэдний өгч чадах амар амгаланг мэдрэхэд бидэнд тусалдаг.
Та Сургаал ба Гэрээг судлах явцдаа Тэнгэрлэг Эцэг, Есүс Христ хоёрын талаар сурч мэдэж байгаа зүйл дээрээ төвлөр. Тэдний талаар олж авсан ойлголтоо бичихэд зориулан судлах тэмдэглэлийнхээ нэг хэсгийг гаргаж эсвэл Gospel Library аппликэйшн дээрээ тэмдэглэл үүсгэх нь тустай байж болох юм. Та сурч мэдсэн ойлголтоо жилийн туршид жагсаалтдаа нэмж болно. Тэнгэрлэг Эцэг, Есүс Христ хоёрын талаар сурсан зүйл тань тэдэнд итгэх итгэл, тэднийг хайрлах таны хайранд хэрхэн нөлөөлөх тухай бодож үз.
Дараах хичээлийн үйл ажиллагаа нь Сургаал ба Гэрээн дэх Аврагчийн үгсээс Тэнгэрлэг Эцэг, Есүс Христ хоёрын талаар юу сурч болох жишээг олж харахад суралцагчдад тусална. Суралцагчдыг бүлгүүдэд хуваагаад, бүлэг бүрд судрын нэг эсвэл хэд хэдэн хэсгийг судлуулахаар оноож өгөх нь тустай байж болно.
Сургаал ба Гэрээн дээрх дараах хэдэн судраас Аврагчийн үгсийг судал. Судалж буй шүлгээсээ Тэнгэрлэг Эцэг, Есүс Христ хоёрын тухай юу сурч мэдэж болоход анхаар.
Дараах асуултуудын эхнийхэд өгсөн суралцагчдын хариултыг самбарт жагсаан бич. Эсвэл та өөр өөр суралцагчийг самбарт гарч ирэн, ойлгосон зүйлээ бичихэд урь.
-
Судрын эдгээр хэсэг нь Тэнгэрлэг Эцэг, Есүс Христ хоёрын талаар юуг ойлгоход танд тусалсан бэ? Тэдний талаар эдгээрийг мэдэх нь яагаад чухал гэж та бодож байна вэ?
-
Эдгээр шүлгээс Тэнгэрлэг Эцэг, Есүс Христ хоёрын талаар сурч мэдсэн зүйл тань амар амгаланг мэдрэхэд тань хэрхэн туслах вэ?
Судар судлахыг зорилгоо болгох
Дараах материалыг хуваалцаад, энэ жил Сургаал ба Гэрээг судлахтай холбоотой зорилго тавих цагийг суралцагчдад гаргаж өг.
Суралцагчдыг хэрхэн сайн мэдээг өдөр бүр судлахад урамшуулах талаар сургалт хэрэгтэй бол Багшийн хөгжүүлбэл зохих ур чадвар: Хичээнгүйлэн суралцахад урих сургалтын “Өдөр бүр судраас судлах зорилго тавихад суралцагчдад тусал” гэсэн хэсгийг үзнэ үү.
Семинарын нэг зорилго бол өдөр бүр судар судлах замаар Тэнгэрлэг Эцэг, Есүс Христ хоёрт илүү ойртоход танд туслах явдал юм. Сургаал ба Гэрээг судлахтай холбоотой зорилго тавихын тулд Ариун Сүнсээр дамжуулан сүнслэг өдөөлт эрэлхийл. Зорилго тавихдаа дараах асуултуудын талаар бод.
-
Хэзээ, хаана би өдөр бүр судар судалж болох вэ?
-
Өдөрт хэдэн цаг судлах вэ?
-
Судар судлахдаа Ариун Сүнсийг илүү бүрэн урихын тулд би юу хийж чадах вэ?
Зорилгоо судлах тэмдэглэлдээ бичиж тэмдэглэ.
Суралцагчдыг бичиж дууссаны дараа өмнөх асуултуудын заримд эсвэл бүгдэд өгсөн хариултаа хуваалцахыг тэднээс хүсэж болох юм.
Суралцагчдыг зорилгодоо хүрэхийн төлөө ажиллахад урамшуул. Ийн хийх нь тэдэнд Аврагчийн дуу хоолойг сонсож, Түүнээс ирэх удирдамж зааврыг хүлээн авахад тусална гэдгийг амла. Жилийн туршид зорилгыг нь сануулж, гаргасан ахицаа дүгнэх боломжийг суралцагчдад олго.