Lesona 5: Fotopampianarana sy Fanekempihavanana 1

Fotopampianarana sy Fanekempihavanana 1:30–33

“Ilay hany fiangonana marina sy velona”

Tao amin’ny sasin-teniny amin’ny Fotopampianarana sy Fanekempihavanana ny Tompo dia nanambara ny lanjan’ny Fiangonan’i Jesoa Kristy vao naverina tamin’ny laoniny. Nambarany ho “ilay hany fiangonana marina sy velona eto ambonin’ny tany manontolo” (Fotopampianarana sy Fanekempihavanana 1:30) ny Fiangonana. Ity lesona ity dia natao hanampiana ny mpianatra hahatsapa ny lanjan’ Ny Fiangonan’i Jesoa Kristy ho an’ny Olomasin’ny Andro Farany amin’ny maha hany fiangonana marina azy.

Ireo sahanasa fianarana azo atao

Ny Fiangonan’ny Tompo

Azonao atao ny mizara ity fanontaniana manaraka ity sy ny teny nambara miaraka aminy ary hanasa ny mpianatra maromaro hizara ny valin-tenin’izy ireo.

Inona no antony mety haneken’ny olona sasany na tsia ireto teny nambara manaraka ireto?

1. Tsy mila fiangonana aho raha ny hevitro.

2. Samy marina daholo ny fiangonana rehetra.

3. Ny Fiangonan’i Jesoa Kristy ho an’ny Olomasin’ny Andro Farany no hany fiangonana marina.

Azonao atao ny mangataka ny mpianatra hieritreritra mangina hoe inona no hevitr’izy ireo manokana momba ireo teny nambara ireo.

eMety ho sarotra ny hahafantatra ny marina noho ny fisian’ny karazana fivavahana sy hevitra be dia be. Nanome antsika fitarihana tamin’ny alalan’ny soratra masina mba hanampy antsika hanana fitokiana izay marina sy hahalala ny zavatra tiany ho antsika ny Tompo.

Mba ho sasin-teny ho an’ny Fotopampianarana sy Fanekempihavanana, dia nanambara fampitandremana iray “miantefa amin’ny olon-drehetra” (Fotopampianarana sy Fanekempihavanana 1:4)ny Tompo. Nanao fanambarana mazava momba Ny Fiangonan’i Jesoa Kristy ho an’ny Olomasin’ny Andro Farany Izy tao anatin’ny hafany.

Vakio ny Fotopampianarana sy Fanekempihavanana 1:30, ary tadiavo ny fomba hamariparitan’ny Tompo Ny Fiangonan’i Jesoa Kristy ho an’ny Olomasin’ny Andro Farany.

NyFotopampianarana sy Fanekempihavanana 1:30 dia andalan-tsoratra masina fifehezana fotopampianarana. Hevero ny hanasa ny mpianatra hanisy marika ireo andalan-tsoratra masina fifehezana fotopampianarana amin’ny fomba miavaka mba hahitan’izy ireo azy ireny mora foana.

• Inona no hitanao?

“Ilay hany fiangonana marina sy velona eto ambonin’ny tany manontolo”

Asao ny mpianatra hanisy marika ao amin’ny soratra masin’izy ireo ilay andian-teny ao amin’ilay lohateny eo ambony. Makà fotoana kely hanampiana ny mpianatra hahatakatra ny dikan’ny hoe sady marina no velona ny Fiangonana. Fomba iray ahafahanao manao izany ity manaraka ity:

Manaova tsanganana roa eny amin’ny solaitrabe. Asao ny mpianatra handalina iay taratasy zaraina sy hanisy marika ireo andian-teny izay manampy azy ireo hahatakatra ny fomba maha sady “marina” no “velona” ny Fiangonana.

Ilay Fiangonana velona sy marina

Nampianatra izao ny Loholona David A. Bednar ao amin’ny Kôlejin’ny Apôstôly Roambinifolo:

Ny Tompo dia nanambara fa Ny Fiangonan’i Jesoa Kristy ho an’ny Olomasin’ny Andro Farany no “ilay hany fiangonana marina sy velona eto ambonin’ny tany manontolo” (F&F 1:30). Ity Fiangonana naverina tamin’ny laoniny ity dia marina satria Fiangonan’ny Mpamonjy; Izy no “lalana sy fahamarinana ary fiainana” (Jaona 14:6). Ary dia Fiangonana velona izy noho ny asa ataon’ny Fanahy Masina sy ny fanomezana ny Fanahy Masina. (David A. Bednar, “Raiso ny Fanahy Masina,” Liahona, nôv. 2010, 97)

Nampianatra izao ny Filoha Dallin H. Oaks ao amin’ny Fiadidiana Voalohany:

Toetoetra telo—(1) fahafenoan’ny fotopampianarana, (2) fahefan’ny fisoronana, ary (3) fijoroana ho vavolombelon’i Jesoa Kristy—no manazava ny antony nanambaran’ Andriamanitra … fa io no hany Fiangonana marina sy velona eto ambonin’ny tany. …

Ny filazantsaran’i Jesoa Kristy naverina amin’ny laoniny dia mahafaoka ny zavatra rehetra, misy manerana izao tontolo izao, mamindra fo ary marina. …

Noho izy ireo manana ny fahefan’ny fisoronana, dia nomena fahefana ireo mpitarika sy mpikambana nahazo lalana ara-dalàna ao amin’ Ny Fiangonan’i Jesoa Kristy ho an’ny Olomasin’ny Andro Farany mba hanatanteraka ireo ôrdônansin’ny fisoronana takina, toy ny batisa, ny fanomezana ny Fanahy Masina, ary ny fitantanana ny fanasan’ny Tompo.

Ireo fanalahidin’ny fisoronana, hazonin’ny mpaminany malalantsika … sy ny mpaminany hafa rehetra ary ny Filohan’ny Fiangonana, dia manome azy zo hahazo fanambarana ho an’ny Fiangonana manontolo. “Marina” ny Fiangonana satria manana mpaminany isika izay manohy manome antsika ny tenin’ny Tompo izay ilaina amin’izao androntsika izao.

Ny antony fahatelo mahatonga antsika ho hany Fiangonana marina dia ny fananantsika ny fahamarinana nambara momba ny toetran’ Andriamanitra sy ny fifandraisantsika Aminy, ary noho izany isika dia manana fijoroana ho vavolombelona miavaka momba an’i Jesoa Kristy. (Dallin H. Oaks, “La seule Église vraie et vivante,” Liahona, Août 2011, 3–5)

Asao hizara ny zavatra nasiany marika ny mpianatra. Azon’izy ireo atao ny manoratra ny zavatra hitan’izy ireo ao amin’ireo tsanganana roa eny amin’ny solaitrabe. Hevero ny hanontany ny mpianatra hoe ahoana no itahian’ny Tompo antsika amin’ny alalan’ny tsirairay amin’ireo lafin-javatra amin’ny Fiangonany izay nasian’izy ireo marika. Mba hanampiana ny mpianatra hahatakatra ny zavatra noresahin’ny Filoha Oaks momba ny fijoroana ho vavolombelona miavaka ananantsika momba an’i Kristy, dia hevero ny hangataka azy ireo hikaon-doha momba ireo fahamarinana momba ny Ray any An-danitra sy i Jesoa Kristy nianaran’izy ireo tamin’ny alalan’ny Mpaminany Joseph Smith, ny Bokin’i Môrmôna, na ny mpaminany maoderina. Afaka mampiditra ny heviny ao amin’ny tsanganana “Marina” izy ireo.

Ampio, raha ilaina, ny mpianatra hahatakatra fa raha nijoro ho vavolombelona ny Tompo ka nanambara fa Ny Fiangonan’i Jesoa Kristy ho an’ny Olomasin’ny Andro Farany no “hany Fiangonana marina sy velona” dia tsy midika izany fa tsy manana fahamarinana mihitsy ny fiangonana hafa.

Ireo fitahiana avy amin’ny Fiangonan’i Jesoa Kristy

Rehefa avy nilaza ny Mpamonjy fa ny Fiangonana no “ilay hany fiangonana marina sy velona,” dia nampidiriny tao anatin’izany ny sasany amin’ireo antony namerenany ny Fiangonany tamin’ny laoniny. Vakio ny Fotopampianarana sy Fanekempihavanana 1:31–33, hitadiavana ny zavatra nampianariny.

Afaka mitodika any amina namana mpiara-miasa iray ny mpianatra dia mamintina ny zavatra nianarany avy tamin’ireo andininy ireo. Afaka mifanakalo hevitra momba ity fanontaniana manaraka ity ihany koa izy ireo.

• Ahoana no anampian’ny Fiangonana marina sy velon’i Kristy anao hitodika any Aminy mba hahazo famelan-keloka?

Omeo fahafahana ny mpianatra hilaza ny zavatra nianarany nandritra ity lesona ity. Fomba iray hanaovana izany ny fanasana ny mpianatra hanoratra valiny iray amin’ity rafi-tantara manaraka ity ao amin’ny diary fandalinan’izy ireo. Hevero ny hanasa mpianatra maromaro hizara ny zavatra nosoratan’izy ireo rehefa vitan’izy ireo izany.

Alaovy sary an-tsaina hoe manontany anao ny zavatra mampiavaka ny fiangonanao amin’ny hafa ny olona iray. Ahoana no ahafahanao mamaly io olona io amin’ny fomba izay mety hanampy azy hanana faniriana hahalala misimisy kokoa momba ny Fiangonana? Azonao ampidirina ao amin’ny valin-teninao ity manaraka ity:

1. Ny zavatra nianaranao androany avy amin’ny fijoroana ho vavolombelona nataon’ny Tompo momba ny Fiangonany sy ny zavatra tsapanao momba izany fijoroana ho vavolombelona izany.

2. Ireo fomba izay nahatsapanao na nahitanao fa marina na velona ny Fiangonana

3. Ireo fitahiana azonao amin’ny maha mpikambana anao ao amin’ny Fiangonan’i Kristy

Mety ho azonao faranana amin’ny alalan’ny fizarana ny fijoroana ho vavolombelona anananao momba ireo fitahian’ny Fiangonana marina sy velon’i Jesoa Kristy izany sy ny fomba nanampian’ny fidiranao ho mpikambana tao amin’izany hanatona akaiky kokoa ny Mpamonjy.

Ataovy tsianjery

Mety ho tianao ny hanampy ny mpianatra hitadidy ny toko sy andininy sy ny andian-teny manan-danja mandritra ity lesona ity ary hamerina hijery izany any amin’ny lesona manaraka. Ny andian-teny manan-danja dia ny hoe “Ilay hany Fiangonana velona sy marina.” Ao amin’ny fitaovana tovana etsy ambany ireo hevitra ho an’ny sahanasa fanaovana tsianjery; “Sahanasa famerenana ny fifehezana fotopampianarana.”

Loharanom-pitaovana fanampiny

Ny Fiangonan’i Jesoa Kristy ho an’ny Olomasin’ny Andro Farany ve no hany fiangonana manana ny fahamarinana?

Nampianatra toy izao ny Filoha Dallin H. Oaks ao amin’ny Fiadidiana Voalohany:

Noho io fanambaran’ny Tompo io, ny Fiangonany—ny Fiangonantsika—dia antsointsika amin’ny hoe ilay “hany Fiangonana marina.” Indraindray isika dia manao izany amin’ny fomba izay mahatohina tokoa ny olona izay mivavaka any amin’ny fiangonana hafa na mino haifotokevitra hafa. Andriamanitra anefa dia tsy nampianatra antsika zavatra izay mety hahatonga antsika hahatsapa ho ambony kokoa noho ny olona hafa. Azo antoka fa misy zavatra marina ao amin’ny fiangonana sy ny haifotokevitra rehetra, ary ny sasany dia manana betsaka noho ny hafa. Azo antoka fa tia ny zanany rehetra Andriamanitra. Ary azo antoka fa ny tanjon’ny filazantsarany dia ho an’ny zanany rehetra, ary mifanaraka amin’ny fandaharam-potoany daholo. (Dallin H. Oaks, “La seule Église vraie et vivante,” Liahona, Août 2011, 3)

Nahoana no mila ny Fiangonana isika?

Nampianatra toy izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Nahoana no ilaina ny Fiangonana

Namariparitra ireo antony maromaro ilana Ny Fiangonan’i Jesoa Kristy ho an’ny Olomasin’ny Andro Farany eo amin’ny fanatanterahana ny tanjon’ny Mpamonjy i D. Todd Christofferson.

Zava-dehibe ny mahatakatra fa ny tanjona faran’ Andriamanitra dia ny fandrosoantsika. Ny faniriany dia ny hanohizantsika “ny fahasoavana miampy fahasoavana ambara-pandraisan[tsika] ny fahafenoan[’]” [Fotopampianarana sy Fanekempihavanana 93:13] izay rehetra azony omena. Izany dia mitaky mihoatra ny hoe tsara fanahy sy mahatsapa tena ho masina ara-panahy fotsiny. Mitaky finoana an’i Jesoa Kristy, fibebahana, batisan’ny rano sy ny Fanahy ary faharetana am-pinoana hatramin’ny farany izany. Tsy misy olona afaka hahatanteraka izany ao anatin’ny fijanonana irery ka ny antony lehibe nananganan’ny Tompo Fiangonana dia ny hamoronana fikambanan’ Olomasina izay hifanohana ao amin’ilay “lalana ety sy tery izay mitondra mankany amin’ny fiainana mandrakizay” [2 Nefia 31:18]. (D. Todd Christofferson, “Nahoana no ilaina ny Fiangonana,” Liahona, nôv. 2015, 108)

Sahanasa fianarana fanampiny

Fiangonana marina tarihin’olona tsy tonga lafatra

Mety hanampy ity sahanasa ity, raha toa ny mpianatrao ka manana fanontaniana momba ny hoe ahoana no hetezan’ny hoe misy mpitarika na fitantanam-piangonana tsy lavorary ao amin’ny Fiangonana marin’i Jesoa Kristy. Nizara fanoharana momba ny fomba iasan’ Andriamanitra amin’ny alalan’ny olona tsy lavorary mba hahatonga famonjena ny Loholona Dale G. Renlund ao amin’ny Kôlejin’ny Apôstôly Roambinifolo sy i Ruth vadiny. Hevero ny handefa ity horonan-tsary manaraka ity manomboka eo amin’ny kaodim-potoana 1:03 hatramin’ny 5:48. Azonao atao ny mampiato kely ilay horonan-tsary eo amin’ny mari-potoana 4:16 mba hamelana ny mpianatra hifampiresaka momba ny hevitra hitan’izy ireo ao amin’ilay fanoharana. Azonao alefa ny ambin’ilay horonan-tsary aorian’ny fifanakalozan-kevitra ataonareo.

“Aza miroanahana, fa minoa kosa”

Loholona Dale G. Renlund ao amin’ny Kôlejin’ny Apôstôly Roambinifolo sy Rahavavy Ruth L. Renlund vadiny: mandaha-teny mandritra ny fampaherezam-panahy maneran-tany ho an’ny tanora tokan-tena sy ny mpivady vao herotrerony ny Alahady 13 janoary 2019.

Ny fanekem-pinoana fahasivy

Hevero ny hanasa ny mpianatra hamaky ny fanekem-pinoana fahasivy mba hamaritana misimisy kokoa ny dikan’ny hoe “velona” ny Fiangonan’i Jesoa Kristy, hitadiavana ny fomba anehoan’izany ny maha tena “velona” marina ny Fiangonana. Azon’ny mpianatra atao ihany koa ny mamorona fampifandraisana an’io fanekem-pinoana io amin’ny Fotopampianarana sy Fanekempihavanana 1:30. Azonao atao ny manontany ny mpianatra ny fomba nahitany ny fanohizan’ny Ray any An-danitra nanambara fahamarinana tamin’ny alalan’ireo mpaminany velona.

Fijoroana ho vavolombeona momba ny Fiangonana

Hevero ny hanasa ny mpianatra hijoro ho vavolombelona amin’ny fomba ôfisialy momba ny Fiangonana. Azonao zaraina aloha ity fijoroana ho vavolombelona avy amin’ny Filoha Henry B. Eyring ao amin’ny Fiadidiana Voalohany ity:

“Mijoro ho vavolombelona aminareo amin’ny fomba manetriketrika aho fa ity no Fiangonan’i Jesoa Kristy marina sy velona. Hamaly ny vavaka amin-kafanam-po ataonareo ny Ray any An-danitra mba hahafantaranareo manokana izany. … Ankoatra izany aza dia afaka mahafantatra ianareo fa ao anatin’izany no anatanterahana ireo ôrdônansin’ny Fiangonana izay afaka manadio ny fanahy sy mamehy eto an-tany sy any an-danitra, toy ny tamin’ny andron’i Petera, Jakoba ary Jaona. Ireo fanalahidy sy ôrdônansy ireo dia naverina amin’ny laoniny ao anatin’ny fahafenoany amin’izao fotoana, tamin’ny alalan’ny Mpaminany Joseph Smith ary nampitaina tamin’ireo nandimby azy. I Jesoa no Kristy. Velona Izy. Fantatro izany” (Henry B. Eyring, “Ilay Fiangonana marina sy velona,” Liahona, mey 2008, 24).

The True and Living Church

The Church of Jesus Christ of Latter-day Saints is true, and it lives on.

Azonao anontaniana avy eo raha misy mpianatra te hizara ny fijoroana ho vavolombelona ananan’izy ireo momba ny Fiangonana marina sy velona. Hevero ny hizara ihany koa ny fijoroana ho vavolombelona anananao manokana.