Seminera
Lesona 4—Fotopampianarana sy Fanekempihavanana 1: “Mandeha hatrany am-paran’ny tany ny feon’ny Tompo”

“Lesona 4—Fotopampianarana sy Fanekempiahavanana 1: -Mandeha hatrany am-paran’ny tany ny feon’ny Tompo,-” Fotopampianarana sy Fanekempihavanana: Boky torolalana ho an’ny mpampianatra seminera (2025)

“Fotopampianarana sy Fanekempihavanana 1,” Fotopampianarana sy Fanekempihavanana: Boky torolalana ho an’ny mpampianatra seminera

Lesona 4: Fotopampianarana sy Fanekempihavanana 1

Fotopampianarana sy Fanekempihavanana 1

“Mandeha hatrany am-paran’ny tany ny feon’ny Tompo”

I Kristy mipetraka eo amin’ny tehezan-tendrombohitra iray

Talohan’ny nanontana ny Bokin’ireo Didy, izay lasa ampahany tamin’ny Fotopampianarana sy Fanekempihavanana tatỳ aoriana, dia nangataka tamin’ny Tompo ny Mpaminany Joseph Smith mba hanaovany sasin-teny ho an’ilay boky. Ho setrin’izany dia nambaran’ny Tompo ny fizarana 1 amin’ny Fotopampianarana sy Fanekempihavanana amin’izao fotoana izao ho teny fanolorana ireo fanambarana ho an’izao tontolo izao. Ity lesona ity dia afaka manampy ny mpianatra hahatakatra ny antony anomezan’ny Tompo fampitandremana ho an’izao tontolo izao.

Ireo sahanasa fianarana azo atao

“Ny feo fampitandremana”

Hevero ny hampiasa ity rafi-tantara manaraka ity na zavatra iray izay mety kokoa amin’ny zavatra ilain’ny mpianatrao mba hanampy amin’ny fanomanana azy ireo hisaintsaina hoe nahoana no mety hampitandrina olona iray ny olona iray hafa.

Alaovy sary an-tsaina hoe misy namana iray mandray fanapahan-kevitra hiteraka voka-dratsy.

Asao ny mpianatra hizara ohatra maneho zavatra tena misy amin’ny hoe mety ho inona izany fanapahan-kevitra izany. Mety ho ohatra amin’izany ny hoe madainga amin’ny ray aman-dreny, mandika ny Tenin’ny Fahendrena, manao hosoka any am-pianarana, na miala amin’ny Fiangonana.

  • Inona no antony mahatonga anao te hampitandrina ny namanao momba io fanapahan-kevitra io?

Manome “feo fampitandremana” ihany koa ny Mpamonjy (Fotopampianarana sy Fanekempihavanana 1:4). Saintsaino ireto fanontaniana manaraka ireto:

  • Nahoana no mety hampitandrina antsika ny Mpamonjy? Nahoana no mety hampitandrina anao manokana Izy? Amin’ny fomba ahoana?

  • Inona no ampianarin’izany anao momba Azy?

Mitadiava valiny amin’ireo fanontaniana ireo ianao rehefa mandalina ity lesona ity.

Ho an’ny olona rehetra ny feo fampitandreman’ny Tompo

Afaka manampy ny mpianatra hahatakatra ny tantaran’ny hoe ahoana no nahazoana ny sasin-tenin’ny Fotopampianarana sy Fanekempihavanana ireto fampahalalana manaraka ireto.

Nirakitra fanambarana mihoatra ny 60 avy amin’ny Tompo ny Mpaminany Joseph Smith hatramin’ny Nôvambra 1831. Na dia izany aza, dia vitsy ireo mpikamban’ny Fiangonana nanana tahadikan’ireo fanambarana. Teo ambany fitarihan’ny Mpaminany, dia voatambatra tamina bokin-tsoratra masina vaovao nantsoina hoe Bokin’ireo Didy ireo fanambarana ireo, ary lasa ampahany tamin’ny Fotopampianarana sy Fanekempihavanana izany tatỳ aoriana. Nangataka am-bavaka tamin’ny Tompo i Joseph mba hahazo teny fanolorana amin’ilay boky, rehefa teo an-dalam-panontana ilay boky. Ho valin’izany dia noraisiny tamin’ny alalan’ny fanambarana ny fizarana 1, izay nantsoin’ny Tompo hoe “sasin-teniko” (Fotopampianarana sy Fanekempihavanana 1:6) tamin’io bokin-tsoratra masina vaovao io.

Hevero ny hanoratra ireto fanontaniana sy toko sy andininy manaraka ireto eny amin’ny solaitrabe. Afaka mitady valiny samirery na anatina vondrona kely ny mpianatra. Raha miasa anaty vondrona kely ny mpianatra, dia azon’izy ireo atao ny mamintina ny zavatra hitan’izy ireo ao amin’ny vondrona misy azy ireo alohan’ny hizarana izany amin’ny iray kilasy.

Ampiasao hamaliana ireto fanontaniana manaraka ireto ny soratra masinao:

Mety hanampy ny fanoratana ity fanambarana manaraka ity eny amin’ny solaitrabe rehefa mandinika ny valin-tenin’izy ireo ny mpianatra: Miantefa amin’ny olon-drehetra ny feo fampitandreman’ny Mpamonjy.

Porofon’ny fitiavany ny feo fampitandreman’ny Tompo

Ao amin’ny Fotopampianarana sy Fanekempihavanana 1, dia manambara antony maro anomezany fampitandremana ho an’izao tontolo izao ny Mpamonjy. Saintsaino rehefa mandalina ianao hoe amin’ny fomba ahoana no maha porofon’ny fitahian’ny Mpamonjy antsika an’ireny antony ireny.

Vakio ny Fotopampianarana sy Fanekempihavanana 1:11–17, 21–28, ary tadiavo ireo antony anomezan’ny Tompo fampitandremana antsika.

Hevero ny hizara ny kilasy ho roa mitovy. Asao ny antsasany iray hamaky ny andininy 11–17 ary ny antsasany iray hafa hamaky ny andininy 21–28. Afaka manao tabilao misy tsanganana roa ianao raha mila fitarihana bebe kokoa ny mpianatrao. Ampidiro ao amin’ny tsanganana voalohany ireo andininy, ary avelao ny mpianatra hanoratra ny anton’ny fampitandremana ao amin’ny tsanganana faharoa. Mety hahita valim-panontaniana toy ireto manaraka ireto ny mpianatra:

  • 1:12 mba hanomanana antsika amin’ny zavatra ho avy

  • 1:15–17 mba hampitandremana antsika amin’ireo fanamby sy fahotana amin’izao androntsika izao

  • 1:21 mba hampitomboana ny finoantsika

  • 1:22 mba hampiorenana ny fanekempihavanana maharitra mandrakizain’ny Tompo

  • 1:26 mba hampianarana antsika

  • 1:27 mba hamaizana sy hanitsiana antsika rehefa manota isika

  • 1:27 mba hanampiana antsika hibebaka

  • 1:28 mba hanomezana fahalalana antsika

Hevero ny hanasa mpianatra maromaro hizara ny zavatra nianaran’izy ireo tamin’ny alalan’ny fampiasana ity torolalana manaraka ity.

Misafidiana iray amin’ireo antony hitanao fa itenenan’ny Tompo amintsika, ary valio ny iray na ny roa amin’ireto fanontaniana manaraka ireto:

  • Amin’ny fomba ahoana no maha porofon’ny fitiavan’ny Mpamonjy an’io antony io? Ahoana no mety hahafahana mandray io antony io ho fitahiana?

  • Oviana no niainanao io fitahiana io, na inona no antony mety hilanao io fitahiana io eo amin’ny fiainanao?

  • Nahoana no mila io fitahiana io izao tontolo izao manontolo?

Ahoana no fomba ampitandreman’ny Mpamonjy antsika amin’izao androntsika izao?

Afaka manampy ny mpianatra hizara ny zavatra nianaran’izy ireo ity manaraka ity. Azonao atao ny manome taratasy na manasa ny mpianatrao hampiasa ny diary fandalinan’izy ireo. Amporisiho ny mpianatra hahay hitaditady hevitra ny amin’ny fomba izaran’izy ireo ny hafatr’izy ireo. Afaka manome fitaovana fanaovana sary araka izay misy ianao.

Alaovy sary an-tsaina hoe manasa anao ny mpampianatra anao mba haka minitra vitsy hizarana ny antony ampitandreman’ny Tompo antsika ankehitriny, amin’ny lesonao amin’ny alahady. Hevero ny fomba hizaranao io hafatra io amin’ny kilasy misy anao amina fomba manan-danja. Manomàna taratasy zaraina, meme (sary maneho hafatra), petadrindrina, na fomba hafa maneho fahaiza-mamorona hizarana io hafatra io amin’ny kilasy misy anao. Ampidiro ireto manaraka ireto:

  • Andininy iray ao amin’ny Fotopampianarana sy Fanekempihavanana 1 izay mizara farafahakeliny antony iray ampitandreman’ny Tompo ny olon-drehetra

  • Ohatra iray amin’ny fampitandreman’ny Tompo antsika amin’izao androntsika izao (Raha nosafidinao ny hoe ny Tompo dia mampitandrina antsika amin’ireo fanamby sy fahotana eo amin’izao tontolo izao [jereo ny Fotopampianarana sy Fanekempihavanana 1:15–17], dia azonao atao ny mizara andininy iray avy ao amin’ny soratra masina na tenina mpaminany maoderina iray izay mampitandrina antsika amina fakam-panahy maoderina.)

  • Ny eritreritrao sy ny fahatsapanao momba ny Tompo mizara hafatra fampitandremana amintsika ankehitriny. Azonao atao ihany koa ny mampiditra zavatra niainanao anankiray.

Rehefa mizara ny mpianatra, dia mitadiava fomba handokafana sy hisaorana azy ireo amin’ny ezaka amin-kitsimpo nataon’izy ireo, ary koa hanasongadinana ny fitiavan’ny Mpamonjy amin’ny alalan’ireo hafatra alefany amin’izao androntsika izao.

kisary fanofanana Mba hahitana fanofanana fanampiny momba ny fomba anampiana ny mpianatra hahafantatra fa omenao lanja ny fanehoan-keviny, dia jereo ny “Ampitao fa manome lanja ny mpianatra ianao alohan’ny hanehoany hevitra na rehefa manangana ny tanany izy ireo mba haneho hevitra.” Io fanofanana io dia hita ao amin’ny Fahaiza-manao ho fampivoarana ny mpampianatra: Tiavo ireo izay ampianarinao.