Lesona 6: Fotopampianarana sy Fanekempihavanana 1

Fotopampianarana sy Fanekempihavanana 1:37–38

“Na amin’ny alalan’ny feoko, na amin’ny alalan’ny feon’ny mpanompoko, dia iray ihany izany”

Mba hamaranana ny sasin-teniny nentanim-panahy ho an’ny Bokin’ireo Didy (ny Fotopampianarana sy Fanekempihavanana amin’izao fotoana izao), ny Tompo dia nijoro ho vavolombelona fa miresaka amintsika amin’ny alalan’ny mpaminaniny Izy. Afaka manampy ny mpianatra handalina ny tenin’ny Tompo amin’ny alalan’ny soratra masina sy amin’ny alalan’ny tenin’ny mpaminany maoderina ity lesona ity.

Ireo sahanasa fianarana azo atao

Nahoana isika no te hihaino ny Tompo?

Mety hahomby ny manomboka amin’ny fijerena ny “#HearHim: President Nelson Invites Us to Hear the Voice of the Lord,” izay hita ao amin’ny ChurchofJesusChrist.org, manomboka amin’ny kaodim-potoana 0:00 ka hatramin’ny 1:14.

Hevero ny hanasa ny mpianatra hizara ny zavatra tiany na nianarany tao amin’ilay horonan-tsary. Angataho ny mpianatra hanakimpy ny masony sy haka sary an-tsaina ity rafi-tantara manaraka ity, eo am-pisaintsainana ireto fanontaniana manaraka ireto. Asao hizara ny valin-tenin’izy ireo ny mpianatra raha tsy mahakasika ny tena manokana loatra izany.

Alaovy sary an-tsaina hoe manana fahafahana ny ho ao amin’ny efitrano iray misy ny i Jesoa Kristy Mpamonjy ianao.

• Inona no antony mety hahatonga anao ho te hiresaka Aminy na hihaino Azy?

• Inona no lohahevitra tianao horesahin’ny Mpamonjy aminao na hanomezany tari-dalana anao? Nahoana?

• Araka ny eritreritrao, inona no mety ho fiantraikan’izany aminao raha mitranga aminao izany?

Mikatsaha tari-dalana avy amin’ny Fanahy Masina mba hanampy anao hahafantatra ny fomba ahafahanao mandre ny tenin’ny Mpamonjy sy ny fomba ahafahan’izany mitahy anao manokana rehefa mandalina ity lesona ity ianao.

Ny fomba ahenoana ny Mpamonjy eo amin’ny fiainantsika

Tia antsika ny Mpamonjy ary tiany hiezaka hihaino ny feony tsy tapaka isika. Nanasongadina fomba sasantsasany ahafahany miteny amintsika ny Mpamonjy ao amin’ny fiafaran’ilay sasin-teny ho an’ny Fotopampianarana sy Fanekempihavanana.

Vakio ny Fotopampianarana sy Fanekempihavanana 1:37–38, hitadiavana ireo fomba itenenany amintsika. Mety hanampy ny mitadidy fa ny teny hoe “didy” dia entina ilazana ny Bokin’ireo Didy (na ny Fotopampianarana sy Fanekempihavanana).

NyFotopampianarana sy Fanekempihavanana 1:37–38 dia andalan-tsorara masina fifehezana fotopampianarana. Hevero ny hanasa ny mpianatra hanisy marika ireo andalan-tsoratra masina fifehezana fotopampianarana amin’ny fomba miavaka mba hahitan’izy ireo azy ireny mora foana.

• Inona no zavatra nianaranao avy tamin’ireo andininy ireo?

  Azonao atao ny mangataka ny mpianatra hizara ny zava-baovao hitan’izy ireo. Mety hilaza izy ireo fa miteny amintsika amin’ny alalan’ny soratra masina sy ny mpaminaniny ny Tompo. Hevero ny hihazona ambony ny tahadika iray amin’ny Fotopampianarana sy Fanekempihavanana, sarin’ny mpaminany maoderina, ary sarin’ny Mpamonjy raha tsy manao izany izy ireo, ka anontanio ny zavatra itovian’izy ireo araka ny Fotopampianarana sy Fanekempihavanana 1:38. Hevero ny hanasa ny mpianatra hanisy marika ny andian-teny iray izay mampianatra ity fahamarinana manaraka ity: na amin’ny alalan’ny feony na amin’ny alalan’ny feon’ny mpanompony dia iray ihany izany.

  Soraty eny amin’ny solaitrabe, raha toa ka ilaina, ireto andininy manaraka ireto ary asao hamaky iray na roa amin’izany ny mpianatra, hitadiavana ny zavatra ampianarin’izany ka manamafy ilay fahamarinana eo ambony: Deoteronomia 18:18; Fotopampianarana sy Fanekempihavanana 18:33–36; 21:4–6. Azon’ny mpianatra atao ny mirakitra an-tsoratra ireo andininy ireo mba hampifandraisina amin’ny Fotopampianarana sy Fanekempihavanana 1:38.

• Nahoana no mety ho sarotra indraindray izany hoe te handalina ny tenin’ny Tompo izany?

• Ahoana no mety hahafahan’ny fahamarinana izay hitantsika, na ireo andian-teny hafa ao amin’ny Fotopampianarana sy Fanekempihavanana 1:37–38, mandrisika anao handalina ny tenin’ny Tompo?

Ny antony mahatonga antsika ho te handalina ny teniny

Jereo ity horonan-tsary manaraka ity, dia vakio ilay teny nambara manaraka aorian’izay, mba hitadiavana ny antony mety hitiavanao handalina ny tenin’ny Tompo amin’ny alalan’ny soratra masina sy amin’ny alalan’ny tenin’ny mpaminany maoderina:

• “Comment je l’écoute : David A. Bednar #Écoutez-le” (1:15)

Ny Rahavavy Carol F. McConkie, mpanolontsaina teo aloha tao amin’ny Fiadidian’ny Zatovovavy Maneran-tany, dia nampianatra toy izao:

[Ny mpaminanin’ny andro farany] dia miteny amin’ny anaran’i Kristy. Maminany amin’ny anaran’i Kristy izy ireo. Manao ny zava-drehetra amin’ny anaran’i Jesoa Kristy izy ireo. Mandre ny feon’ny Tompo sy mahatsapa ny fitiavan’ny Mpamonjy isika ao amin’ny tenin’izy ireo. (Carol F. McConkie, “Miaina araka ny tenin’ireo mpaminany,” Liahona, nôv. 2014, 77)

• Inona no zavatra tianao na nianaranao avy amin’io teny nambara io?

  Omeo fotoana hisaintsainana ity fanontaniana manaraka ity ny mpianatra, alohan’ny hangatahana mpianatra manolo-tena hizara. Hevero ny hizara ohatra momba ny tenanao manokana izay azon’izy ireo ampifandraisina amin’ny tenany rehefa misaintsaina ny mpianatra. Mety hanampy azy ireo hieritreritra ohatra hafa ny fanaovana izany.

• Oviana ianao (na ny olona iray fantatrao) no nahatsapa fa nahazo hafatra iray avy amin’ny Tompo tamin’ny alalan’ny soratra masina na tamin’ny alalan’ny mpaminany maoderina?

Fampiharana

Natao hanampy ny mpianatra hanatona akaiky kokoa ny Mpamonjy eo am-pandalinana ny tenin’ny mpanompony ity sahanasa manaraka ity. Makà antoka fa ampy tsara ny fotoana omena ny mpianatra hamitana izany sy hizarana ny eritreritr’izy ireo.

1. Makà minitra maromaro hikarohana ny sasany amin’ireto andinin-tsoratra masina sy tenina mpaminany maoderina manaraka ireto. Alaovy sary an-tsaina ny Tompo miteny ireo teny ireo aminao rehefa mandalina ianao. (Fahaiza-mandalina manampy azonao ampiasaina amin’ny fotoana rehetra andalinanao ny soratra masina izany.) Hevero ny hanisy marika izay zavatra manan-danja aminao.

   Fotopampianarana sy Fanekempihavanana 6:34–37; 10:5; 19:23; 27:15–18; 58:26–28; 68:5–6; 78:18–19; 82:10; 98:1–3; 112:10. (Na mifantena andininy hafa ao amin’ny Fotopampianarana sy Fanekempihavanana).

   Raha tsapanao fa izay no hety kokoa amin’ny filan’ny mpianatrao, dia izao no ataovy fa tsy ilay manaraka eo: hevero ny hanambatra teny vao haingana avy amina mpaminany, izay mihatra manokana amin’ny mpianatrao. Makà antoka fa manana ny laharan’ny gazetiboky Liahona farany indrindra tamin’ny fihaonamben’ny Fiangonana maneran-tany maromaro ianao.

2. Halalino ny ampahany na izy manontolo amin’ny lahateny iray tamina fihaonamben’ny Fiangonana maneran-tany vao haingana, izay tsapanao fa hanampy anao manokana.

   Asao ny mpianatra hizara ny zavatra niainan’izy ireo. Mety hilaina ireto fanontaniana manaraka ireto:

3. Inona no nianaranao?

4. Nitondra inona tamin’ny fandalinana nataonao ny fakana sary an-tsaina ny Mpamonjy miteny an’ireny teny ireny aminao?

5. Inona no mety ho fiantraikan’ny fanaovana izany tsy tapaka amin’ny fandalinanao manokana amin’ny fifandraisanao amin’ny Mpamonjy?

Mitadiava fomba hanamafisana fa miteny amintsika amin’ny alalan’ny soratra masina sy ny mpaminany velona ny Tompo rehefa mizara ny mpianatra.

Hamaranana azy, dia soraty ao amin’ny diary fandalinanao ny zavatra tianao hatao mba hanatonana akaiky kokoa ny Mpamonjy amin’ny alalan’ny tenin’ny mpanompony. Mety ho hevitra amin’izany ireto:

• Halalino tsy tapaka ny Fotopampianarana sy Fanekempihavanana, toy ireny hoe miteny aminao ireny ny Tompo.

• Henoy ny tenin’ny mpaminany rehefa miomana ho any am-pianarana ianao amin’ny maraina na miomana hatory amin’ny hariva, na mandritra ny fotoana hafa ilainao kokoa.

Ataovy tsianjery

Azonao atao ny manampy ny mpianatra hitadidy ny toko sy andininy sy ny andian-teny manan-danja ao amin’ny soratra masina ao amin’ny Fotopampianarana sy Fanekempihavanana 1:37–38 ary avereno jerena amin’ny lesona manaraka izany. Ny andian-teny manan-danja ao amin’ny soratra masina dia ny hoe “Na amin’ny alalan’ny feoko, na amin’ny alalan’ny feon’ny mpanompoko, dia iray ihany izany”. Misy hevitra hanaovana sahanasa fitadidiana ao amin’ny tovana eo ambanin’ny “Sahanasa famerenana fifehezana fotopampianarana”.

Loharanom-pitaovana fanampiny

Nahoana aho no tokony hihaino ny mpaminany toy ny hoe miteny ho an’ny Tompo izy ireo?

Toy izao no nampianarin’ny Filoha M. Russell Ballard ao amin’ny Kôlejin’ny Apôstôly Roambinifolo:

Tsy zavatra kely ry rahalahiko sy anabaviko izany hoe manana mpaminanin’ Andriamanitra iray eo anivontsika izany. Lehibe sy mahagaga ireo fitahiana izay tonga eo amin’ny fiainantsika rehefa mihaino ny tenin’ny Tompo omena antsika amin’ny alalany isika. … Tokony hanaiky isika ary hamaly avy hatrany, rehefa maheno ny torohevitry ny Tompo aseho amin’ny alalan’ny tenin’ny Filohan’ny Fiangonana. Naneho ny tantara fa misy fiarovana sy fiadanana, firoboroboana ary fahasambarana avy amin’ny fanatanterahana ny torohevitry ny mpaminany. (M. Russell Ballard, “His Word Ye Shall Receive,” Ensign, May 2001, 65)

Inona no tokony hataoko raha manahirana ahy na tsy azoko ny zavatra lazain’ny mpaminany?

Nampianatra ny Filoha Russell M. Nelson hoe:

Ny Tompo dia nampanantena antsika fa tsy hamela ny mpaminany hampania antsika na oviana na oviana Izy. Nanambara toy izao ny Filoha Harold B. Lee [1899–1973]: “Mety tsy ho tianareo izay lazain’ireo manampahefana ato amin’ny Fiangonana. Mety hifanohitra amin’ny fomba fijerinareo ara-pôlitika izany. Mety hifanohitra amin’ny fomba fijerinareo ara-piarahamonina izany. Mety hisalovana ny fiainanareo eo amin’ny fiarahamonina izany. Kanefa raha mihaino ireny zavatra ireny ianareo, toy ny hoe avy amin’ny vavan’ny Tompo Izy tenany mihitsy izany, miaraka amin’ny faharetana sy ny finoana, ny fampanantenana, dia ny hoe -ny vavahadin’ny helo dia tsy haharesy anareo; eny, ary ny Tompo Andriamanitra dia hampihahaka ny herin’ny haizina eo anoloanareo ary hampihozongozona ny lanitra mba ho soa ho anareo sy ho voninahitry ny anarany- (F&F 21:6)” [Teachings of Presidents of the Church: Harold B. Lee (2000), 84–85].

Mety tsy ho takatrareo foana ny fanambarana rehetra ataon’ny mpaminany velona. Kanefa rehefa fantatrareo fa mpaminany ny mpaminany iray dia afaka manatona ny Tompo amim-panetrentena sy amim-pinoana ianareo, ary mangataka fijoroana ho vavolombelona ho an’ny tenanareo manokana momba izay nambaran’ny mpaminaniny na inona izany na inona. (Russell M. Nelson, “Ho tena zanaky ny Arivo Taona” [fampaherezam-panahy ho an’ny tanora, 10 jan. 2016], broadcasts.ChurchofJesusChrist.org)

Sahanasa fianarana fanampiny

Ny zavatra niainan’ny zatovovavy iray

Hevero ny hizara ity zavatra niainan’ny zatovovavy iray tany am-piandohan’ny Fiangonana manaraka ity, izay nandray ny soratra masina ho tenin’ny Tompo rehefa avy mizara antony mahatonga azy ireo ho te handalina ny tenin’ny Tompo ny mpianatra:

12 taona i Mary Elizabeth Rollins tamin’ny fotoana nandreseny lahatra ny mpifanolobodirindrina taminy hampindrana azy ny Bokin’i Môrmôna, ilay hany tahadika tao amin’izany faritra izany. Nohalalininy tamin’ny alina be izy io ary tatỳ aoriana dia vitany ilay boky manontolo. Rehefa nitsidika ny mpaminany Joseph Smith ka nahare ny fandalinana nataony, dia niteny tamin’ilay zatovovavy izy mba hihazona an’ilay boky ary nampanantena fa hitondra tahadika iray hafa ho an’ny mpifanolobodirindrina aminy.

Herintaona na roa taona tatỳ aoriana, dia nahita ny sasany tamin’ireo pejy vao vita pirintin’ireo fanambarana avy amin’ny Tompo izay hampidirina ao amin’ny Bokin’ireo Didy (ny Fotopampianarana sy Fanekempihavanana amin’izao fotoana izao) i Mary, ary nihaino ny mpitarika tao amin’ny Fiangonana namaky sy nifanakalo hevitra momba azy ireo. Nanana fahatsapana mahery vaika avy amin’ny Fanahy Masina sy fanajana lalina ireo fanambarana izy. (Jereo ny Olomasina, 1:178.)

Rehefa 15 taona i Mary, dia nisy andian’olona tezitra namotika ny milina fanontan’ny Fiangonana talohan’ny nivoahan’ny boky, ary naparitak’izy ireo ny pejin’ireo fanambarana ireo. Nandrasan’i Mary sy ny zandriny vavy hitodika ireo andian’olona ireo, dia nanao vy very ny ainy izy ireo namonjy ireo pejy. Rehefa nahita azy ireo ny sasany tamin’ireo andian’olona ireo ka nanenjika azy ireo, dia nisisika niditra teo amin’ny lavaka tamin’ny fefy iray izy ireo ary niafina tao amin’ny taninkatsaka raha mbola teo am-pikarohana azy ireo ilay andian’olona saingy tsy nahomby. Nomena boky mirakitra ireo fanambarana ireo i Mary tamin’ny farany, ary “tena sarobidy” taminy izany. (Jereo ny “Autobiography of Mary E. Lightner,” Utah Genealogical and Historical Magazine, boky 17 (1926), 193–96.)

• Tamin’ny fomba ahoana no nandraisan’i Mary Elizabeth Rollins ny soratra masina ho tenin’ny Mpamonjy?

• Inona avy no fomba sasantsasany ahafahantsika mandray ny soratra masina ho tenin’ny Mpamonjy ankehitriny?

Misy ohatra tatỳ aoriana kokoa ihany koa, mombana olona izay nianatra nankamamy ny Fotopampianarana sy Fanekempihavanana ho tenin’ Andriamanitra (jereo ny Jennifer Ricks, “Learning to Love the Doctrine and Covenants,” New Era, apr. 2012, 26).

Ampiasao ny tenin’ny mpaminany ao anatin’ireo vatsim-panahy

Asao ny mpianatra hanohy handalina ireo andinin-tsoratra masina sy tenin’ny mpaminanin’ny andro farany. Asao hifandimby hizara ny zavatra ianaran’izy ireo ao amin’ny vatsim-panahin’ny fotoam-pianarana ho avy manaraka izy ireo. Amporisiho izy ireo hizara ny zavatra tsapan’izy ireo hoe tian’ny Tompo ho fantatr’izy ireo na ny fomba ahafahan’ireo fahamarinan’ny filazantsara mitahy antsika ankehitriny.

Mandre ny feon’ny Tompo

Na dia afaka mahazo ny tenin’ny Tompo aza isika, dia tsy hoe mihaino na mahafantatra azy ireny mandrakariva. Hevero ny hanasa ny mpianatra hamaky ny 3 Nefia 11:1–5, ka hanamarika ny zavatra nataon’ny olona mba handrenesana ny feon’ Andriamanitra. Ifanakalozy hevitra ny zavatra azontsika atao mba handrenesana tsara kokoa ny feon’ny Tompo eo amin’ny fiainantsika. Jereo ny iray na ny mihoatra izany amin’ireo horonan-tsary #ÉcoutezLe, izay hanomezan’ireo mpitarika ao amin’ny Fiangonana ohatra amin’ny fomba hihainoan’izy ireo ny Tompo. Hita ao amin’ny ChurchofJesusChrist.orgireo horonan-tsary ireo.