Lesson 6: Doktrina at mga Tipan 1

Doktrina at mga Tipan 1:37–38

“Maging sa pamamagitan ng Sarili Kong Tinig o sa Tinig Man ng Aking mga Tagapaglingkod, Ito ay Iisa”

Para tapusin ang Kanyang inspiradong paunang salita sa Book of Commandments (ngayon ay Doktrina at mga Tipan), nagpatotoo ang Panginoon na nangungusap Siya sa atin sa pamamagitan ng Kanyang mga propeta. Ang lesson na ito ay makatutulong sa mga estudyante na pag-aralan ang mga salita ng Panginoon sa pamamagitan ng mga banal na kasulatan at mga salita ng mga makabagong propeta.

Mga Posibleng Aktibidad sa Pag-aaral

Bakit natin gugustuhing marinig ang Panginoon?

Maaaring maging epektibo na magsimula sa panonood ng “#PakingganSiya: Inaanyayahan Tayo ni Pangulong Nelson na Pakinggan ang Tinig ng Panginoon,” na matatagpuan sa ChurchofJesusChrist.org, mula sa time code na 0:00 hanggang 1:14.

Maaari mong anyayahan ang mga estudyante na ibahagi ang nagustuhan o natutuhan nila mula sa video. Pagkatapos ay sabihin sa kanila na ipikit ang kanilang mga mata at isipin ang sumusunod na sitwasyon habang pinag-iisipan ang mga tanong sa ibaba. Maaari mong ipabahagi sa mga boluntaryo ang kanilang mga sagot kung hindi masyadong personal ang mga ito.

Isipin kunwari na nagkaroon ka ng pagkakataong makasama ang Tagapagligtas na si Jesucristo sa iisang kuwarto.

• Bakit kaya gusto mong makipag-usap at makinig sa Kanya?

• Anong mga paksa ang gusto mong talakayin ng Tagapagligtas sa iyo o tungkol saang mga paksa mo Siya gustong magbigay ng payo? Bakit?

• Sa iyong palagay, paano makakaimpluwensya sa iyo ang karanasang ito?

Habang pinag-aaralan ninyo ang lesson na ito, humingi ng patnubay sa Espiritu Santo para matulungan kayo na malaman kung paano ninyo maririnig ang mga salita ng Tagapagligtas at kung paano kayo personal na mapagpapala ng mga ito.

Paano pakikinggan ang Tagapagligtas sa ating buhay

Mahal tayo ng Tagapagligtas at nais Niyang patuloy tayong magsikap na pakinggan ang Kanyang tinig. Sa pagtatapos ng paunang salita sa Doktrina at mga Tipan, binigyang-diin ng Tagapagligtas ang ilan sa mga paraan na nangungusap Siya sa atin.

Basahin ang Doktrina at mga Tipan 1:37–38, at alamin ang mga paraang iyon na nangungusap Siya sa atin. Maaaring makatulong na tandaan na ang salitang “mga kautusan” ay tumutukoy sa Book of Commandments (o Doktrina at mga Tipan).

Ang Doktrina at mga Tipan 1:37–38 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.

• Ano ang natutuhan ninyo mula sa mga talatang ito?

  Maaari mong sabihin sa mga estudyante na ibahagi ang mga ideya nila. Maaari nilang banggitin na nangungusap ang Panginoon sa atin sa pamamagitan ng mga banal na kasulatan at ng Kanyang mga propeta. Kung hindi nila nabanggit, maaari mong itaas ang isang kopya ng Doktrina at mga Tipan, isang larawan ng mga makabagong propeta, at isang larawan ng Tagapagligtas, at itanong kung ano ang pagkakatulad ng mga ito ayon sa Doktrina at mga Tipan 1:38. Maaari mong sabihin sa mga estudyante na markahan ang isang parirala na nagtuturo ng sumusunod na katotohanan: sa pamamagitan man ng Kanyang sariling tinig o sa tinig man ng Kanyang mga tagapaglingkod, ito ay iisa.

  Kung makatutulong, isulat sa pisara ang mga sumusunod na talata at sabihin sa mga estudyante na basahin ang isa o dalawa sa mga ito, at alamin ang itinuturo ng mga ito na nagpapatibay sa katotohanan sa itaas: Deuteronomio 18:18; Doktrina at mga Tipan 18:33–36; 21:4–6. Maaaring isulat ng mga estudyante ang mga talatang ito bilang mga cross-reference sa Doktrina at mga Tipan 1:38.

• Bakit maaaring mahirap kung minsan na pag-aralan ang mga salita ng Panginoon?

• Paano kayo maaaring mahikayat ng katotohanang natukoy natin, o ng iba pang mga parirala sa Doktrina at mga Tipan 1:37–38, na pag-aralan ang mga salita ng Panginoon?

Bakit gusto nating pag-aralan ang Kanyang mga salita

Panoorin ang sumusunod na video at basahin ang sumusunod na pahayag, at alamin ang mga dahilan kung bakit gusto ninyong pag-aralan ang mga salita ng Panginoon sa pamamagitan ng mga banal na kasulatan at sa pamamagitan ng mga salita ng mga makabagong propeta:

• “Paano Ko Ginagawang Pakinggan Siya: Elder David A. Bednar” (1:15)

Itinuro ni Sister Carol F. McConkie, dating tagapayo sa Young Women General Presidency:

[Ang mga propeta sa mga huling araw ay] nagsasalita sa pangalan ni Jesucristo. Nagpopropesiya sila sa pangalan ni Cristo. Ginagawa nila ang lahat ng bagay sa pangalan ni Jesucristo. Sa kanilang mga salita naririnig natin ang tinig ng Panginoon at nadarama ang pagmamahal ng Tagapagligtas. (Carol F. McConkie, “Mamuhay Ayon sa mga Salita ng mga Propeta,” Liahona, Nob. 2014, 77)

• Ano ang nagustuhan o natutuhan ninyo mula sa video at pahayag na ito?

  Bigyan ng oras ang mga estudyante na pag-isipan ang sumusunod na tanong bago hilingin sa mga boluntaryo na magbahagi. Habang nag-iisip ang mga estudyante, maaari kang magbahagi ng isang personal na halimbawa na makakaugnay sila. Ang paggawa nito ay maaaring makatulong sa kanila na mag-isip ng iba pang mga halimbawa.

• Kailan ninyo nadama (o ng isang taong kilala ninyo) na nakatanggap kayo ng mensahe mula sa Panginoon sa pamamagitan ng mga banal na kasulatan o sa pamamagitan ng mga salita ng mga makabagong propeta?

Magsanay

Ang sumusunod na aktibidad ay naglalayong tulungan ang mga estudyante na mas mapalapit sa Tagapagligtas habang pinag-aaralan ang mga salita ng Kanyang mga tagapaglingkod. Tiyaking bigyan ang mga estudyante ng maraming oras para gawin ito at pagkatapos ay ibahagi nila ang kanilang mga naisip.

1. Maglaan ng ilang minuto para saliksikin ang ilan sa mga sumusunod na talata at salita ng mga makabagong propeta. Habang nag-aaral kayo, isaisip na sinasabi ng Panginoon ang mga salitang ito sa inyo. (Ito ay isang kapaki-pakinabang na kasanayan sa pag-aaral na magagamit ninyo sa tuwing pinag-aaralan ninyo ang mga banal na kasulatan.) Maaari ninyong markahan kung ano ang makabuluhan sa inyo.

   Doktrina at mga Tipan 6:34–37; 10:5; 19:23; 27:15–18; 58:26–28; 68:5–6; 78:18–19; 82:10; 98:1–3; 112:10. (O pumili ng iba pang mga talata sa Doktrina at mga Tipan.)

   Kung sa palagay mo ay mas akma ito sa mga pangangailangan ng iyong mga estudyante, sa halip na ang mga sumusunod, isiping magtipon ng ilang siniping pahayag kamakailan mula sa mga propeta na partikular na naaangkop sa iyong mga estudyante. Tiyaking mayroon kang ilang kopya ng pinakahuling isyu ng pangkalahatang kumperensya ng magasing Liahona.

2. Pag-aralan ang ilan o lahat ng mensahe sa huling pangkalahatang kumperensya na sa palagay ninyo ay makatutulong sa inyo nang personal.

   Anyayahan ang mga estudyante na ibahagi ang kanilang mga karanasan. Maaari ding maging kapaki-pakinabang ang mga sumusunod na tanong:

3. Ano ang natutuhan ninyo?

4. Paano nakaapekto sa inyong pag-aaral na isipin na sinasabi sa inyo ng Tagapagligtas ang mga salitang iyon?

5. Paano makakaimpluwensiya sa inyong kaugnayan sa Tagapagligtas ang regular na paggawa nito sa inyong personal na pag-aaral?

Habang nagbabahagi ang mga estudyante, maghanap ng mga paraan upang mabigyang-diin na nangungusap pa rin sa atin ang Panginoon sa pamamagitan ng mga banal na kasulatan at mga buhay na propeta.

Sa pagtatapos ng klase, isulat sa inyong study journal ang gusto ninyong gawin para mas mapalapit sa Tagapagligtas sa pamamagitan ng mga salita ng Kanyang mga tagapaglingkod. Maaaring ang ilang ideya ay:

• Regular na pag-aralan ang Doktrina at mga Tipan na parang nangungusap sa inyo ang Panginoon.

• Pakinggan ang mga salita ng mga propeta habang naghahanda kayong pumasok sa paaralan sa umaga o matulog sa gabi o sa ibang pagkakataon na mas kapaki-pakinabang sa inyo.

Isaulo

Maaari mong tulungan ang mga estudyante na maisaulo ang reference at mahalagang parirala ng banal na kasulatan ng Doktrina at mga Tipan 1:37–38 at balikan ang mga ito sa mga susunod na lesson. Ang mahalagang parirala ng banal na kasulatan ay “Maging sa pamamagitan ng sarili kong tinig o sa tinig man ng aking mga tagapaglingkod, ito ay iisa.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Bakit dapat akong makinig sa mga propeta na para bang nangungusap sila para sa Panginoon?

Itinuro ni Pangulong M. Russell Ballard ng Korum ng Labindalawang Apostol:

Hindi maliit na bagay, mga kapatid, na magkaroon ng propeta ng Diyos sa [kalipunan] natin. Dakila at kagila-gilalas ang mga pagpapalang dumarating sa ating buhay kapag nakikinig tayo sa salita ng Diyos na ibinibigay sa atin sa pamamagitan niya. … Kapag naririnig natin ang payo ng Panginoon na ipinahayag sa pamamagitan ng mga salita ng Pangulo ng Simbahan, dapat positibo at mabilis ang ating pagtugon. Makikita sa kasaysayan na may kaligtasan, kapayapaan, kaunlaran, at kaligayahan sa pagtugon sa payo ng propeta. (M. Russell Ballard, “His Word Ye Shall Receive,” Ensign, Mayo 2001, 65)

Ano ang dapat kong gawin kung nahihirapan ako o hindi ko nauunawaan ang sinasabi ng mga propeta?

Itinuro ni Pangulong Russell M. Nelson:

Nangako na sa atin ang Panginoon na hindi Niya tutulutan ang propeta kailanman na iligaw tayo ng landas. Ipinahayag ni Pangulong Harold B. Lee [1899–1973]: “Maaaring hindi ninyo magustuhan ang nagmumula sa awtoridad ng Simbahan. Maaaring salungat ito sa pananaw ninyo sa pulitika. Maaaring salungat ito sa pananaw ninyo sa lipunan. Maaaring humadlang ito sa inyong pakikisalamuha. Ngunit kung pakikinggan ninyo ang mga bagay na ito, na tila nagmula mismo sa bibig ng Panginoon, nang may pagtitiis at pananampalataya, ang pangako ay ‘ang pintuan ng impiyerno ay hindi mananaig laban sa inyo; oo, at itataboy ng Panginoong Diyos ang mga kapangyarihan ng kadiliman mula sa harapan ninyo, at payayanigin ang kalangitan para sa inyong ikabubuti, at sa ikaluluwalhati ng kanyang pangalan’ (D&T 21:6)” [Mga Turo ng mga Pangulo ng Simbahan: Harold B. Lee (2000), 99–100].

Maaaring hindi ninyo laging mauunawaan ang bawat pahayag ng isang buhay na propeta. Ngunit kapag nalaman ninyo na ang isang propeta ay isang propeta, malalapitan ninyo ang Panginoon nang may pagpapakumbaba at pananampalataya at makakahiling kayo ng sarili ninyong patotoo tungkol sa anumang naipahayag ng Kanyang propeta. (Russell M. Nelson, “Pagiging mga Tunay na Isinilang sa Milenyong Ito” [pandaigdigang debosyonal para sa mga young adult, Ene. 10, 2016], broadcasts.ChurchofJesusChrist.org)

Mga Karagdagang Aktibidad sa Pag-aaral

Ang karanasan ng isang dalagita

Matapos magbahagi ang mga estudyante ng mga dahilan kung bakit gusto nilang pag-aralan ang mga salita ng Panginoon, maaari mong ibahagi ang sumusunod na karanasan ng isang dalagita, noong mga unang araw ng Simbahan, na itinuring ang mga banal na kasulatan bilang salita ng Panginoon:

Si Mary Elizabeth Rollins ay 12 taong gulang nang hikayatin niya ang kanyang kapitbahay na ipahiram sa kanya ang Aklat ni Mormon nito, ang tanging kopya sa lugar. Pinag-aralan niya ito hanggang gabi at kalaunan ay natapos niya ang buong aklat. Nang bumisita si Propetang Joseph Smith at marinig niya ang tungkol sa pag-aaral nito, sinabi niya rito na sa kanya na ang aklat at nangako siya na bibigyan niya ng isa pang kopya ang kapitbahay nito.

Makalipas ang isa o dalawang taon, nakita ni Mary ang ilan sa mga bagong limbag na pahina ng mga paghahayag mula sa Panginoon na isasama sa Book of Commandments (ngayon ay Doktrina at mga Tipan) at nakinig siya sa mga lider ng Simbahan na nagbabasa at tinatalakay ang mga ito. Nakadama siya ng malakas na impresyon mula sa Espiritu Santo at matinding pagpipitagan sa mga paghahayag. (Tingnan sa Mga Banal, 1:204.)

Noong 15 taong gulang si Mary, winasak ng mga galit na mandurumog ang palimbagan ng Simbahan bago nalathala ang aklat at ikinalat nila ang mga pahina ng mga paghahayag na iyon. Naghintay si Mary at ang kanyang nakababatang kapatid na babae hanggang sa tumalikod ang mga mandurumog, pagkatapos ay ipinagsapalaran nila ang kanilang buhay para isalba ang mga pahina. Nang makita sila ng ilan sa mga mandurumog at habulin sila ng mga ito, lumusot ang dalawang dalagita sa butas ng isang bakod at nagtago sa taniman ng mais habang sila ay hinahanap ng mga miyembro ng mga mandurumog ngunit hindi sila natagpuan. Kalaunan ay binigyan si Mary ng aklat ng mga paghahayag na iyon, na kanyang “labis na pinahalagahan.” (Tingnan sa “Autobiography of Mary E. Lightner,” Utah Genealogical and Historical Magazine, tomo 17 (1926), 193–96.)

• Sa paanong paraan itinuring ni Mary Elizabeth Rollins ang mga banal na kasulatan tulad ng mga salita ng Tagapagligtas?

• Ano ang ilang paraan na maituturing natin ang mga banal na kasulatan tulad ng mga salita ng Tagapagligtas sa panahong ito?

Mayroon ding mas bagong mga halimbawa ng mga taong natutong pahalagahan ang Doktrina at mga Tipan bilang salita ng Diyos (tingnan sa Jennifer Ricks, “Learning to Love the Doctrine and Covenants,” New Era, Abr. 2012, 26).

Gamitin ang mga salita ng mga propeta sa mga debosyonal

Sabihin sa mga estudyante na patuloy na pag-aralan ang mga talata ng mga banal na kasulatan at mga salita ng mga propeta sa mga huling araw. Sabihin sa kanila na magsalitan sa pagbabahagi ng natutuhan nila sa mga darating na debosyonal sa klase. Hikayatin sila na ibahagi kung ano sa palagay nila ang nais ng Panginoon na malaman nila o kung paano tayo mapagpapala ng mga katotohanan ng ebanghelyo sa panahong ito.

Upang marinig ang tinig ng Panginoon

Bagama’t may access tayo sa mga salita ng Panginoon, hindi natin palaging pinakikinggan at kinikilala ang mga ito. Maaari mong ipabasa sa mga estudyante ang 3 Nephi 11:1–5, at sabihin sa kanila na pansinin kung ano ang ginawa ng mga tao para marinig ang tinig ng Diyos. Talakayin kung ano ang magagawa natin para mas marinig ang tinig ng Panginoon sa ating buhay. Pag-isipang panoorin ang isa o mahigit pa sa mga video na #Pakinggan Siya, kung saan nagbigay ang mga lider ng Simbahan ng mga halimbawa kung paano nila pinakikinggan ang Panginoon. Makikita ang mga video sa ChurchofJesusChrist.org.