Lesson 4: Doktrina at mga Tipan 1

Doktrina at mga Tipan 1

“Ang Tinig ng Panginoon ay Hahanggan sa mga Dulo ng Mundo”

Bago ang paglilimbag ng Book of Commandments, na kalaunan ay naging bahagi ng Doktrina at mga Tipan, humiling si Propetang Joseph Smith sa Panginoon ng paunang salita para sa aklat. Bilang tugon, inihayag ng Panginoon ang tinatawag ngayon na bahagi 1 ng Doktrina at mga Tipan bilang pambungad ng mga paghahayag sa mundo. Ang lesson na ito ay makatutulong sa mga estudyante na maunawaan kung bakit nagbibigay ang Panginoon ng mga babala sa mundo.

Mga Posibleng Aktibidad sa Pag-aaral

“Ang tinig ng babala”

Maaari mong gamitin ang sumusunod na sitwasyon o isang bagay na pinakaakma sa mga pangangailangan ng iyong mga estudyante para matulungan sila na maghandang pag-isipan kung bakit maaaring magbabala ang isang tao sa iba.

Isipin kunwari na gumagawa ng desisyon ang isang kaibigan ninyo na hindi magbubunga nang maganda.

Sabihin sa mga estudyante na magbahagi ng mga makatotohanang halimbawa kung ano kaya ang desisyong ito. Ang ilang halimbawa ay maaaring pagsisinungaling sa mga magulang, paglabag sa Word of Wisdom, pandaraya sa paaralan, o pag-alis sa Simbahan.

• Bakit ninyo gugustuhing balaan ang inyong kaibigan tungkol sa desisyong ito?

Nagbigay rin ang Tagapagligtas ng “tinig ng babala” (Doktrina at mga Tipan 1:4). Isipin ang mga sumusunod na tanong:

• Bakit kaya tayo binibigyan ng babala ng Tagapagligtas? Bakit ka kaya binibigyan Niya ng babala? Paano?

• Ano ang itinuturo nito sa iyo tungkol sa Kanya?

Habang pinag-aaralan ninyo ang lesson na ito, maghanap ng mga sagot sa mga tanong na ito.

Ang tinig ng babala ng Panginoon ay para sa lahat ng tao

Ang sumusunod na impormasyon ay makatutulong sa mga estudyante na maunawaan ang kasaysayan kung paano natanggap ang paunang salita sa Doktrina at mga Tipan.

Pagsapit ng Nobyembre 1831, si Propetang Joseph Smith ay nakapagtala ng mahigit 60 paghahayag mula sa Panginoon. Gayunman, iilang miyembro ng Simbahan ang may mga kopya ng mga paghahayag. Sa ilalim ng pamamahala ng Propeta, ang mga paghahayag ay tinipon sa isang bagong aklat ng mga banal na kasulatan na tinatawag na Book of Commandments, na kalaunan ay naging bahagi ng Doktrina at mga Tipan. Nang ililimbag na ang aklat, si Joseph ay nanalangin at humiling sa Panginoon ng pambungad sa aklat. Bilang tugon, natanggap niya sa pamamagitan ng paghahayag ang bahagi 1, na tinawag ng Panginoon na “aking paunang salita” (Doktrina at mga Tipan 1:6) sa bagong aklat na ito ng mga banal na kasulatan.

Maaari mong isulat sa pisara ang mga sumusunod na tanong at reperensya. Maaaring maghanap ang mga estudyante ng mga sagot nang mag-isa o kasama ang maliit na grupo. Kung gumagawa sila sa maliliit na grupo, maaaring ibuod ng mga estudyante ang natutuhan nila sa kanilang mga grupo bago sila magbahagi sa klase.

Gamitin ang inyong mga banal na kasulatan sa pagsagot sa mga sumusunod na tanong:

• Sino ang binibigyan ng babala ng Tagapagligtas sa panahong ito? (tingnan sa Doktrina at mga Tipan 1:1–4, 34–36; maaaring makatulong na malaman na ang “nagtatangi ng mga tao” [talata 35] ay isang taong pumapabor sa isang tao kaysa sa isa pa).

• Paano ibinibigay ng Panginoon ang Kanyang mensahe? (tingnan sa Doktrina at mga Tipan 1:4–6).

Habang pinag-iisipan ng mga estudyante ang kanilang mga sagot, maaaring makatulong na isulat sa pisara ang sumusunod na pahayag: Ang tinig ng babala ng Tagapagligtas ay para sa lahat ng tao.

Ang tinig ng babala ng Panginoon ay katibayan ng Kanyang pagmamahal

Sa Doktrina at mga Tipan 1, inihayag ng Tagapagligtas ang ilang dahilan kung bakit Siya nagbibigay ng mga babala sa mundo. Habang nag-aaral kayo, pagnilayan kung paano naging katibayan ang mga dahilang ito na pinagpapala tayo ng Tagapagligtas.

Basahin ang Doktrina at mga Tipan 1:11–17, 21–28, at alamin ang mga dahilan kung bakit tayo binibigyan ng Panginoon ng mga babala.

Maaari mong hatiin ang klase sa dalawa. Ipabasa sa unang grupo ang mga talata 11–17 at ipabasa sa kabilang grupo ang mga talata 21–28. Kung kailangan ng mga estudyante ng karagdagang patnubay, maaari kang gumawa ng chart na may dalawang column. Isama ang mga talata sa unang column, at hayaang isulat ng mga estudyante sa pangalawang column ang dahilan kung bakit ibinigay ang babala. Maaaring makahanap ang mga estudyante ng mga sagot na tulad ng mga sumusunod:

• 1:12 upang ihanda tayo para sa yaong paparito

• 1:15–17 upang balaan tayo tungkol sa mga hamon at kasalanan sa ating panahon

• 1:21 upang maragdagan ang ating pananampalataya

• 1:22 upang mapagtibay ang walang-hanggang tipan ng Panginoon

• 1:26 upang turuan tayo

• 1:27 upang kastiguhin at ituwid tayo kapag nagkakasala tayo

• 1:27 upang tulungan tayong magsisi

• 1:28 upang mabigyan tayo ng kaalaman

Maaari mong anyayahan ang ilang estudyante na ibahagi ang natutuhan nila gamit ang sumusunod na prompt.

Pumili ng isa sa mga dahilan na nalaman ninyo kung bakit nangungusap sa atin ang Panginoon, at sagutin ang isa o dalawa sa mga sumusunod na tanong:

• Paano naging katibayan ng pagmamahal ng Tagapagligtas ang dahilang ito? Paano maituturing na pagpapala ang dahilang ito?

• Kailan mo naranasan ang pagpapalang ito, o bakit mo gustong magkaroon ng ganitong pagpapala sa iyong buhay?

• Bakit kailangan ng buong mundo ang pagpapalang ito?

Paano tayo binabalaan ng Panginoon sa ating panahon?

Ang sumusunod ay makatutulong sa mga estudyante na ibahagi ang natutuhan nila. Maaari kang magbigay ng papel o maaari mong sabihin sa mga estudyante na gamitin ang kanilang study journal. Hikayatin ang mga estudyante na maging malikhain sa paraan ng pagbabahagi nila ng kanilang mga mensahe. Maaari kang magbigay ng materyal na magagamit sa pagdrowing kung mayroon.

Isipin kunwari na para sa lesson mo ngayong Linggo, inanyayahan ka ng titser mo na ibahagi nang ilang minuto kung bakit tayo binibigyan ng mga babala ng Panginoon sa panahong ito. Pag-isipan kung paano mo ibabahagi ang mensaheng ito sa iyong klase sa makabuluhang paraan. Maghanda ng handout, meme, poster, o iba pang malikhaing pamamaraan para sa pagbabahagi ng mensaheng ito sa iyong klase. Isama lamang ang mga sumusunod:

• Isang talata mula sa Doktrina at mga Tipan 1 na nagbabahagi ng kahit isang dahilan kung bakit nagbibigay ng mga babala ang Panginoon sa lahat ng tao

• Isang halimbawa ng babala sa atin ng Panginoon sa ating panahon (Kung pinili mo na ang Panginoon ay nagbibigay ng babala sa atin tungkol sa mga hamon at kasalanan ng mundo [tingnan sa Doktrina at mga Tipan 1:15–17], maaari kang magbahagi ng isang talata mula sa mga banal na kasulatan o ng mga salita ng isang propeta sa panahong ito na nagbibigay ng mga babala sa atin tungkol sa mga tukso sa makabagong panahong ito.)

• Ang iyong mga naisip at nadama tungkol sa pagbibigay ng Panginoon ng mga mensahe ng babala sa atin sa panahong ito. Maaari ka ring magsama ng isang karanasan.

Habang nagbabahagi ang mga estudyante, maghanap ng mga paraan para purihin at pasalamatan sila sa kanilang tapat na pagsisikap at bigyang-diin din ang pagmamahal ng Tagapagligtas sa pamamagitan ng mga mensaheng ipinadadala Niya sa panahong ito.

Para sa karagdagang training kung paano matutulungan ang mga estudyante na malaman na pinahahalagahan mo ang kanilang mga komento, tingnan ang “Ipaalam na pinahahalagahan mo ang mga estudyante bago pa man sila nagkomento o kapag itinaas nila ang kanilang kamay para magkomento.” Ang training na ito ay matatagpuan sa Mga Kasanayan para sa Pag-unlad ng Guro: Mahalin ang mga Tinuturuan Mo.

Karagdagang Resources

Ano ang Book of Commandments?

Noong unang ilang taon ng Simbahan, nakukuha lang ng ilang miyembro ang mga paghahayag ng Panginoon kay Propetang Joseph Smith sa pamamagitan ng mga sulat-kamay na kopya sa mga piraso ng papel na ipinasa-pasa ng mga Banal. Sa isang paghahayag na natanggap ni Joseph sa isang kumperensya noong 1831, inaprubahan ng Panginoon ang pagtitipon ng mga paghahayag at bago ito inilimbag, naghayag Siya ng paunang salita para sa ilalabas na aklat. Ito ay naglalaman ng mga bersiyon ng halos kalahati ng mga paghahayag na kasalukuyang nasa Doktrina at mga Tipan. Ang paglilimbag ay nagsimula noong 1832 sa isang palimbagan sa Independence, Missouri, ngunit pinigilan ng mga mandurumog ang gawaing ito. Ang mga ito at ang iba pang mga paghahayag ay matagumpay na nailimbag noong 1835 bilang Doktrina at mga Tipan ng Simbahan ng mga Banal sa mga Huling Araw. Para sa karagdagang impormasyon, tingnan sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 (2018), 161–164.

Bakit kung minsan ay nagbabahagi ng mga hindi tinatanggap na mensahe ang mga propeta at apostol?

Itinuro ni Pangulong Russell M. Nelson:

Kung minsan, kami bilang mga lider ng Simbahan ay pinupulaan dahil mahigpit naming sinusunod ang mga batas ng Diyos, ipinagtatanggol ang doktrina ng Tagapagligtas, at pinaglalabanan ang pamimilit ng lipunan sa ating panahon. Ngunit ang aming tungkulin bilang mga inordenang apostol ay “humayo sa buong daigdig upang ipangaral ang [Kanyang] ebanghelyo sa bawat nilikha” [Doktrina at mga Tipan 18:28]. Ibig sabihin niyan ay iniuutos sa amin na ituro ang katotohanan.

Sa paggawa nito, kung minsa’y inaakusahan kami na walang pagmamalasakit kapag itinuturo namin ang mga ipinagagawa ng Ama para matamo ang kadakilaan sa kahariang selestiyal. Ngunit hindi ba’t mas kawalang-malasakit ang hindi namin sabihin ang katotohanan—ang hindi ituro ang inihayag ng Diyos?

Kaya namin inihahayag ang katotohanan ay dahil lubos naming pinagmamalasakitan ang lahat ng anak ng Diyos. Maaaring hindi namin palaging sinasabi sa mga tao kung ano ang gusto nilang marinig. Ang mga propeta ay bihirang maging popular. Ngunit palagi naming ituturo ang katotohanan! (Russell M. Nelson, “The Love and Laws of God” [debosyonal sa Brigham Young University, Set. 17, 2019], 3, speeches.byu.edu)

Mga Karagdagang Aktibidad sa Pag-aaral

Isang alternatibong simula

Sabihin sa isang estudyante na ipikit ang kanyang mga mata o magsuot ng piring at dahan-dahang maglakad mula sa likod ng silid patungo sa harapan nang hindi bumabangga sa anumang mesa o upuan. (Kung gusto mo, maaari mong anyayahan ang mga estudyante na ilipat muna ang kanilang mga mesa o upuan para makagawa ng mga harang habang nag-iiwan pa rin ng daan papunta sa harapan.) Pagkatapos ay sabihin sa ilang estudyante na balaan ang nakapiring na estudyante kung malapit na siyang bumangga sa isang harang. Sabihin sa mga estudyante na mag-isip ng mga halimbawa kung kailan nila maaaring balaan ang iba o kung kailan nila gustong mabalaan ang kanilang sarili.

Ang pagbalewala sa tinig ng Panginoon ay may mga ibubunga

Madalas na nahihirapan ang mga estudyante na maunawaan ang mga bunga ng pagbalewala sa tinig ng Panginoon. Para lalo pa nilang maunawaan, maaari mong sabihin sa mga estudyante na tingnan ang mga babala na tinalakay ng klase sa simula ng lesson. Sabihin sa klase na maikling ibahagi ang iba’t ibang bunga ng pagbalewala sa mga babala ng Tagapagligtas. Tulungan ang mga estudyante na maunawaan na ang pagsuway sa mga banal na batas ng Tagapagligtas ay nagdudulot ng mga negatibong espirituwal na bunga sa mga taong pinili ang hindi magsisi.

Ipabasa sa mga estudyante ang Doktrina at mga Tipan 1:14, at sabihin sa kanila na tukuyin ang mga bunga ng hindi pakikinig sa tinig ng Panginoon o ng Kanyang mga tagapaglingkod. Maaaring makatulong na ipaliwanag na ang ibig sabihin ng “ihihiwalay” sa mga tao ng Diyos ay ihihiwalay sa mabubuti. Ang ibig sabihin din ng “ihihiwalay” ay ihihiwalay sa kapangyarihan, proteksyon, impluwensya, at mga pagpapala ng Diyos, at sa huli ay ihihiwalay sa Kanyang piling.

Maaaring makatulong sa klase ang pagbabasa ng sumusunod na pahayag ni Pangulong Russell M. Nelson:

Mahal kong mga kapatid, ang mga banal na batas ay mga kaloob ng Diyos sa Kanyang mga anak. Tulad ng mga patakaran ng ating pamilya na nagpanatiling ligtas sa ating mga anak habang lumalaki sila, tulad ng mga banal na batas na sumasaklaw sa puso at paglipad ng mga eroplano na nagpapanatili sa iyong ligtas sa operating table o habang naglalakbay, ang pagsunod sa mga batas ng Diyos ay pananatilihin kang ligtas habang sumusulong ka patungo sa kadakilaan. …

… Ang mga pinakadakilang pagpapala ng Diyos ay nakalaan para sa mga sumusunod sa Kanyang mga batas, tulad ng ipinaliwanag Niya: “Sapagkat lahat ng magkakaroon ng pagpapala sa aking mga kamay ay susunod sa batas na itinakda para sa pagpapalang iyon” [Doktrina at mga Tipan 132:5]. Ang mga batas ng Diyos ay ginawa dahil sa Kanyang sukdulang pagmamahal sa atin at sa Kanyang hangarin para sa atin na maging ang nararapat na maging tayo. (Russell M. Nelson, “The Love and Laws of God” [debosyonal sa Brigham Young University, Set. 17, 2019], 3, speeches.byu.edu) 

Ang tinig ng Tagapagligtas ay pumoprotekta sa atin

Upang matulungan ang mga estudyante na makagawa ng koneksyon sa pagitan ng kanilang pagsunod sa mga salita ng Panginoon at Kanyang banal na proteksyon, maaari mong ipanood ang video na “Follow the Prophet” (4:16).