Lesson 9: Joseph Smith—Kasaysayan 1:1–26

Joseph Smith—Kasaysayan 1:21–26

“Nakakita Ako ng Isang Pangitain … at Ito’y Hindi Ko Maipagkakaila”

Matapos ibahagi ang kanyang karanasan sa Unang Pangitain sa isang lokal na ministro ng simbahan, ang 14 na taong gulang na si Joseph Smith ay kaagad na naging puntirya ng pag-uusig. Gayunman, hindi nito nabawasan ang kanyang pananalig na nagpakita sa kanya ang Ama sa Langit at si Jesucristo. Ang lesson na ito ay makapagbibigay sa mga estudyante ng pagkakataong madama ang Espiritu Santo na nagpapatotoo sa kanila na nagpakita ang Ama sa Langit at si Jesucristo kay Propetang Joseph Smith.

Mga Posibleng Aktibidad sa Pag-aaral

Ano kaya ang mararamdaman ninyo?

Maaari mong simulan ang klase sa pag-anyaya sa mga estudyante na pagnilayan ang sarili nilang patotoo na tinawag ng Diyos si Joseph Smith na maging Kanyang Propeta. Ang sumusunod na kuwento at mga tanong ay maaaring makatulong na maisakatuparan ito.

Nagbahagi si Pangulong Thomas S. Monson (1927–2018) ng isang kuwento tungkol sa dalawang missionary na kinutya dahil sa kanilang patotoo tungkol kay Joseph Smith.

Kumatok ang dalawang [misyonero] sa bahay ni Mr. Elmer Pollard. … Ipinarinig nila ang kanilang mensahe at itinanong kung puwede siyang sumali sa pagdarasal. Pumayag siya, sa kundisyong siya ang magdarasal.

Nagulat ang mga misyonero sa panalanging sinambit niya. Sabi niya, “Ama sa Langit, basbasan po Ninyo ang dalawang sawimpalad at naliligaw na mga misyonerong ito, para makauwi na sila sa kanilang tahanan at hindi mag-aksaya ng oras sa kasasabi sa mga taga-Canada ng [tungkol sa] isang di kapani-paniwalang mensahe na kakatiting lang ang alam nila.”

Pagtindig nila mula sa pagkakaluhod, sinabi ni Mr. Pollard sa mga misyonero na huwag nang babalik sa bahay niya. Paglisan nila, pakutyang sinabi nito sa kanila, “Huwag ninyong sabihin sa akin na talagang naniniwala kayo na si Joseph Smith ay propeta ng Diyos!” at [ibinalibag] niya ang pinto. (Thomas S. Monson, “Si Propetang Joseph Smith: Huwarang Guro,” Liahona, Nob. 2005, 69)

Anyayahan ang mga estudyante na sagutin ang mga sumusunod na tanong sa kanilang study journal. Maaari mong hilingin sa mga boluntaryo na ibahagi sa klase ang kanilang sagot sa pangalawang tanong.

• Gaano ka kakumpiyansa na makapagpapatotoo ka na si Joseph ay dinalaw ng Ama sa Langit at ni Jesucristo at tinawag siya bilang propeta?

• Paano makakaimpluwensya sa iyong buhay at kaugnayan sa Diyos ang pag-alam niyan para sa iyong sarili?

Habang pinag-aaralan ninyo ang lesson na ito, pag-isipan kung ano ang ibig sabihin sa inyo ng Unang Pangitain at kung paano nito nabago o maaaring mabago ang inyong buhay. Magkakaroon kayo ng pagkakataon sa katapusan ng lesson na isulat ang inyong mga pagmumuni-muni sa inyong study journal.

Ang katotohanan ng Unang Pangitain ni Joseph Smith

Matapos magpakita ang Ama sa Langit at si Jesucristo kay Joseph Smith, ibinahagi niya ang karanasan sa isang mangangaral ng isa sa mga lokal na simbahan.

Basahin ang Joseph Smith—Kasaysayan 1:21–23, at alamin kung paano tumugon ang mangangaral at ang marami pang iba nang marinig nila ang tungkol sa pangitain ni Joseph.

• Ano ang pinakanapansin ninyo mula sa paglalarawan ni Joseph sa nangyari sa mga talatang ito?

• Sa paanong mga paraan ninyo naranasan ang oposisyon sa alam ninyong totoo?

• Bakit mahalagang magkaroon ng sariling patotoo sa katotohanan kapag nag-aalinlangan ang iba sa sinasabi ninyo?

Basahin ang Joseph Smith—Kasaysayan 1:24–26 at markahan ang mga salita at parirala kung saan pinagtibay ni Joseph ang katotohanan ng kanyang pangitain.

• Anong mga katotohanan ang matututuhan natin sa mga talatang ito?

  Maaaring tumukoy ang mga estudyante ng iba’t ibang katotohanan. Pasalamatan sila sa pagbabahagi ng nalaman nila. Isulat sa pisara ang sumusunod na katotohanan: Ang Ama sa Langit at si Jesucristo ay totoong nagpakita kay Joseph Smith bilang sagot sa kanyang panalangin.

  Maaaring makatulong na ilista sa tabi ng katotohanan sa pisara ang mga salita at parirala na minarkahan ng mga estudyante. Bilang alternatibo, maaaring isulat ng mga estudyante ang mga salita o parirala sa maliliit na piraso ng papel at maaari nilang idikit ang mga ito sa pisara.

• Ayon sa talata 25, paano nakatulong kay Joseph ang naunawaan niya tungkol sa Diyos upang mapanindigan ang alam niyang totoo?

Bigyan ang mga estudyante ng pagkakataong pagnilayan at isulat sa kanilang journal ang kahulugan ng Unang Pangitain para sa kanila. Maaari silang mag-ukol ng 10 hanggang 15 minuto sa paggawa nito. Ang pagbibigay sa mga estudyante ng aktibidad na may tagubilin para matulungan silang magnilay at magsulat, tulad ng mga nakalista sa ibaba, ay makatutulong sa kanila na madama ang pagpapatotoo sa kanila ng Espiritu Santo tungkol sa Unang Pangitain. Maaari mong ipakita ang mga aktibidad na ito at hayaang piliin ng mga estudyante ang gusto nilang gawin, o maaari mong piliin kung ano ang gagawin ninyong lahat sa klase. Ang unang dalawang aktibidad ay maaaring magandang gawin ng buong klase.

1. Kantahin bilang isang klase o basahin ang mga titik ng himnong “Unang Panalangin ni Joseph Smith” (Mga Himno, blg. 20). Narito ang isang bersiyon ng Tabernacle Choir sa Temple Square na kinakanta ang himno:

2. Panoorin ang video na “A Choice Seer Will I Raise Up: Prophet of the Restoration” (4:42), matatagpuan sa ChurchofJesusChrist.org.

3. Isulat ang mga salita ng Joseph Smith—Kasaysayan 1:16–17 sa iyong journal, at pagnilayan nang mabuti ang mga salita. O kung maaari, i-record at pakinggan ang iyong sarili na binabasa ang mga salitang ito sa isang digital device.

4. Basahin ang isang mensaheng ibinigay sa pangkalahatang kumperensya tungkol sa Unang Pangitain. Narito ang ilang pagpipilian:

   1. “Ang mga Bunga ng Unang Pangitain” (Dieter F. Uchtdorf, Liahona, Mayo 2005, 36–38)

   2. “Joseph Smith Did See God” (Joseph F. Merrill, Ensign, Dis. 2015, 70–71)

Maaari mong isalaysay ang natitirang bahagi ng kuwento tungkol kay Mr. Pollard na matatagpuan sa “Si Propetang Joseph Smith: Huwarang Guro” Liahona, Nob. 2005, 69.

Isulat sa iyong journal kung ano ang kahulugan sa iyo ng Unang Pangitain. Isama sa iyong pagninilay ang patotoo mo o kung paano sa palagay mo mapagpapala ang iyong buhay ng pagkakaroon ng patotoo tungkol sa Unang Pangitain.

Kapag natapos na ang mga estudyante, anyayahan ang mga gustong magbahagi ng kanilang patotoo o damdamin tungkol kay Joseph Smith at sa Unang Pangitain. Maaari mong ibahagi kung paano mo nalaman ang katotohanan ng pagdalaw ng Ama sa Langit at ni Jesucristo kay Joseph Smith.

Karagdagang Resources

Ano ang ibinahagi ng mga lider ng Simbahan tungkol sa pagkakaroon nila ng sariling patotoo tungkol sa Unang Pangitain?

Nagpatotoo si Pangulong Lorenzo Snow (1814–1901):

Alam ko na si Joseph Smith ay tunay na Propeta ng buhay na Diyos. Pinatototohanan ko na nakita at nakausap niya ang Diyos at ang Kanyang Anak na si Jesucristo. Ibinigay sa akin ng Panginoon ang buhay na patotoong ito at nag-aalab ito sa aking kaluluwa simula nang matanggap ko ito. Ibinibigay ko ito ngayon sa buong mundo. Hindi ko lamang pinatototohanan sa buong sangkatauhan na si Joseph Smith ay isinugo ng Diyos at ang gawaing itinatag sa pamamagitan niya ay gawain ng Diyos, kundi binabalaan ko ang lahat ng bansa sa mundo tungkol sa mga propesiya ng Propeta, at taos-puso kong pinatototohanan na alam kong totoo ang mga ito. (Mga Turo ng mga Pangulo ng Simbahan: Lorenzo Snow [2012], 307)

Nagpatotoo si Pangulong David O. McKay (1873–1970):

Ang pagpapakita ng Ama at ng Anak kay Joseph Smith ang pundasyon ng Simbahang ito. Dito nakasalalay ang sikreto ng kalakasan at katatagan nito. Ito’y totoo at saksi ako rito. Ang isang paghahayag na iyon ang sumagot sa lahat ng tanong ng siyensya hinggil sa Diyos at sa kanyang banal na katauhan. Hindi ba ninyo nakikita ang kahulugan nito? Nasagot kung ano ang Diyos. Malinaw ang kaugnayan Niya sa Kanyang mga anak. Maliwanag na may malasakit Siya sa sangkatauhan dahil sa awtoridad na ipinagkatiwala sa tao. Tiyak ang patutunguhan ng gawain. Ito at ang iba pang maluwalhating mga katotohanan ay nilinaw ng maluwalhating unang pangitain na iyon. (Mga Turo ng mga Pangulo ng Simbahan: David O. McKay [2003], 107)

Nagpatotoo si Pangulong Ezra Taft Benson (1899–1994):

Ipinagtanggol ng labing-apat-na-taong-gulang na binatilyo ang katotohanan laban sa mundo. Kilala ng Diyos ang kanyang anak [si Joseph Smith] nang piliin niya ito. Alam niyang siya’y magiging tapat at matatag hanggang kamatayan. (Mga Turo ng mga Pangulo ng Simbahan: Ezra Taft Benson [2014], 128)

Nagpatotoo si Pangulong Gordon B. Hinckley (1910–2008):

Kamakailan lang ay galing ako sa Palmyra, New York [malapit sa lugar kung saan natanggap ni Joseph Smith ang Unang Pangitain]. Ukol sa mga pangyayaring naganap sa lugar na iyon, ang isa[ng tao] ay makapagsasabing: “[Dalawang bagay lang] nangyari ito o hindi. Hindi maaaring kapwa tama ang mga ideyang ito.”

At ang tinig ng pananampalataya ay bumubulong: “Nangyari ang lahat ng ito. Nangyari ito tulad ng sinabi niya na nangyari ito.” (Mga Turo ng mga Pangulo ng Simbahan: Gordon B. Hinckley: [2016], 167)

Mga Karagdagang Aktibidad sa Pag-aaral

Video: “Origin”

Isiping gamitin ang video na “Origin” (4:57) upang tulungan ang mga estudyante na maunawaan kung paano nila matatamo o mapapalalim ang kanilang pananampalataya na nagpakita ang Ama sa Langit at si Jesucristo kay Propetang Joseph Smith.

Video: “Sacred Grove Historic Site, Part 1: The First Vision”

Upang matulungan ang mga estudyante na malaman kung ano ang pakiramdam ng nasa Sagradong Kakahuyan at mabigyan ang Espiritu Santo ng pagkakataon na magpatotoo sa mga estudyante kung ano ang nangyari doon, maaari mong ipanood ang bahagi o buong video na ito: “Sacred Grove Historic Site, Part 1: The First Vision” (10:57). Upang makita ang partikular na bahagi ng video na inilarawan sa Unang Pangitain, simulan ang video sa time code na 4:55.

Joseph Smith—Kasaysayan 1:26

Ang isa pang paraan para matalakay ang talatang ito ay tingnan ito bilang halimbawa ng pagkilos nang may pananampalataya. Sa bahaging ito sa kanyang kasaysayan, hindi alam ni Joseph kung paano mangyayari ang Pagpapanumbalik. Alam niya na nakakita siya ng isang pangitain na nag-uutos sa kanya na huwag sumapi sa alinman sa iba pang mga simbahan, at alam niyang maghihintay siya ng karagdagang tagubilin. Maaari mong anyayahan ang mga estudyante na ikumpara ang Joseph Smith—Kasaysayan 1:26 sa talata 7 ng bahaging “Pagtatamo ng Espirituwal na Kaalaman” ng Doctrinal Mastery Core Document (2023), at maghanap ng mga pagkakatulad. Ang pahayag na ito mula sa mensahe ni Elder Neil L. Andersen na “Mga Alaala na Espirituwal na Nagpapatibay” ay maaari ding magbigay-linaw.

Sa mga oras ng kanyang paghihirap, naalala ni Joseph ang halos dalawang dekada ng katiyakan ng pagmamahal ng Diyos para sa kanya at ng mga pangyayaring nagpasimula sa matagal nang ipinropesiyang Pagpapanumbalik. Habang pinagninilayan ang kanyang espirituwal na paglalakbay, sinabi ni Joseph: “Hindi ko masisisi ang sinuman kung hindi paniwalaan ang aking kasaysayan. Kung hindi ko ito naranasan, ako mismo ay hindi maniniwala rito.”

Ngunit ang mga karanasan ay totoo, at hindi niya kailanman kinalimutan o ikinaila ang mga iyon, na tahimik na pinagtitibay ang kanyang patotoo hanggang sa humantong siya sa piitan ng Carthage. “Ako ay patutungong gaya ng isang kordero sa katayan,” wika niya, “subalit ako ay mahinahon gaya ng isang umaga sa tag-araw; ako ay may budhi na walang kasalanan sa harapan ng Diyos, at sa lahat ng tao.” (Neil L. Andersen, “Mga Alaala na Espirituwal na Nagpapatibay,” Liahona, Mayo 2020, 19)

Pagkakaroon ng patotoo tungkol kay Joseph Smith at sa Unang Pangitain

Upang matulungan ang mga estudyante na magkaroon ng patotoo tungkol sa Unang Pangitain, maaari mong bigyan ang bawat estudyante ng kopya ng pahayag na ito ni Elder Neil L. Andersen ng Korum ng Labindalawang Apostol. Sabihin sa kanila na markahan ang mga bagay na naranasan nila at gumuhit ng linya sa margin ng papel kung saan maaari silang magsulat ng maiikling paglalarawan ng kanilang mga karanasan.

Ang patotoo tungkol kay Propetang Joseph Smith ay maaaring dumating sa atin sa magkakaibang paraan. Maaari itong dumating habang nakaluhod kayo sa panalangin, na hinihiling sa Diyos na patunayan na siya ay totoong propeta. Maaari itong dumating habang binabasa ninyo ang salaysay ng Propeta tungkol sa Unang Pangitain. Ang patotoo ay maaaring magpadalisay sa inyong kaluluwa habang paulit-ulit ninyong binabasa ang Aklat ni Mormon. Maaari itong dumating kapag nagpatotoo kayo tungkol sa Propeta o habang nasa templo kayo at natatanto na sa pamamagitan ni Joseph Smith ay ipinanumbalik ang banal na kapangyarihang magbuklod sa lupa. Taglay ang pananampalataya at tunay na layunin, ang inyong patotoo kay Propetang Joseph Smith ay lalakas. Ang dumaraming water balloon volleys mula sa mga manonood ay maaaring makabasa sa inyo, ngunit hindi nito ma[pa]patay kailanman ang nag-aalab na apoy ng inyong pananampalataya. (Neil L. Andersen, “Joseph Smith,” Liahona, Nob. 2014, 30)

Pagkatapos ay maaari ninyong talakayin ang mga tanong na gaya ng mga sumusunod: Ano ang iba’t ibang paraan na matatamo o mapapalalim ninyo ang inyong patotoo tungkol kay Joseph Smith at sa Unang Pangitain? Paano nakaimpluwensya ang alinman sa mga mungkahing ito sa inyong patotoo tungkol kay Joseph Smith?