Joseph Smith—Kasaysayan 1:1–14

Joseph Smith—Kasaysayan 1:1–14

“Humingi sa Diyos”

Sa batang edad, ninais ni Joseph Smith na sundin si Jesucristo at hinangad niyang malaman kung aling simbahan ang tama at kung alin ang dapat niyang sapian. Gayunman, maraming simbahan ang nagtuturo ng iba’t ibang bagay, at nahirapan ang batang si Joseph na mahiwatigan ang katotohanan. Ang lesson na ito ay makatutulong sa mga estudyante na matularan ang halimbawa ni Joseph Smith sa kanilang mga pagsisikap na malaman ang katotohanan mula sa Diyos.

Mga Posibleng Aktibidad sa Pag-aaral

Panahong puno ng kalituhan

Sa lesson na ito, pag-aaralan ng mga estudyante ang Joseph Smith—Kasaysayan 1:1–14 na nakatuon sa mga ginawa ni Joseph Smith sa paghahangad niyang malaman kung aling simbahan ang dapat sapian. Sa sumusunod na lesson, “Joseph Smith—Kasaysayan 1:15–20,” pag-aaralan ng mga estudyante ang karanasan ni Joseph sa Sagradong Kakahuyan. Depende sa magagamit na oras sa klase, maaari mong pagsamahin ang dalawang lesson na ito.

Sabihin sa mga estudyante na magbahagi ng mga halimbawa ng mga pagkakataon na nakatanggap sila ng magkakaibang impormasyon. Halimbawa, maaaring nakakita na sila ng magkakaibang ulat at opinyon tungkol sa isang paksa sa social media o sa balita.

• Bakit maaaring mahirap kung minsan na tumukoy ng mapagkakatiwalaang impormasyon?

• Paano nahihirapan ang isang tao na mahanap ang katotohanan tungkol kay Jesucristo at sa Kanyang doktrina dahil sa mga hamong iyon?

Habang natututuhan ng mga estudyante ang tungkol sa karanasan ni Joseph Smith, sabihin sa kanila na pag-isipan kung paano sila matutulungan ng kanyang halimbawa sa sarili nilang paghahanap ng katotohanan.

Sa batang edad, nag-alala si Joseph Smith sa kapakanan ng kanyang kaluluwa. Sa komunidad, at maging sa pamilya Smith, may magkakaibang opinyon kung aling simbahan ang naglalaman ng mga katotohanang kailangan para sa kaligtasan.

Maaari mong hatiin ang mga sumusunod na talata sa mga estudyante para mabilis na mahanap ng klase ang mga hamon kay Joseph sa pagtukoy sa katotohanan.

Basahin ang Joseph Smith—Kasaysayan 1:5–10, at alamin kung bakit mahirap para kay Joseph na tukuyin ang katotohanan ng Diyos sa iba’t ibang relihiyon.

• Paano ka nakakita ng katulad na kalituhan tungkol sa relihiyon sa mundo sa kasalukuyan?

• Sa iyong palagay, bakit mahalagang hangarin nating malaman ang katotohanan mula sa Diyos sa halip na tanggapin lamang ang lahat ng itinuturo sa atin?

Upang matulungan ang mga estudyante na maiugnay ang halimbawa ni Joseph sa kanilang buhay, maaari mong kopyahin ang sumusunod na chart sa pisara at punan ito bilang isang klase sa buong lesson.

Gawin ang sumusunod na chart sa iyong study journal, at lagyan ng label ang mga quadrant tulad ng nakikita mo sa ibaba:

Mga tanong ni Joseph para sa Diyos	Mga tanong ko para sa Diyos
Ang ginawa ni Joseph	Ang gagawin ko

Balikan ang binasa mo sa Joseph Smith—Kasaysayan 1:8, 10. Isulat ang mga tanong at ginawa ni Joseph sa angkop na quadrant.

Maaaring matukoy ng mga estudyante mula sa talata 10 na ang mga tanong ni Joseph ay “Ano ang nararapat gawin?” at “Sino sa lahat ng [simbahang] ito ang tama?” Maaaring mapansin nila sa talata 8 na kasama sa mga ginawa ni Joseph ang pagmumuni-muni at pagdalo sa iba’t ibang miting ng simbahan.

Makatutulong na ituon ang pansin ng mga estudyante sa talata 3 sa bahaging Pagtatamo ng Espirituwal na Kaalaman ng Doctrinal Mastery Core Document (2023) habang tinatalakay ninyo ang sumusunod na tanong.

• Sa inyong palagay, bakit ikinalugod ng Ama sa Langit na itinanong ni Joseph ang mga bagay na ito?

Tularan ang halimbawa ni Joseph Smith

Habang sinisikap nating malaman kung ano ang totoo, makatutulong na sundin ang paanyayang ito ni Pangulong Russell M. Nelson:

Nagbigay si Propetang Joseph Smith ng huwaran na susundan natin sa paglutas ng ating mga tanong. …

Sa gayon ding paraan, ano ang mabubuksan sa inyo ng inyong paghahanap? Anong karunungan ang kulang sa inyo? Ano sa palagay ninyo ang kailangan ninyong malaman o maunawaan kaagad? Tularan ang halimbawa ni Propetang Joseph. (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 95)

Ang isang katotohanan na matututuhan natin mula kay Pangulong Nelson ay matutularan natin ang halimbawa ni Joseph Smith para malaman ang katotohanan ng Diyos para sa ating sarili. Pag-isipan ang mga tanong ni Pangulong Nelson. Paano mo sasagutin ang mga iyon para sa iyong sarili? Pag-isipan ang ilang tanong mo at isulat ang mga ito sa quadrant na “Mga tanong ko para sa Diyos” sa iyong study journal.

Maaaring nakapili na ang mga estudyante ng tanong na pagtutuunan ng pansin sa lesson na “Pagtatamo ng Espirituwal na Kaalaman, Bahagi 1” o “Pagtatamo ng Espirituwal na Kaalaman, Bahagi 2.” Maaaring makatulong na ipaalala ito sa kanila.

• Alin sa mga tanong mo ang nabigyang-inspirasyon kang unahin sa puntong ito ng iyong buhay? Bakit?

Habang patuloy mong pinag-aaralan ang Joseph Smith—Kasaysayan sa buong lesson, patuloy na punan ang chart sa iyong study journal. Maghanap ng mga paraan kung paano mo matutularan ang halimbawa ni Joseph para makahanap ng mga sagot sa sarili mong mga tanong. Sa quadrant na “Ang gagawin ko,” isulat ang mga impresyong natanggap mo na gagawin mo.

Matapos basahin ng mga estudyante ang sumusunod na talata, sabihin sa kanila na patuloy na punan ang quadrant na “Ang ginawa ni Joseph” sa pisara.

Basahin ang Joseph Smith—Kasaysayan 1:11–14, at alamin ang mga karagdagang ginawa ni Joseph para malaman ang katotohanan ng Diyos. Maaari mong isulat ang nalaman mo sa quadrant na “Ang ginawa ni Joseph.”

Kung pinili mong panoorin ang video na “Ang Panunumbalik,” i-pause ito sa tuwing makatutukoy ang mga estudyante ng isang bagong tanong ni Joseph o ginawa niya. Sabihin sa isang estudyante na idagdag ang mga ito sa quadrants sa pisara.

Ang mga ito ay mga halimbawa ng mga ginawa ni Joseph sa video na maaaring mapansin ng mga estudyante: nagtanong sa kanyang mga magulang, nakipag-usap sa mga mangangaral, naglaan ng oras na pagnilayan ang natutuhan niya, nagbasa ng maraming talata mula sa Biblia, at hindi sumuko nang hindi kaagad dumating ang mga sagot.

• Kahit hindi nalaman ni Joseph kung aling simbahan ang sasapian, ano ang nalaman niya tungkol sa Diyos? (Tingnan sa “Pagtatamo ng Espirituwal na Kaalaman,” Doctrinal Mastery Core Document (2023), mga talata 2–3.)

• Sa iyong palagay, bakit kaya gustung-gusto ng Diyos na tulungan tayo na matuklasan ang katotohanan? (Tingnan sa Joseph Smith—Kasaysayan 1:11.)

• Alin sa mga ginawa ni Joseph ang nasubukan mo na sa iyong buhay? Alin ang gusto mong subukan?

Alalahanin ang paanyaya ni Pangulong Nelson na “tularan ang halimbawa ni Propetang Joseph.” Humingi ng tulong sa Ama sa Langit habang iniisip mo ang maaari mong gawin para matularan ang halimbawa ni Joseph sa paghahanap mo ng katotohanan.

Kung kinakailangan, maaari kang magbahagi ng mga paraan na matutularan ng mga estudyante ang halimbawa ni Joseph Smith, tulad ng mga ito:

• Maghanap ng banal na kasulatan na makabuluhan sa iyo. Planuhing pagnilayan ito nang paulit-ulit. Maaari kang gumawa ng isang poster at maaari mo itong ilagay kung saan mo makikita ang talata sa buong maghapon. O maaari mo itong subukang isaulo at bigkasin ito batay sa pagkakaalala mo araw-araw sa loob ng isang linggo.

• Magpasiyang manalangin sa Diyos nang malakas sa isang pribadong lugar. Gumawa ng outline ng gusto mong isama sa iyong panalangin.

Sa quadrant na “Ang gagawin ko” sa iyong study journal, sumulat ng isa o dalawang paraan na matutularan mo ang halimbawa ni Joseph Smith. Isama ang mga partikular na detalye kung paano mo isasagawa ang mga gawaing ito habang naghahanap ka ng mga sagot mula sa Diyos. Maaari mong ibahagi ang iyong plano sa isang pinagkakatiwalaang kaibigan o kapamilya. Mahalagang tandaan na kahit ang pinakamagagandang plano ay maaaring matagalan bago makuha ang mga ninanais na resulta. Bumalik sa iyong study journal at sa Joseph Smith—Kasaysayan paminsan-minsan para masuri kung ano na ang progreso ng ginagawa mo.

Hayaang magpatotoo ang mga estudyante tungkol sa matatapat na gawain na maaaring humantong sa paghahayag at mga sagot sa mga espirituwal na tanong. Magpatotoo na kapag tinularan natin ang halimbawa ni Joseph Smith, tutulungan tayo ng Diyos na malaman ang katotohanan para sa ating sarili.

Karagdagang Resources

Paano kaya idinaraos ang mga miting ng simbahan na dinaluhan ni Joseph Smith?

Maaaring madagdagan ang iyong kaalaman sa pagbabasa ng “Mga Awakening at Revival” at “Mga Simbahang Kristiyano Noong Panahon ni Joseph Smith,” na matatagpuan sa ChurchofJesusChrist.org at sa “Mga Paksa sa Kasaysayan ng Simbahan” sa Gospel Library.

Bakit ko kailangang humingi sa Diyos?

Itinuro ni Elder Neil L. Andersen ng Korum ng Labindalawang Apostol:

Ang espirituwal na mga tanong ay nararapat sa espirituwal na mga sagot mula sa Diyos. (Neil L. Andersen, “Joseph Smith,” Liahona, Nob. 2014, 28)

Ano pa ang maaari kong gawin para mahanap ang mga sagot sa mga tanong ko?

Matapos tayong anyayahang tularan ang halimbawa ni Joseph Smith, sinabi pa ni Pangulong Russell M. Nelson:

Humanap ng tahimik na lugar na palagi ninyong mapupuntahan. Magpakumbaba sa harapan ng Diyos. Ibuhos ang inyong puso sa inyong Ama sa Langit. Humiling sa Kanya ng kasagutan at kapanatagan.

Ipanalangin sa pangalan ni Jesucristo ang inyong mga alalahanin, ang inyong mga takot, mga kahinaan—oo, ang pinakainaasam ng inyong puso. At makinig! Isulat ang mga naiisip ninyo. Itala ang inyong nadama at isagawa ang mga ipinahiwatig na gawin ninyo. Habang inuulit ninyo ang prosesong ito araw-araw, buwan-buwan, taun-taon, kayo ay “uunlad sa alituntunin ng paghahayag.” (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 95)

Joseph Smith—Kasaysayan 1:14. Ano ang kahalagahan ng pagdarasal nang malakas?

Sinabi ni Elder Jeffrey R. Holland ng Korum ng Labindalawang Apostol:

Isa sa magagandang aral na natutuhan ko tungkol sa panalangin ay ang kapangyarihang dumarating mula sa pagdarasal nang malakas. Para sa akin, may kaibahan sa pagbanggit ng mga salita. Ito ang isa sa pinakamahahalagang paraan na natutuhan ko upang talagang maabot ang langit at marinig ang tinig ng Panginoon.

Kailangan nating magbigay ng oras—mabuting oras, oras para sa mga bagay na may mataas na prayoridad—kung kailan makaluluhod tayo, kung maaari, at hayagang mananalangin. Bigkasin ninyo ang mga salita. Naniniwala ako na ang prosesong ito ay mahalaga sa kung paano nakikipag-ugnayan sa atin ang Diyos at kung paano Niya nais na makipag-ugnayan tayo sa kanya. (Jeffrey R. Holland, “Paano Ko Ginagawang Pakinggan Siya,” ChurchofJesusChrist.org)

Mga Karagdagang Aktibidad sa Pag-aaral

Pagtatanong tungkol sa katotohanan

Para simulan ang klase, sabihin sa mga estudyante na isulat ang dalawang totoong pahayag tungkol sa kanilang sarili at isang pahayag na mali. Pagkatapos ay maaari silang maghalinhinan sa pagbabahagi ng mga pahayag na ito sa maliliit na grupo o sa klase. Maaaring hulaan ng mga kaklase kung aling mga pahayag ang totoo at kung alin ang mali. Kapag tapos na ang mga estudyante, talakayin kung bakit maaaring madali o mahirap matukoy ang katotohanan. Ipaliwanag na noong 1838, maraming maling impormasyon ang ipinalaganap tungkol kay Joseph Smith at sa Simbahan ni Jesucristo. Ito ang naghikayat kay Joseph na isulat ang katotohanan tungkol sa kanyang buhay at sa Pagpapanumbalik ng Simbahan. Kalaunan, ang salaysay na ito ay naging bahagi ng ating banal na kasulatan at matatagpuan ito ngayon sa Joseph Smith—Kasaysayan.

Hikayatin ang mga estudyante na markahan ang pariralang “[mga] mananaliksik ng katotohanan” sa Joseph Smith—Kasaysayan 1:1. Para maging mas angkop ito, maaari din nilang isulat ang tulad ng “Paano ako magiging mananaliksik ng katotohanan” sa margin ng kanilang banal na kasulatan o sa naka-highlight na mga tala sa kanilang Gospel Library. Pag-aralan ang Joseph Smith—Kasaysayan at maghanap ng mga alituntunin na tutulong sa mga estudyante na maging mga mananaliksik ng katotohanan.

Ang pagtanggap ng mga sagot ay kadalasang nangangailangan ng panahon

Maaaring makatulong na ipaliwanag sa mga estudyante na si Joseph Smith ay nagsimulang magtanong tungkol sa kanyang kaligtasan noon pang edad 12 (tingnan sa “Humiling nang may Pananampalataya,” Mga Banal, 1:10). Itanong ang tulad nito: “Sa iyong palagay, bakit hinayaan ng Ama sa Langit si Joseph na maghanap ng mga sagot nang napakatagal bago nagpakita sa Sagradong Kakahuyan? Paano makatutulong sa atin na nalalaman natin ito tungkol kay Joseph habang nagsisikap tayong tularan ang kanyang halimbawa at maghanap ng mga sagot?”

“Paulit-ulit kong pinagmuni-muni ito.”

Maglagay ng isang basahan sa isang mangkok na puno ng tubig. Sabihin sa isang estudyante na pigain ang basahan para lumabas ang tubig. Nang hindi ibinabalik ang basahan sa mangkok, sabihin sa isa pang estudyante na pigain pa ito para mas maraming lumabas na tubig. Patuloy itong ipasubok sa mga estudyante hangga’t gusto nila. Gamitin ang Joseph Smith—Kasaysayan 1:12 para ipaliwanag na mas marami tayong nakukuha mula sa mga banal na kasulatan kapag pinagninilayan at pinag-iisipan natin ang mga ito nang “paulit-ulit.” Maaaring magsanay ang mga estudyante sa pagbabasa ng mga salita ni Santiago sa Joseph Smith—Kasaysayan 1:11 nang maraming beses, habang sinisikap na matukoy ang isang bagong bagay na maaaring hindi pa nila nakita sa unang pagkakataon. O maaari mong sabihin sa kanila na tukuyin ang mga salita o parirala na makatutulong na magpaliwanag o pag-isipan nang malalim. Maaari silang makinabang mula sa nalaman nila na ang “nagbibigay nang sagana sa lahat at hindi nanunumbat” ay tumutukoy sa Diyos na sagana sa pagbibigay ng mga sagot sa ating mga tanong at hindi nagagalit kapag hinihingi natin ang mga ito. Isipin ang iba pang mga paraan na matutulungan mo ang mga estudyante na pagnilayan ang Santiago 1:5 nang “paulit-ulit.”