“Lesson 165—Paghahangad ng Personal na Paghahayag para sa Aking mga Tanong,” Manwal ng Titser ng Seminary para sa Doktrina at mga Tipan (2025)
“Paghahangad ng Personal na Paghahayag para sa Aking mga Tanong,” Manwal ng Titser ng Seminary para sa Doktrina at mga Tipan
Lesson 165: Doctrinal Mastery: Paghahanap ng mga Sagot sa Aking mga Tanong
Paghahangad ng Personal na Paghahayag para sa Aking mga Tanong
Pagtatamo ng Espirituwal na Kaalaman, Bahagi 1
Mahal ng Ama sa Langit ang Kanyang mga anak at gusto Niyang maging katulad natin Siya. Habang hinahangad nating malaman ang tungkol sa Kanya, nangako ang Ama sa Langit na ihahayag ang katotohanan sa ating puso’t isipan sa pamamagitan ng Espiritu Santo (tingnan sa Doktrina at mga Tipan 8:2; Moroni 10:5). Ang lesson na ito ay makatutulong sa mga estudyante na maunawaan kung paano sila makatatanggap ng patnubay at paghahayag mula sa Diyos sa pamamagitan ng Espiritu Santo.
Mga Posibleng Aktibidad sa Pag-aaral
Espirituwal na makaligtas
Maaari mong simulan ang lesson sa pagguhit ng stick figure sa pisara na kumakatawan sa isang teenager. Maaari ding kopyahin ng mga estudyante ang stick figure na ito sa kanilang study journal. Maaaring masiyahan ang mga estudyante na pangalanan ang stick figure, pati na rin ang ilang pangunahing katangian tulad ng edad, mga libangan, at mga paboritong pagkain.
Habang sinasagot ng mga estudyante ang una sa mga sumusunod na tanong, isulat ang kanilang mga sagot sa paligid ng stick figure sa pisara.
-
Ano ang maaaring magpahirap sa mga teenager para espirituwal na makaligtas sa mundo ngayon?
-
Ano ang makatutulong sa atin para madaig ang mga hamon o impluwensyang ito?
Ibinahagi ni Pangulong Russell M. Nelson ang isang paraan para espirituwal na makayanan natin ang mga hamon at madaig ang mga impluwensyang kinakaharap natin:
Ang social media at ang 24 na oras na pagbabalita ay inaatake tayo ng walang humpay na mga mensahe. Kung gusto nating magkaroon ng pagkakataong masuri ang iba’t ibang opinyon at mga pilosopiya ng tao na sumisira ng katotohanan, kailangan tayong matutong tumanggap ng paghahayag. …
… Sa darating na mga araw, hindi magiging posible na espirituwal na makaligtas kung walang patnubay, tagubilin, at nakapagpapanatag [at patuloy] na impluwensya ng Espiritu Santo.
Mahal kong mga kapatid, nakikiusap ako sa inyo na dagdagan ang inyong espirituwal na kakayahan na tumanggap ng paghahayag. (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 96)
-
Anong mga salita o parirala mula sa pahayag na ito ang partikular na makabuluhan sa inyo? Bakit?
-
Sa inyong palagay, bakit ang pagtanggap ng paghahayag mula sa Espiritu Santo ay mahalaga para tayo espirituwal na makaligtas sa ating mundo?
Sabihin sa mga estudyante na pagnilayan ang sarili nilang pangangailangan sa paghahayag. Maaari mo silang anyayahang isulat sa kanilang journal ang mga tanong nila o mga dahilan kung bakit kailangan nila ng paghahayag ngayon sa kanilang buhay. O maaari mo ring ipabahagi sa mga estudyante ang ilan sa mga tanong nila o hamon na naranasan nila sa paghahangad nila ng paghahayag noon.
Hikayatin sila sa pag-aaral nila ngayon na hanapin ang mga turo at paanyaya na makatutulong sa kanila na maghandang tumanggap ng paghahayag mula sa Diyos para sa kanilang buhay.
Pagtanggap ng patnubay at paghahayag mula sa Diyos
Basahin ang Mosias 4:9 at Doktrina at mga Tipan 38:1–3, at alamin ang mga katangian ng Diyos na makatutulong sa atin na hingin ang Kanyang patnubay.
-
Ano ang itinuturo sa inyo ng mga banal na kasulatang ito tungkol sa Diyos?
Bigyan ang maraming estudyante ng pagkakataong sagutin ang nakaraang tanong. Kabilang sa maraming sagot na maaaring maibigay ng mga estudyante, maaari nilang mabanggit ang katotohanang tulad ng sumusunod: Taglay ng Diyos ang lahat ng karunungan at nalalaman Niya ang lahat ng bagay.
-
Paano makakaimpluwensya ang pag-alam sa mga katangiang ito ng Diyos sa hangarin ninyong gabayan at turuan Niya kayo?
Isulat sa pisara ang sumusunod na heading: Paano ako makatatanggap ng mga sagot mula sa Diyos?
Pag-aralan ang mga talata 1–3 ng bahaging “Pagtatamo ng Espirituwal na Kaalaman” sa Doctrinal Mastery Core Document (2023). Salungguhitan ang mga salita o parirala na naglalarawan kung ano ang magagawa ninyo para makatanggap ng mga sagot mula sa Diyos sa ating mga espirituwal na tanong.
Bukod sa pag-aaral mula sa Doctrinal Mastery Core Document, maaari mo ring sabihin sa mga estudyante na saliksikin ang mga banal na kasulatan para sa mga turo na naglalarawan kung ano ang magagawa natin para makatanggap ng mga sagot mula sa Diyos. Kasama sa mga halimbawa ng mga banal na kasulatan na maaari mong sabihin sa mga estudyante na pag-aralan ang 2 Nephi 32:3–5; Moroni 10:4–5; Doktrina at mga Tipan 9:7–9; 42:61.
-
Ano ang natutuhan ninyo tungkol sa magagawa natin para madagdagan ang ating kakayahang tumanggap ng mga sagot sa ating mga tanong mula sa Diyos?
Maaari mong anyayahan ang mga estudyante na ilista sa pisara ang nahanap nila.
Sa halip na itanong ang sumusunod, maaari mong hilingin sa iba’t ibang estudyante na pumili ng isa sa mga salita o parirala sa pisara na tila partikular na makabuluhan sa kanila. Pagkatapos ay maaari nilang ipaliwanag kung bakit sa palagay nila ay mahalagang paraan ang salita o pariralang iyon para makapaghanda tayo na makatanggap ng mga sagot sa ating mga tanong.
-
Sa inyong palagay, bakit mahahalagang paraan ang mga gawaing ito para maihanda tayo sa pagtanggap ng paghahayag sa pamamagitan ng Espiritu Santo?
-
Ano ang mga naging karanasan ninyo sa pagtanggap ng personal na paghahayag? Ano ang mga ginawa ninyo na nakatulong para maihanda kayong tanggapin ito?
Tulungan ang mga estudyante na maunawaan na hindi sila dapat magbahagi ng anumang karanasan na masyadong personal o sagrado. Maaari ka ring magbahagi ng isang karanasan mula sa sarili mong buhay.
Ipamuhay ito
Sabihin sa mga estudyante na isipin ang natutuhan nila ngayon na makatutulong sa mga tanong nila. Pagkatapos ay ibahagi ang sumusunod upang matulungan ang mga estudyante na maipamuhay ang mga turo na natutuhan nila ngayon.
Alalahanin ang payo ni Pangulong Nelson na pinag-aralan ninyo sa simula ng lesson: “Nakikiusap ako sa inyo na dagdagan ang inyong espirituwal na kakayahang tumanggap ng paghahayag” (“Paghahayag para sa Simbahan, Paghahayag para sa Ating Buhay,” 96).
Pagnilayan ang natutuhan at nadama ninyo ngayon na makatutulong sa inyo na sundin ang payong ito. Isulat sa inyong study journal ang gagawin ninyo para madagdagan ang kakayahan ninyong tumanggap ng personal na paghahayag sa pamamagitan ng Espiritu Santo.
Kapag natapos nang magsulat ang mga estudyante sa kanilang study journal, maaari mong hilingin sa ilang boluntaryo na ibahagi sa klase ang kanilang mga plano.
Kung may sapat na oras, maaari mong ipaalam sa mga estudyante na sa mga susunod na lesson, matututuhan nila ang tungkol sa tatlong alituntunin ng pagtatamo ng espirituwal na kaalaman na tutulong din sa kanila na makatanggap ng mga sagot sa kanilang mga tanong. Maaaring mayroon ka nang ilang estudyante na nakakaalam sa tatlong alituntunin ng pagtatamo ng espirituwal na kaalaman. Maaari mong hilingin sa kanila na ibahagi kung alam nila ang mga ito o ipahanap ang mga ito sa mga estudyante sa Doctrinal Mastery Core Document. Sabihin sa kanila na magkakaroon sila ng mga pagkakataon sa seminary na madagdagan ang kanilang kakayahang tumanggap ng paghahayag.