Lesson 167: Doctrinal Mastery: Paghahanap ng mga Sagot sa Aking mga Tanong

Pagsuri sa mga Paksa at mga Tanong tungkol sa Ebanghelyo nang may Walang-hanggang Pananaw

Pagtatamo ng Espirituwal na Kaalaman, Bahagi 3

Ang isang layunin ng doctrinal mastery ay tulungan ang mga estudyante na maging pamilyar sa mga alituntunin ng pagtatamo ng espirituwal na kaalaman upang magamit nila ang mga ito sa buong buhay nila. Ang lesson na ito ay makatutulong sa mga estudyante na masuri ang mga konsepto at tanong nang may walang-hanggang pananaw at mas makita ang mga ito tulad ng pagkakita rito ni Jesucristo.

Mga Posibleng Aktibidad sa Pag-aaral

Ang Mata ng Pananampalataya

Ipakita ang larawan sa ibaba at sabihin sa mga estudyante na ilarawan sa isipan ang sitwasyon.

Isipin kunwari na pumasok kayo sa isang museo at nakakita kayo ng exhibit na tulad nito. Paano ninyo ilalarawan ang nakikita ninyo?

• Ano kaya ang maiisip ninyo kung sinabi sa inyo ng isang taong nakatingin sa exhibit ding iyon na nakita niya ang hugis ng mata ng tao?

Ipaliwanag na mula sa iba’t ibang anggulo, ang mga tuldok-tuldok ay nagpapakita ng larawan ng mata ng tao. Ipakita ang sumusunod na larawan. Maaari mo ring ipalabas ang video, na nagpapakita ng pagbabago ng pananaw hanggang sa makita ang mata.

• Ano ang matututuhan natin tungkol sa pananaw mula sa artwork na ito?

• Anong mga espirituwal na aral ang maaaring maunawaan natin sa tulong nito?

Matapos ibahagi ng mga estudyante ang kanilang mga ideya, tulungan silang matuto mula kay Elder Neil L. Andersen ng Korum ng Labindalawang Apostol.

Tingnan ninyo ang magandang artwork na ito ni Michael Murphy. Mula sa perspektibong ito, hindi mo aakalaing isa itong malikhaing paglalarawan ng mata ng tao. Ngunit kapag tiningnan mo ang mga tuldok mula sa ibang perspektibo, makikita mo ang napakagandang likha ng isang artist.

Gayundin, nakikita natin ang mga espirituwal na katotohanan sa pamamagitan ng perspektibo ng mata ng pananampalataya. (Neil L. Andersen, “Ang Mata ng Pananampalataya,” Liahona, Mayo 2019, 35)

• Ano sa palagay ninyo ang ibig sabihin ng makita ang mga espirituwal na katotohanan nang may “mata ng pananampalataya”?

• Ano kung minsan ang nagpapahirap sa atin na makita ang mga espirituwal na katotohanan sa ganitong paraan?

Nakikita kung paano nakikita ng Panginoon

Kapag kailangan natin ng tulong sa pagtingin sa doktrina, mga tanong, o isyung panlipunan mula sa pananaw ng pananampalataya, magagamit natin ang mga alituntunin ng pagtatamo ng espirituwal na kaalaman:

1. Kumilos nang may pananampalataya.

2. Suriin ang mga konsepto at tanong nang may walang-hanggang pananaw.

3. Hangaring mas makaunawa sa pamamagitan ng sources na itinalaga ng Diyos.

Sa lesson na ito, pagtutuunan natin ang pagsuri sa mga konsepto at tanong nang may walang-hanggang pananaw.

Sabihin sa mga estudyante na ipaliwanag ang pagkaunawa nila sa kung ano ang ibig sabihin ng suriin ang mga konsepto at tanong nang may walang-hanggang pananaw.

Basahin ang mga talata 8–10 sa bahaging “Pagtatamo ng Espirituwal na Kaalaman” ng Doctrinal Mastery Core Document (2023) para malaman kung ano ang magagawa natin para magkaroon ng walang-hanggang pananaw.

• Ano ang natutuhan ninyo mula sa mga talatang ito tungkol sa kahalagahan ng pagkakaroon ng walang-hanggang pananaw?

• Ano ang makatutulong sa inyo na magkaroon ng walang-hanggang pananaw?

Maaari ninyong markahan ang pariralang ito sa talata 8: Hinahangad natin ang tulong ng Espiritu Santo para makita ang mga bagay-bagay ayon sa pagtingin dito ng Panginoon.

• Ano sa palagay ninyo ang ilang pakinabang ng pagsisikap na makita ang ating mga espirituwal na tanong o alalahanin sa paraan ng pagtingin ng Panginoon sa mga ito?

Maghanap ng dalawa o tatlong talata sa banal na kasulatan na makatutulong sa inyo na maunawaan ang kahalagahan ng pananaw ng Panginoon.

Narito ang ilang talata na pag-iisipan:

• Isaias 55:8–9

• 2 Nephi 9:20

• Doktrina at mga Tipan 38:1–2

• Doktrina at mga Tipan 88:6, 41

Upang matulungan ang mga estudyante na pag-isipan ang nabasa nila, sabihin sa kanila na magsulat ng buod ng natutuhan nila tungkol sa Diyos. Maaari mong anyayahan ang ilang estudyante na ibahagi ang isinulat nila o sabihin sa mga estudyante na magbahagi sa isang ka-partner.

• Ano ang itinuturo ng mga talatang ito tungkol sa Diyos na maaaring maghikayat sa atin na makita ang mga bagay-bagay mula sa Kanyang pananaw?

Iba’t ibang pananaw

Ang sumusunod na aktibidad ay makatutulong sa mga estudyante na magsanay na ikumpara ang makamundong pananaw sa walang-hanggang pananaw. Maaari mong simulang ilahad ang isang sitwasyong tulad ng sumusunod at tulungan ang mga estudyante na pag-isipan ang dalawang pananaw.

Kamakailan ay nagtapos si Ryan ng high school. Nagsimula siyang makipag-date sa isang babae na hindi miyembro ng Ang Simbahan ni Jesucristo ng mga Banal sa mga Huling Araw. Dahil naging mas seryoso na ang kanilang relasyon, kamakailan ay naisip ng babae na maaari silang magsama sa halip na magpakasal.

Sabihin sa klase na talakayin ang sumusunod na tanong at ilista sa pisara ang mga sagot sa ilalim ng heading na pinamagatang “Makamundong pananaw.” Maaari mong ipaalala sa mga estudyante ang artwork na ipinakita sa simula ng lesson. Maaari mong ipakita ang side view ng artwork ng mata sa talakayang ito.

• Kung limitado o makamundo ang pananaw ni Ryan, bakit kaya magandang ideya ito sa kanya?

Kung kailangan ng mga estudyante ng tulong sa pag-iisip ng mga dahilan, maaari mong ibahagi ang sumusunod na talata.

Kung titingnan ni Ryan ang desisyong ito nang may makamundong pananaw, maaari siyang makakita ng ilang kapakinabangan sa pagsasama nila ng kanyang kasintahan sa halip na magpakasal. Maaaring isipin niya na makakatipid siya ng pera dahil hindi niya magagastos ito sa mamahaling singsing at kasal. Maaaring isipin niya na dahil hindi sila kasal, walang gaanong stress at hindi mangangailangan ng kanyang lubos na katapatan. Kung magiging maayos ang lahat, maaari silang magpakasal kalaunan.

Ngayong tiningnan na ng mga estudyante ang sitwasyong ito sa makamundong pananaw, tulungan silang tingnan ito nang may walang-hanggang pananaw. Kung ipinakita mo ang side view ng mata sa huling talakayan, ipakita ngayon ang larawan kung saan makikita ang mata.

Sa pisara, isulat ang heading na “Walang-hanggang pananaw,” at sabihin sa mga estudyante na ilista ang mga sagot sa sumusunod na tanong sa ilalim ng heading na ito. Maaari mong ituro sa mga estudyante ang resources na tulad ng “Ang Mag-anak: Isang Pagpapahayag sa Mundo” o Para sa Lakas ng mga Kabataan: Isang Gabay sa Paggawa ng mga Pagpili (2022).

• Kung pangwalang-hanggan ang pananaw ni Ryan, bakit pipiliin niyang huwag silang magsama ng kasintahan niya?

Kung kailangan ng mga estudyante ng tulong sa pagsagot sa tanong, maaari mong ibahagi ang sumusunod na talata. Mainam kung ang mga estudyante ay magkakaroon ng sarili nilang mga sagot habang nakikibahagi sila sa talakayan.

Kung titingnan ni Ryan ang desisyong ito nang may walang-hanggang pananaw, maaari niyang isaalang-alang ang ilan sa mga sumusunod na bagay: Ang kaligayahan ay nagmumula sa pagsunod kay Jesucristo at sa pamumuhay ng Kanyang mga turo. Hindi gugustuhin ni Ryan na [magkasala] laban sa Diyos” (Genesis 39:9) sa paglabag sa batas ng Panginoon sa kalinisang-puri, na kinapapalooban ng pag-iwas sa seksuwal na relasyon bago ikasal. Itinuturo din ng ebanghelyo ni Jesucristo na ang mga bata ay may karapatang isilang sa isang pamilya kung saan ang ama at ina ay kasal at tapat sa kanila at sa isa’t isa. Nauunawaan ni Ryan na maaari siyang makipagtipan sa Diyos sa templo upang maging walang hanggan ang kanyang mga ugnayan.

Ang sumusunod na maikling video ay nagpapakita ng kalinawan na maaari nating matamo sa paggawa ng mga desisyon kapag tinitingnan natin ang mga tanong at isyung panlipunan nang may walang-hanggang pananaw.

Ngayong nasuri na ng mga estudyante ang isang sitwasyon, maaari mo silang anyayahang talakayin ang iba pang mga sitwasyon nang mag-isa o sa maliliit na grupo. Maaari nilang tingnan ang ibang tanong o isyung panlipunan sa makamundo at walang-hanggang pananaw.

Upang matulungan ang mga estudyante na matalakay ang kahalagahan ng pagkukumpara ng makamundo at walang-hanggang pananaw, maaari mong itanong ang tulad ng mga sumusunod:

• Ano ang natutuhan ninyo sa pagkukumpara ng makamundong pananaw at walang-hanggang pananaw?

• Anong mga kapakinabangan ang maaaring dumating kapag nakita natin ang ating mga pagpili o tanong nang may walang-hanggang pananaw?

• Kailan ninyo napansin ang mga pagpapala na dulot ng pagtingin sa mga bagay-bagay nang may walang-hanggang pananaw?

Patotohanan ang mga katotohanang tinalakay ninyo ngayon. Hikayatin ang mga estudyante na patuloy na magsanay na gamitin ang mga alituntunin ng pagtatamo ng espirituwal na kaalaman habang naghahanap sila ng mga sagot sa kanilang mga tanong.

Karagdagang Resources

Paano ako makikipag-usap sa iba kapag naiiba ang aking pananaw sa pananaw nila?

Sinabi ni Pangulong Dallin H. Oaks ng Unang Panguluhan:

Iminumungkahi ko na mas makabubuti para sa ating mga kabataan na iwasang makipagtalo sa kanilang mga kasamahan. … Mas makabubuting tumugon sila sa pamamagitan ng pagtukoy sa mga makamundong paniniwala o palagay na kinakaharap nila at pagkatapos sa pagtukoy sa iba’t ibang palagay o paniniwala na gumagabay sa mga iniisip ng mga Banal sa mga Huling Araw. Hindi nito makukuha ang pagsang-ayon ng mga taong hindi natin kapanalig, ngunit makatutulong ito na hindi humantong sa pagtatalo ang talakayan. (Dallin H. Oaks, “As He Thinketh in His Heart” [gabi kasama ng isang General Authority, Peb. 8, 2013], broadcasts.ChurchofJesusChrist.org)

Paano nakakaimpluwensya sa aking pananaw ang pag-unawa sa plano ng kaligtasan?

Itinuro ni Pangulong M. Russell Ballard ng Korum ng Labindalawang Apostol:

Sa pamamagitan ni Propetang Joseph Smith, ibinigay ng Diyos ang Aklat ni Mormon, ang Doktrina at mga Tipan, at marami pang karagdagang mga turo sa Simbahan. Kabilang dito ang kaalaman tungkol sa plano ng kaligtasan, na isang mapa kung saan tayo nanggaling, ang layunin natin dito sa lupa, at saan tayo pupunta kapag namatay tayo. Ang plano ay naglalaan din sa atin ng natatangi, at walang-hanggang pananaw na tayo ay mga espiritung anak ng Diyos. Sa pagkaunawa kung sino ang ating Ama sa Langit at sa kaugnayan natin sa Kanya at sa Kanyang Pinakamamahal na Anak na si Jesucristo, tatanggapin natin ang Kanilang mga utos at gagawa ng mga tipan sa Kanila na aakay sa atin pabalik sa Kanilang piling. (M. Russell Ballard, “Ang Diyos ang Namamahala,” Liahona, Nob. 2015, 25)

Mga Karagdagang Aktibidad sa Pag-aaral

Ang walang-hanggang pananaw ni Jesucristo

Maaaring makapagbigay-inspirasyon sa mga estudyante na makita na napanatili ni Jesucristo ang walang-hanggang pananaw sa Kanyang mortal na buhay. Isiping basahin ang mga halimbawa sa mga banal na kasulatan kung saan tumugon si Jesucristo sa isang tanong o isyu batay sa Kanyang pagkaunawa sa plano ng kaligtasan ng Diyos. Kabilang sa mga halimbawa ang Lucas 2:49; Juan 6:35, 38, 42, 51; Juan 18:36; at marami pang ibang banal na kasulatan. Maaaring makatulong na basahin ang ilan sa nauugnay na mga talata o magbigay ng konteksto para sa binabasa ng mga estudyante. Maaari ding makinabang ang mga estudyante sa pagtalakay kung bakit sila nagpapasalamat na napanatili ni Jesucristo ang walang-hanggang pananaw upang maisakatuparan ang Kanyang banal na misyon.

Pag-aaral ng kasaysayan ng Simbahan

Tulungan ang mga estudyante na maunawaan ang mga pagkakaiba sa kultura ng ating mga kaugalian at tradisyon sa kultura ng mga tao noon. Ang isang paraan para magawa ito ay magpakita ng mapa ng mundo at anyayahan ang mga estudyante na maikling ibahagi ang nalalaman nila tungkol sa iba’t ibang bansa sa buong mundo. Maaaring talakayin ng mga estudyante kung ano ang matututuhan natin mula sa pagbisita sa iba’t ibang bansa at kung ano ang maaaring mahirap. Sabihin sa mga estudyante na pag-aralan ang mga talata 9 at 10 sa bahaging “Pagtatamo ng Espirituwal na Kaalaman” ng Doctrinal Mastery Core Document (2023), at alamin kung ano ang dapat gawin kapag mayroon tayong mga tanong tungkol sa kasaysayan. Maaari mo ring ipanood ang video na ito, kung saan nagpayo ang mananalaysay ng Simbahan na si Matthew Grow kung paano magsaliksik ng kasaysayan ng Simbahan.

Pagtingin sa mga isyu at tanong sa ibang pananaw

Ayon sa talata 8 sa bahaging Pagtatamo ng Espirituwal na Kaalaman ng Doctrinal Mastery Core Document (2023), ang pagtingin sa mga bagay-bagay tulad ng pagtingin ng Panginoon dito ay nagbibigay-daan sa atin na tingnan ang mga doktrinal na konsepto, tanong, at isyung panlipunan sa ibang pananaw. Tulungan ang mga estudyante na matutuhan kung paano sila mag-iiba ng pananaw, at pagkatapos ay hayaan silang magsanay. Ang sumusunod na tatlong hakbang ay maaaring makatulong na mga tagubilin na susundin ng mga estudyante. Maaari nilang gamitin ang handout na Pagtingin sa mga Tanong sa Ibang Pananaw para isulat ang kanilang mga tanong at palagay. Maaari mo ring ipanood ang video para mailarawan ang pagtingin sa mahihirap na tanong sa ibang pananaw.

1. Pumili ng tanong o isyung panlipunan.

2. Pag-isipan at isulat ang iba’t ibang palagay nila o ng isang taong may makamundong pananaw tungkol sa paksa.

3. Tingnan ang parehong tanong o isyung panlipunan nang may walang-hanggang pananaw. Pag-isipan ang mga tanong na tulad ng “Ano ang nalalaman ko tungkol sa Ama sa Langit, sa Kanyang plano, at kung paano Siya nakikitungo sa Kanyang mga anak?” at “Anong mga turo ng ebanghelyo ang nauugnay o naglilinaw sa konsepto o isyung ito?”