“Lesona 10—Joseph Smith—Tantara 1:27–50—Niseho tamin’i Joseph Smith i Môrônia,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Joseph Smith—Tantara 1:27–65,” Seminera momba ny Fotopampianarana sy Fanekempihavanana
Lesona 10: Fotopampianarana sy Fanekempihavanana 2; Joseph Smith—Tantara 1:27–65
Joseph Smith—Tantara 1:27–50
Niseho tamin’i Joseph Smith i Môrônia
Tamin’ny 21 septambra 1823, dia nivavaka tamin’ Andriamanitra i Joseph Smith mba hahazo famelan-keloka amin’ny fahotany sy hahalala ny toerana misy azy eo anatrehan’ Andriamanitra. Ho valin’izany dia niseho tamin’i Joseph Smith ny mpaminany Môrônia mba hampianatra azy momba ny Bokin’i Môrmôna sy ireo faminaniana fahiny momba ny Famerenana amin’ny laoniny ny filazantsara. Naminany momba ny hoavin’i Joseph ihany koa i Môrônia. Ity lesona ity dia afaka manampy ny mpianatra hahatsapa ny lanjan’ny fiantsoana an’i Joseph ho mpaminanin’ Andriamanitra.
Ireo sahanasa fianarana azo atao
Namariparitra ny fahatanorany i Joseph Smith.
Mba hanomanana ny mpianatra hianatra momba ny zavatra niainan’i Joseph Smith tamin’ny fahatanorany, dia hevero ny hanasa azy ireo hizara teny izay mamariparitra zatovo. Azo atao ho solon’izany ihany koa ny fampisehoana teny sy andian-teny eny amin’ny solaitrabe izay mamariparitra an’i Joseph Smith tamin’ny fahazatovony. Ohatra, “matetika aho no nahatsiaro ho meloka noho ny fahalemeko sy ny tsy fahatanterahako”. Azon’ny mpianatra atao ny manamarika ireo izay mahakasika azy ireo.
Azonao atao ny mamporisika ny mpianatra hijery famaritana izay teny tsy azon’izy ireo ato amin’ity andalan-tsoratra masina manaraka ity. Ity endri-piasana ity dia azo ampiasaina ao amin’ny application Médiathèque de l’Évangile. Lokoy miavaka ny teny iray ary fanteno ny safidy hoe “définir.”
Vakio ny Joseph Smith—Tantara 1:27–29, hitadiavana ny fomba nilazalazan’i Joseph Smith ny zavatra tsapany nandritra ireo telo taona taorian’ny Fahitana Voalohany.
-
Ahoana no ahafahan’ny zatovo amin’izao androntsika izao hampifandray ny tenany amin’i Joseph Smith?
Nanana asa ho an’i Joseph Smith Andriamanitra.
Ny andian’andininy manaraka dia andian-dahatsoratra hovakina. Hevero ny zavatra ilain’ny mpianatrao sy ny fahaizan’izy ireo rehefa misafidy fomba famakian-teny ianao. Azonao atao ny mamaky izany miaraka amin’ny iray kilasy (mampifandimby ny mpianatra mamaky), mampamaky tsiroaroa ny mpianatra, na mandefa ilay raki-peo ary manasa ny mpianatra hanaraka ao amin’ny soratra masin’izy ireo.
Aorian’ny fanontaniana voalohany, dia azonao atao ny miato kely sy miresaka ny zavatra hitan’ny mpianatra fa afaka manampy azy ireo amin’ny zavatra iainan’izy ireo amin’ny maha-zatovo azy ireo.
Vakio ny Joseph Smith—Tantara 1:30–35 ary tadiavo ny zavatra niainan’i Joseph Smith rehefa nivavaka izy.
-
Inona no zavatra niainan’i Joseph ka mety ho nanome azy fanantenana?
-
Inona avy no fahamarinana azontsika ianarana avy amin’ireo andininy ireo momba an’i Joseph Smith?
Azon’ny mpianatra atao ny mitady fahamarinana isan-karazany, ao anatin’izany ny hoe niantso an’i Joseph Smith hanao ny asany Andriamanitra. Azonao hazavaina fa nandritra ny fotoana nahatsapan’i Joseph Smith ho meloka noho ny fahadisoany sy ny fahotany, dia nikatsaka famelan-keloka tamin-kitsimpo izy, ary niantso azy hanao ny asany Andriamanitra.
Nandritra ny alina sy vao marainan’ny 21–22 septambra 1823 dia niseho tamin’i Joseph intelo i Môrônia. Io hafatra io ihany no nozarainy ary ireo soratra masina ireo ihany no noresahiny isaky ny mandeha (jereo ny Joseph Smith—Tantara 1:36–50).
Mba hanampiana ny mpianatra hahita ohatra amin’ny asa izay hotanterahin’ Andriamanitra amin’ny alalan’i Joseph Smith, dia azonao atao ny mizara amin’ny mpianatra ireto faminaniana manaraka izay notanisain’i Môrônia ireto. Asao hamaky ireo andalan-tsoratra masina ny mpianatra, ka hitady ny fomba hifandraisan’izy ireo amin’ny asa niantsoana an’i Joseph mba hataony.
Vakio ireo andininy ireo hitadiavana ny antony hanomezan’ireo faminaniana ireo fahatakarana fanampiny an’i Joseph momba ny asa izay handeha hataony.
-
Ahoana no ifandraisan’ireo andininy ireo amin’ny asa niantsoan’ny Tompo an’i Joseph mba hataony?
-
Ahoana no mety hanamafisan’ireo faminaniana ireo ny fijoroana ho vavolombelona anananao momba ny antso masina hazonin’i Joseph?
Eo am-pamakiana ireo andininy ireo, dia mety ho tsikaritry ny mpianatra fa niantso an’i Joseph Smith ny Tompo mba hanampy amin’ny fanomanana ny olony ho amin’ny Fiaviany Fanindroany amin’ny alalan’ny Famerenana amin’ny laoniny ny filazantsara, izay ahitana ny famerenana amin’ny laoniny ny herin’ny famehezana sy ôrdônansin’ny tempoly, ny fanangonana an’i Isiraely, ary ny firotsahan’ny fitahiana ara-panahy hafa.
-
Inona no fiantraikan’ny asa notanterahin’ Andriamanitra tamin’ny alalan’i Joseph Smith tamin’ny zavatra fantatrao na tsapanao momba an’i Jesoa Kristy? (Jereo ny 2 Nefia 3:6–8, 11; Fotopampianarana sy Fanekempihavanana 135:3.)
Ho tsara sy ratsy laza ny anaran’i Joseph Smith
Sariho hifantoka amin’ny faminanian’i Môrônia momba ny anaran’i Joseph Smith ao amin’ny Joseph Smith Tantara—1:33ny sain’ny mpianatra. Ifanakalozy hevitra ny mety ho tsapan’i Joseph momba ilay faminaniana sy ny fomba ahatanterahin’izany ankehitriny. Ampio hahita ny mpianatra fa ny fahatanterahan’ilay faminaniana dia porofon’ny fiantsoana an’i Joseph Smith ho mpaminanin’ Andriamanitra.
-
Nahoana, araka ny eritreritrao, no tena betsaka ny fanoherana ny Mpaminany Joseph Smith?
Nampianatra toy izao ny Loholona Neil L. Andersen ao amin’ny Kôlejin’ny Apôstôly Roambinifolo:
Fa nahoana no avelan’ny Tompo hiara-hitranga amin’ny fanaratsiana ny filazana zavatra tsara momba ny olona iray? Ny antony iray dia ny hoe ny fanoherana ireo zavatra avy amin’ Andriamanitra no mamporisika ireo mpikatsaka ny fahamarinana handohalika hivavaka mba hahazoana valiny. …
Hitombo ireo fanaratsiana atao momba ny Mpaminany Joseph Smith arakaraka ny handrosoantsika mankany amin’ny Fiavian’ny Mpamonjy Fanindroany. Tsy hihena ny filazana zavatra tsy tena marina sy ny famitahana miharo hafetsena. Hisy olona ao amin’ny fianakaviana sy namana izay hila ny fanampianao. (Neil L. Andersen, “Joseph Smith,” Liahona, nôv. 2014, 28, 30)
-
Ahoana no mety hanampian’ny fahafantarana fa i Môrônia dia naminany ny hisian’ny mpitsikera izay hiteny zavatra “ratsy” momba an’i Joseph Smith?
-
Inona no azontsika atao mba ho vonona hanampy ireo izay mety miaina fanoherana noho ny finoan’izy ireo momba an’i Joseph Smith?
Manatanteraka ny faminaniana hiteny zavatra tsara momba an’i Joseph Smith
Ny Loholona Neil L. Andersen ao amin’ny Kôlejin’ny Apôstôly Roambinifolo dia nanome fanasana manokana ho an’ny zatovon’ny Fiangonana:
Fanamby voafaritra mazava tsara no omeko an’ireo zatovo izay mihaino an’ireto teny ireto amin’izao fotoana izao na mamaky ireto teny ireto any aoriana: Ataovy izay hahazoana fijoroana ho vavolombelona an’ny tenanao manokana momba ny Mpaminany Joseph Smith. Aoka ny feonareo hanampy amin’ny fanatanterahana ireo teny faminanian’i Môrônia ka hanatsara ny lazan’ny Mpaminany. (Neil L. Andersen, “Joseph Smith,” Liahona, nôv. 2014, 30)
-
Inona avy no fomba sasantsasany azonao anampiana amin’ny fanatanterahana ny faminanian’i Môrônia hiteny zavatra tsara momba an’i Joseph Smith?
Mba hanampiana ny mpianatra hahita ohatra amin’ny fomba nitenenan’ny Mpamonjy zavatra tsara momba an’i Joseph Smith, dia azonao atao ny mizara ireto toko sy andininy manaraka ireto amin’ny mpianatra: Fotopampianarana sy Fanekempihavanana 1:17; 35:17; 112:15; 136:37–38. Mangataha mpianatra vitsivitsy mba hizara ny zavatra nolazain’ny Mpamonjy momba an’i Joseph Smith.
Asao ny mpianatra hanao zavatra ao an-dakilasy mba hanampiana amin’ny fanatanterahana ny teny ara-paminaniana nataon’i Môrônia mba hilazana zavatra tsara momba an’i Joseph Smith. Ohatra, azon’izy ireo atao ny mizara ny fomba nanampian’i Joseph azy ireo hahafantatra momba an’i Jesoa Kristy na fomba hafa nitaoman’i Joseph Smith ny fiainan’izy ireo ho amin’ny tsara. Azo atao ihany koa ny manasa ny mpianatra handefa hafatra na amin’ny alalan’ny tambajotran-tserasera any amin’ny olona iray ivelan’ny kilasy.