10-р хичээл: Сургаал ба Гэрээ 2; Иосеф Смит—Түүх 1:27-65

Иосеф Смит—Түүх 1:27–50

Моронай Иосеф Смитэд үзэгдэв

Тэнгэр элч Моронай ба Иосеф Смит

1823 оны 9-р сарын 21-нд Иосеф Смит нүглээсээ өршөөгдөхийг гуйж, Бурханы өмнө эзлэх өөрийн байр суурийг мэдэхийн тулд Түүнд хандан залбирчээ. Хариуд нь бошиглогч Моронай Мормоны Ном болон Сэргээгдсэн сайн мэдээний тухай эртний бошиглолуудыг заахаар Иосефт үзэгдсэн. Моронай мөн Иосефын ирээдүйн тухай бошиглов. Энэ хичээл нь Бурханы бошиглогчийн хувьд Иосеф Смитэд өгсөн дуудлагын ач холбогдлыг мэдрэхэд суралцагчдад тусална.

Боломжит суралцах үйл ажиллагаа

Иосеф Смит өсвөр насаа дүрслэв

Суралцагчдыг Иосеф Смитийн өсвөр насны талаар сурч мэдэхэд нь бэлтгэхийн тулд өсвөр насны хүүхдүүдийг дүрсэлдэг үгсийг хуваалцахад урь. Өөр нэг арга бол Иосеф Смитийн өсвөр насыг дүрсэлсэн үг, хэллэгийг самбарт үзүүлэх юм. Жишээ нь: “Сул тал хийгээд төгс бусынхаа улмаас би буруутгагдах учиртай хэмээн олонтаа боддог байлаа.” Суралцагчид өөрт хамаатай зүйлээ чагталж болно.

Та дараах судрын хэсгүүд дээрх ойлгохгүй байгаа үгсийнхээ тайлбарыг олж мэдэхэд суралцагчдыг урамшуулан дэмжиж болно.

Иосеф Смит—Түүх 1:27–29-ийг уншаад, Анхны үзэгдлийн дараагийн гурван жилийн туршид төрсөн мэдрэмжээ Иосеф Смит хэрхэн дүрсэлснийг олж мэд.

• Өнөөгийн өсвөрийнхөн Иосеф Смитэд ямар байсныг хэрхэн ойлгож болох вэ?

Иосеф Смитээр хийлгэх ажил Бурханд байв

Дараагийн багц шүлэг нь уншихад зориулсан том бичвэр юм. Унших арга барилаа сонгохдоо суралцагчдын хэрэгцээ, чадварыг харгалзан үзээрэй. Ангиараа уншихдаа (өөр өөр суралцагчаар уншуулах) суралцагчдыг хосоор нь уншуул эсвэл аудио тоглуулан, суралцагчдыг судраа гүйлгэн уншихад урь.

Эхний асуултын дараа та түр азнаж, өсвөр насны суралцагчдын хувьд өөрсдөд нь тус болох юуг олж мэдсэн талаар ярилцахыг хүсэж болно.

Иосеф Смит—Түүх 1:30–35-ыг уншаад, Иосеф Смит залбирахдаа юуг мэдэрсэн талаар олж мэд.

• Иосефт тохиолдсон ямар үйл явдал түүнд итгэл найдвар төрүүлсэн байж болох вэ?

• Бид Иосеф Смитийн талаар ямар үнэнийг эдгээр шүлгээс мэдэж авч болох вэ?

Суралцагчид Бурхан Өөрийн ажлыг хийлгэхээр Иосеф Смитийг дуудсан гэх мэт өөр өөр үнэнийг тодорхойлж болно. Хэдийгээр Иосеф Смит сул тал хийгээд төгс бусынхаа улмаас өөрийгөө буруутгагдах учиртай хэмээн боддог байсан ч чин сэтгэлээсээ нүглээ наманчилсан төдийгүй Бурхан түүнийг Өөрийн ажлыг гүйцэлдүүлэхээр дуудсан гэдгийг онцол.

1823 оны 9-р сарын 21-ээс 22-нд шилжих шөнө болон үүрээр Моронай Иосефт гурван удаа үзэгджээ. Тэр ижил захиас хуваалцаж, ирэх бүрдээ нэг л судраа эш татсан (Иосеф Смит—Түүх 1:36–50-ийг үзнэ үү).

Бурханы Иосеф Смитээр дамжуулан гүйцэтгэх ажлын жишээг олж харахад нь суралцагчдад туслахын тулд Моронайн эш татсан дараах бошиглолуудыг ангийн гишүүдэд хувааж өг. Суралцагчдыг уг судрын хэсгүүдийг уншаад, тэдгээр нь Иосефоор хийлгэхээр дуудсан ажилтай хэрхэн хамаатай болохыг олж мэд.

Эдгээр шүлгийг уншаад, тэдгээр бошиглол яагаад Иосефын гүйцэтгэх ажлын талаар нэмэлт ойлголт өгдгийг олж мэд.

• Малахи 4:1, 5–6

• Исаиа 11:11–12

• Үйлс 3:22–23

• Иоел 2:28–29

• Эдгээр шүлэг Их Эзэний Иосефоор хийлгэхээр дуудсан ажилтай хэрхэн холбогдож байна вэ?

• Эдгээр бошиглол Иосефын тэнгэрлэг дуудлагын талаарх гэрчлэлийг тань хэрхэн хүчирхэгжүүлж болох вэ?

  Суралцагчид эдгээр шүлгийг уншиж байхдаа, Их Эзэн Иосеф Смитийг лацдан холбох хүч, ариун сүмийн ёслолууд, Израилын цугларалт болон бусад сүнслэг адислалын цутгалт зэрэг сайн мэдээний Сэргээлтээр дамжуулан Их Эзэний Хоёр дахь ирэлтэд Өөрийн хүмүүсийг бэлдэх ажилд туслуулахаар дуудсаныг олж харж болох юм.

• Бурханы Иосеф Смитээр дамжуулан хийж гүйцэтгэсэн ажил Есүс Христийн талаар таны мэддэг эсвэл боддог зүйлд хэрхэн нөлөөлсөн бэ? (2 Нифай 3:6–8, 11; Сургаал ба Гэрээ 135:3-ыг үзнэ үү.)

Иосеф Смитийн нэр сайн болон муугаар дурсагдана

Суралцагчдын анхаарлыг Иосеф Смит—Түүх 1:33 дахь Иосеф Смитийн нэрийн талаарх Моронайн бошиглолд хандуулна уу. Уг бошиглолын талаарх Иосефын бодол мөн энэ нь өнөө үед ямар арга замаар биелж байгааг ярилц. Суралцагчдад тухайн бошиглолын биелэл нь Иосеф Смит Бурханы бошиглогчоор дуудагдсаны нотолгоо гэдгийг олж харахад тусал.

• Яагаад Иосеф Смитийг тэгтлээ их эсэргүүцэж байсан гэж та бодож байна вэ?

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Ахлагч Нийл Л.Андэрсэн

Яагаад Их Эзэн хорон муу амтнуудыг сайн хүмүүсийн араас мөшгөж хөөцөлдөхийг нь зөвшөөрдөг юм бол? Бурханы зүйлсийн эсрэг зөрчилдөөн нь хариултаа авахын тулд үнэнийг эрэлхийлэгчдийг өвдөг сөгдөхөд хүргэдэг нь үүний нэг шалтгаан юм. …

Аврагчийн Хоёр дахь ирэлт ойртохын хэрээр бошиглогч Иосеф Смитийн талаарх сөрөг мэдээлэл улам бүр ихсэх болно. Хагас дутуу үнэн мэдээллүүд болон нарийн заль мэхнүүд багасахгүй. Та нарын тусламж хэрэгтэй гэр бүлийн гишүүд, найз нөхөд ч гарч ирэх болно. (Нийл Л.Андэрсэн, “Иосеф Смит,” 2014 оны 10-р сарын Ерөнхий чуулган, 31, 35)

• Моронай Иосеф Смитийг “муугаар” ярих шүүмжлэгчид байх болно гэдгийг бошиглосныг мэдэх нь хэрхэн тустай байж болох вэ?

• Иосеф Смитэд итгэдэг итгэл үнэмшлийг нь үгүйсгэсэн эсэргүүцэлтэй тулгарч байгаа хүмүүст туслахад бэлэн байхын тулд бид юу хийж болох вэ?

Иосеф Смитийг сайнаар ярих бошиглол биелэх

Арван хоёр төлөөлөгчийн чуулгын ахлагч Нийл Л.Андэрсэн Сүмийн өсвөр үеийнхэнд тусгайлан нэгэн урилга өгсөн.

Ахлагч Нийл Л.Андэрсэн

Өнөөдөр бидний үгийг сонсож байгаа эсвэл хэдэн өдрийн хойно унших өсвөр үеийнхэндээ хандаж хэлэхэд, би бошиглогч Иосеф Смитийн талаар өөрийн гэсэн гэрчлэлтэй болцгоогоорой гэсэн онцгой нэгэн даалгаврыг өгөх гэсэн юм. Бошиглогчийн талаар сайнаар дурсагдах болно гэсэн Моронайн бошиглолын үгс биелэхэд та нарын дуу хоолой туслах болтугай. (Нийл Л.Андэрсэн, “Иосеф Смит,” 2014 оны 10-р сарын Ерөнхий чуулган, 34)

• Иосеф Смитийн талаар сайнаар ярих болно гэсэн Моронайн бошиглол биелэхэд та ямар арга замаар тусалж болох вэ?

Аврагч Иосеф Смитийн талаар хэрхэн сайнаар ярьж байсан жишээг олж харахад нь суралцагчдад туслахын тулд дараах судрын эшлэлийг тэдэнд хувааж өгч болно. Үүнд: Сургаал ба Гэрээ 1:17; 35:17; 112:15; 136:37–38. Хэдэн суралцагчаас Иосеф Смитийн талаар Аврагч юу хэлснийг хуваалцахыг хүс.

Иосеф Смитийн талаар сайнаар ярих болно гэсэн Моронайн бошиглолын үгс биелэхэд туслах ямар нэгэн зүйлийг ангидаа хийхэд суралцагчдыг урь. Жишээлбэл: Иосеф тэдэнд Есүс Христийн талаар мэдэхэд хэрхэн тусалсан эсвэл Иосеф Смит амьдралд нь өөр ямар арга замаар сайнаар нөлөөлсөн тухай хуваалцаж болно. Мөн ангиас гадуурх хэн нэгэн рүү бичвэр бичих эсвэл олон нийтийн хэрэгслээр зурвас илгээхэд суралцагчдыг урьж болно.

Нэмэлт эх сурвалж

Иосеф Смитийн туршлага түүнийг бошиглогч гэдгийг хэрхэн гэрчилж байна вэ?

Арван хоёр төлөөлөгчийн чуулгын ахлагч Гэррит В.Гонг Иосеф Смит—Түүх 1:33–34 дэх бошиглолын талаар ийн заасан.

Ахлагч Гэррит В.Гонг

1823 онд Иосеф шинээр тусгаар тогтносон, бусдын мэддэггүй байсан нэгэн тосгонд амьдарч байсан ба хэний ч үл таних 17 настай хүү байв. Хэрэв энэ нь үнэн биш байсан бол тэрээр Бурханы ажлыг гүйцэтгэх зэмсэг болж, Бурханы бэлэг, хүчээр дамжуулан хожим нь хүн бүхний мэдэх ариун судрыг орчуулах болно хэмээн хэрхэн төсөөлөх байсан бэ?

Гэвч энэ нь үнэн тул энэхүү бошиглол биелж байгааг, тэр байтугай биднийг үүнд туслуулахаар урьсан гэдгийг та, би, бид бүгд гэрчилж чадна. (Гэррит В.Гонг, “Бүх үндэстэн, ястан, хэлтэн,” 2020 оны 10-р сарын Ерөнхий чуулган, 41)

Иосеф Смитийн өсвөр настай байх үеийн үлгэр жишээг та хэрхэн дагаж болох вэ?

Залуу эмэгтэйчүүдийн ерөнхий ерөнхийлөгч асан Сюзан В.Таннэр ийн хуваалцсан.

Сюзан В.Таннэр эгч

Иосеф анх Моронайтай уулзахдаа залуу эмэгтэйчүүд та нарын олонхын адил 17 настай байсан. Бид яг тэр цаг мөч, газрыг мэднэ. Энэ нь 1823 оны 9-р сарын 21-ний шөнө таван ах дүүг нь унтаж байх үеэр унтлагын өрөөнд болж өрнөсөн юм. Иосеф “[өөрийн] байдал хийгээд [Бурханы] өмнө хэрхэн зогсож байгааг мэдэхийн тулд” (ИС—Т 1:29) залбирсан байв. Иосеф өөрийгөө Бурханы өмнө хангалттай сайн биш, зохисгүй гэж боддог байж. Тэр “аливаа их, эсвээс хор хөнөөлтэй нүглүүдэд гэмтэй” байгаагүй ч “олон мунхаг алдаа гарган, залуу насны сул тал” (ИС—Т 1:28) байсан учир тайтгарахаар залбирчээ. Би та нарын олонхын ойлгож байгаачлан, Иосефт төрж байсан мэдрэмжийг мэднэ. Бидний хүн нэг бүр хангалттай сайн биш гэдгээ мэдрэн, бурханлаг тайтгарлыг эрэлхийлэн, хэр их өвдөг сөхрөн сууж байсан бэ?

Иосефын гэмшсэн, итгэлтэй залбирлын хариуд тэнгэрлэг элч Моронай түүнд үзэгджээ. Иосеф “Тэрээр намайг нэрээр минь дуудаад … надад зориулсан хийх нэгэн ажил Бурханд бий гэдгийг … хэлэв” (ИС—Т 1:33) хэмээн цэдэглэсэн. Иосеф “энэ ер бусын элчээр [түүнд] хэлэгдсэн зүйлд үлэмж ихээр” (ИС—Т 1:44) гайхширчээ.

Бид ч мөн адил залбирлынхаа хариуд сүнслэг тайтгарлыг хүлээн авч чадна. Бид мөн Тэнгэрлэг Эцэг маань биднийг нэрээр маань мэддэг мөн Түүнд дэлхийд биднээр гүйцэлдүүлэх зорилго байгаа гэх гэрчлэлийг хүлээн авах болно. (Susan W. Tanner, “Glad Tidings from Cumorah,” Liahona, May 2005, 104)

Иосеф Смит (1805–44) ийн бичсэн.

Бошиглогч Иосеф Смит

Арван долоон насандаа би Их Эзэнийг дахин дуудсан ба Тэрээр надад тэнгэрлэг үзэгдлийг үзүүлж, болгоогтун Их Эзэний тэнгэр элч ирэн, өмнө минь зогсож, шөнөөр тэрээр намайг нэрээр минь дуудан Их Эзэн миний нүглүүдийг уучилсан гэдгийг хэлэв. (Joseph Smith, “ History, circa Summer 1832 ,” The Joseph Smith Papers, 4, https://www.josephsmithpapers.org/paper-summary/history-circa-summer-1832/4)

Нэмэлт суралцах үйл ажиллагаа

Моронайн үзэгдсэн Смитийн байшингийн зураг

Суралцагчдад Моронайн Иосеф Смитэд үзэгдсэн сэргээн засварласан Смитийн байшингийн зургийг үзэх сонирхолтой байж болох юм (Иосеф Смит—Түүх 1:30–47-г үзнэ үү). Дараах зургуудыг үзүүл.

Смитийн-гэр

Моронайн-Иосефт-үзэгдсэн-өрөө

Суралцагчдад бошиглогч Иосеф Смитийн талаарх гэрчлэлээ хүчирхэгжүүлэхэд нь туслах

Бошиглогч Иосефын талаар хувийн гэрчлэлтэй болох ахлагч Андэрсэны урилгыг уншсаныхаа дараа суралцагчид судлах тэмдэглэлдээ дараах асуултуудад хариулж болно. Үүний дараа хэдэн суралцагч өөрсдийн ойлгосон зүйлийг сайн дураараа ангийнхантайгаа хуваалцаж болно. Иосеф Смитийн талаар хувьдаа гэрчлэлтэй байх нь яагаад чухал талаар ярилцахыг бод.

• Хэрэв та бошиглогч Иосеф Смитийн талаарх хувийн гэрчлэлээ хүчирхэгжүүлбэл хэрхэн адислагдана гэж бодож байна вэ?

• Иосеф Смит бол бошиглогч гэсэн гэрчлэлтэй болж, үүнийгээ хүчирхэгжүүлэхэд танд юу тусалсан бэ?

• Ямар үйл явдал танд Иосеф Смит бол бошиглогч гэдэгт итгэхэд тусалсан бэ?

Иосеф Смитийн бошиглогчийн дуудлагын нотолгоо

Иосеф Смитэд тулгарсан эсэргүүцэл болон түүний нэр “бүх үндэстний дунд … муугаар дурсагдаж” байгаа зэрэг нь тэрээр Бурханаар дуудагдсан гэсний нотолгоо гэдгийг олж харахад суралцагчдад тусал. Та Сатан үргэлж үнэнийг эсэргүүцдэг гэдгийг онцолж болно. Далын ахлагч Лорэнс И.Корбрижийн дараах мэдэгдлийг хуваалцаж болно.

“Эсэргүүцэл, шүүмжлэл, дургүйцэл нь үнэнтэй үргэлж хамт байдаг юм. Хүмүүний зорилго болон хувь заяанд хамаарах үнэн илчлэгдэх бүрд үүнийг сөрөх хүч үргэлж байдаг. …

Та бүхэн хамгийн шударга бусаар эсэргүүцэгдэн, үгүйсгэгдэж мөн гологдон, цохигдож, орхигдсон мөн цовдлогдоод бүх зүйлийн доор бууж ирсэн Нэгнийг хайгаад үз. Тэндээс та үнэнийг, бүх хүн төрөлхтний Аврагч, Бурханы Хүүг олох болно. Хүмүүс яагаад Түүнийг зүгээр байлгахгүй байсан бэ?

Яагаад? Яагаад гэвэл, Тэр бол үнэн. Мөн үнэн нь үргэлж эсэргүүцэгдэж байдаг учраас юм.

Дараа нь Есүс Христийн бас нэгэн гэрээг болон өөр судрыг илчилсэн нэгнийг, дэлхий дээр Есүс Христийн Сүм болон сайн мэдээний бүрэн байдлыг сэргээх зэмсэг болсон нэгнийг хайгаад үзээрэй. Мөн түүнтэй шударга бус харьцсан хүмүүсийг хайгаад үз. Яагаад түүнийг зүгээр байлгаагүй юм бол?

Яагаад? Яагаад гэвэл, Иосеф үнэнийг заасан. Мөн үнэн нь үргэлж эсэргүүцэгдэж байдаг учраас тэр билээ” (Лорэнс И.Корбриж, “Бошиглогч Иосеф Смит,” 2014 оны 4-р сарын Ерөнхий чуулган, 123–124).