“Lesson 10—Joseph Smith—Kasaysayan 1:27–65—Nagpakita si Moroni kay Joseph Smith,” Manwal ng Titser ng Seminary para sa Doktrina at mga Tipan (2025)
“Joseph Smith—Kasaysayan 1:27–65,” Seminary para sa Doktrina at mga Tipan
Lesson 10: Doktrina at mga Tipan 2; Joseph Smith—Kasaysayan 1:27–65
Joseph Smith—Kasaysayan 1:27–50
Nagpakita si Moroni kay Joseph Smith
Noong Setyembre 21, 1823, nanalangin si Joseph Smith sa Diyos para sa kapatawaran ng kanyang mga kasalanan at para malaman ang kanyang katayuan sa harapan ng Diyos. Bilang tugon, nagpakita ang propetang si Moroni kay Joseph Smith para ituro sa kanya ang tungkol sa Aklat ni Mormon at mga sinaunang propesiya tungkol sa Pagpapanumbalik ng ebanghelyo. Nagpropesiya rin si Moroni tungkol sa hinaharap ni Joseph. Ang lesson na ito ay makatutulong sa mga estudyante na madama ang kahalagahan ng pagtawag kay Joseph Smith bilang propeta ng Diyos.
Mga Posibleng Aktibidad sa Pag-aaral
Inilarawan ni Joseph Smith ang kanyang kabataan
Upang maihanda ang mga estudyante na malaman ang tungkol sa mga karanasan ni Joseph Smith noong kanyang kabataan, maaari mo silang anyayahang magbahagi ng mga salitang naglalarawan sa mga teenager. Ang isa pang opsiyon ay magpakita ng mga salita at parirala sa pisara na naglalarawan kay Joseph Smith noong kanyang kabataan. Halimbawa, “Madalas [akong makadama ng pambabatikos] dahil sa aking kahinaan at mga kamalian.” Maaaring maglagay ang mga estudyante ng tsek sa tabi ng mga nauugnay sa kanila.
Maaari mong hikayatin ang mga estudyante na hanapin ang mga kahulugan ng mga salita sa sumusunod na scripture passage na hindi nila nauunawaan. Ang feature na ito ay available sa Gospel Library app. I-highlight ang salita at piliin ang opsiyon na “define.”
Basahin ang Joseph Smith—Kasaysayan 1:27–29, at alamin kung paano inilarawan ni Joseph Smith ang kanyang nadama sa loob ng tatlong taon pagkatapos ng Unang Pangitain.
-
Paano maaaring makaugnay kay Joseph Smith ang mga kabataan sa ating panahon?
Ang Diyos ay may gawain para kay Joseph Smith
Ang susunod na set ng mga talata ay isang mas malaking block ng teksto na babasahin. Isipin ang mga pangangailangan at kakayahan ng iyong mga estudyante kapag pumipili ng paraan ng pagbabasa. Maaari kayong magbasa bilang isang klase (na naghahalinhinan sa pagbabasa ang mga estudyante), magpabasa sa mga estudyante nang may ka-partner, o i-play ang audio at sabihin sa mga estudyante na sumabay sa pagbasa sa kanilang mga banal na kasulatan.
Pagkatapos ng unang tanong, maaari kang tumigil sandali para talakayin ang natuklasan ng mga estudyante na makatutulong sa kanila sa kanilang mga karanasan bilang teenager.
Basahin ang Joseph Smith—Kasaysayan 1:30–35 at alamin ang naranasan ni Joseph Smith nang manalangin siya.
-
Ano ang naranasan ni Joseph na maaaring nagbigay sa kanya ng pag-asa?
-
Anong mga katotohanan ang matututuhan natin mula sa mga talatang ito tungkol kay Joseph Smith?
Maaaring tumukoy ang mga estudyante ng iba’t ibang katotohanan, kabilang na ang pagtawag ng Diyos kay Joseph Smith upang gawin ang Kanyang gawain. Maaari mong ipaliwanag sa mga estudyante na bagama’t nadama ni Joseph Smith na binatikos siya dahil sa kanyang mga pagkakamali at kasalanan, taos-puso siyang humingi ng kapatawaran, at tinawag siya ng Diyos sa Kanyang gawain.
Noong gabi at umaga ng Setyembre 21–22, 1823, nagpakita si Moroni kay Joseph nang tatlong beses. Ibinahagi niya ang parehong mensahe at binanggit niya ang parehong mga banal na kasulatan sa bawat pagkakataon (tingnan sa Joseph Smith—Kasaysayan 1:36–50).
Upang matulungan ang mga estudyante na makita ang mga halimbawa ng gawain na isasakatuparan ng Diyos sa pamamagitan ni Joseph Smith, maaari mong hatiin sa mga miyembro ng klase ang mga sumusunod na propesiyang binanggit ni Moroni. Sabihin sa mga estudyante na basahin ang mga talata, at alamin kung paano nauugnay ang mga ito sa gawaing ipinagagawa kay Joseph.
Basahin ang mga talatang ito at alamin kung bakit ang mga propesiyang ito ay magbibigay kay Joseph ng karagdagang pag-unawa tungkol sa gawaing gagawin niya.
-
Paano nauugnay ang mga talatang ito sa gawaing ipinagawa ng Panginoon kay Joseph?
-
Paano mapapalakas ng mga propesiyang ito ang inyong patotoo tungkol sa banal na tungkulin ni Joseph?
Habang binabasa ang mga talatang ito, maaaring mapansin ng mga estudyante na tinawag ng Panginoon si Joseph Smith upang tumulong sa paghahanda ng Kanyang mga tao para sa Kanyang Ikalawang Pagparito sa pamamagitan ng Pagpapanumbalik ng ebanghelyo, na kinapapalooban ng pagpapanumbalik ng kapangyarihang magbuklod at mga ordenansa sa templo, pagtitipon ng Israel, at pagbuhos ng iba pang mga espirituwal na pagpapala.
-
Paano nakaimpluwensya ang gawaing naisagawa ng Diyos sa pamamagitan ni Joseph Smith sa nalalaman o nadarama ninyo tungkol kay Jesucristo? (Tingnan sa 2 Nephi 3:6–8, 11; Doktrina at mga Tipan 135:3.)
Ang pangalan ni Joseph Smith ay magiging mabuti at masama sa usap-usapan ng lahat ng tao
Ituon ang pansin ng mga estudyante sa propesiya ni Moroni tungkol sa pangalan ni Joseph Smith sa Joseph Smith—Kasaysayan 1:33. Talakayin kung ano ang maaaring nadama ni Joseph tungkol sa propesiya at mga paraan na natutupad ito ngayon. Tulungan ang mga estudyante na makita na ang katuparan ng propesiya ay katibayan ng pagtawag kay Joseph Smith bilang propeta ng Diyos.
-
Sa inyong palagay, bakit maraming oposisyon kay Propetang Joseph Smith?
Itinuro ni Elder Neil L. Andersen ng Korum ng Labindalawang Apostol:
Bakit tinutulutan ng Panginoon na pagsalitaan ng masama ang mabubuti? Ang isang dahilan ay itinutulak ng oposisyon laban sa mga bagay ng Diyos ang mga naghahanap ng katotohanan na lumuhod [at] [m]analangin para sa mga sagot. …
Ang negatibong komentaryo tungkol kay Propetang Joseph Smith ay madaragdagan pa habang papalapit ang Ikalawang Pagparito ng Tagapagligtas. Ang mga katotohanang may halong kasinungalingan at panlilinlang ay hindi mababawasan. May mga kapamilya at kaibigan na mangangailangan ng tulong ninyo. (Neil L. Andersen, “Joseph Smith,” Liahona, Nob. 2014, 28, 30)
-
Paano makatutulong na malaman na ipinropesiya ni Moroni na magkakaroon ng mga kritiko na magsasalita ng “masama” tungkol kay Joseph Smith?
-
Ano ang magagawa natin para maging handa sa pagtulong sa mga taong maaaring makaranas ng oposisyon sa kanilang paniniwala kay Joseph Smith?
Pagtupad sa propesiya na magsalita ng mabuti tungkol kay Joseph Smith
Si Elder Neil L. Andersen ng Korum ng Labindalawang Apostol ay nagbigay ng partikular na paanyaya sa mga kabataan ng Simbahan:
Sa mga kabataang nakikinig ngayon o nagbabasa ng mga salitang ito, may hamon ako sa inyo: Magkaroon ng sariling patotoo tungkol kay Propetang Joseph Smith. Hayaan ang inyong tinig na makatulong sa katuparan ng propesiya ni Moroni na magsalita ng kabutihan tungkol sa Propeta. (Neil L. Andersen, “Joseph Smith,” Liahona, Nob. 2014, 30)
-
Ano ang mga paraan na makatutulong kayo sa katuparan ng propesiya ni Moroni na magsalita ng kabutihan tungkol kay Joseph Smith?
Upang matulungan ang mga estudyante na makita ang mga halimbawa kung paano nangusap ang Tagapagligtas ng mabuti tungkol kay Joseph Smith, maaari mong hatiin ang mga sumusunod na scripture reference sa mga estudyante: Doktrina at mga Tipan 1:17; 35:17; 112:15; 136:37–38. Sabihin sa ilang estudyante na ibahagi ang sinabi ng Tagapagligtas tungkol kay Joseph Smith.
Sabihin sa mga estudyante na gumawa ng isang bagay sa klase na makatutulong para maisakatuparan ang propesiya ni Moroni na magsalita ng mabuti tungkol kay Joseph Smith. Halimbawa, maaari nilang ibahagi kung paano nakatulong sa kanila si Joseph para malaman nila ang tungkol kay Jesucristo o ang iba pang mga paraan na nakaimpluwensya si Joseph Smith sa kanilang buhay sa kabutihan. Maaari ding anyayahan ang mga estudyante na magpadala ng mensahe sa pamamagitan ng text o social media sa isang tao sa labas ng klase.